مجـدى_الاخيــــرة

من الجزء اللى فات:
*/محمود: انتى عارفه قصدى كويس يا علا .. انا احق بيكي .. احنا بنحب بعض من زمان
هو ميعرفش عنك حاجة .. وانتى محدش يعرفك ادى .. ازاى منكونش لبعض
علا: ايه اللى انت بتقوله ده/*

علا: انت تنسي الموضوع دا خالص
ولو سمحت كفاية كلام فى الموضوع ده .. كده كتير اوى انا مش قادرة استحمل
ارجوك متتصلش بيا تانى .. وسيبنى فى حالى بقي
محمود: ماشي يا علا .. انا مش هضغط عليكي اكتر من كده
انا هسيبك لقلبك ولاحساسك .. وانا متاكد ان انتى مش هيهون عليكي كل اللى كان بينا بالسهولة دى
صح يا علا؟
؟
علا..
علا انتى بتعيطي؟؟ .. عشان خاطرى بلاش انا مبستحملش اشوف دموعك
يا علا..
غلا: حرام عليك يا محمود .. ليه وصلتنا للموقف ده .. انا عمرى عايرتك باى حاجة يا محمود
انا مش كنت دايما التمسلك العذر وكنت دايما واقفة وراك .. انا عمرى اتخليت عنك؟
حرام عليك نفسك وحرام عليك انا .. انا عذاب ضميري هيقتلنى
انت متخيل الوضع اللى انا فيه .. عمرك حطيت نفسك مكانى وعرفت انا عايشة ازاى
لو انت مبتنامش انا مبقدرش اغمض عيني
انا مبقيتش عارفه اعيش حياتى زى بقية الناس .. بفكر كل دقيقة وكل ثانية .. نفسي ارتاح زى بقيت البني ادمين
انا فكرت اموت نفسي عشان استريح من الدنيا باللى فيها..
محمود: لا
لا يا علا ابوس ايدك .. انا عايش بصوتك يا علا
مفيش حاجة مصبرانى ع الدنيا غير المكالمة بتاعتك دى
انا عارف انى بقيت انسان وحش وانا كاره تصرفاتى وفعلا مش طايق نفسي
بس مش قادر..
مش قادر يا علا اتخيل حياتى من غيرك
انا بعدك بقيت اضعف من اضعف بني ادم فى الدنيا .. انا مبقيتش محمود اللى تعرفيه ولا اللى اى حد يعرفه
بس لو شايفه ان انا مشكلة حياتك الوحيدة اعتبريني مش موجود
انا هختفي من حياتك يا علا
بس عشان انا بحبك .. مش عشان اى حاجة تانية
ربنا يوفقك يا علا..

علا عايشة اصعب ايام حياتها .. عياط ليل ونهار .. تعب وارهاق ومفيش نوم

علا: الو .. مروة معايا
مروة: ايوة يا علا مالك .. صوتك عامل كده ليه
علا: عاوزه اتكلم معاكى شوية .. ينفع؟
مروة: ايه ينفع دى يا علا .. احنا فى بينا الكلام ده .. ساعة وهكون عندك .. مع السلامة

مروة راحت لعلا

مروة: سلام عليكم .. ازيك يا مجدى
مجدى: اهلا ازيك يا مروة .. اخبارك ايه
واخبار الواد اللمض اللى فى بطنك هو وابوه
مروة: تاعبيني والله هما الاتنين :D
مجدى: هههههههه .. الله يكون فى عونك
مروة: علا جوا؟؟
مجدى: اه جوا اهى .. مش عارف مالها اليومين دول متغيرة خالص
مبتبطلش عياط ومش عاوزه تقولى فى ايه .. شوفيها كده يا مروة مالها
انا هنزل مشوار وجاى..

