اهلا يا ريس

بعيدا عن البوست اللى فات
لازم لما يحصل حدث فريد كده لازم يتسجل

النهارده الخميس
ال اي هيا اخويا وال ايه ياختى
قررت انى اروح الجامعة
طبعا هتقولى ايه الغريب فى كده
لا غريب
انا تقريبا من ساعة ما عرفت الجامعة دى مروحتش 5 او 6 خمايس على بعض
دا غير ان السبت اجازة اصلا

لا وايه رايح احضر سيكشن
يعنى انا اصحى بدرى وانزل من بيتنا عشان سيكشن
هو ايه اللى جرا فى الدنيا
الفرخة كلت بيضها :D

تقوم تشاء الاقدار ان النهارده مين عندنا فى اسماعلياااااااااا
السيد الرئيس
الزعيم والقائد والاسطورة

قالك بمناسبة عيد تحرير سينا
أو بمناسبة افتتاح وحدة سكنية جديدة فى مدينة المستقبل
فى روايتين
مش متأكد بصراحة ايهم الصح
ما علينا

ان السيد الرئيس محمد حسنى مبارك عندنا فى اسماعلية
وموجود فى استراحة الجلاء هنا

ايه بقي المشكلة فى كده
المشكلة يا سيدي ان معظم مداخل ومخارج المحافظة مقفولة

الحركة داخل البلد بحساب

الناس بقي اللى بتيجي من سفر دى كلها مش مهم مصيرها ايه
ولا الناس اللى وراها اشغالها دى تتحرك ازاى

طبعا الناس اللى جاية بالقطر نزلوهم فى السكة
ويكملو هما
ييجو ازاى بقي دى مش مشكلتهم

الناس اللى جاية مواصلات
كل 10 متر نقطة تفتيش
وبهدلة وقلة ادب

حتى جوا البلد طالعين من الجامعة مفيش تاكسي واحد موجود
واى حد يحاول يقف ادام الجامعة الامن يمشيه
ومش مهم الناس دى تروح بيوتها ازاى
صباح العطلة :L

هنا تتفرج على ايفيهات الشعب المصرى بقي
طلعت شبطت فى تاكسي بالعافية جه وقف فلتة كده
امن الجامعة شافه طبعا قاله محدش يقف هنا
الراجل قاله امال اقف فين يا عم
قاله اقف بعيد
انا رحت قايل للراجل طبعا اصل النهارده فى كذا كذا
الراجل السواق راح قايله يا عم ابعدو عننا بقي
يعنى حسنى مبارك هيأكلنى ويشربني
هههههههههههههههه

المهم ان اللى نتج عن كده
ان النهارده كل المعيدين اللى بييجو من سفر معرفوش ييجو طبعا
والسيكشن اللى كان عندى اتلغى :D

شفتو بقي
ادى لما فكرت انى اروح الجامعة عشان سيكشن
عشان لما ابقي اقولكو محدش يدي الدراسة اكتر من حقها تبقو تصدقونى :-p

نرجع لموضوعنا
يعنى عشان سيادته ييجي يحضر احتفال ولا افتتاح
يوقف المواصلات
ويعطل الدنيا
ويبهدل الناس

طب لما هو كده
ميعملوه اجازة طيب
ويبقي عيد يوم الريس
:D

لا وايه
اليفط واللافتات فى كل حتى
اهلا بالزعيم
اهلا بقائدنا ورئيسنا حبيبنا

وطبعا الامن مستتب
وكل على ما يرام
ومنضفين الشوارع الرئيسية
ومصنفرين الدنيا
فكرونى بفيلم جواز بقرار جمهورى :D

كدب فى كدب
وكله ضحك ع الدقون

وكل سنة وانتى طيبة يا سينا

مع انه مبقتش تفرق سينا من سونيا

اقعدو بالعافية

12 Comments:

  1. دريم كبير said...
    هههههههههه

    مش هقوللك الا بلاش كلام في السياسه

    عداد عمرك مش ناقص كافيه انه ماشي 19 سنه وبيكح اهو :P

    وبعدين انت حد قاللك تروح اليوم ده مش قلت متديش الدراسه اكتر من حجمها

    على اخر زمن بقينا بنيجي يوم الخميس ههههههههه

    ناس معندهاش بلود
    a7mad sala7 said...
    دريم كبير

    يا لهوى
    انا كتبت الموضوع دا ازاى

    وانا اقول النت فصل ليه
    اتاااااااااارى
    هههههههههههههههههههههه
    e_emy said...
    ههههههههههه

    انت مش واخد بالك دول كانوا منضفين الشوارع علشان عارفين انك رايح الجامعهP:

    ومفيش تاكسيات .. عاوزينك تتبهدل علشان تجرب البهدله بتاعت البشر العاديه الى بيروحوا الجامعه كل يوم
    حتى السبت )):

    كل سنة وانت طيب (:
    a7mad sala7 said...
    e_emy

    ااااااااه

    وانا اقوووووول ;;)

