نــااااس

بنقــابل نااس
ونفــارق ناااس
ومش قادريــن ننسي اللى كــان
!!!

===============

اللى عايز اقوله
انك ممكن تنسي ناس .. بس متنساش حاجة معينة عملوها .. تبقي فاكر الموقف ومش فاكر تفاصيل البني ادم اللى مشترك معاك فى الموقف
ودا اللى بيخليك تفتكرهم

القصد انك ممكن تفتكر ناس من مجرد حدث معين دار بينك وبينهم
ايا كان الحدث بقي .. حاجة كويسة او وحشة
فى حين انك ممكن تنسي ناس تانية ظهورهم فى حياتك كان افضل كتير من غيرهم
بس انت منسيتش غيرهم دول رغم ان ظهورهم فى حياتك كان مش مريح بالنسبالك
بس هى الدنيا كده

ان صح التعبير هى الذاكرة كده

روح على جنب تانى
ممكن ناس شوفت منهم حاجات وحشة كتير يشغلو تفكيرك اكتر بكتير من ناس شوفت منهم حاجات كويسة
مش عشان انت وحش ولا ندل
بس هى كده غصب
تلاقي عقلك بيودى ويجيب فى حاجات كانت رخمة بالنسبالك اوى
اكيد انت مش عايز تفتكرها .. بس هى بتيجي فى بالك غصب بردو

فى حين ان ناس تانية كانو كويسين معاك اوى ولا يزالو
بس بردو مش شاغلين حيز كبير من تفكيرك
دا بردو مش عيب منك انت ولا ندالة
بس هى فعلا بتيجي كده

يمكن عشان انت متعود منهم على كده !!
يمكن عشان هو دا اللى المفروض متعارف بين البني ادمين .. فى العلاقات البشرية يعنى (الفطرة فى الخير)!!

بس اللى عايز اقوله انه مش عدل ابدا
ان عقلك وتفكيرك تتحكم فيهم ذكرى مش كويسة بالنسبالك فى حين انت اولى بذكرى حلوة تديك امل فى اللى جاى !!

19 Comments:

  1. ShiMOo said...
    انا معاك في كل كلمة قلتها وبصراحه البوست فعلا استفزني لاني حسيت بيه واكيد مش انا بس كلنا بيحصل معانا كده بس تفتكر ده ظلم لمين ؟ للناس اللي سابت اثر حلو في حياتنا وماخدتش حيز كبير من تفكيرنا وناس تانيه سايبين لينا ذكريات وحشه ومع ذلك بنفتكرهم ونفكر فيهم اكتر ؟ ولا لينا احنا علشان غصب عنك مواقف وناس وحاجات كتير بتفكرك بذكريات وحشه كانت في حياتك ونفسك تنساها ومتفتكرهاش في حين ان في مواقف حلوه بتعدي علينا ومش بفتكرها كتير بعدها ؟
    وتفتكر برده ايه الحل ؟
    نفضل طول عمرنا نفتكر حاجات ضايقتنا وكل ما نفتكرها نتضايق اكتر !!!
    ولا نمسح ذكرياتنا الوحشه بأستيكه !!!

    والله حاجه تحرق الدم )-X
    star in the sky said...
    صححححححححح اووووووووووووووى

    تعرف احيانا نقعد نفسك ف حاجات وحشة وناس اذاتنا ومضيقانا فى حياتنا ونقعد نقول عايشين لوحدنا والناس كلها بتخون الثقة ومفيش صحاب بجد ويقعد يفكر فى كل مواقف الفشل وكل الناس اللى كانت سبب
    ويهدم حياته بايديه محدش مسئول عن فشل او نجاح حد ولا عن سعادة او رضا حد
    واحيانا فى ناس بنربط بينها وبين حاجات وحشة حصلت لنا لما بشوفها ونفضل بعدها متضايقين مش ضرورى نبقى على طول فاكرينها وتبقى شاغلة بالنا

    بس التسامح بيخلينا ننسى كل حاجة وحشة او ناس مضيقانا فى حياتنا ونتعامل معاهم بشكل طبيعى ونعيش حياتنا برضا عنها وباستقرار اكتر
    ShiMOo said...
    @ Star in the sky

