وتتوالى الصدمات


سلامو عليكو

كل صدمة وانتو طيبين

يمكن اسعد صدمة بقابلها اليومين دول هى صدمة الاهلى فى نفسه :D
بقاله 4 ماتشات مش عارف يكسب يا عيني
ونزيف النقاط مستمر
والناس مش مصدقة نفسها
يا ترى هترسي علي ايه!!

على جانب اخر بقي

مش عارف هفضل لحد امتى اسامح
واعدى واعمل نفسي مش واخد بالى

لحد امتى لازم اخبي ناحية من قلبي وابص للناحية اللى بتقولى انت محقوق

لحد امتى هتفضل الناس متقدرش بعضها

يعنى انا كنت بقول كتير ان كل واحد ليه طاقة

بس مين فينا سوبر مان
ولا مين فينا طاقته infinity

مهو لازم الانسان يتأثر
ولازم الانسان يتعب وتيجي عليه فترة ميقدرش يقاوم

لازم الانسان يحصله overflow
:D

وبجد كل يوم الواحد بياخد صدمة جديدة
والله لو بعمل البوم اجمع فيه الصدمات
كنت عملت مكتبة :D

وعلى الرغم من كده بردو بهزر وبضحك
ومبشكيش همى لحد وببان ادام الناس الايزي الفريش اللى عايش الدنيا بالطول وبالعرض
وضارب الدنيا مية شوز

مهو لو معملتش كده هطق وهموت
وارحل غير مأسوف عليا :)

بجد نفسي اعيش فترة كده من عمرى اقول دى مفهاش مشاكل

نفسي الاقى معاملة من الناس زى اللى بعاملهم بيها بس
مش عايز اكتر من كده

لكن متبقاش ملهوف ع الناس وخايف عليهم
وبتحاول تعمل اى حاجة عشان تسعدهم
واوقات كتير تدوس على نفسك عشان تبقي فى نظرهم الانسان اللى هما محتاجينه

وفى الاخر تلاقي رد فعل غير اللى انت مستنيه خالص

يمكن فى موضوع الاسئلة اللى كنت عامله ده
كنت اتسئلت ايه الحاجة اللى نفسك تتخلص منها
وانا قلت انى ماستناش حاجة من حد انا بديهاله

نفسي اعيش حياتى one way

بس بردو مين فينا نبي ولا ملاك

يفضل يدي يدي وميستناش مقابل

كلنا انسان :)

بجد محتاج اعمل لنفسي reset
ارجع نفسي لل default

اشوف ايه اللى ممكن ينفعنى وايه اللى ممكن يتعبني

واعيش حياتى من اول وجديد

واى حد محتاج يعمل كده

بس للاسف زى ما بيقولو ان العشرة متهونش الا ع التيت :)

ربنا يتولانا برحمته

الى ان نلتقي مع صدمة جديدة
ابقو معنا :)

18 Comments:

  1. ShiMOo said...
    بالنسبه للاهلي
    بصراحه بقى دي الحاجه الوحيده اللي فرحتني
    في الكام يوم اللي فاتوا p-:
    شمتانه فيهم اووووووووووي D:
    مع اني "زملكاويه"
    بس فرحت لما الاسماعيلي كسب الزمالك
    واخد الـ 3 نقط انهارده
    ماهو المثل بيقول ...
    انا واخويا على ابن عمي
    وانا وابن عمي على الغريب" D:


    //بجد نفسي اعيش فترة كده من عمرى اقول دى مفهاش مشاكل
    نفسي الاقى معاملة من الناس زى اللى بعاملهم بيها بس
    مش عايز اكتر من كده//

    يـــاااااااااااااااه
    حلم بعيد اووووووووي بحلمه بقالي فتره
    ومتأكده انه مش هيتحقق
    ومع ذلك مبطلتش احلمه برده :)
    olivetree said...
    بعيدا عن موضوع الاهلى دا لانى مش هتكلم فيه
    بس الموضوع جميل قوى دا انت مفجر كل حاجة فى شويه كلام بسيط
    احنا بشر وبنحتاج للكلمه الحلوه فى كل وقت دا مش ضعف دا بيبقى احتياج داخلى للكلمه دى انها تتقال ويا جمالها لو كانت من حد قريب منك تحسها منه اكتر ,,,, العطاء مش شىء وحش نهائى بالعكس خليك كدا على طول وصدقنى لو اتجرحت مره هتلاقى مليون واحد بعد كدا يداويك وهتحس ان الدنيا بخير مش تتستلم ولا تقول ان الناس كلها وحشه خلي عندك امل ولو بسيط جدا وان شاء الله ربنا يعوضك.
    موضوع انك بتضحك على طول وبتحاول تبين انك مش تعبان فدى حاجة انا ممكن احسدك عليها(همسك الخشب).
    مينفعش تعيش حياتك وان واى ومش تقبلك فيها صدمات وتتعب وترجع الطريق تانى من اوله لازم دا يحصل خلى نفسك طويل وسبها على ربنا ولو حاسس انك مظلوم او حد تعبك قول يارب وربنا ان شاء الله ينورلك طريقك وتعرف بعد كدا تختار كويس وميحصلش اى تعب تانى ولو حصل انت قدها يا باش مهندس.
    موضوع ان العشره مش بتهون دى لا بتهون على بعض الناس لما بتلاقى حد احسن ساعات بتهون وبيقدر ينسى اى حاجة حلوه حصلت ما بينكم الدنيا فيها الوحش وفيها الحلو وخليك دايما حلو فيها للاخر

