علمى ولا ادبي ؟؟

بعد ما خمنا .. ووشوشنا الودع
واللى قال وجهة نظره فى الكلمتين اللى فاتو
اخش انا بقي بوجهة نظرى

معروف طبعا ان التعليم عندنا فى الثانوى _وهو مش فى الثانوى بس يعنى_ ياما علمى يا اما ادبي
ظاهرة بقي حاسسها من ايام ما كنت فى ثانوى
ليه بحس ان ادبي دى شتيمة ؟؟

ليه لما تيجي تتكلم عن حد
تقول دا ثانوى .. ومبيزاكرش
يقولك يا عم عادى دا ادبي ؟؟
ليه لما تيجي تسال واحد كان مستواه حلو فى التعليم وتعرف انه ادبي
تقول ايييييه؟؟ .. ادبي؟؟ :O
وكانه عمل جريمة
يا عم دا ادبي والله عادى .. مش معهد الرقص الشرقي

ليه لما تلاقي واحد كده تيجي تسأله انت دخلت ايه
يرد عليك وهو مدلدل راسه كده .. وتبدو عليه علامات الحزن والاسي
ويقولك دخلت ادبي :(
وكأنها وصمة عار ؟؟ .. زى اللى تيجي تساله زمان خلفت ايه يقولك جبت بنت :(
نرجع لموضوعنا ..

طب ليه بقي دى نظرتنا للادبي على انه مستوى متدنى من التعليم
او كأن هرم التعليم الثانوى انه الدبلومات والمدارس الداخلية وبعدهم الادبي العام وعلى قمة الهرم العلمى بقي
دول الكريم شانتيه بتوع البني ادمين

مع ان لو حسبتها صح هتلاقي ان مفيش فرق
بتوع الادبي بياخدو دروس ويحفظو ويصمو
وبتوع العلمى بردو بياخدو دروس ويحفظو ويصمو
بس الفرق بقي ان بتوع علمى دول قدرتهم على الصم اعلى شوية .. يا جااااامد انت يابو 95% ;)
يعنى انت بتحفظ كويس وبتدش كويس وذاكرتك حلوة كده .. هتخش ترمى الكلمتين اللى حفظتهم فى ورقة اجابة وتطلع تجيب درجة حلوة
وتبقي بنى ادم حلو كده وتخش كلية من كليات القمة .. قمة اه :|

بتاع الادبي ده بقي مستهتر شوية ومقضيها طول السنة قهاوى وبلاى ستيشن وبلياردو
فده مبيصمش اوى بقي وبيخش يكتب الكلمتين اللى فاكرهم وخلاص ويطلع يجيب درجة وحشة
ويتقال عادى مهو ادبي .. هو دا الرينج بتاعهم .. ويخش كلية كوخه الناس بتقول عليها يع

واحد هييجي يقولى ايه
يا عم دى مناهجهم كلها حفظ .. ومبيشغلوش مخهم خالص
بيدشو الكلام ويروحو يكتبوه
طب يابنى يا حبيبي لما هو كده بياخدو دروس ليه
متقعدت تحفظ فى بيتكو .. تشترى اى مذكرة من بتوع الجهابزة اللى عارفين الامتحانات بتيجي ازاى
هو الحفظ محتاج ايه غير كده

