ساعة صفا


مدونيني مدوناتى
اهلا وسهلا بكم
نورتو بلوجنا المتواضع

انه فى تمام الساعة الخامسة الا الربع تقريبا
بعد الفجر كده
والجو صااافى والدنيا هدوء
حيث يصاب الجميع بالنوم :D
وانا قاعد رايق كده
بحب المود دا اوى

جاتلى فكرة كده
زى متقول ايه
كرسي الاعتراف

بس بطريقة تانية

كل حد هيخش يرد ع البوست ده
هيسيبلى اى 5 اسئلة يخطرو على باله
اى 5 اسئله نفسه يسالهملى
اللى عايز يزود يزود
واللى عايز يقلل براحته بردو
بس يعنى دا رينج كده

وانا باذن الله هرد على اى سؤال
من اى حد

ويا ريت ننقل الموضوع بعد ما يخلص عندى لحد تانى
ونخليها تلف علينا بقي
لو معندكوش مانع يعنى

حاجة صغيره كده:
يا ريت الاسئلة متبقاش بغرض الاحراج
ومتكونش لعب بالالفاظ
وبلاش تعقيد
اظن فاهمينى
ها ؟
;)


يالا مستنى اسئلتكو :)

Iam waiting...

26 Comments:

  1. Ahmed Gaber said...
    ابو صلاح,
    انا هابدأّ
    1. انت ايه امتر حاجه بتخليك طاير من الفرحه؟
    2. نفسك تكون ايه لما تتخرج؟
    3. لو حواليك صحابك, و حاسس انه هايجي يوم و مش هاتشوفهم ناني, هاتحس بايه؟
    4. انت ليه كتبت الموضوع ده؟
    5. ايه رأيك في نفسك؟
    mo7mad sala7 3rafa said...
    لا يا عم جابر انا اللي هبدأ
    1-ايه رأيك في احمد صلاح؟
    ده سؤال غير مقرر وانت فاهمني طبعا
    2-امتي تقول مش هعمل كده عشان كرامتي نقحت عليه؟
    3-تحب تنصح نفسك بايه وتنصح احمد صلاح بايه؟
    4-أسال نفسك سؤال وجاوب عليه؟
    5-احرج نفسك بسؤال وقول مش هقدر اجاوب؟

    يلا يا سيدي هيص في دول لما تخلص قولي وانا ابعت لك خمسه غيرهم

    ويا ريت اللي يردوا هنا بس هما اللي ليهم الحق في استعارة ذاك الموضوع

    ويكون اختيارهم باغلبية الناس
    سلامي
    ShiMOo said...
    فكره حلوه اوي :)
    بس كان نفسي ابقى اول واحده تغلس
    يلا بقى مش مشكله ملحوقه D:

    1- ايه الحلم اللي لسه محققتوش ؟
    2- مين الحد اللي انت مزعله منك وعايز تصالحه دلوقتي ؟
    3- امتى تقول لنفسك "انا غلط" ؟
    4- ايه الطبع اللي فيك ونفسك تغيره ؟
    5- حسيت قبل كده انك مضطر تتنازل عن حلم حلمت بيه ؟
    6- اكتر سؤال اتسألته في البوست ده وعجبك ؟ D:

    اتمنى اني مكنش غلست اوي يعني :)
    angel said...
    1-اوصف نفسك فى كلمتين؟
    2-ماهى اكتر حاجة بتشدك فى استكشاف شخصية معينة؟
    3-اية الشىء الى يخليك تضحك من قلبك واية هو الى يخليك تزعل من كل قلبك؟
    4-لو قالولك هتكون شخصية اى شخصية انت تختارها لمدة معين تحب تكون مين؟
    ....يالى كفاية كدا....
    a7mad sala7 said...
    يا ساتر يا رب

    دا 3 سالو فى طلعة الصبح
    امال لما الموضوع يقعد شوية :D
    انا قلت مش هيلاقي اقبال
    بس ما شاء الله
    الناس رحبت بالفكرة اهو

    طب تمام
    عموما قبل ماجاوب
    زى ما محمد صلاح قال
    الموضوع هيتنقل لحد من اللى شاركو بس

    ومحدش يكرر اسئلة يا جماعة بعد اذنكو
    اللى يسال يقرا اسئلة اللى قبله

    تمام كده نبدا على بركة الله :D
    a7mad sala7 said...
    Ahmed Gaber

    يا مراحب يا مراحب
    رجالة اسماعلية هنا
    واخواتنا الكبار
    والله البلوج ظأطط :D

