نعم لتحديد الانترنت فى مصر



سيداتى سادتى
بغض النظر عن سياسة الفرح
دى هنبقي نتكلم فيها بعدين
ناخد منها فكرة صغيرة
معروف ان الناس فى الفرح بتقعد تزغرط تزغرط حتى لو متعرفش دا فرح مين
بس اهو فرح وكله لولولولولولى وخلاص
دا النظام السائر فى مصر
الناس لما تلاقي حاجة طالعة كده
كله يندرج وراها من غير ما يسالو نفسهم ليه او ازاى
عايزين جنازة ويشبعو فيها لطم

نرجع لموضوعنا ونربط
بجانب سياسة الفرح او اللطم بصيغة اخرى
بقينا محترفين اوى فى سياسة خدنى على اد عقلى
بقي كل واحد بيتبارى على انه ياخد التانى على اد عقله
وانا اكتر حاجة تجننى اللى ياخدنى على اد عقلي

يبقي واحد عامل مصيبة ويقنعك ان الدنيا وردية

يبقي واحد مخبي حاجة وواخدك على اد عقلك بداعى انه ميكبرش المشكلة
مع انه لو خبي والحكاية اتعرفت بالصدفة المشكلة هتبقي اكبر
ومش بعيد تكون الدنيا خربت
بس اهو بقي استسهال انك يسكتك وخلاص
يقوم ياخدك على اد عقلك

تعالى بقي لموضوع الانترنت المحدود ده
تقليعة زى باقي التقليعات
واعتصام وشغلانة
واهو الفيس بوك بياكل عيش
مواضيع وانتقادات وشتايم فى الحكومة
والرسايل رايحة جاية ع الميل والمنتديات

وتتفرج على مدى الاستهبال اللى فى الناس
الاول الحكومة (وزارة الاتصالات يعنى) تضاعف السرعة لمشتركى الدى اس ال
دا ليه؟
عشان تسكت الناس وتكتم افواههم
وتبين ان قلبها عليهم
ودا ليه
عشان تاخدهم على اد عقلهم

انا اول ما الحكاية دى اتطبقت ماقتنعتش
قلت اكيد الحكاية دى وراها مصيبة
وقلت لناس كتير كده مصدقونيش

طبعا الناس فرحت وفكروا الدنيا جميلة

بعدها بكام يوم لقينا حكاية الانترنت المحدود دى

طلع ليه هما زودو السرعة فى الاول
عشان يقولك دى ادام دى
زودنا السرعة وبقى محدود
يعنى خلصانين

تعالى اتفرج على ردود الافعال بقي
اعتصامات ومنشورات بتتوزع
والفيس بوك بقي مركز قيادة الثورة

استوقفنى منشور بقي
حتة منه كده هوريهالكو
بيقولو ان تحديد النت دى هتأدى لاثار سلبية على مصر وتنميتها
وان احنا عايزينه يرجع زى ما كان

//
حتى يستطيع الشاب المصرى استخدام هذه التكنولوجيا الهامة له ولمستقبله بطريقة
شرعية مما يعود بالخير على
مصرنا الغالية..
//

يا سلام ع البؤين دول
اد ايه حسيت بالوطنية
عايزين حد يقوم يرفع العلم بقي
ونأدى السلام الجمهورى
انا سامعه بيسقف فى ودنى اهو وانا قاعد

ايه يا جدعان
احنا كمان بناخد الحكومة على اد عقلها
نعود بالخير على مصرنا الغالية ايه بس
بلاش بقي نضحك على بعض اكتر من كده
شكلنا بقي وحش

دا عملو احصائية على اكتر المواقع شغل فى مصر لقوهم ايه

جوجل والياهو والفيس بوك واليو تيوب وماى ايجي

دول ال5 اللى فاكرهم دلوقتى
تعالى بص كده هتلاقي ولا واحد فيهم مهم
ولو حاجة فيهم ليها اهمية حقيقية مش هتتعدى ال5% من استخدامها فى مصر

فوقوا بقي
طب والله ليهم حق على اللى بيعملوه فينا

لما تبقي شبكة معمولة فيها 8 اشخاص مثلا _لاحظو انها مش شرعية اساسا_ تمام؟
وناس قاعدة موراهاش غير الداون لود
الواحد فيهم كل يوم ينزله فيلمين ع السريع

يا جدعان دا معدل شرا الفلاشات قل :D
كل واحد دلوقتى يقولك وانا انزل اجيب حاجة على فلاشة من واحد ليه
مانا انزلها من ع النت وانا قاعد

طب احسب معدل الاستهلاك كده
تلاقي الشبكة بتستخدم ييجي 500 جيجا شهريا وبيدفعو 95 جنيه
طب ما ليهم حق يعملو فينا كده
مهو لو كل واحد قاعد بيداون لود ملف بي دى اف مثلا
بينزل حاجة مفيدة عمرك ما هتتعدى 200 ميجا كل يوم