    لا بس ماتلبهدلتش الحمد لله
    بعرف اتصرف :D

    وللعلم كمان

    عشان السبت اجازة رسمي عندنا
    احتمال يدونا الحد مكانه كمان :-p
    ShiMOo said...
    ده انت تحمد ربنا انها جت على قد يوم واحد :((
    غيرك بقى في العذاب ده كل يوم
    ومن غير زيارة المحافظ حتى D:
    ده بالنسبه لينا بقى العادي يعني :(


    اممممممممم الاغنيه اللي فاتت كانت احلى :(
    بصراحه "لو قادر" الاغنيه الوحيده اللي مش بحبها لعمرو D:
    MOROOOO said...
    ههههههههههه
    ولا تزعل نفسك
    ربنا يقلل من زيارات الريس ليكم
    وبلاش كلام فى السياسه
    a7mad sala7 said...
    ShiMOo

    اه يوم واحد

    بس كان يوم خميييييييس
    خمييييييييييييييس
    وخامس مرة اروح السنادى
    ها
    هههههههههههههههههههههههه

    انا عارف ان انتى مش بتحسدي
    :D

    وبالنسبة للاغنية انا زهقت منها بردو :D

    بس عمرى مازهق من عمرو طبعا :)
    دا نمبر وان

    يو ار ويلكمد شيمو :)
    a7mad sala7 said...
    MOROOOO

    ههههههههه
    يالا بقي خليها علينا :D

    دا الريس ينور فى اى وقت

    وبعدين فين السياسة دى
    هو انا جبت سيرة سياسة
    ها؟

    ربنا يجعل كلامنا خفيف عليهم :D

    منورانا النهارده :)
    ShiMOo said...
    //يالا بقي خليها علينا :D
    دا الريس ينور فى اى وقت//

    يا نهـــــــــار
    لالالا مش من قلبك دي على فكره
    بقى في حد يقول كده ع الريس بتاعه
    اللي بيأكله وبيعلمه وبيعالجه
    وهيشغله "عديها دي" !!!
    لالالالا مكنتش اتوقع منك حاجه زي دي ابداااااااا يا احمد
    بجد يا خسارة خيبت ظني فيك :)
    يالا بسرعه صلح غلطتك وادعيله أوام

    "اللهم كتر فيتاميناته"
    هههههههههههه

    اسمع دي بقى D:

    http://www.youtube.com/watch?v=50Sd9Mnnvrc
    a7mad sala7 said...
    ShiMOo

    ههههههههههههه
    والله توقعت الفيديو انه يكون ده :D

    //اللي بيأكله وبيعلمه وبيعالجه
    وهيشغله "عديها دي" !!!//

    ههههههههههههههه
    اهو انا مصدقش كل اللى قلتيه واصدق الاخيرة دى :D
    هو فى اكتر من كده شغل
    دانا بجرى على كارنيه القهوة من دلوقتى
    >>احجز مقعدك من الان ههههههههه

    //لالالالا مكنتش اتوقع منك حاجه زي دي ابداااااااا يا احمد
    بجد يا خسارة خيبت ظني فيك :)//

    [-(
    اعمل ايه بس
    المعتقل وحش يا شيمو
    ومش عيب ان الواحد يغلط
    وهو الشعب المصرى كده بيحب يتكلم كتير
    بس الريس قلبه كبير وهيسامحنى انا عارف
    هههههههههههههه

    //يالا بسرعه صلح غلطتك وادعيله أوام//

    طبعا ادعيله
    دا بيركب ببلاش :))

    اللهم اطحن الزعيم
    واديله على اد نيته قاادر يااا كريم
    :D

    >>لو غبت عن البلوج دا اكتر من 3 ايام
    اعرفو انى فى زيارة للمعتقل :D
    ShiMOo said...
    افتكرت كلمة كان حد قلهالي قبل كده D:
    "شخبطته سعادته
    "الريس طبعا هو في سعادته غيره"
    تخطيط لمستقبل البلد
    ههههههههههههههه
    لا وونعم التخطيط
    "خطه فظيــــــع ما شاء الله عليه"
    "عمال يخطط بقاله فوق الـ 20 سنه"
    ده خلص كشــــــــاكيـــــــــل
    ههههههههههههههه


    //لو غبت عن البلوج دا اكتر من 3 ايام
    اعرفو انى فى زيارة للمعتقل :D//

    عادي عادي كله يهون في حب مصر P-:
    وبعدين انا شكلي هاجي معاك بعد الكومنت ده :(


    معلش بقى اتلخبطت فمسحت الكومنت اللي فات :(
    a7mad sala7 said...
    ShiMOo

    دا اكتر حاجة عملها التخطيط
    حتى الحبر بردو بقي فى ازمة :D

    ومحدش فينا هيتاخد ان شاء الله
    الريس قلبه كبير
    وعارف ان دى شقاوة شعب :D

Post a Comment



رسالة أحدث رسالة أقدم الصفحة الرئيسية

Blogger Template by Blogcrowds