واحد تانى ييجي يقولى لا يا عم العلمى غير بردو
ناس دماغها عالية ودا قسم الفهم وتشغيل المخ
يابنى انت بتقول لمين الكلام ده .. ماحنا كنا ثانوى وعارفين الدنيا ماشية ازاى
هو احنا نازلين من القمر ع الكلية
بتروح الدرس يقولك خد ام القاعدتين دول احفظهم
وادى الاسئلة المتوقعة فى الامتحان .. لن يخرج عنها الامتحان .. يا فرحتى
حتى الرياضة والاحصا بقو يديوهم مسائل يحفظوها
انا افتكر ايام ما كنت فى تالتة .. كان امتحان الاحصا جاى سم _هما بيقولو كده_
بقيت قاعد فى اللجنة الناس عمالة تشد فى شعرها .. واللى ينفخ واللى يكسر فى القلمة
واللى عمال يطلع برشام .. يخرب بيتك يا شيخ هتغش ايه دى رياضة
بس هو معتقد انه هيفتح البرشام يلاقي الاجابة مثلا
وسيبك من كده .. بقي هو دا اللى جايب 93% فى تانية مثلا
وكمان كام شهر هيبقي مهندس اد الدنيا
مش عارف يتصرف فى مسألتين رياضة
ويطلعو يقولو الامتحان صعب .. احنا مخدناش الحاجات دى
دا ليه .. لانه متعود يحفظ ليس الا

انا مش هنكر ان فى ناس مخها نضيف فعلا وبتحل وتتفوق
وان فى مدرسين بيركزو على ازاى تعرف تفكر تحل .. مش ازاى تعرف تحفظ عشان تجيب درجة
بس دول قليلين اوى .. والدليل اننا كل سنة بنلاقي الناس عمالة تنتحر .. واللى تتشحتف واللى يغم عليها
وعربيات الاسعاف بتعمل سبوبة حلوة يومين الامتحانات دول

ويقولك اه يا عم دول علمى
اما دول بقي ادبي ياااااى .. دول حسالة المدرسة .. وبقايا الطلبة

يا سااااااادة التعليم فى مصر حفــــــــظ

هتقولى علمى .. هتقولى ادبي .. السياسة واحدة
صم اكتر تجيب درجات اكتر

انت يابنى يا بتاع ادبي خد احفظ سطرين التاريخ دول
وانت يابنى يا بتاع علمى خد احفظ القاعدتين دول .. وشوية اسئلة علل فيزيا .. وشوية معادلات الكيميا دول .. على كام مسئلة
وظبط نفسك يا معلم .. ويطلع يقولك انا علمى

قيس بقي على الكلية .. المستوى الاعلى شوية
هتكلم عن كليتنا احنا .. احنا عندنا قسمين .. علوم حاسب ونظم معلومات _للى ميعرفوش_

تعالى بص على طالب تانية بقي اللى عاوز يختار يا عيني
يمسكوه المقربين من ذوى الخبرة
يابنى خش علوم .. دى اسمها علووووووووووم .. وكأنه بياخد سكاشنه فى المختبر
يابنى احنا اللى بناخد الاسس .. احنا لب الكلية .. احنا اللى بنينا السد العالى :D
هتخش نظم .. دى ادبـــــــــي .. بعد ما كنت علمى اد الدنيا فى الثانوى .. وجبت 95% جاى تضيع نفسك يا عبيط
دول مبياخدوش حااااااجة .. وكل حاجة عندهم حفــــظ

والواد يا عيني يتخض .. يقولك ادبي؟؟ .. لااااااااا ادبي لا .. وكأنها الحقنة ال13 سنتى

تعالى احسبها بالراحة كده
بتاع النظم بياخد ايه .. مبياخدش حاجة ماشي .. انا موافقك .. بالنسبالك مبياخدش حاجة
بياخد كلام يحفظه ويرصه فى الامتحان وخلاص على كده .. يطلع مش عارف حاجة

انت بقي يا بتاع علوم بتاخد ايه
بتاخد حبة الجورزمات تحفظها .. شوية كونسبت على اسمبلي
تحفظـــــهم بردو وتمتحن فيهم .. وتطلع تركنهم جنب اخواتهم
حتى الاسمبلي اللى فيه شوية شغل .. لما الامتحان بييجي تقيل شوية
وتقيل دى بمعنى انها حاجات مخدوهاش بالنص فى المحاضرات
يعيطو ويصوتو ويقولك الامتحان صعب .. احنا مضطهدين .. احنا بيفترو علينا
يابنى يا حبييب قلبي مانت اللى اخترتها .. هو حد كان ضربك على ايدك
يعنى انت عايز تاخد اسمبلي تحفظهم وتروح تمتحن فيهم .. مهى طبيعة المادة كده
عشان تدور وتدرب نفسك وتشغل دماغك .. لا هما علمى بدماغ ادبي
قصدي علوم بدماغ نظم