لكن اللى ينزل فيلم واللى ينزل لعبة واللى ينزل البوم اغانى
وابو بلاش كتر منه

استخدام النت فى مصر للترفيه من المقام الاول
الا من رحم ربي

اللى اعرفه ان الغاوى ينقط بطاقيته
انت واحد بتحب تداون لود عمال على بطال يبقي من جيبك بقي

انا معاكو ان ده اسلوب لوى دراع والمفروض مكانتش تيجي كده
بس شعبنا ده مبيجيش الا كده
الديموقراطية مبتنفعش معانا

لو بصيتو على عهد محمد على
كان ممشيها ضرايب وظلم ونظام الكرباج
كنا احسن بلد فى العالم

لكن هتمشيها ديموقراطية مش هننفع
احنا اتفقنا على الا نتفق
لو كانو عملوها بالديموقراطية مكناش هنوصل لحل

وبعدين احنا كشعب مبنعرفش نعتصم

دا منظر واحد رايح اعتصام والنبي
دا واقف ع البلاج
رايح يقضى وقت ظريف

هما دول الشباب السيس اللى بيقول عليهم احمد حلمى :D

وانا من هذا المزنق
احبك اقولكو انى موافق على نظام تحديد النت فى مصر
بؤين الوطنية اللى بنقراهم دول ضحك ع الدقون
مفيش حد هيحتاج نت فى حاجة مفيدة اكتر من المحدود ده
الانترنت المفتوح دا عايز واحد قاعد يحمل ليل ونهار
وبعدين والله عملو فينا خير
خلى الشباب تقوم تدور على شغل
بدل ما هما مرميين كده ليل ونهار

على راى مكى
يجطع النت ع اللى بينتتوه :D

خلص الكلام

صحيح كنت هنسي
احب اشكر الاستاذ البني ادم اللى عملى التصميم ده
هو مش حابب يتقال اسمه نظرا لانه عمل تطوعى :D

فوتكم بالمحدود
;)

27 Comments:

  1. a7med3bdalla said...
    بص يا ابو حميد
    معلشى قى أنا أختلف معاك
    انا ضد ده
    مش من ناحية بس انهم بيختمونا على أفانا

    لكن علشان ده مش تعامل القرارلما طلع من وزارة الاتصالات محدش ضربهم على ايدهم وقال لهم اعملا القرار ولا كان فى مظاهرات علشان السرعة تزيد هما عملوا كده علشان قال ايه ينقلوا مصر نقلة حضارية

    ثانيا مثلا لو ناس ماسكة سيرفرات
    وناس شغالة دونلودات علشان خاطر ماسكين ادارة او اشراف فى مواقع
    ودول بقوا كتير جداا فعلشان تقول لى تحدد يبقى هتوقف عمل دول كلهم وأولهم المفيد

    وأنا من مكانى هنا بقول لا للانترنت المحدود لأن ده ضد الواقع :D
    Ahmad Hima said...
    بص يا احمد باشا
    اولا دا نظام غير قانوني وغير شرعي
    وبعدين الانترنت في مصر لما ضاعفوا السرعه لازم نبقي مبسوطين ولو ان بردو بالمضاعفه دي النت في سرقه ونصب علي كبير
    يعني دلوقتى النت في امريكا النت الـ 15 ميجا ب30 دولار ودا مش ارخص حاجة علي فكرة
    يعني بالمصري 150 جنيه مصري
    والمية وخمسين دول بيجيبوا في مصر نت واحد ميجا
    يعني بالصلاة ع الزين كدا احنا بيتنصب علينا
    وامريكا اللى المفروض اغلي من عندنا النت عندنا قدها 15 مرة ودا زي ما بقولك مش الرخيص والله
    يعني بالعقل كدا احنا بنتسرق
    وبالنسبة لنظام تحديد الداونلود هما ملهمش دعوة انا بستخدمه في ايه إن شاء الله بداونلود بيه بورنو هما ما حددوش انى انزل بي دي اف بس انا انزل اللى عايزة حتى لو حاجة هايفه
    هما مش شغالين الاخ الاكبر علي رأي بيللا ننزل ايه وايه لأ
    لو واحد بينزل ويندوز سيفين لوحده شوف هياخد قد ايه وزيه فوتوشوب سي اس فور وادوبي بريمير وهكذا
    انا مش بقولك كدا كلام ف الفاضي لا دا فعلا احنا بننزله
    يعني انا منزل الكريتيف سووت بتاعه ادوبي كلها مع فهمي دي لوحدها اكتر من عشره جيجا مثلا ورامي بينزل ويندوز سفن
    وزينا كتير
    مش هقولك مش بنزل افلام
    لا بنزل بس مش بكثافة حاجات معينة بس وبنزل العاب كمان وبردو حاجات معينه
    هتقولي ان دا تنزيل مش قانوني هقولك انهم ملهمش دعوة واحترام حقوق الملكية الفكرية مش بتحديد الداونلود دي بتغيير وعي الناس وانهم يؤمنوا بدا
    وبعدين الاستخدام الطبيعي نظريا لسرعه 512 هو 146 جيجا شهريا مش النصب بتاع اهاليهم اللى عايزين يدونا 1/6 من الاستخدام الحقيقي
    ومحدش يقولي بيتطبق الكلام دا ف العالم كله
    الكلام دا بيتطبق علي تطبيقات البير تو بير p2p
    والتورنتtorrent وبس
    انا معنديش مشكلة يطبقوا دا فعلا بس زي بقية الناس علي التطبيقات دي بس مش علي كل حاجة
    وبعدين دا ملوش دعوة باللى بيزيطوا ف الزيطة اصلا
    الناس من حقها نت غير محدد وبس
    الحكومة ملهاش دعوة انزل بيه بورنو ولا انزل بيه حلقات طارق السويدان

