اولا كده
اخوانا الصعايده ياخدو الكلام بصدر رحب :D
انا مش عامل الموضوع ده عشان اجر شكل حد ولا اى حاجة من هذا القبيل
ولكن احساس حسيته بمجرد ما انتهت الحلقة الاخيرة

انا مش من هواة التليفزيون
بس دايما فى رمضان البيت كله بيبقي متابع المسلسل اللى بيبقي شغال ع الفطار
واللى هو كان شيخ العرب ده السنادى على الحياة

اينعم يحيي الفخرانى راجل ملوش حل
ومعظم مسلسللاته بتعجبني .. العيب مش عيبه يعنى
العيب عيب السيناريست او المؤلف بتاع المسلسل
ايا كان بقي المسلسل قصة حقيقية او مش حقيقية

طبعا واضح ان المسلسل بيتكلم عن فترة من الزمن
بتظهر فيها بطولة الصعايدة وحنكتهم .. وشوية صفات حلوة كده للصعايدة
هى كانت فترة فيها الحكم العثمانى .. وكان المماليك ماسكين مصر

المسلسل باختصار ماشي من الاول كويس اوى
وبيوريك عادات الصعايدة اللى احنا عارفينها
الكرم والشهامة والطيبة والشجاعة و و ...

الراجل اتجوز اتنين عشان بس يخلف وقولنا ماشي
وواحد تانى سايب بنته تتضرب من جوزها وقولنا ماشي

لكن لما تفضل 30 حلقة بتقنعنا ان دى فترة هيمنه من الصعايدة على ارضهم
وفى الاخر يرويلك تفاصيل الخطة اللى عملها شيخ العرب
وانه جمع جميع فرسان الصعيد ورجالتها عشان يصدو خطر المماليك
اللى كانو عايزين ياخدو ارضهم ويشردوهم ويهينو كرامتهم وكرامة ستاتهم

ويبينلك هيبة شيخ العرب واد ايه كل الدنيا عاملاله حساب
حتى العثمانيين وشيخ الازهر وغيرهم

ويطلع الراجل من اقصي الصعيد يلم فى الجيوش
وماشي فى رحلته للقاهرة عشان يطرد المماليك .. او يصد خطرهم
وفجأة يتعب وهو فى السكة
فى النص الاخير من الحلقة الاخيرة من المسلسل
ويقرر يرجع بلده ويسيب الليلة فى ايد ابن عمه يكمل مكانه

وفجاة يبعت قائد من المماليك رسالة لابن عمه ده
يقوله شيخ العرب مبيحبكش واحنا شايفينك انت شيخ العرب
بيعهم وانسحب بالجيش بتاعك واحنا هنخليك شيخ العرب بفرمان من الحاكم

ويقومو يعملو خدعه هبلة
ياخدو كام واحد صعيدي ويقتلوهم
ويولعو فى جثثهم ويبعتوها محروقة للصعايدة
على اساس ان معاهم سلاح بيقتل بالكبشة
يقتل كام واحد كده ويولع فيهم كمان
وان بقي خطره كبير وهيعمل الفرق فى الحرب

يقوم اخوانا الصعايدة يصدقو ويتهزو
ويوقفو الزحف ناحية القاهرة
رغم ان موقفهم كان اقوى بكتير

يقوم ابن عم شيخ العرب الشيطان يضحك عليه
ينسحب بجيشه كله لورا فى لحظه
وفى خلال دقيقتين من المسلسل تتغير واجهة كل حاجة
تبقي السيطرة فى ايد المماليك على كل زمام الامور
ويخشو بلد شيخ العرب
يخربوها ويقلبو عاليها واطيها ويشردو الناس ويقتلوهم
وياخدو الستات بتاعتهم ويمرمرطو اهل بيت شيخ العرب
وتتهان كرامة الاشراف المصونة وتقع الصورة اللى محطوطة فى ازهان المشاهدين عن الصعايدة
يستخبي شيخ العرب فى مخبئ تحت الارض .. رغم انه هو المفروض بطل الابطال

كل دا عشان ايه
ابن عم شيخ العرب اتضحك عليه بكلمتين من واحد مملوك
وبناءا عليه ..
يخونوه طبعا ويقتلوه .. بعد ما مراته وعياله واخواته اتبرو منه

حتى بنته اللى كان رافض جوازها عشان منشف دماغه ع الفاضي
وامها كانت موافقة وكل حاجة
بعد ما مات الراجل .. هى كمان مبقتش موافقة .. ليه بقي
لان هما الصعايدة كده .. لازم تنشف دماغها زى ما بيعملو _كما وجدنا ابائنا وهكذا نحن فاعلون_

وبناءا عليه البت تتعقد وتتخرس
واللى كان عايز يتجوزها يقعد يندب حظه لحد ما يموت

وشيخ العرب يتصدم ويبقي مش عارف يعمل ايه
يقوم يقرر يروح ياخد جيش من النوبه .. من الجنوب تحت
اللى كانت ايامها من اسوان وانت نازل ع السودان
رايح يحارب بالسودانيين .. واحنا محرمناش ورايحين نلاعب الجزائر هناك :D

طبعا دا بعد ما البلد خربت
وموتو الناس وهانو كرامة الشرفاء .. يعنى بعد ما خربت مالطة

لا دا مش بس كده
وهو واخد المركب ورايح النوبة
مات فى المركب

يقوم يحصل ايه تانى ؟؟
ولا حاجة .. خلص المسلسل على كده
والمماليك اللى ملهمش اصل ضحكو علينا واخدو البلد بخدعه هبلة
عشان واحد صعيدي اتضحك عليه

ومكسبناش احنا الا الصلا ع النبي !!