.
.
بعد ساعة كلام بينهم

مروة: انا مش قادرة اصدق اللى بسمعه
معقول؟؟
علا: انا خلاص مبقيتش قادرة استحمل
مروة: وليه يا علا وصلتى نفسك للموقف ده .. وانا كنت فين من دا كله
ليه مش بتحكيلي او تحكى لمامتك
علا: ماما لو عرفت حاجة عن الموضوع ده ممكن تروح فيها .. ارجوكى يا مروة انا كلمتك عشان نشوف حل
مروة: حل لايه يا علا .. الموضوع مفهوش تفكير
انتى متجوزه .. وجوزك ليه عليكي حق .. واظن انتى مشوفتيش منه حاجة وحشة لكل ده
علا: ربنا يعلم مجدى دا انسان طيب اد ايه .. وعمره ما زعلنى فى حاجة ولا خلانى محتاجه اى حاجة
مروة: مجدى بيحبك اكتر من اى حاجة فى الدنيا دلوقتى .. واظن مش من حقك انك تحطيه فى اى مقارنة مع اى حد فى الدنيا
موضوع محمود دا تنسيه خالص .. وتقطعى علاقتك بيه نهائيا
ربنا يعدى الموضوع دا على خير..

..
بعد يومين

مجدى: متعرفيش مروة هتجيب ولد ولا بنت
علا: لسه شوية مش هيبان دلوقتى
نفسك فى طفل يا مجدى
مجدى: طبعا .. هو فى اب فى الدنيا منفسوش يبقي ليه طفل .. مش محتاجه سؤال
.
.
مجدى بيتفرج ع التليفزيون

علا: مجدى..
مجدى: ايوة يا لولو
علا: انا بحبك اوى يا مجدى..
مجدى: :)
غريبة
علا: ليه غريبة؟؟
مجدى: اول مرة تقوليهالى صريحة كده :)
علا: هو انا محتاجة اقولك بحبك عشان تعرف انى بحبك يا مجدى؟
مجدى: لا طبعا مش محتاجة .. انتى كمان اغلى حاجة عندى فى الدنيا
علا: بجد يا مجدى؟
مجدى: ايه يا علا فى ايه .. ايه الكلام الغريب ده
علا: معلش محتاجة اطمن بس...

تانى يوم مجدى رجع من شغله ومستنى الغدا
علا فى المطبخ بتحضر الاكل

مجدى: يا علا..
يا علا موبايلك بيرن
راحت فين دى .. نامت جوا ولا ايه
يا علا..

مجدى طلع يشوف الموبايل
you have received 2 messages..
.
.
مجدى بيشوف الرسايل

MM:
علا انا مش قادر اعيش من غيرك
حاولت كتير والله بس مفيش فايدة

MM:
يا علا انا محمود .. معقول نسيتي اللى كان بينا بالسهولة دى

.
.
مجدى فى حالة زهول تام
مش قادر يتحرك .. ومش قادر يفكر .. حالة شلل فى النطق مفاجأة !!
.
.
علا طالعة من المطبخ بتبص على مجدى
علا حست ان فى حاجة .. علامات الصدمة بدأت تظهر على وشها

جريت على مجدى تشوف فى ايه
ماسك الموبايل فى ايده ومبيتحركش
عرفت ان فى حاجة جت من طرف محمود

..
علا انهارت من غير اى مقدمات .. ولا صوت يعلو صوت البكاء فى الشقة

.
.
مجدى قعد على كنبة الانتريه .. فاقد النطق .. فاقد الوعى تقريبا
باصص لعلا .. وعلا باصه فى الارض وبتعيط

مجدى: ليه؟؟
.
.

علا نزلت ع الارض تحت رجل مجدى
ومش عارفه تتكلم من العياط

مجدى: ليه كده؟؟
انا قصرت معاكى فى ايه؟؟
كان فى حاجة ناقصاكى؟؟

.
.
علا بصوت مختلط بالبكاء حكتله على كل حاجة

.
.
مجدى: طب وليه وافقتى عليا
بتردى اعتبارك لنفسك؟؟ .. طب وانا؟
مفكرتيش فيا
مفكرتيش فى اليوم ده
مفكرتيش فى حياتك اللى هتتقلب جحيم فى يوم من الايام

علا: يا مجدى انا والله حبيتكـ..
مجدى: .. بس .. متكمليش .. متجيبيش اسمي على لسانك
علا: لا .. يا مجدى والله ..