    بالنسبة للناس اللى بتتمسح في الحكومة سوري دا ناس وسخه وملهاش مبدأ
    بس
    Catch Me If You Can said...
    ويحددوه ليه؟
    هما مش بياخدوا فلوس
    نقعد نعمل اللي نعمله بقي؟
    عادي يحددوه ولا لاء
    مش هتفرق معايا ومع ناس كتير
    بس الواحد ممكن في اخر الشهر يبقي مزنوق في شوية دون لود لازمينه ضروري
    ولازم يعملهم عشان شغل ضروري
    ييجي هو في اخر الشهر هو مش معاه دون لود
    يروح يعمل دون لود بره بيته
    ياخي تيــــــت
    امال انا موصل ودافع فلوس ليه؟
    عشان اروح انزل عند حد تاني

    هتقولي ابقي نزل المهم بس
    الله
    يا عم انا حر انزل اللي انا عاوزة
    ماحنا طول عمرنا عايشين كده
    ايه اللي جد يعني عشان تعملوا كده؟
    ولا انتم عاوزين ترزلوا علينا وخلاص

    اطير انا عشان انا متضايق من كده
    ومش عاوز اتكلم كتير لانك قلت هتمسح
    وانا مش عاوز اكتب تاني
    س ل ا م ي
    MR-MIDO said...
    ايها السادة جاءكم مستر ميدو

    انا ابن خاله احمد صلاح هيرو
    وانا اللى باعتله الرساله اللى هو حطها بتاع مصر الغاليه دى الرساله كامله يرايت نقراها مع بعض كده
    الحمله القوميه لمواجهه تحديد الأنترنت في مصر

    ===========================

    ■ ضد الانترنت المحدود ■

    ===========================



    السلام عليكم ورحمــة الله وبركاته


    بــــــدون مقدمات

    قررت شركات الإنترنت في مصر تطبيق سياسة حقيرة هي الأولى على مستوى العالم المتحضر والمتخلف وهي تحديد كمية التنزيل للسرعات التي من المفترض ألا تكون محدودة !!!!



    والصوره ده هتوضح اكتر نسبة التحديد
    ====================

    http://www.facebook.com/photo_search.php?oid=25523384862&view=user#/photo.php?pid=3718699&op=1&o=user&view=user&subj=25523384862&aid=-1&oid=25523384862&id=544661354



    ===========================

    الجزء التانى و المهم من حملتنا ضد الانترنت المحدود

    ========================


    ارسال شكوى لجهاز تنظيم الاتصالات بمصر
    ========================

    الى البريد الاليكترونى التالى

    cccomplaints@tra.gov.eg

    ==================


    وهذا هو موقع الجهاز
    http://www.tra.gov.eg/arabic/main.asp


    ==================
    وهذا نص الرسالة

    =================


    السادة جهاز تنظيم الاتصالات بمصر...

    بعد التحية..

    نعلم ان هدفكم وكذلك شركات الانترنت بمصر ..

    هو القضاء على الشبكات الغير شرعية..

    والتى ينتفع بها غير المتعاقد رسميا لدى شركات الانترنت..

    ولما كان هدفكم هو ان يستفيد بالخدمة فقط من هو منتفع ومتعاقد رسميا لدى شركات الانترنت..