هديك دليل كمان .. لما تروح تسال حد منهم على حاجة اخدوها الترم اللى فات .. يقولك لا والله معلش اصلى نسيت _ ايوة ماحنا بناخد نفس المواد تقريبا :D تصدق؟؟_ لانك لو مكنتش حافظه مكنتش نسيته يااا .. يا علوم

يعنى هو خد نت ورك وذكاء اصطناعى الترم اللى فات تاخدهم انت الترم ده .. انت خدت بي اتش بي وداتا بيز الترم ده ياخدها هو الترم الجاى .. وبنظام نلف حوالين بعض بقي .. غير المواد المشتركة اصلا
نسيت ايه بقي .. مانت نسيت اللى كنت حافظه .. واللى انا هحفظه وانساه الترم الجاى بردو

بس انت اتنفخت فى الامتحانات وجبت تقدير تعبان .. لانك علوووووووم .. انت التوب بتاع الكلية .. انت وانت .. وانت اللى هتعيط فى الاخر
وهو اللى جاله امتحان سهل بقي وجاب تقدير عالى .. لانه نظم .. ادبي يعنى .. هو اللى بيحفظ وخلاص يا عم .. راعيه بقي على اد تفكيره .. وهو اللى هيضحك عليك فى الاخر بقي :D

وبعدين اصلا لو بصيتلها من فوق شوية
هتلاقي ولا اللى هما بياخدوه بيفيد .. ولا اللى بتوع نظم بياخدوه بيفيد
مناهج ملهاش اى علاقة بالشغل الخارجى .. ولا هتفيدك فى حياتك العملية خالص

هتقولى بس بتوع علوم بياخدو فكرة شوية .. بياخدو فكرة عن ايه اصلا
دول بياخدو الفكرة غلط اساسا .. لانه بياخدو الفكرة يحفظوها .. مش يطبقوها
والفكرة اللى بياخدوها بيسيبوها فى ورقة الامتحان قبل ما يروحو

طب مانت زيك زي بتاع الادبي بالظبط .. اللى هو بتاع النظم يعنى
فرقت ايه عنه؟؟
متقولش مفرقتش .. لانك فعلا فرقت

بس عارف فرقت ايه بقي؟؟
فرقت انك حرقت اعصابك طول السنة .. وربيت لنفسك الخفيف
وعشت سنتين فى رعب .. وحفظ وطحنت نفسك
وفوق كل ده مجيبتش تقدير عدل فى الاخر .. اللى بيجيبه بتاع نظم بمجهود مزاكرة 3 ايام

روح بص على نتيجة نظم كده هتلاقي التقديرات فى السما .. وباقل مجهود
ويقولك يا عم دول نظم
نظم دول بيشترو درجات مثلا ولا بيعملو ايه؟؟

وفى الاخر دا بيتخرج .. ودا بيتخرج .. وبياخدو نفس الشهادة
والاتنين بيتقابلو فى نفس مركز الكورسات اللى برا
الاتنين بياخدو كورس اوركل 3 ايام فى الاسبوع
وبيتقابلو ال3 ايام التانيين فى كورس الجافا

واحد بيقولى اشمعنى دول؟؟ .. مهو هما دول اللى شغالين فى مصر
دلوقتى 90% من الشغل اللى حضرتك هتطلع تدور عليه
اوركل وجافا .. وحبة ويب كده فى اللذيذ تشتغلهم على ما تبقي جامد فى الاوركل
وتروح تشتغل اوركل بردو .. دا لو عايز تشتغل يعنى

