brb


اجازة شهر .. مع الشغل والنفاذ


خالد وساره


انتهت قصة خالد وساره
بالحلو .. بالوحش اللى فيها
بال7 اجزاء .. وان كنت مش عارف هى مناسبة فى 7 اجزاء ولا كنت رغاى .. ولا كان المفروض اعمل تفاصيل اكتر من كده
بالنهاية المأسوية دى .. وان كانت مخيبة لامال بعض المتابعين .. فى حين اعتبرها البعض الاخر واقعية جدا او مناسبة جدا او عقلانية جدا
سموها زى ما تحبو تسموها
العاطفيين كانو مع ساره اكتر .. واحنا مش معاهم :D
يمكن انتهاء القصة بالشكل ده بينعكس على شخصية الكاتب
يمكن لان هى دى شخصيتي .. مش هو خالد انا لكن قصدي انى لو فى موقفه هعمل كده بالظبط
ويمكن لان انا الادمن الوحيد للبلوج .. يعنى انا بس اللى بكتب وانا اللى بحدد الاحداث من البداية للنهاية
زى ما بيقولو فى الافلام المخرج عايز كده :D
فطلعت النهاية بالشكل ده
دا معناه ان النهاية كان ممكن جدا تبقي غير كده
ترجع لشخصية كل واحد
بمعنى بردو ان اى حد غيري فى الموقف دا كان ممكن يغير مسار القصة تماما .. كلٍ حسب مزاجه بقي

انا كنت ناوى من البداية اسيب النهاية مفتوحه على فكرة واترك النهاية لخيال كل قارئ بقي يحط النهاية اللى تريحه
بس لقيت الناس هتقوم عليا تاكلنى :D
فحطيت النهاية اللى انا شايفها مناسبة من وجهة انا
يعنى لحد الجزء السادس القصة كانت ماشية طبيعية .. اخر جزء دا هو اللى فيه اللعب
حتى عنوان القصة اسمه محتاجالك يا خالد يعنى مفيش تنويه على ملامح النهاية

ناس كتير بتعتبرني قسيت اوى على ساره فى النهاية دى
بس معلش بجد دا اللى المفروض يحصل من وجهة نظرى

مبدأيا بعتزر لكل حد سببتله احباط فى مشاعره وهو بيقرا :D

ولكل حد زغزغزته فى اعصابه وكل حد عيط بسبب القصة ودا حصل فعلا
وبعتزر لكل حد كان متابع وبييجي من وقت للتانى يشوف الباقي
بس هى كده فى شكل مسلسل على حلقات .. ولازم يخش فيها عنصر التشويق
وكل يتبع وانتو طيبين :)

القصة خلت ناس كتير تيجي تعلق مجاتش من زمان
وعملت تجمعات كده مشوفتهاش من زمان فى البلوج
معدل التعليقات ارتفع :D
وناس جديدة كتير شوفتها على حس القصة
دا وان دل على شيئ يدل على ان فى حاجة كويسة بتتكتب هع هع .. سامع واحد بيقولى متاخدش فى نفسك قلم بس
حاضر يا سيدي مش هاخد
الناس كلها نورتنى ويا رب دايما اشوف الاقبال دا وزيادة

فى ظاهرة خدت بالى منها ضايقتنى حبتين
ان فى ناس بتتفنن بالرد بغير معروف او اسمه تمويه
مش عارف السبب الحقيقة
هو انا برد عادى جدا ومفيش حاجة بس مش لاقي مبرر يعنى
انك طالما رديت ووافقت تحط رايك او تقييمك يبقي الاولى انك تقول انت مين
انا ماهتمتش اوى اعرف مين اللى بيرد شخصيا
بس على الاقل لما الردود بتزيد مبتبقاش عارف دا من ده
ما علينا

من المفارقات بقي
فى الجزء الاول حد قالى اشمعنى كلية تجارة :D
مش عارف هى جت كده بس يمكن لانها كلية الشعب .. وياما هتشوف فيها من كده كتير
يمكن هى اللى مجالاتها تسمح بالشغل فى كذا حاجة والسفر والكلام ده .. يمكن لان المخرج عايز كده بردو

حد تانى سالنى اشمعنا اسم خالد .. وبعدها اشمعنى اسم ساره
مش عارف ارد اقول ايه بس هو لو كنت حطيت اى اسم كان هيتقالى اشمعنى اسم فلان ده بردو
يعنى لازم الاشمعنى دى تبان فى كل حاجة
بس يمكن لانى اخترت اسماء مليش معاها احتكاك مباشر
يعنى مليش احتكاك مباشر مع حد بالاسماء دى عشان محدش يقولى بقي ااه دا فلان ليه دخل بالقصة والحاجات الظريفة اللى بنسمعها دى

ناس اعترضت بردو على طبيعة شخصيات القصة
يعنى حد قال ان فى شخصية متناقضة
حد تانى قالى فى شخصية جريئة وشخصية منفتحه زيادة وشخصية كذا
يا جماعة الشخصيات دى موجود زيها فى حياتنا والله
زى كده بالظبط واكتر ودا واقع فعلا
يعنى انا مبعملش شخصيات متكاملة انا بجيب امثلة
ولازم يبقي شوية تناقضات فى الشخصيات وحاجات تحصل غير متوقعة
مينفعش القصة تمشي دايركت من اولها لاخرها مش هيبقي ليها طعم

الجزء الخامس كنت مندمج فيه اوى :D
ساعات لما بتحط نفسك فى الموقف نفسه بيبقي عندك التعبير الادق للموقف وهو بيتكتب
الجزء دا هو محور القصة
رغم ان احداثه مش كتير ومطولتش بس هو كان الزتونة بتاعة القصة يعنى