الكلام تاه من على لسانها
مجدى لسه على موقفه من الصدمة .. مش قادر يفكر .. مش قادر يتكلم .. والموبايل لسه فى ايده

علا: يا مجدى انا مستعدة اعيش تحت رجليك طول عمرى
انا غلطت غلطة كبيرة وانا عارفه كده .. بس انا كنت ضعيفة وكنت وحيدة ومفيش حد قالى اعملى ده ومتعمليش ده
انا عارفه ان ده مش مبرر .. وان انا ماتصرفتش صح .. بس انا ندمانة وعارفه غلطتى
والانسان ده بيطاردنى من زمان وانا مكنتش عارفه اتصرف ازاى
.
.
يا مجدى انا اخترتك انت
اه وربنا .. انا مش عاوزه غيرك
مجدى انت بتحبني .. صح؟
قول صح يا مجدى انا متأكده من كده
هنكمل حياتنا وهنجيب طفل صغير تفرح بيه زى مانت عاوز
وهتبقي اب .. صح يا مجدى؟
.
.
مجدى رد عليا ابوس رجلك .. انا بتقطع من جوايا
مكنتش اتخيل ابدا اننا نوصل لكده
يا مجدى طب قول اى حاجة
انت كرهتنى؟؟
طب انت مش عاوزنى تانى؟؟
اعمل ايه بس يا ربي..

.
.
عادل راح لمجدى بالليل

عادل: طبعا انا مقدرش اقولك كمل معاها او لا
بس كل اللى اقدر اقولهولك ان دى دلوقتى مراتك .. وانت بتحبها
واحنا بنى ادمين يا مجدى .. مين فينا مبيغلطش؟؟
وهى عرفت غلطتها وواضح انها ندمانة ..
القرار بايدك .. بس حاول تفكر فى بكرة شوية
انتو داخلين على سنة جواز .. وانتو اتعلقتو ببعض جدا
فكر يا مجدى .. بس فكر فيك وفيها .. فكر فى حياتك .. فكر فى بيتك .. فكر فى سمعتك
فكر فى حبك ليها .. فى تمسكها بيك .. زى ما هتفكر فى كرامتك وكبريائك
بس يا ريت تاخد قرارك بسرعة .. عشان تعرف هتكمل حياتك
مجدى
مجدى..

مجدى: ايوة سامعك .. سامعك يا عادل .. سامعك

.
.
مجدى عايش اصعب ايام حياته .. مبيبصش فى وش مراته
مجدى راجل شرقي وكلنا عارفين تقاليد الشرقيين وحكم دينهم
مجدى بيحب علا لحد النهارده .. وفى نفس الوقت مش قادر يرضي كرامته ويرد لنفسه كبريائه

.
.

مجدى محير بين امرين
يطلقها ... ولا يسامحها
ولا فى حل تالت ؟؟؟

لك ان تضع النهاية المناسبة :)

..انتهت..

12 Comments:

  1. MOROOOO said...
    انت كده عملت زى برنامج بين الناس بس فين بقى الراجل اللى هيقول الحل فين ؟؟ :D
    e_emy said...
    ايه النهاية دى )):

    بس بتهيألى الى بيحب بيسامح

    ف يكملوا بقى وينسوا الى فات (:



    حلوة جدااااا القصة (:
    morgana said...
    البت مروه دي اللي عاقله و زي العسل
    وايه الجديد ما كل المروات كده
    احم احم

