ومن الذكريات ما قتل

الذكريات
فيضان من الاحداث المتتابعة المتصلة المتعلقة ببعضها سواء من قريب او بعيد
شريط من المشاهد المتلاحقة متخزن فى العقل والقلب احيانا

الذكريات
شريك حياتك الازلى اللى بيلازمك لحد ما تنتهى حياتك
لذلك ليس منا من هو وحيد
الواحد هو الله سبحان والله

كل انسان ليه ذكرياته سواء سعيدة او حزينة
مفرحة او مؤلمة
منها ما يحيي ويعطى الدفعة والامل
ومنها ما قتل

كده وصلنا للزتونة
نقطة ومن اول السطر
بعد التحية والسلام والترحيب والمباركة والتعييد
دى كانت تعريفات للذكريات من وجهة نظرى
تشمل نبذة عن انواع الذكريات
واليكم التفاصيل

صحيح كانت الناس مستنية انفلونزرا الفرافير :D
معلش بقي هى بتبقي مجموعة افكار فى دماغى
واللى بيتجمع منهم الاول بدلقه فى بوست
والترتيب حسب المود يعنى
بوست الانفلونزا جاى قريب بعد الشر عن السامعين

نرجع للذكريات
وهو الانسان ايه غير ذكريات وشوية حاجات فوق بعضها :D

ونبدا من حيث انتهينا
الزتونة
من الذكريات ما يعطى الدفعة والامل
ومنها ما قتل

مش المفروض ان الانسان مخير ؟؟
ايوة مخير
يعنى هو فى حد بيضربك على ايدك عشان تعمل حاجة معينة؟؟
لا مفيش

تفكيرك اللى جوا راسك واحساسك اللى جوا قلبك حد بيتحكم فيهم ؟؟
لا بردو مفيش

طب متيجوا نتفق اننا نفكر فى اللى يريحنا ونحس باللى يطمننا
الله .. داحنا متفقين اصلا .. تصدق
اه طبعا متفقين كل واحد بيعمل اللى تريحه على رأى عمو عمرو
امال يا عم احمد فين الذكريات اللى بتقتل دى؟؟
اه فى ذكريات بتقتل
بتعيشك ميت على قيد الحياة
رهين ليها
تتحكم فيك وتسيطر على تفكيرك كله

تسمعو عن لعنة الفراعنة؟؟
واحد بيقولى يوووه دانت رغاى اوى فراعنة ايه يا عم دلوقتى
اقوله يا عم اهدى شوية لما تخش تقرا عندى فضي نفسك 10 دقايق بس
ادينا بندردش
ولو مش مستعد تقرا متقراش عشان متكرهش البلوج وتكرهنى شخصيا
وخلى بالك انت اللى بتعطلنى اهو :P
رغاى رغاى يعنى :D

نرجع خطوتين ورا
كنا بنقول اللعنة
فى بقي لعنة الحب ولعنة الذكريات كمان

لما تلاقي حاجة ماسكاك من رقبتك كده ومتبتة فيك وبتقولك انا مستريحة كده
زى بقع الغسيل فى غياب تايد اتوماتيك
طب ليه هى مستريحة؟؟
عشان انت موفرلها مقومات الحياة على رقبتك
واحد فارد رقبته كده لكل اللى يكلبش فيها ومسلملها خالص
ليه هى متكونش مستريحة
طب مهو انت لو مسلمتلهاش مش هتستريح
ولو ماستريحتش هتسيبك وتشوف غيرك تستريح عنده
الكلام ده منطقي ولا لا؟؟
(واحد متنح)

ابسطهااااااااااالك
بالمثال الحى
انت لما تكون عايز تعمل اى حاجة فى الدنيا
اللى بيخليك عاوز تعملها ان فى دافع
دافع من جواك او رغبة عندك تعمل الحاجة دى
واداة بتستخدمها عشان تعمل الحاجة دى

لما تكون عايز توصل لحاجة ابسط وسيلة للتنفيذ
طلع ايدك من جيبك وسيب التانية من ع الماوس
واعمل قرنين كده بايدك
وقول دافع واداة

طيب انت جواك ذكريات مضايقاك ومش قادر تتخلص منها
حاول تخلى عندك دافع واداه انك تتخلص منها

الدافع: انك تحط فى دماغك ان الطرف المشترك معاك فى نفس الذكرى مش فى دماغه الذكرى دى ابدا
لان الذكرى دى بتؤلمك انت مش بتؤلمه هو
لو بتؤلمه هو انت هتنساها ومش هتحط فى دماغك وهو اللى هيفضل فاكرها
والعكس صحيح بتؤلمك انت يبقي هو مش هيحط فى دماغه
مع ان هو الجانى وهو صاحب الذنب
بس انت اللى بتدفع التمن
طيب انت هترضى على نفسك كده؟؟
مفيش حد فى الدنيا هيرضي
طيب متخلى نفسك تعز عليك وتبقي هى الدافع
وتقول هو مش احسن منى عشان اعيش انا فى حزن بسبب الم هو سببهولى وهو مش فى دماغه

الاداة:حاول تقطع كل خيط بيربطك بالذكرى دى
سواء كان خيط معنوى او مادى
اشغل تفكيرك واملا حياتك بتصرفات تسعدك انت
وتريحك انت
وتعيشك انت
لا انت غالى على نفسك
ونفسك مش هتغلى عند حد ادك بعد ربك سبحانه وتعالى
وربنا مبيظلمش حد
الانسان هو اللى بيظلم نفسه