من هنا بقي تباينت الاراء
ما بين مؤيد ومعارض
اللى بيدي اعزار واللى بيحكم بقلبه
اللى حط كرامته ادامه رقم واحد ونسي كل حاجة
اللى محسبهاش لادام شوية واللى نظرته واسعه
اختلاف الاراء دا كان بيخليني احاول احط نقط فاصله كده فى كل موقف
عشان لما ابقي اشرح وجهة نظرى فى الاخر تبقي بمبررات

واحدة واحدة كده
لما تكون عايش حياتك عشان شخص معين
ومستعد تعمل اى حاجة عشانه .. تختار البهدلة والمرمطة .. وتسافر وتتغرب .. وتعيش لوحدك
وتستحمل حاجات انت فى غنا عنها فى سبيل انك تبقي انسان يستحق انه يرتبط بيك
وتعمل كل ده عن طيب خاطر ومن غير تردد
وفى عز مانت متبهدل وطالع عينك وكل امنيتك تليفون تتصبر بيه لحد التليفون اللى بعده
وفجأة تنقطع امنيتك الوحيدة
ولما تحاول تتصل انت وتعرف السبب تقابلك بكدب .. اصل ماما تعبانة .. اصل فرح واحدة صاحبتي
وتعرف بالصدفة انها اتخطبت .. يعنى الحاجة الوحيدة اللى هى مطالبة بيها تعملها
انها متتخطبش الا ليه .. معملتهاش

محدش يقولى غصب عنها .. مفيش حد بيتجوز غصب عنه دلوقتى
هما مهما عملو اخر حاجة ممكن تتعمل انهم يضغطو عليها بالاقناع
وهى فى اديها توافق او لا
هى لو مصممه على مبدأ عمرها ما هتتخطب لو حصل ايه

وبعدين حاجة كمان
هو بيسالها فشكلتى خطوبتك ليه بتقوله ماتفقناش
معنى كده انهم لو اتفقو كان هيقولهم مبروك
ماتفقوش يبقي هو ستبن موجود احتياطى
ومعنى كده كمان انها لو ماتفقتش معاه هتسيبه ونقول لغيره مبروك

هى نفسها مش لاقيه مبرر مقنع تقوله عشان يسامحها

وبعدين محدش يقولى اللى بيحب بيسامح
فى حاجات كده بتتحفر مينفعش تعدى
فى اخطاء مميته ملهاش علاج
جرح القلب ممكن جدا يتعالج ويتسامح فيه .. لكن جرح الكرامه مبيتعالجش
لو هو نفسه سامحها .. كرامته مش هتسمحله
لو ارتبط بيها وبعدها افتكر فى يوم من الايام ان الانسانة دى كانت مستعدة انها تتجوز حد غيره
واللى فصلها عن كده عدم اتفاق على حاجة من التفاصيل
غير انها كانت مدياله وعد قبلها انها مش هتكون غير ليه
هو مش هيبقي مستريح فى حياته وبالتالى هى مش هتكون مستريحة

طيب لو هى مش هتقدر توفي بالوعد ادتهوله ليه وخلته يتعلق بيها

اكيد رايي دا نابع من شخصيتي
انى لما احب حد احبه اوى ومستعد اضحيله باللى اقدر عليه واللى ماقدرش كمان
لكن وقت لما ملاقيش مقابل او على الاقل تقدير للى بعمله عمرى ما هبقي على الانسان ده تانى
ومهما عمل من محاولات عشان يرجعنى للى كنت عليه .. عمرى ما هبقي زى الاول
والانسان ده هيبقي سقط من حساباتى .. واقصي علاقتى به معرفة عشان خاطر العشرة

ناس قالتلى هو كده بيعاقبها ولا بيعاقب نفسه
هو ولا بيعاقبها ولا بيعاقب نفسه
هو كده بيكسب نفسه .. وجع ساعة ولا كل ساعة
لما اكسب كرامتى واحفظ كبريائي ادام نفسي النهارده ولو على حساب قلبي شوية
احسن ما ادوس على كرامتى طول عمرى فى سبيل ارضاء قلبي
وزى ما اخلص ليها وحبها ربنا هيرزقه باللى تحبه وتقدره وتستاهله

لان دا مش مجرد جرح .. انا بعتبرها خيانة
ودى اللى ملهاش حل من وجهة نظرى
انتصار القلب فى الحالة دى بعتبره هزيمة .. ولي يعتبره انتصار الا لضعاف الشخصية

بالنسبة لسؤال شيمو
//يا ترى لو كان هو اللي اهله ضغطو عليه وسابها وخطب
ورجعلها تاني بعدها, كانت هتسامحه لما يقولها "سامحيني" ؟//

لو انا مكانها مش هسامحه
واللى هيتطبق عليه يتطبق عليها بالظبط
كونها هى عايزة تسامحه فدى حاجة ترجعلها هى .. لشخصية كل واحد
لكن بالنسبالى الاتنين واحد فى الحتة دى

شكرا لكل حد حاول يقرا عندى .. شكرا لكل حد حاول يرد عندى .. شكرا لكل حد فكر يشارك .. شكرا لكل حد وصله لينك على ميله منى واتضايق :D
.. شكرا لساعى البريد .. شكرا للسيد الرئيس راعى الفنون فى مصر
:)

رسائل أحدث رسائل أقدم الصفحة الرئيسية

Blogger Template by Blogcrowds