    ابوحميد بدا
    يبقي ليه بوناس :D

    1. انت ايه امتر حاجه بتخليك طاير من الفرحه؟

    لما احس ان ربنا راضي عنى
    بييجي عليك فترة كده تحس انك مستريح
    بتأدى اللى عليك ناحية ربنا
    اكيد عمرك ما هتدى ربنا حقه كاملا طبعا
    بس اهو انك تحس انك عامل اللى عليك بس
    وساعتها هتحس ان انت محبوب من الناس
    لان ربنا لما بيحب عبد بيحبب خلقه فيه
    ساعتها ببقي فى قمة السعادة :)

    2. نفسك تكون ايه لما تتخرج؟

    system analyst
    يمكن دى امتع حاجة قابلتها فى الكلية دى
    تظرا لانها مكانتش طموحى اصلا
    وداخلها تقليدي كده
    لانى ملحقتش هندسة طبعا
    ويمكن دى اقرب حاجة ليها
    نص العما ولا العما كله :D
    فلما دخلت حاسبات
    قلت ادور على حاجة انا حاببها فيها
    بعيدا عن البرمجة اللى مبحبهاش خاص
    انا عامة بحب اسمع من الناس
    واحاول احل معاهم
    ومبزهقش من حد الحمد لله
    ودى نعمة من عند ربنا
    ف تلاقي اقرب حاجة لكده هى وظيفة محلل النظم

    ان لم يكن ف هناك البديل
    واللى معروف ان الاوراكل اضخم حاجة فى مجال نظم المعلومات والداتا بيز
    وانا اى اس طبعا
    فان لم يكن هنتجه للاوراكل ان شاء الله
    وفى كلام على كورس قريب
    ادعولنا كده :)

    3. لو حواليك صحابك, و حاسس انه هايجي يوم و مش هاتشوفهم ناني, هاتحس بايه؟

    عارف
    مش صحابي بس
    اى حد انا اعرفه فى حياتى
    مهما كان
    وجت لحظة فراقه
    اكتر حاجة بتأثر فيا
    هى ان انا مقصر معاه ولا لا
    انا لو من جوايا مقتنع انى مش مأثر معاه
    وان فراقنا دا بمزاجه هو
    او غظب عننا احنا الاتنين
    ف انا مش هكون زعلان
    اكيد هزعل شوية فى الاول
    بس ضميري هيبقي مستريح بعد كده
    وعلى راى مصطفى كامل
    الحياة قابل وفارق
    والحكم فيها القدر
    :D

    4. انت ليه كتبت الموضوع ده؟

    ليييييه كتبت الموضوع
    سؤال حلو
    هو اولا عشان نبقي صرحا مع بعض
    توقيت كتابة الموضوع كان هو اول الاسباب
    كنت قاعد واغزالة رايقة كده :D
    وجاتلى فكرة اننا نرجع موضوع كرسي الاعتراف ده
    منه يبقي حاجة مسلية تشيل الملل اللى عايشين فيه ده
    ومنه نعرف عن بعض شوية بدون حساسية
    عشان كده بدات بنفسي

    5. ايه رأيك في نفسك؟

    مالى يا جدعان
    دانا غلباااان والله :(
    ههههههههه
    رأيي فى نفسي
    سؤال صعب اوى على فكرة
    والمفروض انا اخر واحد اجاوب ع السؤال ده
    بس هجاوب

    انا انسان بسيط جدا
    مشاكس بطبعى
    اجتماعى الى حد ما
    مش عصبي الحمد لله
    ومش بارد فى نفس الوقت :D
    مبحبش الازى لحد

    عن اليومين دول بقي
    حاسس ان انا كسلااان اوى
    يومى مكرر ممل
    حاسس انى مقصر فى حق نفسي حبتين
    محتاج حدث مختلف عشان يغير حياتى شوية
    لان انا من الناس اللى بتتأثر بالاحداث والمواقف
    بس تأثر جانبي يعنى

    خلص الكلام
    سلام
    a7mad sala7 said...
    mo7mad sala7 3rafa

    واد يا محمد
    اقف فى طابورك ومتعملش دوشة
    وبالدور يابنى احنا مش فى فرن عيش هنا :-p

    1-ايه رأيك في احمد صلاح؟

    يمكن اسم مش موسيقي كده
    فلو ممكن نخليه احمد رمزى يبقي الذ :D

    هو طالما انت قلت مش مكرر
    يبقي اكيد تقصده من ناحية تانية
    ولا مش مقرر يعنى تقصد ملغى ولا ايه
    مش عارف قصدك والله
    عموما قول قصدك المرة الجاية

    2-امتي تقول مش هعمل كده عشان كرامتي نقحت عليه؟

    ممممممممممم
    كراامتى نقحت عليا :-?
    يمكن لما تحس انك متطفل على حد
    يعنى تبقي موجود فى حيات شخص معين
    وهو مش عايزك وانت موجود بالغظب كده
    والمشكلة الاكبر لما يكون بيحاول يبعدك عنه
    وانت مصمم تبقي فى حياته
    اكيد بقي لما احس انه بيبعدك عنه
    انا مش هفضل فى حياته
    حتى لو بداعى انى عايز احتويه والكلام ده
    الكرامة بتنأح طبعا :D