فى نفس الكورس دا بقي فى واحد تالت .. بس مش حاسبات خالص بقي
واحد من كلية تانية .. ايا كانت ملتها
وجاى ياخد الكورس زيه زيك .. وهياخد شهادتها زيه زيك .. وهيشتغل بردو زيه زيك
ولا زاكر وطحن نفسه طول السنة زى بتاع علوم .. ولا حتى زاكر 3 ايام قبل الامتحان زى بتاع نظم
لا دا زاكر ساعتين قبل الامتحان الصبح فى كلية تانية

الفرق بين دا وده وده ان كل واحد فيهم عرف ينقى طريقة
واحد بيحب وجع الدماغ والقرف ودخل علوم .. واحد دخل الكلية غلط واشترى دماغه لما فاق ودخل نظم .. وواحد تالت اشترى دماغه من الاول او مجموعه اجبره انه يشترى دماغه من الاول ودخل كلية تانية

زى مثال جميل اوى كنت سمعته من اسمو ايه داهوان .. كان بيقولك ايه
الفرق فى الطعمية :D
يعنى ايه يا كبير:-

بيقولك بتاع الادبي بيخلص امتحاناته ويروح يبيع كتبه لبتاع الطعمية وبيرجعوله تانى قراطيس

بتاع علمى بيقولك لاااااا .. كتبي لا .. دا العلم .. ويديه لابن خالته اللى اصغر منه يزاكر فيهم بعده .. اللى بيروح يديهم لنفس بتاع الطعمية .. وبردو بيرجعوله فى قراطيس

بتاع ولا علمى ولا ادبي معندوش كتب اصلا .. فموداش لبتاع الطعمية اصلا .. بس بردو رجعله شوية من عند نفس بتاع الطعمية من كتب الاتنين اللى فاتو فى قراطيس :D

لا تقولى بقي علمى .. ولا تقولى ادبي .. ولا تقولى ثانوى كمان ان جيت للحق
انت تخلص اى حاجة .. باقل مجهود .. واقل تكاليف .. واقل وقت
وتشوف نفسك هتنفع فى ايه .. وتقوى نفسك فيه .. وتشتغل زى الناس المحترمين

يعنى م الاخر تجارة انجلش يا مى :D

انا لو اتكلمت عن نفسي .. لو رجعت بالزمن 4 سنين لورا
اخش تجارة مع صاحبي زيزو حبيبي .. واعيش حياتى على رأى تامر لمدة 4 سنين .. واطلع اخد كورسين الاوركل والجافا وشوية الويب
وهبقي بنفس الحال اللى هتخرج بيه كمان 6 شهور ان شاء الله فى موقفى ده

انا كده .. سبرايت

وسلملى ع العلمى وع العلوم ;)

15 Comments:

  1. star in the sky said...
    ههههههههههههههههههههههههههههههههههههههههههههههههههههه