    بس مش دايما بتبقي قاصده تفتكري كل حاجه وحشه مريتي بيها
    ساعات كتير اوي بتفتكري غصب عنك من مجرد كلمة تتقال قدامك او موقف مشابهه
    او حتى اي موضوع يتفتح يفكرك بحاجه قديمة ضايقتك في يوم
    بس ده ميمنعش ان في ناس كل هوايتها انها تفضل تعيد وتزيد وتفتكر حاجات ضايقتها واثرت فيها بالسلب ,,, بس دي ناس مش عايز تنسى وده عيب فيها
    على العكس في ناس بتبقى نفسها تنسى بس مش عارفه

    وعلى فكره ساعات بتبقي مسامحة من جواكي وبرده لما تفتكري بتضايقي
    وساعات غصب عنك من جواكي بتبقي مش مسامحه وبرده بتضايقي لما تفتكري



    سوري يا احمد اني رديت عليها كده من غير استئذان
    بس بصراحه كانوا كلمتين محشورين في زوري ,,, ابلعهم يعني !!!
    هههههههههههههههههه
    ستيته حسب الله الحمش said...
    الأسرع ان نتذكر شيء علم علينا
    اصلنا نكديين
    البني ادمين كائنات عاطفية مهما انكروا

    وايه ها يعلم على روحنا وقلبنا اكتر من ذكرى وحشة لإنسان أوحش
    كنا نتمنى لو ربنا خفاه قبل ما نشوفه ويعلمنا جزء من ندالة الدنيا ويعلم على الروح ويخط صفحة سودة جوانا؟
    Imagine That said...
    اولا احب اشكر الاستاذ البني ادم اللي كبر الخط
    لاني بعدت 5 متر عن الجهاز عشان اعرف اقرا
    ثانيا
    سيبك من البوست وخليك معايا
    في مقوله بتقول
    what is go up comes down
    بمعني
    اي حاجه هتحدفها لفوق اكيد الطبيعه هترجعهالك تاني من نفس نوعها ومساويه لها في القيمه
    اللي هيا لكل فعل رد فعل
    ماشي يا ديفيدي -سيدي CD-
    بردوا مش فاهم
    هبسطهالك
    يعني لو انت زعلان هترمي للطبيعه زعل
    هترد عليك من نفس النوع اللي انت بعتهولها
    جميل
    يعني استحاله تكون زعلان وعقلك يفكرك بيوم عيد مثلا
    حتي لو فكرك بيوم عيد
    هيختار اسوء عيد مر عليك في حياتك

    لو انت فرحان استحاله هتفتكر حد افتقدته
    حتي لو افتكرته هتفتكره بالخير
    يا ابو الخير

    وبما ان كل انسان مخير في تفكيره
    وهو اللي بيوجهه للاتجاه اللي هو عاوزه
    فالانسان هو من يسخر عقله ليتذكر ما يشاء
    العقل لا يفرض عليك اي فكره انت مش عاوزها

    اكيد اللي اقصده وصلك انت بالذات

    اذا فلنذهب ورائهم الي يثرب
    س ل ا م ي
    star in the sky said...
    اممممممم
    معتقدش ان الناس دى هواية عندها تنكد على نفسها و تقعد تفتكر كل شوية حاجة تضايقها
    بس يمكن اللى شافته فى حياتها كان كتير لدرجة خلتها تشوف الحياة كده دايما ومتصدقش ان فى خير او فى حاجات كويسة لسة موجودة فى الحياة حواليها

    ان الواحد يسامح ده بيخفف عنه اللى حصل له ومع الوقت هينسى حتى لو كان بيضايق فى الاول
    e_emy said...
    هو مش عدل ..

    بس حاجه مش بأيديك ان تفتكر ايه وتنسى ايه ..

    بس بتهيألى الظروف الى حواليك و مودك هو الى بيترب عليه الذكريات الى تفتكرها ..