    3-تحب تنصح نفسك بايه وتنصح احمد صلاح بايه؟

    هتقولى نفسك واحمد صلاح تانى
    يابنى وضح الحتة دى
    يمكن عقليتنا موصلتلكش
    استحملنا شوية

    بس عامة انصح نفسي بايه
    انى ماستناش حاجة من حد انا بديهاله
    لانى بتعب كتير من نفسي
    احسن حاجة ان الواحد يعامل ربنا
    وميستناش مقابل من الناس
    لان الواحد لو بيعامل الناس بمعاملتهم مش هيعامل ناس كتير اوى

    4-أسال نفسك سؤال وجاوب عليه؟

    لو انت فى حاسبات غير حاسبات اسماعلية
    تحب تكون فى حاسبات ايه؟؟

    حاسبات الزقازيق :)

    5-احرج نفسك بسؤال وقول مش هقدر اجاوب؟

    ماشي يا رخم

    لو انا فى انترفيو مفاجئ
    ايه مؤهلاتك فى الكلية دلوقتى؟؟

    NO COMMENT :L
    a7mad sala7 said...
    ShiMOo

    لا هى مش غلاسة والله
    انا عامل الموضوع بمحض ارادتى :D
    ومستعد لاى اسئلة الحمد لله
    ف مش هيفرق توقيت السؤال

    نخش فى الموضوع

    1- ايه الحلم اللي لسه محققتوش ؟

    السؤال يبقي احسن
    لو قلتى ايه الحلم اللى حلمته :D
    يمكن انا انسان غريييييب جدا فى الحتة دى
    انا مش فاكر انى حلمت حلم مؤثر فى حياتى
    يعنى
    حياتى ماشية بشكل روتيني
    من صغرى وانا كويس فى المدرسة
    من الاوائل
    فمكانش ليا طموح انى اعمل حاجة تانية
    حتى لو طلعت مش الاول
    تانى او تالت او كده
    دى مكانتش حاجة تضضايقنى يعنى
    واقعد اعيط بقي واقول انا مابقاش الاول ليه والكلام ده هههههههه
    كله محصل بعضه والله

    كنت بلعب سباحة وانا صغير لحد تانية ثانوى كده
    وكنت ماشي فيها يعنى
    محلمتش مثلا انى ابقي بطل جمهورية واول محافظة ولا الكلام ده
    كنت بلعبها كترفيه

    نفس الكلام فى الكورة
    كان ممكن اكمل وابقي فى نادى دلوقتى
    وابقي كابتن احمد صلاح :D
    بس محبتش الطريق دا بردو

    لما وصلت لتالتة ثانوى
    مكانش فى حاجة بقي فى دماغى بحلم بيها
    كان اللى اسمعه ان انا علمى رياضة
    يبقي تخش هندسه
    لان احسن كلية فى المجال ده هى الهندسة
    يمكن كنت بحب الهندسة الفراغية
    فكنت عايز اخش هندسة معمارية
    او فنون جميلة عمارة
    اهى الحاجة اللى ممكن ابقي كويس فيها يعنى
    ومحصلش نصيب
    تكملة للروتين
    دخلت الكلية اللى ممكن تبقي بديلة ليها
    ودلوقتى ببني افكارى على الحاجة اللى ممكن ابقي كويس فيها
    مش الحاجة اللى بحلم بيها بقي وراسم عليها المستقبل الوردى
    يعنى ممكن تقولى امانى مش احلام

    2- مين الحد اللي انت مزعله منك وعايز تصالحه دلوقتي ؟

    انا مبزعلش حد منى والله
    ولما بحس انى مزعل حد او مقصر معاه مبسكتش الا لما اصالحه
    وبسرعة كمان

    الا بقي لو هو عايز يزعل منى
    او انا مزعله غظب عنى
    بس انا مبأزيش حد

    وميبقاش حد بيبعدنى عنه بالعقل
    وانا اتطفل عليه
    بداعى انى مش عايزه يزعل منى

    او اغير فكرى وامشي دماغي بطريقة تناسبه عشان بردو يبقي مبسوط منى

    عموما من هنا بقول اهو
    لو اى حد زعلان منى
    مهما كان
    وايا كانت الاسباب
    حقه عليا وانا اسف ليه
    ويا ريت يسامحنى

    وانا عن نفسي مش زعلان من حد

    3- امتى تقول لنفسك "انا غلط" ؟

    لما اكون مصر على رأى
    وشايف الناس كلها ماشية فى اتجاه تانى
    لان مستحيل انا ابقي صح والناس كلها غلط
    اكيد هنا يبقي فى حتت عند عندى
    ساعتها اقول انا غلط
    واحاول افكر بهدوء شوية