    ونظرا لارتفاع الاسعار بلا مبرر من شركات الخدمة..
    فقد انتشرت الشبكات التى تودون محاربتها الان ...
    باجراء ادخال بند الاستخدام العادل -غير العادل-
    والذى تضرر منه من يتنفع بالخدمة بمفرده..
    علاوة على ان الدولة هدفها الرئيسى من ادخال هذه المنظومة -الانترنت- الاتصال والاستفادة
    من العالم الخارجى ..في كل النواحي..
    املين من سيادتكم ادراك الحالة المعيشية المتوسطة للشباب المصرى..
    وكذلك تعديل مستوى الخدمة الى ماكانت عليه حتى نقضي معكم على
    الشبكات
    الغير شرعية للانترنت بمصر..
    و حتى يستطيع الشاب المصرى استخدام هذه التكنولوجيا الهامة له ولمستقبله بطريقة
    شرعية مما يعود بالخير على
    مصرنا الغالية..


    بعد الكلام ده عايز اوضح حاجة

    الاخ اللى اللى قال ان احنا بيتنصب علينا ده
    ده احن مش بيتنصب علينا احنا بنتبلف يامعلم
    او بمعنى اصحى بيحط الجزمة القديمة جوا بقك وتكتم هو دا الموجود
    كأنه بيقولك احمد ربنا يامعفن انى دخلتلك نت دا من كام سنه كنت قاعد زى الكلب على نت تلفون من ورا ابوك
    سياسة تحديد الانترنت موجوده بشكل كبير فعلا بره
    بس مش التحديدات دى
    تحديدات ترضى ربنا جامد
    وبأسعار هايفه جدا تكاد تكون زى رسوم رمزيه او ضرايب على استخدامك ياعنى

    مشس تجارة مكسب
    ياجماعه بره ممفيش شركات نت والهبل اللى احنا فيه ده مش بشكل اللى احنا فيه ده
    كل شركة تذوق خدمتها بالطريقه اللى تنافس شركة تانيه

    بقت تجارة النت حاجة جامده
    MR-MIDO said...
    وحكومتنا ماشاء الله اكتر دوله فى العلام بتنشر غسيلها الوسخ قدام العالم كله

    انا معاكو ان ففى ناس بتستخدمة صخح وناس بتستخدمة غلط

    وركزو فى الحته دى

    متنسساش ياحمد ياصلاح يامؤيد فكرتهم

    ان فى برامج اعلى من دماغك لسه مشتغلتش يعادتك فيها

    جرافيك و3DMAX وشغل ال3ي والفلاش ومصمم الالعاب والبرامج

    الناس دى اه مش بتنزل افلام بس بتنزل ادوات وبرامج بتاخد منها جيجات

    وكتير منهم فى شبكات غير شرعيه فعلا

    بس فكرة شبكة شرعيه ولا لا طب ماهو انت فى شبكة غير شرعيه

    مش كل الناس فى اسطتاعتها تدفع اشتراك خاص بيه لوحده فى النت

    نظام التطبيق اللى عايزين يعملو ده يتعمل بشرط تخفيض اسعار النت جدا

    بحيث الغاء فعلا الشبكات الغير شرعية
    وكل فرد يدفع اشتراك رمزى زى باق الدول وبتاخد جيجات فعلا كتير تكفيك انت

    اما سياسة لوى الدراع والهبل ده وياخدوك على خوانه

    طيب ليه متعملش حوارات ولقاءات مع الشباب وتسمع وجه نظرهم من الناحيه دى قبل ماتطبق

    انا مش مع السياسة دى ابدا

    ونسيت اوضح حاجة بالنسبه لمهاجمتك للفيس بوك
    انا معاك بردو ان فى ناس كتير مهوسه فيه

    بس متنساش ان كليتك ليها جروب

    وان اى حد دلوقتى سها يسوق منتج او يعمل جروب لشركته او جروب لكليته
    ويتبادلو فيه حاجات كتير ممكن يترفع عليه اى حاجة محتاجنها
    بحيث كل اللى فى الجروب يقددر يتعامل ممكن نشرح فيه حاجات كتيير

    اظن ده اسهل واسرع من تصميم سايت مخصوص

    ملناش دعوه انى فى بنى ادمين هبل فى مصر دى مش مشكلتنا انا ليه نهبل ونسوق الهبل فى الجبل

    فكرة الفيس بوك يااستاذ احمد يامتعلم يابتاع الحسابات
    جت من طالب جامعى فى امريكا كان عايز يربط اصاحبه فى مكان واحد وبدون تكاليف واكثر سرعه

    وابدت الفكرة وابتدت تكبر

    كون فكرة انشاء جوروبات لمهااجمه غنانين وكويزات ده الجانب الزباله طبعا

    طيب والحلو فين يااستاذ
    ديما تبص للوحش وناسى الحلو

    ركز فى موضيعك ياكابتن

    اسف طولت عليكو ومحدش يزعل كنت بفضفض شويه ليكو
    دريم كبير said...
    السلام عليكم ورحمة الله

    طبعا سياسة الاستخدام العادل دي سياسه ممتازه علشان هتنبه الشباب انهم يركزوا على المفيد في الانترنت

    لكن لما نحدد الدونلود يبقى كده حاجات مفيده كتير جدا جدا ضاعت

    زي مثلا واحد شغال جافا ميقدرش ينزل نتبينز ميقدرش ينزل فيديو توتورياال ميقدرش ميقدرش حاجات كتير

    واحد شغال دزين ميقدرش يتابع البرامج الجديده مثلا اخر اصدار من ال3دي ستوديو ماكس ’ اصدارات ادوبي كلها الخ الخ

    نسخة ويندوز جديده , نسخه لينكس جديده

    ابديت للانتي فيرس !