    /مجدى محير بين امرين
    يطلقها ... ولا يسامحها
    ولا فى حل تالت ؟؟؟

    /
    احنا جايين نهدي النفوس بصراحه
    بس الراجل اتظلم معاها كتييير
    هو اي نعم لو طلقها هيهد بيته
    بس لو سامحها عمره ما هينسي انها كدبت عليه في يوم من الايام وخبت عليه حاجه زي كده وهيشك فيها في حاجات تانيه بعد كده وعيشتهم هتبقي نكد بردو
    خصوصا انه راجل شرقي ودي واحده قعدت سنه معاه بتفكر في راجل تاني ودماغها وقلبها معاه

    الست دي لازم تتقتل
    >:)
    !! a7mad sala7 !! said...
    موروو

    لااااا اله الا الله
    لما نحط نهاية من دماغنا ابقي قاسي ووحش

    طيب سيبتلك النهاية اهو
    حطى انتى النهاية المناسبة بقي

    ولا اجيب جمال الشاعر
    ولا اسمه ايه ده بتاع بين الناس :D
    !! a7mad sala7 !! said...
    ايمي

    يمكن
    دى وجهة نظرك
    او رد فعلك انتى

    بس بيتهيالى دى خيانة
    ودى بقالها سنة مقرطساه

    مش عارف بقي

    لكم الحكم ولى المشاهدة

    نورتيني :)
    !! a7mad sala7 !! said...
    مرجانة

    لا كل المراوى زى الفل :D



    وانا موافقك فى كل اللى قولتيه
    الا اخر سطر :D
    غير معرف said...
    هو ليه كل البنات اللى بتتطلع فى الاخر هيه اللى اتخلت وهيه اللى مش كويسه وهيه اللى اتخلت عن الحب وهيه اللى ضحت وهيه وهيه وهيه
    بجد ارحموا بجد حرام كل واحد لما بيجى يكلم بيكلم من وجهة نظره هوه بس ذى ما فيه الوحش فيه الحلو ومش كل حاجه نقول هيه هيه عايزه اشوف مره الراجل هوه اللى مش عارف يعمل ولا حاجه عشان يستمر الحب بالرزواج طبعا لازم زواج ولا هيه هتقضى حياتها كلها فى الحب من نظر الولد اه تقضى حياتها وتضحى عشانه طيب انت لو اختك هتعمل ايه ليه بننظر للموضوع انى انا وبس ليه مش بنعمم بجد حرام فى قصص كثيره الولد مش بيعمل حاجه سلبى يعنى بيقول انا حاولت كثير لا انت مش لازم تحاول كثير انت تحاول اكثر واكثر واكثر بالصبر والايمان هتيجى بس لما تتختار اختار صح وبعدين تعالى اتكلم مش تختار واحده مش بتحب الا نفسها وانتى مش تختارى واحد مش بيحب الا نفسه الحب ما فيش حد فينا لسه وصله ولما توصلولوا ابقوا اتكلموا عنه كفايه تجريح وقصص الكثيره اللى بتثبت ان المراه غداره ومش بتوفى بالوعد وخاينه الراجل برضه كده بس فيه ناس كويسه من الطرفين ولازن نراعى الظروف واحنا مش عايشين فى الدنيا لوحدنا عشان نتحكم فى قرارتنا اى بنت نفسها تكون ححياتها مع زوج واولاد اكثر من الولد وطبعا بتتمنى انها تحب ويبدا بالزواج مش ينتهى بس احيانا بيستمر واحيانا لا اولا واخر ده نصيب واكيد ربنا شايلهم الخير بس مش معنى كده انها مش كويسه او انه مش كويس بس بجد ارحموا من فى الارض يرحمكم من فى السماء
    اسفه للاطاله
    Cave Man said...
    وعيد ميلاد الليله مين
    ؟؟؟
    ؟؟
    ؟

    وخلص الفيلم والبطل مجاش
    ايه يا عم انت العك ده
    انا مش متأثر خالص
    بص يا ابو صلاح
    هكلمك كلام دبلوماسي
    انا اتحطيت مكان كل واحد من شخصيات القصه وانا بكتب الجزء بتاعي
    اي نعم انت عدلت فيها بس انا تقريبا ممكن اخمن كل واحد بيفكر ازاي
    هو ممكن يسامحها هنا
    لانه شكلها مش فارقه معاه حياته بعد ما امه ماتت واتجوز جواز صالونات
    وحياته كانت مع الاخت علا كانت مش قد كده يعني
    اعتقد بعد ما اتزللت ليه كده ممكن يسامحها
    ده مجدي