    4- ايه الطبع اللي فيك ونفسك تغيره ؟

    مأتعلقش بالناس بسرعة
    وماستناش من ناس نتيجة انا مرتب نفسي عليها
    لان احيانا كتير بتصدم فى ناس
    وبرجع بخفي حنين :(

    5- حسيت قبل كده انك مضطر تتنازل عن حلم حلمت بيه ؟

    لا
    يمكن لسه محستش
    لانى بتمنى حاجات كتير
    ولسه فى علم الغيب
    لكن حتى الان مفيش حاجة اقدر اقول كنت عايزها بشدة ومجاتش يعنى
    الا بتدخل القدر
    ويمكن لان انا واقعى شوية
    والاحداث عندى ماشية بترتيب معين
    مبستناش حاجة تيجي قبل حاجة

    يعنى انا مقتنع تمام الاقتناع
    ان خط سير الانسان اللى زيي
    انه يخلص تعليمه
    يخلص جيشه
    يشتغل
    يحضر نفسه
    يبدأ يفكر فى الارتباط الجدىىىىى

    غير كده يبقي بيهزر

    لذلك لسه الامانى ممكنة :)

    6- اكتر سؤال اتسألته في البوست ده وعجبك ؟ D:

    ههههههههههههههههههه
    5-احرج نفسك بسؤال وقول مش هقدر اجاوب؟
    ههههههههههههههههههههه
    عفريت الواد محمد صلاح ده ;)

    فاينالى
    اسئلت لايت جدا ومفهاش اى غلاسة :)
    a7mad sala7 said...
    angel

    منور/ه يا انجل والله
    انا عارف انت مين
    وميرسي موووت على المشاركة دى ههههههه


    1-اوصف نفسك فى كلمتين؟

    سؤال صعب اوى
    لان مفيش حد بيقول على نفسه انا كذا
    بس عموما ممكن اقول
    رومانسي واقعى
    محدش يتريق ها @-)

    2-ماهى اكتر حاجة بتشدك فى استكشاف شخصية معينة؟

    سؤال لذيييييذ

    هى بتختلف من موقف لاخر

    بس عامة الحاجة اللى بتشدنى فى شخص
    انه يكون مختلف
    يعنى تحسى انه مميز عن اللى حواليه بحاجة معينة ;;)

    3-اية الشىء الى يخليك تضحك من قلبك واية هو الى يخليك تزعل من كل قلبك؟

    اضحك من قلبي
    لما يحصل موقف كوميدي وانا وسط ناسي
    سواء كانو قرايبي او صحابي

    وازعل من قلبي
    لما احس ان حد ظالمنى
    او حد يصعب عليا

    ازود عليهم حاجة من عندى:
    اكتر حاجة تضايقنى
    لما احس انى مضحوك عليا
    او حد واخدنى على اد عقلى

    4-لو قالولك هتكون شخصية اى شخصية انت تختارها لمدة معين تحب تكون مين؟

    مممممممممممم
    مفيش فى مخى شخصية معينة

    من ناحية نفسي ابقي زى مين
    فى ناس كتير
    ولنا المثل والقدوة فى رسول الله والصحابي
    بحب سيدنا عمر بن الخطاب اوى

    ومن ناحية اكون مين لسبب معين ولفترة معينة
    نفسي ابقى شومان
    عشان اخرج الغلابة بتوع الزقازيق دول
    صعبانين عليا والله :D
    وساعتها بقي ممكن ابقي بطل قومى هناك
    هههههههههههههههههه

    شكراااا انجل
    اسئلتك لذيذة جدا
    والبلوج نور :)
    a7mad sala7 said...
    يا رب تكون اجاباتى مقنعة من وجهة نظركو

    اللى شايف ان فى اى تزوير يقولى
    :D

    انا عادل جدا >> دا اسم مستعار :-p
    وفى امكانية الاستئناف ;;)

    اللى عايز يسال تانى يسال
    واللى عايز يسال كتير مفيش مشكلة
    مش لازم 5 يعنى

    يالا جو اون :)
    Heshmat said...
    عايز اسئله
    اتفضل


    1 - بتفضل تكتب فى اى اتجاه ؟؟
    2 - افضل موضوع كتبته من وجهه نظرك ؟
    3 - حاجه بتكرهها اوى ؟؟؟
    4 - تحب تموت ازاى؟؟؟؟؟
    5 - ناوى تكمل فى البلوج لامتى ؟؟؟
    6 - عجبتك اسألتى ؟؟؟


    معلشى بقى انت اللى اقترحت الفكره
    استحمل بقى
    دريم كبير said...
    السلام عليكم ورحمة الله