    الناس اللي بتحضر لايف في جامعات اجنبيه !

    والناس والناس وحاجات كتير مصالحها هتقف

    دا غير ان شركات مواقع الرفع هتخسر عملائها في مصر

    زي الرابدشير مثلا!

    يعني لما تيجي تطبق سياسيه الاستخدام العادل للانتر نت يبقى تعملها دراسه جدوى الاول وتشوف السلبيات والايجابيات المترتبه عليها

    انا باعتقادي ان السياسه دي بتعامل شريحه بسيطه جدا من المستخدمين

    اللي هم رجال الاعمال والبسطاء والمبتدئين في الاستخدام مثلا
    زي ماوزير الاتصالات بيقول :
    كل واحد هيقدر يعمل check the mail,browsing , download PDF format , Chating
    هههههههههههههههههههه
    على اساس ان كل النت كله كده ممكن علشان هو مبيستخدمهوش الا كده

    وفي الحاله دي يبقى مينفعش يبقى وزير اتصالات حضرتك


    يلا معلش طولت عليكم وانا متأكد انك يااحمد مش موافق على السياسه دي لانك شغال نقل افلام بالهاردسك:P
    هههههههه

    يلا فوتكوا بعافيه
    Romancia said...
    لا طبعااااا
    زى مالناس قالت فى التعليقات المفيد اضر اكتر ميت مره على الاقل المفيد مش هيقدر يستغنى عن الى بيعمله انما السىء اهو مش فرقه معاه

    لااااا للانترنت المحدود
    والف لااااا
    a7mad sala7 said...
    //معروف ان الناس فى الفرح بتقعد تزغرط تزغرط حتى لو متعرفش دا فرح مين
    بس اهو فرح وكله لولولولولولى وخلاص
    دا النظام السائر فى مصر//


    دا اقتباس من الموضوع


    يالا لولولولولولولولولى



    معلش هرد قريب
    نظرا لبعض الظروف
    Catch Me If You Can said...
    متردش وامسح الموضوع
    خلاص القرار اتلغي
    ♥ Am fOpa'D ♥ said...
    لياعودة عشان اقول راي
    :)

    بس مبدئيا رمضان كريم
    Heshmat said...
    يا بو صلاح حرام عليك اللى انت كاتبه دا
    انت مش عاجبك الناس وهى سلبيه ولما يحاولوا يبقوا ايجابيين ننقدهم ونبهدلهم
    دا ايه الشعب المصرى دا
    امسح الموضوع دا يابنى وخليك انسان ايجابى
    انت زى المثل اللى بيقول خالف تعرف
    والصوره اللى انت حاطتها دول رجوالسيس هو اللى قعد فى بيتهم
    şσмā ēŁ3āşħē2 said...
    يا حبيبى لو كانت اتحدد السرعه كان فى ناس متير هتقعد من غير شغل
    انا مخلص تعليمى
    وشغل كله
    شبكة نت عندنا فى اسكندرية ولو كانت اتحدد السرعه كان زمانى من غير شغل
    وبعدين انا عندى سايبر صغنن معتمد عليه فى اكل عيشى
    لما ناس تجيلى تعمل صيانة وتطلب افلام جديدة مثلا اقولهم لآ معلش النت محدود
    يا سيدى ده احنا البلد الوحيدة اللى بيضحك عليها فى كل حاجة
    ===========
    كل سنة وانت طيب وهابى مضان
    morgana said...
    /نعم لتحديد الانترنت في مصر/
    شرير
    >:)




    رمضان كريم:)
    moly said...
    السلام عليكم

    بصراحة أنا كنت داخلة وناوية على أنى أخالفك لأنه أتحرق دمى لما النت فصل يوم وكنت عمله زى اللى مخدتش الحقنة
    هههههههههههههه
    لأنى تقريباً مدمنة نت
    بس بصرآحة لما قريت الموضوع كله بأعلن أنى غير رأيى وأقتنعت
    لأن تحليلك للموضوع مقنع فعلاً وبجد كان وقت مش قليل كان بيضيع كده فى الكلام ع الميل وحاجات مالهاش لزمة
    يلا كفاية عليا الشوية الباقيين من النت نستفيد منهم
    بس ربنا يستر بعد كده