لان الانسان اللى سببلك ذكرى مؤلمة لو فعلا تهمه مكانش خلاها ذكرى بالنسبالك
كان اقل ما فيها خلاها غلطة وتداركها

ومحدش يعيب فى الزمن ويعيب فى الظروف
العوامل دى بتواجه كل واحد يعنى دى باك جراوند لكل واحد متتاخدش فى الحسبان
والشماعات اللى بتتعلق عليها دى شماعات خايبه مصدرها ضعف


يبقي مما سبق:
اظن فى وجود الدافع اللى هو عزة النفس وفى وجود الاداة اللى هى قطع خيوط الذكرى
مبقاش فى مشكلة فى قضيتك مع لعنة الذكريات
ويبقي عنوان حياتك (ومن الذكريات ما يسعد والباقي يهمش) مش هتبقي احسن؟؟
والله احسن ودا حق نفسك عليك
وابسط الحقوق كمان

مش هقولك انسى
لان فى حاجات فعلا مبتتنسيش
ولكن خليها محطة عديت عليها ومش هترجعلها تانى ان شاء الله

اخيرا
لا تحزن على ذكرى عشتها
فان لم تستفيد منها بفرح
فاقل الاستفادة انك اخدت منها درس

ومفيش حد بيتعلم ببلاش
وزى ما بيقولو الضربة اللى مبتموتش بتقوى
مش بتضعف

بس خلاص

11 Comments:

  1. e_emy said...
    ايه الدافعه الجامده دى

    بجد فعلا اهم حاجه عزة النفس ..
    وهتقبه جامده جدااا لو فضل الانسان يتحكم ف نفسه بعقله .. كده مش هيضعف ابداا
    ومش هيسيب ذكرى تألمه ابداا

    بس تجيب منين بقى حد شغال بعقله طول حياته ...

    موضوع جامد جداا بجد
    THE illusionist said...
    كل سنه وانت طيب يا ابو صلاح
    عيد سعيد
    !! a7mad sala7 !! said...
    وانت طيب يا راجل يا طيب

    مكانها كان فى البوست اللى فات
    بس يالا ما علينا
    غير معرف said...
    عشنا اد ايه باقى اد ايه يبقى بس ليه نشغل بالنا
    يعنى محدش واخد منها حاجة
    يعنى منضيعش اللى باقى ده شاغلين بالنا وواجعين قلبنا على حد مايستاهلش اصلا
    عاشـــــــــقة القمر said...
    موضوعك حلو جدا

    فعلا الذكريات بتقتل ساعات لما
    يكون كل تفكيرك منصب عليها هى وبس
    وخاصا بقى الذكريات المؤلمه
    ولو اتكررت قدامك تانى بتبقى اصعب واصعب
    احنا مهما كنا بشر وغصب عننا بنضعف وبيجى علينا وقت مش بنقدر نستحمل اى شىء تانى فوق طاقتنا


    الذكريات مهما كانت قوتك متقدرش تمحى من دنيتك لان دا وقت مر عليك وانحسب من عمرك ومتقدرش تنساه ابدا

    هى حاله واحد بس اللى ممكن تهون دا كله
    ان يجى دنيتك اللى تعشها بعد الذكريات دى تكون ايام حلوه وتنسيك كل اللى فات مهما كان فيها
    حاول تخلى كل اللى جاى عليك فرح ومش فيه اى حزن وهتقدر تنسى ...















    انا بقى واحده من الناس مش بتعرف تنسى الا بمرور وقت طويل جدااااااااااااااااااااااااا
    :)



    وخليها وفى ايامى ذكريات تحينى
    روح بلا فرح (روان) said...
    سلام عليكم
    الحاله الحاليه بعد قراءة البوست
    الصراحه يعنى متنحه جامد
    و مش عارفه ارد عليك اقولك ايه
    يا ريتنى انسى
    بس الذكريات دى فى دمى و روحى هى حياتى لان كل انسان عباره عن ذكريات
    بقالى 18 سنه بحاول امسح شوية ذكريات او بالاصح مفكرش فيها بس معرفتش
    و حاليا فى حاجه بحاول انساها من 8 شهور
    بس شكلها متمسره
    سلاموز
    !! a7mad sala7 !! said...
    e_emy

    مش مسألة عقل بس والله


    ممكن تتصرف بعقلك وقلبك مع بعض
    بس متديش حاجة اكتر من حجمها
    دا كل ما فى الامر
    !! a7mad sala7 !! said...
    غير معروف
    اللى طلع معروف


    اصلا ؟؟


    :)
    !! a7mad sala7 !! said...
    عاشـــــــــقة القمر


    نخليها زى ما نخليها

    المهم منظلمش نفسنا
    !! a7mad sala7 !! said...
    روح بلا فرح

    وعليكم السلام



    كله بيرجع لقوتك النفسيه بقي


    الله المعين
    حسبى الله و نعم الوكيل said...
    سلام عليكم
    ههههههههههههههههههههههههههههههههههه
    دى ضحكه هيستريه على فكره
    ال قوتى النفسيه ال
    ربنا يستر من اللى جاى

Post a Comment



رسالة أحدث رسالة أقدم الصفحة الرئيسية

Blogger Template by Blogcrowds