    ايه جو الكئآبه اللي في الاسئله ده

    نفسك ونفسك انت ياض محروم والا ايه ههههههههههه

    كنت عايز اسأل بس سؤال صغنن

    انت راضي على نفسك دلوقتي ؟ ولو مش راضي على نفسك هل فكرت تغير نفسك ؟

    ومش هسألك ايه اللي مش عاجبك في نفسك او الكلام ده

    سؤال اخير انت شايف فايده من البوست ده ولو في فايده اتمنى تعلنها علشان تؤمن بيهاوتطبقها!!
    olivetree said...
    ازيك
    طبعا ليا الحق انى اسال بقى مليش دعوه
    يلا ومش عايزين غش بليز متبصش فى ورقه اللى جنبك الغش حرام ...
    1-ايه رايك فى الندم ولو حسيت احساس الندم قبل كدا ايه هى الحاجة اللى عملتها وندمت عليها اوى؟

    2-بتفضل ان يكون صحابك من قرايبك ولا من زميلك فى الدراسه بترتاح مع مين اكتر؟

    3-مين اكتر حد بتحب تتكلم معاه ومش بتزهق من الكلام معاه ابدا؟

    4-ايه اكتر حاجة بتفرحك وايه اكتر حاجة بتزعلك ؟

    5-مين مثلك الاعلى فى حياتك وليه اخترت الشخصيه دى بالذات ؟

    6-ايه هى المواضيع اللى بتحب تتناقش فيها مع صحابك وبتلاقى نفسك فيها اوى؟

    7-لو فرحان او زعلان دلوقتى قولنا ايه اللى مفرحك او ايه اللى مزعلك ؟

    مفتريه انا 7 اساله يلا مش كتير والله
    استحملنى بقى
    سلام
    e_emy said...
    يااااه ايه الشجاعه دى ..

    اسأل بقى

    1- راضى عن نفسك ؟ وليه ؟
    2-عارف انت عاوز ايه ؟
    3-بتعمل ايه علشان توصل لل انت عاوزه ؟
    4-لو قولتلك قول نصيحة لنفسك تقول ايه؟
    5-لو مش عارف تاخد قرار ف حاجه تعمل ايه؟ممكن تسيب الدنيا الى تمشك ولا تاخد رأيى الناس ولا تعمل ايه بالظبط ؟

    انا سألت الاسئله الى نفسى اعرف اجاوب عليها .. ربنا يكون ف عونك D:

    سلالالالالالالالام
    a7mad sala7 said...
    Heshmat

    وحشمت كمان
    لالا
    النهارده يوم تاريخي فى حيات البلوج ده

    1 - بتفضل تكتب فى اى اتجاه ؟؟

    بكتب حروف اسمك بحبات الندا ;;)

    فى لاتجاه ده >>
    هههههههههههههههههه

    اتجاه ايه يا عم
    انا مش كاتب يعنى
    انا مجرد مدون كده
    بس لما بحب اكتب يعنى
    بحب اكتب اشعار خفيفه كده
    او نقد كوميدي
    اللى بنسميه تهييس :D

    2 - افضل موضوع كتبته من وجهه نظرك ؟

    موضوع لسه منشرتوش :D
    اسمه يوم القيامة فى عين طفل
    موضوع نثرى
    هنزله قريب ان شاء الله

    3 - حاجه بتكرهها اوى ؟؟؟

    التظاهر بغير الواقع

    4 - تحب تموت ازاى؟؟؟؟؟

    موتة ربنا
    مش هنقي يا حشمت
    بس الموت على عبادة افضل حاجة طبعا

    5 - ناوى تكمل فى البلوج لامتى ؟؟؟

    مش عارف والله
    مش حاطط رينج
    بس طول ما بنتنفس فى جديد :D

    6 - عجبتك اسألتى ؟؟؟

    هو انا اقدر اقول ما عجبتنيش
    فيها دبح يا باشا ;;)

    نورت يا كبير
    a7mad sala7 said...
    دريم كبير

    وعليكم السلام ورحمة الله
    واحد سحلب هنا لسنيك يا ناس

    1-انت راضي على نفسك دلوقتي ؟ ولو مش راضي على نفسك هل فكرت تغير نفسك ؟

    مفيش حد بيرضي عن نفسه تمام الرضا
    لان الكمال لله وحده

    واكيد فكرت اغير السلبيات طبعا
    والتفكير سهل
    المهم التنفيذ
    ادعيلنا بقي :)

    2-انت شايف فايده من البوست ده ولو في فايده اتمنى تعلنها علشان تؤمن بيهاوتطبقها!!

    كفاية اننا نجيبك ترد هنا وتشاركنا يا عم
    هى دى مش فايدة ولا ايه؟؟
    ;)

    ومش لازم كل حاجة نعملها تكون ليها فايدة يعنى
    دا لو كان فى حاجتين تلاتة بنعملهم فى حياتنا حاليا ليهم فايدة
    من بيت لكلية لحياة عامة

    وعموما هو بوست ترفيهي يعنى
    والفايدة اننا بنعرف بعض

    هات حلبه حصا مع السحلب يابنى
    Do3a2 said...
    ما هى الحياه بالنسبه لك ?