    سلااااااااام
    a7mad sala7 said...
    a7med3bdalla


    //مثلا لو ناس ماسكة سيرفرات
    وناس شغالة دونلودات علشان خاطر ماسكين ادارة او اشراف فى مواقع
    ودول بقوا كتير جداا فعلشان تقول لى تحدد يبقى هتوقف عمل دول//


    اعزرنى دى مش شغلانة يعتمد عليها
    يعنى انا اروح اتقدم لعروسة اقول لباباها انا شغال مشرف فى موقع ولا ماسك ادارة
    دى شغلانة لا يعتمد عليها

    وبعدين لو قلنا ان كل واحد حر
    وانت بتعتبر دا شغلك ودخلك الاول
    يبقي تعامل النت زى اى ماتريال بتستخدمة وتدفعله زى ما هتستنى منه مقابل
    a7mad sala7 said...
    Ahmad Hima

    //اولا دا نظام غير قانوني وغير شرعي//

    وافتكر بردو ان اى شبكة بتتعمل فيها ناس كتير بتبقي غير شرعية وغير قانونية
    يعنى مبروم على مبروم ميلفش

    ومن البداية طالما وافقت تحط نفسك فى الموقف ده
    يبقي تستنى اى رد فعل وانت ساكت


    //يعني دلوقتى النت في امريكا النت الـ 15 ميجا ب30 دولار ودا مش ارخص حاجة علي فكرة
    يعني بالمصري 150 جنيه مصري//

    يا سيدي الفاضل ملناش دعوة بامريكا
    كل دولة ليها اقتصادها وسياستها
    انا مبتكلمش فى اقتصاديات
    خلينا فى بلدنا العدمانة دى


    //هما ملهمش دعوة انا بستخدمه في ايه إن شاء الله بداونلود بيه بورنو//

    لا مش معمول عشان تنزل بورنو
    انت عايز تنزل بورنو نزل من جيبك
    الحكومة مش جايبالنا نت عشان ننزل بورنو
    اظن النت ليه اغراض اهم من كده


    وبعدين انت واحد بتستخدم النت فى حاجة مهمة انت و4 معاك هتلاقي ادامكو 95 واحد مبيسخدموش فى حاجة عدلة
    يعنى نسبة ضئيلة جدا متتعداش 0.05

    لو انت شايف ان دا شغلك واستخدامك ليه عشان مصلحة معينة ليك
    يبقي تدفع زيادة زى ما هتستنى منه مقابل
    دى حاجة مفهاش زعل
    وانا عند رأيي ان لو عندك نت بطريقة شرعية هيكفيك لاخر الشهر وهيفيض منك كمان
    انا مقولتلكش نزل بي دى اف بس
    نزل اللى يريحك
    انشالله تنزل البورنو بتاعك حتى

    بس لما هيبقي النت محدود كل واحد هيظبط نفسه من اول الشهر ينزل الحاجة اللى هتفيده وبس
    ونظام ابو بلاش كتر منه ده مش هتلاقيه

    //بالنسبة للناس اللى بتتمسح في الحكومة ..سوري.. دا ناس وسخه وملهاش مبدأ//

    وسورى ليه
    اظن ملهاش موقع من الاعراب هنا

    بس لما نبقي احنا بنعلق خيبتنا على شماعة فساد الحكومة نبقي احنا اللى ناس وسخة وسلبيين
    يوم ما اجتمعنا على كلمة رجل واحد
    اجتمعنا على النت

    ملوحظة ليك شخصيا
    انا عمرى ما كان ليا صلة بالحكومة من قريب او من بعيد
    ولا حتى ليا حد بيشتغل فيها
    عشان ابقي نصير الحكومة او استنى منها حاجة او ما شابه

    وسلملى ع المبادئ
    a7mad sala7 said...
    Catch Me If You Can

    على فكرة انت مقريتش الموضوع كويس

    //ويحددوه ليه؟
    هما مش بياخدوا فلوس//

    هما بياخدو فلوس منك انت لوحدك؟
    ولا بتلم انت واللى معاك فى الشبكة
    يعنى انت عامل شبكة غير شرعية

    انت لو عاملها لوحدك هتكفيك

    //بس الواحد ممكن في اخر الشهر يبقي مزنوق في شوية دون لود لازمينه ضروري
    ولازم يعملهم عشان شغل ضروري
    ييجي هو في اخر الشهر هو مش معاه دون لود
    يروح يعمل دون لود بره بيته//

    اه روح اعملهم برا بيتك
    الشهر ده هتروح تعملهم برا
    الشهر الجاى هتسستم نفسك وتنزل اللى يفيدك بس
    وهيكفيك لاخر الشهر