ايا كانت القصة بقي حقيقية ولا متألفه
بس مجرد ان الفكرة تلاقي استحسان ويختارها يحيي الفخرانى
وتتعمل وتتزاع فى رمضان .. يبقي اكيد قصة ليها قيمتها

وادى اخرة اللى يرمى ودنه لمسلسل صعايدة 30 يوم متصلين :D

كل سنة وانتو طيبين :)

اتنين متفقين ع الجواز
اتنين زى اى اتنين
والدنيا مستقره وكله تمام
اتفقو على كل تفاصيل الجواز

العروسه راحت اختارت النادى
واختارت الدى جى
وقالتله كمان ع الاغانى اللى هيشغلها

تانى يوم احنا فى الفرح دلوقتى
الدى جى شغل بحبك يا حمار
الناس كانت متأزيه
والعريس نفسه متأزي
العريس راح همس فى ودن بتاع الدى جى
" بلاش الاغنية دى يا عم .. شغل غيرها "
الراجل رد عليه وقاله لا الا دى
دى العروسة اللى مختاراها واكدت عليا
العريس راح همس العروسة فى ودنها قالها بلاش الاغنية دى مش كويسة
قالتله لا لازم دى
ويالا تعالى معايا نرقص
قالها لا مش هنرقص دلوقتى
قالتله لا دلوقتى ياااااالا
هو كان بيقاوم شوية
راحت شدته من الكرافته وبتبصله وهى بتغنى
" بحبك يا حمار "
العريس الدم غلى فى عروقه
راح جارى ماسك الميكرفون
وقالها ادام الناس كلها
" انتى طالق !!! "

الناس اتصدمت
صوت الاغنيه سكت
العروسة تنحت
وسالته انت بتطلقنى وانا لسه عروسه

قالها مستنيه ايه من واحد حمار ؟؟!!

شيئ من الخشـوع




النهارده كان 22 رمضان
جملة للتاريخ ليس اكثر

المهم
صليت كام ركعة من التراويح النهارده .. هيى .. بقولك انت :D

طيب صليت كام تراويح لحد النهارده
قريت كام جزء من القران لحد النهارده

تعرف ان مش دى القضية
امال ايه القضية يا عم احمد ..

القضية فى مدى صحة العمل اللى بتعمله

يعنى كام واحد بيقرا قران فى رمضان ؟؟
وفى غير رمضان ؟؟
كتييييير اوى .. ما شاء الله
مع ان نسبتهم بالنسبة للكل ضعيفة جدا
بس ما علينا

لكن كام واحد منهم بيقرا ويتدبر ويفهم
يفهم ولو شيئ من اللى بيقراه ؟؟
طب يحاول بس
طبعا اقل بكتيييير

كام واحد بيصلى التراويح
والتهجد كمان .. ويقوم الليل لوحده ويصلى الفجر
بردو كتير

لكن كام واحد بيصلى وهو فعلا بين يدي الله
بردو اقل

تعالى على مشهد كده:

واحد بيصلى فى اوضة فى بيتهم .. مثلا
ودا رايح ودا جاى
واخوه الصغير بيلعب ادامه
ومعرفش مين عمال يتكلم برا
والتليفزيون شغال وصوته عالى
و و و

واللى بيصلى ده

اللـــــــــه اكبر
عشان يوطو صوت التليفزيون

ويبص للواد الصغير جاامد
عشان ميعديش من ادامه

ويبص للى معدى كده واللى معدى كده
ورامى ودنه ومركز مع اللى بيتكلم برا

مشهد تانى واحدة واقفة تصلى:

وعمالة تفكر هطبخ ايه النهارده
والراجل جاى امتى النهارده
والغسالة مشغلاها من الساعة كام
وهروح اطلع كيس اللحمة من التلاجة يفك
ولا انزل الواد يشتري فرخة

تعالى مشهد تانى خالص:

اللى فى الجامع بيصلى التراويح
الله يباركله ويزيده

كل ركعة يبص فى الساعة
ولو الامام طول شوية يبقي عايز يحدفه بالكوباية بتاعة الميه

ويبص لعيل صغير عمال يجري فى الجامع

بين كل ركعتين يفضل قاعد ع الارض ولا فى اخر الجامع
لحد ميقرب الامام يركع الركعة اللى بعدها يقوم جارى واقف فى الصف


المشهد الاصعب بقي:

انك تبقي عند واحد تعرفه
ويبقي مواظب ع الصلا .. ما شاء الله
تساله بتصلى من امتى يقولك الحمد لله بصلى من وانا ااااااد كده
تبص تلاقيه بيسجد ويقوم فى ثانية
يركع ويقوم فى ثانية
بيعمل اكروبات فى الصلا