    لو مبسوط هتفتكر كل حاجه حلوة لكل الناس ... زعلان بقى كل ذكرى وحشه هتطلع

    بوست حلو (:
    !! a7mad sala7 !! said...
    ShiMOo

    طالما رديتي يبقي استفذك فعلا :D

    على فكرة دا مبيحصلش للناس كلها
    مش كل الناس بتفتكر بنفس الكيفية .. فى ناس بتنسي بسهولة جدا .. او بمعنى اصح مبتحطش فى دماغها

    بس اكيد الحكاية دى لو فيها ظلم يبقي ظلم لنفسك مش لحد تانى
    حتى بحس ان الناس اللى مش واخده حقها دى مبتبقاش حاسه بالحتة دى اوى

    بصي هو كل حاجة بتتنسي
    بس هى بتفرق من حد للتانى فى الوقت
    دا بينسي امتى ودا بينسي امتى
    دا بياخد وقت شوية عشان ينسي لكن دا دماغه بتهوى على طول مش بتفرق معاه

    طبيعة حياة كل انسان بتفرق بردو
    فى ناس حياتها منطوية شوية
    عيشتها بتتمثل فى عدد معين من الناس
    بيأثرو عليهم تأثير زايد شوية
    غير ناس تانية اجتماعيين زيادة ومعارفهم زيادة
    ومع مواقف الحياة بينسو بردو بشكل اسرع شوية

    بس عايز اقولك مفيش حاجة اسمها نمسح ذكرياتنا باستيكة
    محدش بيقدر يعملها دى لانها مش بمزاج حد اصلا
    هى طبيعة بشرية كده ولان الانسان عاطفي بفطرته زى ما الدكتورة ستيتة قالت

    متحرقيش دمك انتى بس وقومى اعمليلك واحد لمون :D
    !! a7mad sala7 !! said...
    star in the sky

    ايوة محدش مسئول عن حد فى حاجة
    بس فعلا اللى بيفتكر حاجة زى كده مبيبقاش فى مزاجه
    اينعم فى ناس طبعها كده انها مبتريحش نفسها
    او بمعنى اصح دماغهم بتقلب فى القديم عمال على بطال
    بس ميمنعش ان دى بتبقي حاجة غصب بردو
    طبع فى الانسان ده مش فعل مقصود منه

    وبعدين عايز اقولك حاجة
    العفو والتسامح والمفاهيم اللى شبه دى كلها دى صفة الاهية
    ربنا لوحده هو اللى قادر يسامح حد بشكل مطلق

    الصفات دى بالنسبة للبني ادمين نسبيه
    وكمان بتختلف من شخص للتانى
    مفيش اتنين فى الدنيا ليهم نفس القدر من التسامح
    بتبقي هبه من عند ربنا لناس معينة انها تنسي بسرعة او تسامح بسرعة او متشيلش فى قلبها
    غير ان فى حاجات فعلا مبينفعش فيها العفو المطلق ده او التسامح الكامل يعنى
    بتبقي بردو معلمة جوا الانسان او محفورة زى ما بيقولو
    تيجي تبصي عليها كده تفتكريها

    وزى ما قالت شيمو فعلا ممكن تبقي انتى مسامحة من جواكى بجد بس بردو لما بيحصل موقف ادامك بيفكرك بحاجة معينة او بموقف معين بيضايقك انت لنفسك
    مش بيزعلك من الانسان اللى كان ضايقك
    !! a7mad sala7 !! said...
    شيمو

    ولا يهمك يا سيدي
    حرية الرأى والتعبير هنا مكفولة للجميع
    المهم بس تسددى الضرايب بتاعة الحاجات دى
    ولا يعنى تبلعى الكلمتين؟؟ :P
    !! a7mad sala7 !! said...
    دكتورة ستيته

    هو دا فعلا بيبقي اسرع حل
    انك تتعلم جزء من ندالة الدنيا :D

    بس اكيد ربنا خالقنا فى احسن صورة كده من برا ومن جوا
    وله فى ذلك حكم :-??
    !! a7mad sala7 !! said...
    محمد ابوصلاح

    والله يا عمنا الخط كبر لوحده كده وحلف مية يمين انه ما يصغر
    بحاول فيه من امبارح
    لسه ربنا هادية من شوية بس

    معاك انك لو زعلان هتفتكر الحاجات اللى بتزعل بس
    بس بردو احيانا مش بتبقي زعلان .. بالعكس بتبقي فى حاله استقرار نفسي
    وتهف عليك رياح الذكرى ترمى عليك شوية زبالة ريحتها وحشة
    تعالى معايا بس من جنب المقلب ده


    بتبقي حاجات كده لا اراديه
    وزى ما قالت شيمو بيبقي موقف بيعدى عليك
    موضوع بيتفتح ادامك بيلمس فيك حتة معينة فى ماضيك
    يرجعك للموقف بقي بحزافيره