    وربنا فكرتنى بيا
    ايام اعدادى كنت بقول هندسة وراثية مجال حلو وبمووت فيها واقعد اقرا عنها واصلا مش بفهم حاجة بس بحبها او اكمل فى طب نفسى مع ان بطنى بتوجعنى لو شفت دم وعملية وحاجات من دى فى التلفزيون
    و اول ما دخلت اولى ثانوى ولما شفت الكيميا والفيزياء قلت علمى مين هدخل ادبى ونفضت لهم فى المذاكرة لانه هيبقى تضيع وقت لا هما داخلين دماغى ولا ناوية اكمل علمى
    وحسيت انى صعوبت على اللى يعرفنى عشان دخلت ادبى وقلت ميخسرش المهم اكون مرتاحة وفعلا اكتشتف ان بتوع ادبى سمعتهم زبالة مع احترامى لكل ادبى المفروض انهم ناس فاشلة اولا مبتذاكرش ثانيا مبيفهموش ثالثا ملهمش لازمة رابعا وبينى بينك انا كنت عاوزة مجموع وعارفة ان ادبى بيعرفوا يجيبوا مجموع سهل لو ذاكروا
    بس 2 ثانوى بالنسبة لى كنت بذاكر عشان عاوزة كلية مجوعها عالى اووى مع انى فاشلة دراسيا ومش من النوع اللى يذاكر الا الحاجة اللى يحبها وعملت انجاز رائع وجبت 94 يعنى جبت مجموع يدخلى اى كلية عاوزاها فى ادبى ماعدا سياسة واقتصاد المهم انه كان يجيب الكلية اللى عاوزاها
    و فى اجازة 2 ثانوى رحت بسلم على استاذ كنت باخد عنده وبحبه اوووى وبحترمه جدااااااا المهم بيقولى جبتى كام قلت 94 فى المية قالى وعلمى علوم ولا علمى رياضة قلت له لا ادبى قالى كويس وشدى حيلك وعدت السنة وكنت ناوية احول علمى عشان ادخل طب او زى ما كنت فاكرة ان هندسة وراثية بيدرسوها فى كلية هندسة هطل بعيد عنك ههههههه
    وكملت ادبى وفى 3 عرفت ان مش هينفع ادخل الكلية اللى عاوزاها حصل ايه بقى قلت ملوش لازمة المجموع ونفضت صحيح كنت بذاكر لان اتعودت على كده فى سنة 2 بس مكنتش قادرة ارجع فترة الامتحانات حسيت انى مخنوقة ومش عاوزة اجيب مجموع بالعند بس النصيب يا اخى جبت حوالى 84 او 85 وطبعا صحابى صدموا وقالوا لى معلش حصل خير المهم فى النهاية بردوا فضل مجموعى عالى حوالى 89 وشوية كده وكان يجيب اثار بس دخلت اييييييييييييييه
    اداب كل اللى يعرف كده احسه انه عاوز يضربنى ويشتمنى يالهووووووووى حد يدخل اداب وجاب 90 انتى هبلة يعنى حتى الكليات بقت مستويات
    وفى النهاية كلهم هيتخرجوا ويقبلونى لو فلحوا ولا فهموا حاااااااجة

    لو كل واحد يعرف هو عاوز ايه يعرف يكمل صح الكلية مش ضرورى ولا الصنايع والمدارس دى اللى بدل الثانوى وحشة اللى بيدخلها اللى افشل من بتوع الثانوى
    هى دماغ وثقافة مجتمع وشوية حاجات كده
    ومحدش فاهم حاجة

    من الصبح برغى معلش الموضوع فتح نفسى
    يلا كده شهرين مجيش اعلق عندك :D
    sony2000 said...
    اهو هي دي بقي اس المشكله
    خلاص انا فاضل عليا كام شهر واكون اوت
    تجاره عربي بس بجد قعدتها حلوه
    هو دا اللي هيوحشني اونلي
    الدكاتره عندنا صراحه موش كلهم هيوحشوني
    خلصت من عقدهم خلاااااص
    ههههههههه
    ShiMOo said...
    يااااااااااااه البوست طويل اوي
    قريت شويه ومقدرتش اكمل
    "مهنجة خالص ولسه طالعه من الارضي للدور الرابع 6 مرات ورا بعض" :((

    هريح شويه واجي اكمل Don't Worry :)
    MOROOOO said...
    كلام ميه ميه وزى الفزدق
    بلا علمى بلا ادبى
    كده كده مش هنستفيد حاجة :)
    ShiMOo said...
    والله هي فعلا بقت محصلة بعضها
    وللاسف برده صعب اوي نظرة الناس للاتنين تتغير
    well said...
    عجبنى البوست