بجد والله بزعل اوى
لما يكون حد مواظب ع الصلا بالذات
وبيصلى بالطريقة دى

محدش يقولى يا عم احسن من اللى مبيصليش خالص
اللى مبيصليش دا ميستحقش تتكلم عنه اصلا

طالما صليت يبقي تصلى صح
طالما نويت تصلى وقومت واتوضيت
يبقي صلى صح
ناس كتير اوى بتعيش حياتها كلها تصلى كده وهما فاكرين ان كده تمام

اخطر حاجة والله
طب اللى مبيصليش عارف انه مبيصليش .. وعارف مصيره
لكن اللى عايش طول حياته موهوم انه بيعمل اللى عليه

هى العبرة فى الصلا ايه
الصلا هى الصلة بين العبد وربنا
الاساس فى الصلا هو الخشوع

تفتكر امتى اخر مرة دمعت من ايه قران سمعتها
امتى اخر مرة جسمك اقشعر من كلمة من كلما ربنا

وعلى جانب تانى
امتى اتأثرت بموقف شوفته فى فيلم ودمعت منه ..

بجد شيئ مخزى

روي عن النبي ( صلي الله عليه وآله وسلم ) مسندا :«إن العبد ليصلي الصلاة لا يكتب له سدسها ولا عشرها، وإنما يكتب للعبد من صلاته ما عقل منها»

وربنا سبحانه وتعالى بيقول {وإنها لكبيرة إلا على الخاشعين} صدق الله العظيم

الموضوع مش صعب
كل ما فى الامر انك تستعد بكل جوارحك للصلا
وتستحضر عظمة ربنا .. وتحس بكلمة الله اكبر
لو حسيت فعلا انه اكبر واهم من اى حاجة تانية
هتركز فى الصلا

لو حسيت وانت راكع ان الركوع دا محدش يستاهله منك الا ربنا
هتركز فى الركوع

لو حسيت وانت ساجد ان مفيش حد يستاهل انك تحط وشك على الارض ليه الا ربنا
هتركز فى السجود
دا حتى ربنا بيقولك اقرب ما يكون العبد من ربه وهو ساجد
يعنى فرصه
اسجد وادعى ولح على ربنا

والله لو كلنا نحس بالقيمة دى
محدش هيفقد خشوعه فى الصلا

وبالنسبة للناس اللى بتقرا قران:

تلاقي واحد طول ما هو بيقرا عمال يعد الصفحات
ويبص الجزء دا هيخلص امتى
والحزب دا لحد فين

شوية ويقيس قرا اد ايه بالنسبة للمصحف

واحد تانى قاعد يقرا فى وسط ناس

وكل ما يقولو حاجة ودنه معاهم
يقوم ناطط فى الكلام ورادد
يقرا كلمتين ويتحشر فى الكلام

محدش يقولى يا عم احسن من اللى مبيقراش
اللى مبيقراش دا حر فى نفسه
لكن طالما قريت يبقي تستفيد من اللى بتعمله
حرام لما تكون بتعمل حاجة لله
بتعملها عشان تاخد منها ثواب وتكون بتعملها غلط
حرام عليك نفسك

الحكمة من قراية القران انك تعرف انت بتقرا ايه
محدش قالك اقرا وفسر
بس على الاقل تدبر الكلام
حاول تفهم انت بتقرا ايه
دانت لو بتقرا جرنان بتبقي مركز عشان تفهم
عشان ع الاقل متبقاش بتقرا ع الفاضي
فما بالك وانت بتقرا كتاب ربنا

فى ناس بتقرا بالمرتين والتلاتة
ما شاء الله عليهم .. ربنا يزيدهم
بس هل بيستفيدو حاجة من اللى بيقروه
ولا هو العدد فى اللمون !!

بس بزعل اوى على الناس اللى بتقرا .. والاسم انهم بيقرو
ولكن زيهم زي اللى مبيقراش

طبعا مش انا اللى هحكم عليهم
الثواب فى الحاجات دى درجات

يعنى الصلا مثلا
فيها ثواب تأدية الفريضة
وفيها ثواب اكتر من كده اللى احنا المفروض نستفيد بيه
وبردو فى صلا متاخدش منها اى ثواب
الحكم فى كده لله وحده

لكن انا دايما بقول
لو بتعمل حاجة غلط
حاول على الاقل تقلل منها الاول
يعنى خلى عقابها قاصر على ارتكابك انت ليها
متشيلش ذنب ناس تانية نقلتلهم الغلط

وبردوبالمثل لما تعمل حاجة صح
يبقي اعملها صح تماما
طالما تعبت نفسك وعملتها
يبقي حاول تنال ثوابها كامل
عشان تبقي عملت حاجة مفيدة فعلا تفرح بيها يوم القيامة

ربنا يهدينا .. ويهدى بينا .. ويجعلنا سبب لمن يهتدى

كل سنة وانتو طيبين :)

رسائل أحدث رسائل أقدم الصفحة الرئيسية

Blogger Template by Blogcrowds