انفلونـــزا الفرافــــير



المدارس 3-10

لا 10-10
لالا دا مفيش مدارس
لا دا هيبقي 3 ايام فى الاسبوع
يا عم دانا سمعت انه هيبقي فترتين
واللى سمع انها اتلغت السنادى خالص
واللى يقولك هتبقي منازل وهنذاكر من الدش والنت
وكل يغنى على ليلاه
واحنا ما شاء الله احسن شعب يحب يفتى

المعروف ان السبب طبعا هو انفلونزا الخنازير
والمعروف ان وباء انفلونزا الخنازير فى العالم كله
مش فى مصر بس

الا ما سمعنا عن بلد عملت الهليلة دى كلها

ومن ابرز استعدادات المصريين لوباء انفلونزا الخنازير ما يلى

اولا جهزوا اكياس ومقابر جماعية لدفن ضحايا الوباء اللعين
اللهم صلى ع النبي

اول حاجة فكروا فيها يتاووا الجثث وكأن دول مش بنى ادمين دول حيوانات

الاستعداد التانى جهزو 13 مليون كمامة
ماركة الملثمون
عبارة عن حتت قماشة بفته مكونة من طبقتين مزودة باستكين
واحد من فوق وواحد من تحت
تلبسها تخنقك ومتحميش من اى حاجة
وتخليك شبه العيال الصغيرة فى العيد
اللى لابسين الوشوش البلاستك دى

احسب بقي 13 مليون كمامة هتكلف الدولة اد ايه
واضرب فى 2 عشان النهب والسرقة اللى هيحصلو على ما يوصلوها للطلبة
عشان يبقي لكل طالب كمامة

مشروع كمامة لكل طالب
فى المدارس والجامعات

قالك ان الوباء ملوش عقار محدد لحد دلوقتى
يعنى مفيش مصل
الموجود هو عقار التيمفلو على ما اظن
ودا للعلاج ليس للوقاية
يعنى تتعالج بيه بعد ما تصاب مش عشان تحمى نفسك من المرض

والادهى والامر ان مفيش غير عقار يكفى ل 5 مليون شخص فقط
واحنا 85 مليون

الاول قالو عايزين نوفر للاطفال والعواجيز على الاقل
عشان دول بتبقي مناعتهم ضعيفة
وبعدين قالو نوفر للطلبة الاول عشان دول معرضين للزحام والاختلاط
والحقيقة المرة ان الموجود 5 مليون ومتشالين لعلية القوم اللى منتظر يعيو
يعنى مش لعامة الشعب

وفى تصريح كوميدي لاحد المسئولين فى وزارة الصحة
بيقول ايه

الوباء قادم قادم لا محاله
واحنا عملنا احتياطاتنا
عملنا ارشادات وتوعيه
عشان بدل ما الوباء يقضى على 10 مليون مثلا
مثلا يعنى
يقضي على مليون بس
:D
تقوم انت اول ما تسمع البؤ ده تبتسم ابتسامة عريضة
وتبين سنانك كده وفتحة بؤك توصل بين الودنين

يموت مليون مثلا؟
بيقولك مثلا
على اساس ان مليون دول يتعدو ع الصوابع

قالك ايه كمان
وباء انفلونزا الطيور استوطن فى مصر خلاص
احنا داخلين على خنازير دلوقتى
ولو اتحد الفيرسين مع بعض فيها موت على طول
فيها موت من قبل ما تظهر الاعراض حتى

مش هنرمى شماعتنا ع الحكومة طبعا
الموضوع فى الاول وفى الاخر واقف على الوعى
وعى الشعب وخوفه على نفسه

الناس فى الصين كان عندهم سارس وحياتهم كانت ماشية طبيعي
مأجلوش المدارس ولا عطلو الدنيا
لأن كان عندهم وعى

فيرس انفلونزا الخنازير نفسه ضعيف جدا
اضعف من فيرس البرد العادى اللى بيجيلنا
وبيموت من مجرد نزول الشمس عليه
لكن خطورته فى انه بينتشر بسهولة وبسرعة ملفتة
ولما بيخش فى ادواره الاخيرة مبيتعالجش
يعنى لازم يتلحق فى بداياته
والامر سهل جدا

يعنى لما كل واحد يحس باعراض يتصرف على طول
لكن احنا لا طبعا

اللى بيحس باعراض بيفضل ساكت
لحد ما يبقي بيموت خالص يفكر يكشف بقي
ولما يفكر يكشف يروح يكشف عند سباك
وكل اللى نقابلهم بالاحضان والبوس
والعيان يروح شغله عادى ويعدى الناس اللى معاه
وكل اللى تقابله برشامه ياخدها
طب مهو الوباء ليه حق يستوطن عندنا

اذ كان الناس بتيجي من برا بيوزعو عليهم ورقة كده
زى استبيان

بتحس بدوخه ولا لا
فى حاجة بتزغزغك ولا لا
بطنك بتوجعك ولا لا

وعلى اللى معاه الورقة دى انه يحط صح ولا غلط
يا صلاة النبي

يعنى لا كشف ولا غيره
ممشينها بالنوايا
ويقولك كل واحد يخاف على نفسه بقي
محدش هيعرف مصلحتك اكتر منك