    انما نبعد عن الدبلوماسيه شويه
    ونروح للواقعيه
    لو انا مكانه بقي
    لو هيا طلبت مني اني اسامحها
    هطلقها
    وده عندي اكتر درجات السماح في موضوع زي ده
    دي تتزنق في ركن في البيت وتقعد تسك فيها لغيت ما يبان ليها صاحب
    حتي لو ظهر ليها صاحب هيضرب مع مجدي
    اعتقد ان الحياه وقفت هنا
    خلاص وانا هقعد كل شويه اشك فيها واقعد افكر وانا في الشغل
    لاء ... بناقص
    الطلاااااااااااق ... ابغض الحلال بس هو الحل
    وعمي مأزون وهيخلص واحنا واقفين

    بس احنا يا ابوصلاح كنا عاوزين نشوف بعد الطلاق ايه اللي هيحصل
    انت كده وقفت في نص القصه

    انا كنت كاتب عندي انها هتبقي حامل في نفس الوقت اللي راحت تكشف فيه مروة
    وبعد كده
    كنت انت كتبت قصه تانيه خالص والناس مشيت معاك فيها
    وفي الاخر يطلع ده تخمين علا للاحداث اللي بعد كده
    شفت فيلم الفرح ... زيه كده
    او الفيلم بتاع الواد كيف مان اللي قعد يسرح بيهم وفي الاخر قالهم دي قصه انا قاريها وكنت بشتغلكوا
    اي نعم هو مكنش بيشتغلهم ... بس هو زي ما قدر يقنعهم بواقعية القصه قدر يقنعهم انها مجرد قصه
    المهم
    كنت انت سرحت في لو انها اطلقت من مجدي واتجوزت السيد محمود
    وشافت العيشه معاه
    هههه
    عشان تعرف ان في ايديها كنز اسمه مجدي
    اصل القرموطي قالها حكمه
    الراجل مننا لما بياخد اللي عاوزه من المزه بتاعته بيركب جناحات ويطير
    اصل اللي اي حد بيحلم بيه مبيستمرش اكتر من سنتين والكلام ده موثق من ناس كتيييييير
    يمكن في حد يضرب رقم قياسي وتفتح معاه لــ 3 سنين بس مش هتدوم للابد
    بس بردوا كيف مان اداني حل كويس جدا لكسر اي حالة ملل ممكن تمر بيها في حياتك ... نبقي نطبقها ونشوف كده


    المهم
    ان القصه خلصت
    ومجدي طلق علا
    وعلا اكتشفت بعد الطلاق انها حامل ولما مجدي عرف كده
    رجعها تاني
    ومحمود اخته ماتت ولانه كان مرتبط بيها قرر يسيب مصر خالص بكل مشاكلها
    وسافر بره
    واتجوز وبعد 7 سنين اتقابلوا في فرح واحده صاحبتهم من ايام الكليه
    وكان كل واحد مستريح مع طرفه التاني
    ومشيت الامور طبيعي جدا
    وعاشوا في تبات ونبات وخلفتهم كانت كلها بنات

    هههههههههههههه
    ادي قصه مش متشائمه اهي

    يلا تقبل سلامي
    وعقبال العمل المشترك اللي ما بينا
    وابقي وريني نفسك
    ت ح ي ا ت ي
    !! a7mad sala7 !! said...
    الغير معروفة

    ههههههههههههههههههه
    كنت حاسس والله ان فى حد هيقول كده :)

    بصي يا ستي
    انا والله ماقصدش ان البنت هى اللى تطلع وحشة فى الاخر او ان تبقي هى السبب
    بس هو السيناريو بييجي كده