    مين اكتر حد انت بتثق فيه?

    تعمل ايه لو كنت بتفضفض مع حد وواثق فيه واكتشفت انه بيخون ثقتك دي وبينقل اسرارك لحد؟

    تعمل ايه لو حسيت انك لوحدك فعلا بالرغم من ان الناس كلها حواليك?

    انت راضي عن نفسك؟

    ايه الزمن اللي كنت تتمني انك تكون مولود فيه ؟


    أكتر موقف حسيت أنك نفسك تكون مش موجود فيه?

    لمــــــــــــــــن تقول ؟

    ما بلاش نتكلم فى الماضى:
    نسيانك صعب اكيد:
    كون صديقي:
    بحبك:
    كذاب:
    مع السلامه:
    افتكرنى:
    كرهتك:
    سامحتك:
    زعلان منك:
    نور عينى:
    a7mad sala7 said...
    olivetree

    الله يسلمك
    ومن حقك طبعا
    داحنا نوسع ليكي وانتى تسالى


    1-ايه رايك فى الندم ولو حسيت احساس الندم قبل كدا ايه هى الحاجة اللى عملتها وندمت عليها اوى؟

    الندم احساس وحش اوى
    بالذات لو جه بعد عند
    بيقولو ان العند يورث الكفر

    يمكن ندمت شوية لانى اهملت حبة فى الثانوى
    حاجة فظيعة انك تقف على كلية على نص درجة :D
    بس يالا كله نصيب

    2-بتفضل ان يكون صحابك من قرايبك ولا من زميلك فى الدراسه بترتاح مع مين اكتر؟

    هو الاتنين مطلوبين

    من قرايبك ممكن يبقي فاهمك اكتر
    وعارف عنك اكتر

    ومن الدراسة بتبقي حر شوية معاه

    واذا كان كده او كده
    كله بيرجع لمدى ارتباطك بصحابك

    3-مين اكتر حد بتحب تتكلم معاه ومش بتزهق من الكلام معاه ابدا؟

    فى ناس كتير
    بس اكتر حد دى مش موجودة يعنى

    وكل واحد فى مجاله بقي
    يمكن احكى حاجة لحد
    ماحكيهاش للتانى
    مع ان ممكن التانى يبقي اقربلى من الاولانى
    بس هى بترجع للقبول اللى فى الانساان
    والناس اللى بتستريحلهم عن الناس التانية

    وعلى فكرة هى من الناس اللى بستريحلها جدا يا جماعة
    وتعرف عنى الىى ميعرفوش ناس كتير

    4-ايه اكتر حاجة بتفرحك وايه اكتر حاجة بتزعلك ؟

    سؤال مكرر يا زينب

    5-مين مثلك الاعلى فى حياتك وليه اخترت الشخصيه دى بالذات ؟

    عمر ابن الخطاب
    رضى الله عنه وارضاه

    لاسباب كتير
    اولهم العدل والحق والقوة
    وجهورية الصوت بس فى الحق
    وحاجات تانية كتير

    6-ايه هى المواضيع اللى بتحب تتناقش فيها مع صحابك وبتلاقى نفسك فيها اوى؟

    قضايا الرأى العام

    7-لو فرحان او زعلان دلوقتى قولنا ايه اللى مفرحك او ايه اللى مزعلك ؟

    اللى مفرحنى
    الاقبال اللى لاقيته من الناس ده
    يعنى
    حسيت انى حاجة بالنسبالكو اهو :)

    نورتينا يا ترى
    a7mad sala7 said...
    e_emy

    لا مش شجاعة ولا حاجة
    عادى جدا انك تبقي فى موضع سؤال
    بس فى ناس مبتحبش تتحط فى الموقف ده


    1- راضى عن نفسك ؟ وليه ؟

    مكرر يا باشمو

    2-عارف انت عاوز ايه ؟

    اه
    الحمد لله

    3-بتعمل ايه علشان توصل لل انت عاوزه ؟

    لازم احط جدول كده
    بالنقط
    اعملا واحد اتنين تلاتة
    ولو معملتش كده
    ببوظ الدنيا
    وفى حاجات بتاخد حق حاجات تانية

    4-لو قولتلك قول نصيحة لنفسك تقول ايه؟

    اهتم بنفسك شوية :(

    5-لو مش عارف تاخد قرار ف حاجه تعمل ايه؟ممكن تسيب الدنيا الى تمشك ولا تاخد رأيى الناس ولا تعمل ايه بالظبط ؟

    لو مش عارف اخد قرار
    بلجأ لربنا

    وباخد اراء ناس طبعا

    بس قليل اوى لما اسيب حاجة كده للظروف

    كتير اوى بحط احتمالات

    اسئلتك لايت اوى
    ومش متعبة خااااالص
    نورتينا :)
    a7mad sala7 said...
    ShiMOo يقول...