طب ميمكن هو مهمل فى نفسه يا عم
هو مش مهم بس المهم الناس اللى هيروح يعديهم دول وينشر الوباء عليهم

كمية من اللا مبالاه من الطرفين شعب وحكومة

النهارده انفلونزا الخنازير
بكرة انفلونزا الصراصير
ولسه

وانا حاططهم كلهم تحت بند انفلونزا الفرافير
لان لو كل وباء هيقابلنا نعمل فى نفسنا كده عشانه
يبقي احنا فعلا فرافير
ربنا يستر علينا

9 Comments:

  1. صاحب رأى said...
    يا واد يا فرفور
    بتعيب على الحكومة
    وجاى تقول فى البوست بتاعى انى هتحبس
    مش بقولك رجلى على رجلك

    المهم

    الخلاصه فعلا
    الحكومه عايزه تجمع فلوس فى كرشهاااااااااااا
    كرشها واسع اوى
    عايزين فلوس باى طريقه
    كل طالب لما يدفع له كام جنيه على كل كمامه شوف هيلموا كام
    بدل معونة الشتا
    هتبقى شتا وخنازير يا ريس

    بوست جميل
    تحياتى
    LOVE SPIRIT said...
    فرافير و خنازير كده على نفس الوزن
    و بعدين انا عطست على السيره
    بص يا بنى وى ار شعب لا يمكن وصفه
    انا سمعت ان ايام زمان كانوا بيقولوا الشرطه فى خدمة الشعب و الكلام الفاضى اللى كلنوا بيقولوه و الشعارات اللى مالهاش لازمه
    حاليا كله فى خدمة نفسه
    و شعار التوداى الشهير "نفسى أولا ثم ثانيا ثم ثالثا و للأبد"
    ده اللى الناس ماشيين بيه
    اذن من هذا المنطلق فلابد للحكومه ان تشبرق نفسها و الشرطة تظبط بريستجها
    و انا اروح فى اى مكان بدل ما انا بقول كلام معرفش جايبه منين
    نتقابل فى قسم الشرطه و لا اقولك على السجن عدل
    سلام
    morgana said...
    /جهزوا اكياس/
    وكمان هيعبونا في كياس:((

    ياخرابي ع اللي هيجرالنا :D

    واستفادنا ايه احنا لما الدراسه اتأجلت ما كده كده هتبدأ وهيبقي نفس المشكله

    وبعدين ده الناس في الشارع اكتر بكتير من تجمعات الكليات والمدارس


    معاهم في ان الانفلونزا وباء وبينتشر
    بس الضحايا من المرض يتعدو ع الصوابع
    علي الرغم من ان الاحق بالاهتمام فيرس سي اللي الضحايا بتوعه ما يتعدوش


    سلام كبيييييييير :)
    وربنا يكفينا شر جميع الامرض والأوبئه
    !! a7mad sala7 !! said...
    صاحب رأى
    وانا اللى مفكرك مصاحب حد عدل :D


    مش عارف هياخدو مننا فلوس ولا لا ع الكمامات دى
    بس مجاتش عليها يعنى
    !! a7mad sala7 !! said...
    LOVE SPIRIT

    ههههههههههههههههههههههههههههههههههه

    عثل عثل عثل


    يا بن تالايه يا لذينه

    جايبه الكلام الكبير ده منين
    LOVE SPIRIT said...
    //جايبه الكلام الكبير ده منين//
    تصدق بالله معرفش
    كل اللى اعرفه انى كنت و ما زلت بعيط و لقيتنى بكتب كده فى حاله هيستريه لما ضحكت
    اذن من هذا الكلام
    فلقد اتيت بهذا الكلام من المنطقه المهستره فى عقلى
    سلام بقى اروح اصلى الفجر و ادعوالى عندى امتحان بعد كام ساعه
    LOVE SPIRIT said...
    ممكن طلب
    أرجوكم ما تأجلوش الدراسه
    نفسى نروح كلنا الكليه بقى
    دى حتى الكليه لذيذه قوى
    !! a7mad sala7 !! said...
    morgana

    ههههههههههههههههه
    ااااااه هيعبونا فى كياااس


    والسؤال ده نفس السؤال اللى سألته
    يعنى هما لا جهزو مصل
    ولا شافو حل

    هما اجلو الدراسة اسبوع
    ومعملوش حاجة
    !! a7mad sala7 !! said...
    LOVE SPIRIT

    //ممكن طلب
    أرجوكم ما تأجلوش الدراسه
    نفسى نروح كلنا الكليه بقى//

    وماله
    نكلملك السادة المسئولين
    والكاروه المسئولين :-j

Post a Comment



رسالة أحدث رسالة أقدم الصفحة الرئيسية

Blogger Template by Blogcrowds