    اولاً انا كنت ادبى ...واكتر حاجة حبتها فى ثانوى هى الفرنساوى واكتر حاجة نسيتها بعد ثانوى هى الفرنساوى
    ثانيا ...اضم صوتى الى صوتك فالادبى ليس بصمة عار
    ثالثا ..انا كنت من الناس اللى بتحفظ ..وكنت بحب الاساتذة اللى كانت تقولك الامتحان مش هيخرج من المذكرة دى ...الاساتذة اللى كانت سبب فى النتيجة الزفت
    تحياتى
    روح بلا فرح said...
    السلام عليكم و رحمة الله و بركاته
    جميل البوست و بيتكلم عن الحياه السعيده التى نحياها داخل حديقة التعليم
    بس حديقه زى الفل محروقه و زهورها ذابله
    كنت لسه من فتره قاعده فاضيه فقلت يا بت يا روان تحبى تدخلى قسم ايه فقلت أنا هدخل اى اس علشان انا حبيت مادة ال اى اس من دكتور عبد الناصر و من ذلك استنتج انى لما احبها هكون شطوره فيها
    لو كان ينفع كنت حولت كليه تانيه و اخدت كورسات اوراكل و جافا و ريحت دماغى و اكون سمعت صوصوة كام عصفوره بعدم زقل اى حجر
    Imagine That said...
    الله يخرب بيت اللي يزعلك يا راجل

    دا انت رغاي اوي

    بدل ما انت قاعد تتكلم كده
    شوف لنا حل

    في مشكله
    بس ايه الحل طه؟؟؟
    !! a7mad sala7 !! said...
    star in the sky

    مالها الاداب

    مسيرك لبيتك فى الاخر واهو بكالريوس هيتعلق ع الحيطة :P

    يعنى اللى اتعلمو الهندسة الوراثية عملو ايه
    مهو لبيوتهم فى الاخر بردو :D

    انا بهزر طبعا
    اصل الحاجات دى بتفرق اوى مع الرجالة اكتر

    لانه هيخلص ولازم يشتغل عشان يفتح بيت ويصرف على اسرة
    ولو ماشتغلش فى حاجة حاببها مش هيبقي مستريح

    لكن البنت مش مضطرة تشتغل
    فمش هتموت نفسها عشان كلية معينة هى مش هتستفاد بيها بعد كده
    دا لو ماشتغلتش يعنى
    !! a7mad sala7 !! said...
    sony2000

    كل واحد بيبقي عايز يخلص باى طريقة
    وبمجرد ما يخلص ويحس بالملل هتوحشه ايام الكلية
    حتى لو كان متأزى منها وهو فيها
    اكيد فترة وليها زكرياتها بردو
    بغض النظر عن الدكاترة الخنيقة :D

    نورتى فى الفرست فيزيت
    !! a7mad sala7 !! said...
    ShiMOo

    من الارضي للرابع 6 مرات
    يعنى 24 دور
    مش كتير يعنى
    اعتبريها رياضة :P


    =======================

    لا نظر ةالناس دى حاجة تانية بقي
    كل واحد حر فى نظرته
    انا بتكلم فى نظرة البني ادم لنفسه اولا

    المشكلة ان الناس هى اللى بتتعب نفسها بنفسها
    !! a7mad sala7 !! said...
    MOROOOO

    زى الفزدق
    دا تأثير حلاوة المولد بقي :P

    بس انتى فى الروقان خالص
    جبتى م الاخر اهو
    !! a7mad sala7 !! said...
    well

    بالظبط كده
    حلو الملخص ده

    نورت يا فندم
    !! a7mad sala7 !! said...
    روان

    هههههههههههههههه
    ماشي يا معلمى

    معايا ع الخط انت
    اى اس .. اى اس
    !! a7mad sala7 !! said...
    سلطان

    مش هتتغير ابدا
    لازم البؤين بتوعك دول


    عايز الحل طه؟؟

    انا مش لقيلها حل
    لان الحل ان الناس تغير تفكيرها شوية وتشغل دماغها
    دا حل للوضع الراهن

    اما لو حل للمشكلة
    ف دى مشكلة منظومة كاملة
    يعنى مجموعة مشاكل بقي حلها عايزله 4 بلوجات

Post a Comment



رسالة أحدث رسالة أقدم الصفحة الرئيسية

Blogger Template by Blogcrowds