    اوكى
    ماشي
    فكرة كويسة

    رأيك هينزل تحديث للبوست دلوقتى

    وابدأى يا ستي

    عشان الشرط بس :D
    a7mad sala7 said...
    Do3a2

    1-ما هى الحياه بالنسبه لك ?

    بوابة عبور للاخره

    صاحبي وجارى من وانا ااااااد كده
    واحد اسمه علاء

    2-تعمل ايه لو كنت بتفضفض مع حد وواثق فيه واكتشفت انه بيخون ثقتك دي وبينقل اسرارك لحد؟

    اكيد هاخد منه موقف طبعا
    مش هقولك هقاطعه
    لان مفيش حد مبيغلطش
    بس هيبقي ليه انزار شديد اللهجة :D

    3-تعمل ايه لو حسيت انك لوحدك فعلا بالرغم من ان الناس كلها حواليك?

    حسيتها كتير
    وهعمل ايه يعنى
    العمل عمل ربنا
    بس احسن حاجة انك تحاول تكيف نفسك ع الوضع ده

    3-انت راضي عن نفسك؟

    سؤال مكرر يا هانم

    4-ايه الزمن اللي كنت تتمني انك تكون مولود فيه ؟

    اكيد فى عصر الرسول
    اكيد كان الحال هيبقي غير الحال
    ربنا يتولانا برحمته

    5-أكتر موقف حسيت أنك نفسك تكون مش موجود فيه?

    ماشي
    فى موقفين بس محدش يضحك
    ها

    مرة نمت يوم الخميس متاخر وكنت تعبان اوى
    ومحدش صحانى الجمعة الصبح عشان الصلا
    قمت نزلت جرى لقيت الناس طالعة من الصلا وانا لسه رايح :D

    ومرة تانية السنة اللى فاتت كنا فى امتحان ميد تيرم
    وانا كنت قاعد جنب واحد صاحبي
    الامتحان كان اهبل وخلصته فى 5 دقايق
    وواحد صاحبي قاعد جنبي بيمتحن وعمال يرغى فى الامتحان
    والدكتور كان متعصب خالص اليوم ده
    شافه وهو بيتكلم راح جاى جرى علينا
    واخد ورقته وقاله انت بتغش منه

    انا طبعا عملت الشهم قلتله لا يا دكتور مغشش منى
    راح واخد ورقتى انا كمان
    وطردنا احنا الاتنين
    ادام الدفعة كلها
    يمكن دى المرة الوحيدة فى حياتى اللى اتطردت فيها من محاضرة :D

    *-لمــــــــــــــــن تقول ؟

    بلاش زكر اسماء عشان الاحراج بس

    ما بلاش نتكلم فى الماضى:
    معنديش مشكلة ابدا انى اتكلم فى ماضي
    لانه جزء من حياتى
    حتى بأخطاءه
    ممكن اعترف بيها من غير كسوف او هروب
    لذلك عمرى ما هقول لحد بلاش نتكلم فى الماضي

    نسيانك صعب اكيد:
    اى حد عزيز عليا
    طالما انسان دخل دائرة حياتى وبقي ليه مكان فيها
    عمرى ما هنساه بسهولة
    دا لو نسيته اصلا

    كون صديقي:
    هههههههههههههههه
    لا ماعتقدش انى اقول لحد كده
    لان الصداقة مش بالامر
    ولا بالطلب حتى
    صاحبي يعنى شعور متبادل اننا محتاجين بعض
    مش واحد يطلب من التانى يبقي صديقه

    بحبك:
    :)
    بحب الناس كلها :-p

    كذاب:
    اى حد غير القطنة
    لان القطنة ما بتكدبش :))

    افتكرنى:
    اى حد كان ليا مكان فى حياته
    او فى يوم من الايام كنت مهم عنده

    كرهتك:
    لا مفيش
    مش من المفروض ان انسان يكره انسان زيه
    مهما كان
    ومهما عمل

    سامحتك:
    لا مش انا اللى بغنيها دى
    لا اسألى اصاله
    هى اللى بتغنيها :-p

    زعلان منك:
    يالا ربنا يسامحه/ا بقي
    مطرح مهو/هى :(

    نور عينى:
    :)
    من غير كلام
    والدتى طبعا
    ربنا يديها الصحة وطولة والعمر

    نورتينا يا دوعه :)
    a7mad sala7 said...
    //صاحبي وجارى من وانا ااااااد كده
    واحد اسمه علاء//