    الحاجة اللى ملهاش لزمة او التافهة ابقي نزلها من برا بقي
    اظن دى حاجة متزعلش
    a7mad sala7 said...
    MR-MIDO

    اهلا يابن خالتى
    اهو انت بقي اكتر واحد بيعرف يزغرط
    لسانك مرن جدا :D

    //الحمله القوميه لمواجهه تحديد الأنترنت في مصر//

    هههههههههههههههههه
    طب والله كل ماقراها اضحك

    يا عم اتقوا الله

    سايبين الغلا اللى احنا فيه
    والسلع اللى بقت اسعارها نار
    والعيش اللى مش عارفين نجيبه
    و و و
    ورايحين تعتصموا ع النت
    عجبا لامة ضحكت من جهلها الامم

    //الناس دى اه مش بتنزل افلام بس بتنزل ادوات وبرامج بتاخد منها جيجات
    وكتير منهم فى شبكات غير شرعيه فعلا
    بس فكرة شبكة شرعيه ولا لا طب ماهو انت فى شبكة غير شرعيه
    مش كل الناس فى اسطتاعتها تدفع اشتراك خاص بيه لوحده فى النت//

    يا حبيبي اللى معوش ميلزموش
    واللى شايف انه بيستخدمه فى شغل يدفع
    زى ما هتدفع هيجيلك مقابل
    انت مش بتشتغل لله

    ومتقنعنيش ان واحد بيشتغل 3دى ماكس وتصميم برامج والعاب مش لاقي يجيب نت لوحده او حتى يدفع زيادة شوية

    اللى بتقوله ده ضحك ع الدقون

    وطريقة رخيصة بيستخبي بيها التافهين ورا ستارة الناس اللى بتشتغل فعلا من خلال النت

    لكن حد قاعد ليل ونهار على ميل وفيس بوك وداون لود افلام واغانى يستاهل كده واكتر
    والكلام ليكي يا جارة

    //بحيث الغاء فعلا الشبكات الغير شرعية
    وكل فرد يدفع اشتراك رمزى زى باق الدول وبتاخد جيجات فعلا كتير تكفيك انت//

    مش هينفع
    احنا شعب مبينفعش معاه الذوق
    لو خليت النت بربع جنيه هتلاقي بردو الشبكات الغير شرعيه
    طول مانت بتعامل الناس بالحسنى هتركبك

    بدل ما تعتصم علشان النت
    انزل دور على شغل وشوف حاجة تفيدك بجد

    خلينا واقعيين
    انا اه معاكو ان دى طريقة غلط

    بس مش هنمسك فى غلطات الحكومة ونخليها ستارة نستخبى وراها عشان الهلس والهبل

    //فكرة الفيس بوك يااستاذ احمد يامتعلم يابتاع الحسابات//

    انا مش بتاع حسابات على فكرة
    الحسابات دى فى تجارة هناك
    انا حاسبات

    وبعدين انا مانكرتش فايدة الفيس بوك
    انا اتكلمت على طريقة الاستخدام
    معظم المستخدمين للفيس بوك فى مصر مش بيستخدموه فى حاجة مفيدة

    وانا عارف فكرة انشاءه على فكرة مش مستنيك تيجي تقولهالى :D

    //طيب والحلو فين يااستاذ
    ديما تبص للوحش وناسى الحلو//

    الحلو قليل اوى

    وبعدين انا مقولتش اقفلوا الفيس بوك
    خليه وخلى الهايفين ياكلو عيش
    انا بس بخط خط احمر تحت اللى مش عاجبني
    وكل واحد حر فى حياته

    وبعدين بما انك اتدخلت فى طبيعة دراستى واتكلمت على اوجه الاستفادة والضرر للنت فى مجالى
    وبتقولى يا متعلم يا بتاع حسابات

    تقدر تقولى يا متعلم يا خريج تربية رياضية كده ايه احتياجك للنت الغير محدود؟؟

    يالا لولولولولى عقبال عندك
    a7mad sala7 said...
    دريم كبير

    ههههههههههههههه
    والله انت راجل زى العسل
    ورأيك دبلوماسي جدا وانا معاك

    بس زى ما قولت فوق
    اللى عايز ويندوز 7 واللى عايز فيديوهات توتوريال و و
    اظن المفروض يدفع عشان يجيبها

    انت بتنزل الكلام ده عشان تتعلم وتستفيد
    وبعد كده تشتغل وتجيب دخل

    يعنى الدنيا هات وخد

    ومفهاش حاجة لما تدفع عشان تاخد

    //يلا معلش طولت عليكم وانا متأكد انك يااحمد مش موافق على السياسه دي لانك شغال نقل افلام بالهاردسك:P
    هههههههه //