    وبعدين حتى لو دى وجهة نظر حد معين
    فهى مش على كل الناس
    ولا عمرها هتتعمم
    مين قال ان المرأة غدارة والكلام ده
    دى مجرد قصة .. قصة من ضمن قصص فى الحياة
    لا مقصود بيها راجل ولا ست
    مجرد سيناريو وكانك بتتفرجى على مسلسل
    ولا بوصل بها وجهة نظرى ولا بفرض رأيي على حد
    كل اللى ليا دخل فيه هو النهاية
    المشهد الاخير اللى بحط فيه رد فعلى انا
    وكمان لغيته من القصة دى


    ههههههههههههههههههه
    ارحم مين بس انا مش فاهم
    هو انا رميت حد بالباطل
    ولا اتكلمت عن حد بعينه؟؟
    دى قصة


    خلاص ليكي عليا يا ستي القصة الجاية هطلع الراجل هو اللى خاين وغدار ويستاهل ضرب النار

    بس طلب صغير منك تسيبي فواصل بين الجمل كده
    او حتى خليها بنظام سطور
    عشان عيني وجعتنى والله عشان ارد على الكومنت بتاعك ده :)
    Cave Man said...
    النبي يا شيخ
    احياة عيالك ...متولعاش
    .
    .
    .
    يا راجل ايش حال لو مكنتش محلفك بعيالك
    !! a7mad sala7 !! said...
    محمد صلاح

    لا انا مبحبش الدبلوماسية
    خلينا واقعيين


    وبعدين الكلام اللى انت بتقوله ده مكنتش قولته قبل كده
    انت كنت واقفتها على انها حامل
    وعملتلى خازوق فى القصة وسيبتها

    لكن لو قولت كده كان ممكن ماشي

    بس انا كان فى دماغى سيناريو
    زى ما عملته كده
    انت غيرت فيه حاجات بسيطة

    يالا ما علينا
    اهى قصة وانتهت
    ولو عايز تعمل جزء تانى ليها
    اتس اب تو يو

    وان شاء الله فى الاعمال المشتركة نبقي نعمل جديد
    غير معرف said...
    mohammed sala7



    على فكره هى دى احلى نهايا اللى عايز ينهى القصه ينهيها بالنهايا اللى هوعايزها



    عشان كل واحد بشخصيتو

    يعنى انا لو مكان مجدى كنت سامحتها


    وكفايا انها هاتعيش مزلوله ليه طول عمرها


    بس برضو دى غلطت مجدى المفرود كان لازم يحس ان فى حاجه فى حياتها ا


    الواحد لما بيعرف واحد ومجرد انو يتكلم معاها بيعرف ايه اللى فى قلبقها


    مابالك ان دا جوزها




    يعنى عايشا معاها


    حتى لو هى انطوائيه بتبان فى كل حاجه



    اما عن علا

    الفرق بين مجدى ومحمود



    ان حب محمود هى اختارتوه
    اما حب مجدى اتفرد عليها



    وفى كل الحلات الاتنين غلطنين


    اولا مجدى انو محولش يقرب منها ويفهما كل هامو انو يتجوز وخلاص





    وهى لو انسانه وحشه كانت اتغيرت مع جوزه وهى طلبت الطلاق بس هى انسانه كويسه



    ولو غلطت انها كلمتو هو يعقبها على الحاجه دى



    بس ميسبهاش هى هاتتدمر من بعدو




    بس برضو الغلط من البدايه من مجدى

    مش منها

    هى قفلت مع محمود وهو اللى ابن تيت رخم ورزل



    ومجدى كان لازم يعوضها عن محمود وابو محمود



    هو دا رايى فى القصه


    لو احنا مشينا بتفكير الطلاق يبقى نص جوازت مصر هاتبوظ


    عشان معظم الجوازات بقت كده

Post a Comment



رسالة أحدث رسالة أقدم الصفحة الرئيسية

Blogger Template by Blogcrowds