    دا اكتر شخص بثق فيه

    معلش السؤال اتمسح غظب عنى


    يالا يا جماعة مين هيسال تانى

    ايام ريدي ;;)
    mo7mad sala7 3rafa said...
    ايه يا اخي مهمدتش من الاسئله
    دا الواحد ريقه نشف م القرايه

    يلا ابعت البتاع ده لاي حد شارك الا انا

    سلام
    a7mad sala7 said...
    mo7mad sala7 3rafa

    ههههههههههههههههههههه

    وايه المتعب فى كده

    متسأل تانى
    انت مش قلت هسال؟؟

    عموما سيبه كمان يومين كده

    يمكن حد يسال
    دى فرصة لا تعوض
    اوبن بوفيه ;;)
    ωзgdaη said...
    مرحبااااااااااااا

    انا وصلت

    وجبت الاسئله ;)

    1- ماهو الخيال الذي يراودك كل ليلة؟
    2- ماهي أجمل دمعة داعبت وجنتيك؟
    3- لو قالوا لك اختصر أحلا عبارة فما ستقول؟
    4 - أي شخص أنت مدين له؟
    5 - اختر شخصية رجالية مثالية أثرت فيك ؟
    6 - اختر شخصية امرأة مثالية أثرت فيك ؟
    7 - لو قالوا لك اختصر أحلا عبارة فما ستقول؟
    8 - ماذا تود أن تحلم في من*** الليلة؟
    9 - describe me in one word ??

    خلاص انتهيت من الاسئله
    :):):):):):):):):):):):)
    a7mad sala7 said...
    ωзgdaη

    وجدااااااان
    كل سنة وانتى طيبة الاول
    و
    منورة البلوج لاول مرة
    ويا رب متكونش اخر مرة :)
    اديكي عرفتى الطريق :D

    1- ماهو الخيال الذي يراودك كل ليلة؟
    ممممممممممممممم
    سؤال جميييييييل

    لا هو مش خيال واحد بيراودنى كل ليلة
    يعنى على حسب الحالة المزاجية
    والوضع ساعتها

    بس لو هنتكلم بصفة عامة
    كتير اوى بتخيل حياتى بعد فترة معينة
    تقدر ب 6 سنين مثلا
    هكون فين
    عايش ولا فى رحمة الله
    وحالى هيبقي ايه
    وبشتغل ايه وفين
    متجوز ولا لا :D
    عندى اطفال صغنططين كده ولا لا :D
    يعنى حاجات زى كده
    التفكير بيبقي فى مستقبلي يعنى

    2- ماهي أجمل دمعة داعبت وجنتيك؟
    دمعة فرحتى بأسترداد حق من حقوقى المشروعة
    اللى جاهدت عشان ارجعها
    بجد بحس براحة نفسية رهييييييييبة لا يتخيلها احد

    3- لو قالوا لك اختصر أحلا عبارة فما ستقول؟
    >>لا اله الا الله...محمد رسول الله

    4 - أي شخص أنت مدين له؟
    مش أى شخص بقي
    هقولك اكتر شخص
    اكيد والدتى طبعا
    استحملتنى كتييييير اوى
    عملت عشانى اللى ميتعملش انا واخويا
    بجد الام بصفة عامة نعمة لا تعوض من عند ربنا
    ربنا يخليهالى يا رب :)

    5 - اختر شخصية رجالية مثالية أثرت فيك ؟
    عمر ابن الخطاب
    بعد رسول الله طبعا
    عليه الصلاة والسلام

    6 - اختر شخصية امرأة مثالية أثرت فيك ؟
    السيدة مريم عليها السلام

    8 - ماذا تود أن تحلم في من*** الليلة؟

    هى ال3 نجوم دى ايه بقي :D
    هى شكلها كده تحب ;;)
    اعتقد يعنى

    هقولك على حسب ما فهمت

    عموما
    الانسانة اللى بحلم بيها
    هى الانسانة اللى
    تفهمنى
    تقدرنى
    تخاف عليا
    تحافظ عليا
    تحبني اد ما بحبها
    تتقي ربنا فيا وفى نفسها

    عايز احلم بايه بقي ناحيتها

    اى حلم بس اكون معاها فى مكان واحد :)

    9 - describe me in one word ??

    ياااااااه صعب اوى السؤال ده
    ممكن one page :D هههههههههه

    بس لو هقول كلمة واحدة
    هقول >> اختى
    دى ممكن تشمل اى معنى انا عايز اقوله :)

    اسئلت سويت اوى يا وجدان
    زى شخصيتك بالظبط

    يا ريت حبة اسئلة كمان من دول :D

    مرة تانية نوووورتى البلوج
    وبجد اضافة ليا ان وجدان تشارك عندى :)

Post a Comment



رسالة أحدث رسالة أقدم الصفحة الرئيسية

Blogger Template by Blogcrowds