    يعنى مش شرط انك فرحان او مستقر نفسيا ان كل تفكيرك يبقي فى حاجات مفرحة

    الاحساس ده بيبقي متفاوت من انسان للتانى
    يمكن تبقي انت شايف انها حاجة ملهاش مكان التفكير فيها فى عقلك
    بس بالنسبة لغيرك بتبقي سؤال اجبارى على عقله

    لسه عند اعتقادى انها مسالة وقت
    دا الفرق بين حد والتانى
    لكن النسيان ده شيئ مفروغ منه
    لان فعلا النسيان ده نعمة من عند ربنا

    انا فاهم قصدك كويس
    مش محتاج تشرح يابوهم

    ويالا جهز الجمل انا جاى وراك اهو ;)
    !! a7mad sala7 !! said...
    star in the sky .. one more time

    هى مش بتبقي هواية
    هو بيبقي طبع
    واكيد الطبع مش فى انك تنكد على نفسك
    الطبع فى انك تفتكر بس
    يعنى هى ميزة وعيب فى نفس الوقت

    عيب فى الحتة دى
    وميزة فى انك تبقي على تواصل مع ناس تانية كويسين معاك فى المعاملة من زمان

    زى ما قولتى كده هى مع الوقت دى

    هى الساعة معاكى كام دلوقتى :)
    !! a7mad sala7 !! said...
    e_emy

    مش عارف ليه بتبسط لما بشوف كومنتك
    حتى لو مش كاتبه حاجة

    متعرفيش ليه؟ :D

    حتة انها بتبقي ظروف او طبيعة المعيشة دى كنت لسه بتكلم فيها فوق
    فعلا اكيد دى ليها تأثير كبير

    زيادة عليهم كمان طبيعة الشخص نفسه
    لو كان اجتماعى ولا منطوى
    معارفه كتير وحياته بتلهيه شوية ولا معرفته محدوده والناس المحدودين دول بيأثرو عليه بشكل اكبر شوية
    لان لما بتقسم حاجة على 5 غير لما بتقسمها على 10 مثلا
    بتفرق فى الاهتمام والتركيز

    دى بتبقي سلبية اوى بردو على الناس المنطوية شوية
    بتلاقي ناس معرفتهم من الناس قليلة اوى
    فلما بيلاقي حاجة وحشة من حد معين بيعتقد ان الناس كلها كده
    لانه بيحكم على الناس كلها من خلال زاوية صغيرة
    او شباك صغير بيبص منه ع الدنيا
    فبيعمم الحكم على الناس ودى بتديله انطباع وحش عن ناس هو ميعرفهمش اصلا ولا يعرف طبعهم ايه

    البوست حلو بمشاركتك يا سيدي
    نورتى :)
    morgana said...
    هو الواحد ساعات بيبقي مضايق فبيبقي مستني حد يقولو مساء الخير بس عشان يطلع فيه
    حتي مبيستناش يفتكرله حاجه حلوه ولا وحشه

    بس في الاخر حتي لو الواحد كان كده في فتره بيرجع في كلامه بعدها بشويتين وبيفتكر ان الشخص ده اكيد عمله حاجه كويسه في حياته
    !! a7mad sala7 !! said...
    طب ساعات بقي بتفتكرله من غير ما تشوفه اصلا
    من غير ما ييجي يقولك صباح الخير
    هى بتبقي حالة كده وبتهف ع الواحد
    الجنونة دى ولا ايه :D

    بس اكيد طبعا انت مش هتفتكر لحد حاجة وحشة الا لو كان ادامها حاجة حلوة قبلها او بعدها
    والا مكانش هيعلق فى دماغك اصلا

    ولا ايه يا مورجن ..
    e_emy said...
    //
    مش عارف ليه بتبسط لما بشوف كومنتك
    حتى لو مش كاتبه حاجة
    //

    ربنا يخليك (:

    وانا كمان ببقى مبسوطه جداا لما بدخل هنا..

    شكراا جداا
    !! a7mad sala7 !! said...
    لا بجد دى مش مجاملة

    يا رب يكون البلوج بيديكي انطباع كويس
    زى مانا واخد كده :)
    日月神教-任我行 said...

Post a Comment



رسالة أحدث رسالة أقدم الصفحة الرئيسية

Blogger Template by Blogcrowds