    يااااااااااة انا رغيت كتير اوى بس يلا معلش
    سلام
    tota said...
    ياااااااااااااه

    انت تقريبا قلت حاجات كتير كلنا محتاجنها من اصحابنا من اللي بنحبهم من الدنيا

    تقريبا الفيرس ده بقي منتشر
    والظاهر ان ناس كتير المفروض تعمل اسكان

    انا مش هقدر اقول نصيحه لاني لغايه دلوقتي موصلتش لحل ولا مبرر للي بيحصل معانا ولا اللي بيحصل حوالينا..
    هو ده بقي حال الدنيا

    خلينا نحلم...في حاجات كتير مش هنشوفها غير في الاحلام

    الواقع بقي مستحيل خلااااااااص
    بس ارجع اقول
    "نعيب زماننا والعيب فينا وما لزماننا عيباً سوانا"
    mo7mad sala7 3rafa said...
    بالنسبه لموضوع الاهلي
    فده عادي
    ان الزملكاويه يفرحوا عشان الاسماعيلي كسب
    مش غريبه علي جماهير الزمالك

    ولاني اهلاوي (متشدد كمان) بس عندي روح رياضيه وعادي يعني ده يكسب او ده يخسر

    وبعدين دوري مصري مين اللي بتتكلموا فيه
    في حاجه اسمها دوري ابطال اوربا والدوري الانجليزي لو تسمعوا عنهم

    هي دي الحاجه اللي الواحد يتفرج عليها\\\\\\

    بالسبه للموضوع التاني
    اصطوبور يعني اصبر عليه لغيت بكره
    لما اخلص لك الميد تيرم
    وابقي اعلقك
    قصدي اعلق عليك
    لاء
    اعلق لك
    يوووووووة مش مهم
    المهم هبقي اسيب تعليق
    س ل ا م ي
    a7mad sala7 said...
    ShiMOo

    //شمتانه فيهم اووووووووووي D://

    تؤتؤ تؤتؤ
    لا يا شيمو لا
    مش اخلاقنا دى ابدا
    احنا ندعيلهم ربنا يقومهم بالسلامة
    وينشلهم من الوكسة اللى هما فيها دى
    :))

    وعلى راى مختار
    قلبي معاكو يا اهلاوية =))

    //بس فرحت لما الاسماعيلي كسب الزمالك
    واخد الـ 3 نقط انهارده//

    طبعا امال ايه
    الفرق لبعضيها برضو

    //انا واخويا على ابن عمي
    وانا وابن عمي على الغريب" D:
    //

    صح كده
    والماتش الجاى الاسماعيلي هيلعب فى بنها
    عايزين نشوف كرم الضيافة بقي ;;)

    //يـــاااااااااااااااه
    حلم بعيد اووووووووي بحلمه بقالي فتره
    ومتأكده انه مش هيتحقق
    ومع ذلك مبطلتش احلمه برده :)//

    اه
    ولو بطلنا نحلم نموت
    هاءاااااااو :)
    a7mad sala7 said...
    olivetree

    =D> =D> =D> =D

    بجد ماقدرش اقول اى حاجة بعد الكلام ده

    واكيد الرد غطى على البوست :D

    بس ليا اضافة صغيرة

    مينفعش الانسان يفوق من صدمة على صدمة تانية
    وكل يوم صدمة جديدة
    زى البرنامج اليومي فى التليفزيون
    دا حتى البرامج ليها يوم اجازة

    والادهى من كده
    لما حد يكدب عليك كدبة وييجي يصلحها
    يكدب كدبة غيرها
    يبهدل الدنيا اكتر
    وكانك عيل صغير المفروض تصدق كل اللى بيتقالك

    بجد زى ما قلت قبل كده
    اكتر حاجة تجننى فى الدنيا ان حد ياخدنى على اد عقلي

    نورتينا يا فندم :)
    a7mad sala7 said...
    tota

    //خلينا نحلم...في حاجات كتير مش هنشوفها غير في الاحلام//

    طب واللى مبيعرفش يحلم!!!
    دا يعمل ايه بقي

    انا انسان واقعى جدا
    وبؤمن جدا ان 1+1=2

    مينفعش يبقي فيها كسور

    وان زى ما في input
    لازم يبقي فى output

    لنا الله

    البوست المرادى مختلف جدا
    اكيد بزيارتك للبلوج لاول مرة :)
    a7mad sala7 said...
    mo7mad sala7 3rafa

    غريبة مش غريبة
    خليك فى حالك انت واللى زيك :-p

    انتو مش فريق بطل؟؟
    يبقي تكسبو ماتشاتكو وملكوش دعوة بحد

    وزى ما بتلمو لعيبة مصر كلها
    ومش عايزين حد يقولكو انتو بتعملو ايه
    يبقي كل فريق يخليه فى نفسه والنبي
    ها


    وبعدين انت مش قلت هغيب عشان الميد تيرمات
    اللى جابك تانى
    ولا سيرة الاهلى بتنرفزك اوى كده :))
    ShiMOo said...
    //والماتش الجاى الاسماعيلي هيلعب فى بنها
    عايزين نشوف كرم الضيافة بقي ;;)//


    لااااااااااااا كرم ضيفاة ايه بس !!!
    البلد بلدكوا والاستاد بتاعكوا D:

    ده حتى الدنيا واقفه من دلوقتي
    وكل ما تسأل حد هو ايه اللي بيحصل !!!
    يقولك اصل الاسماعيلي جاي يلعب في الاستاد
    هههههههههههه

    ده اول تدريب للاتصالات على الاستاد
    كانت بنها مقلوبه والاستاد على اخره
    اومال لما الاسماعيلي ييجي ايه اللي هيحصل !!!!

    استرهـــــا يــارب :(
    a7mad sala7 said...
    ShiMOo

    اهو
    شفتو بقي

    عشان تعرفو ان الاسماعيلي بيجزب الانظار اينما كان ;;)
    mo7mad sala7 3rafa said...
    قبل ما اعلق ع الموضوع اللي مش عارف اعلق عليه من زمان
    احب اعلق علي كلام الناس هنا
    وخصوصا
    Tota
    اسمح لي طبعا أحمد صلاح
    كلامك //
    انا مش هقدر اقول نصيحه لاني لغايه دلوقتي موصلتش لحل ولا مبرر للي بيحصل معانا ولا اللي بيحصل حوالينا..
    هو ده بقي حال الدنيا ///
    اقولك انا النصيحه يا محترمه
    كل اللي الشباب فيه والعالم كله فيه دلوقت سببه حاجه واحده بس
    وخديها مني ومتسمعيش من غيري
    السبب هو
    البعد عن الله
    اكبر كارثه الناس بتقع فيها وبتسال احنا ليه بقينا كده
    ما انت بعيد عن ربنا دايما هتلاقي الدنيا غامقه اوي
    استحاله تلاقي حد بيصلي الصبح ويقول اذكار الصباح ويمشي يستغفر ربنا وهو رايح الكليه
    وتلاقي يومه وحش
    او يحس باللي احنا بنحس بيه
    استحاله تلاقي واحد بيصلي ركعتين قبل ما ينام ويقول اذكار المساء
    وينام يحلم بكوابيس
    انا مبقولش كده عشان اقول لحد انه مش ملتزم او اني انا احسن منكم وبعمل كده
    بالعكس انا اكتر واحد بيجيله كوابيس في الدنيا دي
    بحس ان انا صاحي وانا نايم

    بلاش اتكلم
    بس يكفيكي ان تعلمي ان البعد عن الله
    والبعد عن صواب الطريق هو السبب الفعلي وراء اي مشكله


    وبالنسبه للاحلام
    عادي جدا لازم طبعا كله يحلم
    بس بجد الحقيقه احسن من الاحلام ع الاقل الحقيقه بتعلم انما الحلم ....

    لا تعليق اكثر من ذلك

    =============
    نروج بقي لتعليق احمد صلاح
    ازاي يا بشمهندس تقول 1+1=2 يا اخي مش مكسوف من نفسك
    ايش حال لو مكنتش في تالته حاسبات
    1+1=0 ومعانا 1 ده اللي الحياه فعلا علمتهولي
    والجدع اوي اللي يفهم قصدي

    يا رب مكونش رزلت عليك
    ولا رزلت عادي يعني البلوج بتاعتنا
    ومحدش يقدر يتكلم
    حتي لو كان اسمعلاوي

    انتظروني وتعليق ارزل من ده
    س ل ا م ي
    a7mad sala7 said...
    mo7mad sala7 3rafa

    //بلاش اتكلم
    بس يكفيكي ان تعلمي ان البعد عن الله
    والبعد عن صواب الطريق هو السبب الفعلي وراء اي مشكله//

    دا اللى اسمه اجمال بعد تفصيل
    اكيد كلامك صح
    ونعم بالله

    بس احنا مش بنكلم عن مشكلة للانسان فى شخصه

    احنا بنتكلم عن معاملة الناس للشخص نفسه
    ودا اللى متقدرش تتحكم فيه

    بمعنى ان الانسان لو ملتزم جدا وعارف ربنا كويس اوى مفيش مانع انه يواجه ناس تنغص عليه عيشته وتأذيه فى حياته
    دى ملهاش علاقة بدى

    //ازاي يا بشمهندس تقول 1+1=2 يا اخي مش مكسوف من نفسك//

    اطلاقا
    ولو ليها حل غير كده
    ورينا يا عم الفيلسوف
    روح بلا فرح (روان) said...
    سلام عليكم الاول
    عمرك يا بشمهندس مهتقدر تتحكم فى معاملة الناس ليك
    بنحب ناس كتير و نضحى بحاجات كتير علشانهم و فجأه ...........
    طبعا ممكن كل واحد يتخيل اللى بيحصل
    كدب , نفاق , خداع ,اهتمام مزيف
    خيانه , فراق...........الى ما لا نهايه
    علشان كده بتلاقى كل مده ناس من اللى بيواجهوا الحاجات دى و اولهم انا بيبعدوا عن العالم عارفه ان ده غلط بس اعمل ايه مبقتش مستحمله
    لما تحب ناس قوى و فجأه تتجرح و تلاقى اللى جرحك اقرب الناس ليك
    و تفكر تشكى لحد هتشكى لمين
    المفروض لما بتكون مخنوق بتقول لصديقك هههههههه بس هم فين الاصدقاء و هتشكى ازاى و هم اللى جرحوك
    كلام كتير فى القلب خلى القلب خلاص فاضى
    ياما سكنه حب الناس و العمل لمصلحتهم من غير مقابل بس دلوقت القلب غير الساكنين اللى فيه
    بقى يسكنه على رأى الشعر بتاعى
    القلب الخالى يسكنه
    حزن الام حرمان
    هتفضل طول عمرك تدور على اجابه للى بيحصل بس مش هتلاقيها
    على رأى الشاعره رونه (أنا يعنى)
    ان حزن القلب فلا تسأل
    هل يجيب الألم الوجدان
    لا تخش الجرح و لا تبحث
    داخل قاموسك عن انسان
    مش انت لوحدك اللى بتحاول تضحك و تبين انك فرحان علشان تخبى حزنك
    ما انا كمان بعمل كده
    و فى الاخر لما متقدرش تتحكم فى ده و يبان عليك انك شايل هموم الدنيا كلها محدش بيقولك انت زعلان ليه و لو حد عبرك يقولك سيبه ده بحالات و عنده شعره ما هو كان دلوقت فرحان و بيضحك ده عامل الشويتين دول علشان نعبره
    و لا يقولولك هتزعل من ايه دى الحياه فله يعنى انت لوحدك اللى بتزعل ما كلنا كده
    هو بجد احنا كلنا كده
    ؟
    الله اعلم
    اللى اعرفه ان دوام الحال من المحال
    و اللى فرحان هيزعل
    و اللى زعلان .......... ربنا يتولاه
    سلام علشان انا طولت قوى عليكم
    ShiMOo said...
    روح بلا فرح (روان)

    ايه اللي هببتيه ده يابنتي !!!
    حرام عليكي
    ده انتي جبتي لامة لا اله الا الله
    اكتئاب مزمن
    بالكلمتين دول :(( :((
    طيب يعني الناس مخنوقه هدي شويه
    مش كده ;)
    a7mad sala7 said...
    هههههههههههههههههههههههههه


    ربنا يتولانا برحمته
    روح بلا فرح (روان) said...
    و الله يا شيمو لسه مش الأمه كلها شويه بس
    و بعدين مش اكتئاب مزمن و لا حاجه ده حاجه خفيفه كده محدش لسه انتحر بسببى يعنى
    و اضحك يا احمد براحتك
    ما هو شر البلية ما يضحك
    و بتتريق على الغلبانه المسكينه (انا يعنى)
    حرام عليك
    الله يسامحك
    سلام بعيط (كده و كده ما تصدقش)
    a7mad sala7 said...
    روح بلا فرح

    ههههههههههههههههههه
    ايه بلاش اضحك ولا ايه؟؟

    انا بضحك على تعليق شيمو

    //سلام بعيط (كده و كده ما تصدقش)//

    مانا مش هصدق ;;)
    روح بلا فرح (روان) said...
    ايه ده مش مصدقنى
    الله يسامحك
    طيب انا هعيط بجد
    واء واء
    اهو عيطت اهوه
    سلام
    نتقابل فى صدمه تانيه ان شاء الله

Post a Comment



رسالة أحدث رسالة أقدم الصفحة الرئيسية

Blogger Template by Blogcrowds