    ههههههههههههههههههههه
    وانا عمرى ما هربط نفسي جنب جهاز عشان انزل افلام

    البركة فى التافهين اللى مربوطينلها
    a7mad sala7 said...
    Romancia


    لا جديد
    a7mad sala7 said...
    Catch Me If You Can


    والله يابنى ماعرف رسيت على ايه

    بس اللى سمعته ان الفرار اتلغى

    وناس بتقول انه هيتطبق على المستخدمين الجدد بس

    وناس بتقول اتلغى مؤقتا

    وناس بتقول محدود بس لما تخلص الكمية المتاحة هيبقي 128 على الكل

    وفى كل الحالات مش فارقة معايا انا شخصيا
    a7mad sala7 said...
    ♥ Am fOpa'D ♥


    الله اكرم

    :)
    a7mad sala7 said...
    Heshmat

    //انت مش عاجبك الناس وهى سلبيه ولما يحاولوا يبقوا ايجابيين ننقدهم ونبهدلهم//

    يا عم يبقو ايجابيين فى حاجة مفيدة

    فين الايجابية لما قولنا اعتصام ومحدش ينزل من بيته والناس كلها لقيناها فى الشارع

    فين الايجابية لما قولنا محدش يشترى منتجات دنيماركية وهى شغالة فى اسواقنا اكتر من العادية

    فين الايجابية فى اعتصام ابريل وغيرهم وغيرهم


    ولا احنا ايجابيين فى الهيافة بس !!

    ايجابية + هيافة = 0

    لا شيئ .. مفيش اضافة


    انا مش ماشي بنظام خالف تعرف على فكرة

    دى مدونة
    وفى الاول وفى الاخر دا رأيي

    وبعدين انا لو موافق على موضوع معين مش هكتب عنه
    لان الموافقين فى اى حاجة بيكتبوا وكلهم زى بعض

    لكن اللى عنده رأى مختلف هو اللى بيكتب
    a7mad sala7 said...
    şσмā ēŁ3āşħē2

    //يا حبيبى لو كانت اتحدد السرعه كان فى ناس متير هتقعد من غير شغل
    انا مخلص تعليمى
    وشغل كله
    شبكة نت عندنا فى اسكندرية ولو كانت اتحدد السرعه كان زمانى من غير شغل
    وبعدين انا عندى سايبر صغنن معتمد عليه فى اكل عيشى //

    اعزرنى
    دى مش شغلانة تاكل منها عيش

    انا لو ولى امر بنت
    وجالى عريس وسالته بتشتغل ايه
    قالى فاتح سيبر وعامل شبكة نت
    هقوله اسف

    انا مش شايف ان دا سبب مقنع لعدم تحديد النت فى مصر

    انا مليش انى اقولك انت بتشتغل ايه
    انت ليك مطلق الحرية فى تصرفاتك
    بس دا مجرد رأيي انا

    وفى النهاية احب اوجهلك نفس السؤال اللى سأله محمد صلاح

    سومة العاشق يحب يقول ايه لسومه الانسان؟؟
    :D
    a7mad sala7 said...
    morgana

    //شرير
    >:)//

    :D
    اوك



    //رمضان كريم:)//

    الله اكرم
    a7mad sala7 said...
    moly

    طب الحمد لله


    منورانا
    a7mad sala7 said...
    اخيرا بقي ..


    عايز اقولكو حاجة


    انا لما كتبت الموضوع ده
    او غيره من المواضيع

    مبيبقاش قصدى اناكف حد معين
    او انى اعمل شوشرة وضجة
    او انى الفت نظر الناس بانى ابقي خالف تعرف

    لكن هو دا رأيي
    واللى انا شايفه بقوله
    واللى انا مقتنع بيه بعمله

    انا مبحجرش على رأى حد
    ولا بقول لحد انت بتعمل كده ليه
    كل واحد حر فى حياته وحر فى تصرفاته وحر فى اراءه
    وانت حر ما لم تضر

    وسبق وقلت ان اللى محروق دمه ميردش
    واللى مش عاجبه كلامى ميقراهوش
    دى مدونتى الخاصة بنقل فيها افكارى
    بتعبر عنى انا مش عن حد تانى


    حاجة تانية
    =========

    كون ان النت يتحدد او ميتحددش
    متفرقش معايا

    يعنى انا مليش مصلحة فى ان النت يتحدد
    وبردو مليش مصلحة فى انه ميتحددش

    ولا انا شغال فى الحكومة ولا الحكومة معينانى مصلح اجتماعى عشان اوافقهم على تحديد النت

    انا بقول اللى شايفه فى مصلحة البلد من وجهة نظرى

    معاكو ان الحكومة زبالة وسلبية فى كل حاجة

    ومعاكو ان القرار سلبي بردو

    انا لما اقول نعم لتحديد الانتر نت مش موافق على السياسة نفسها

    انا باصصلها من ناحية تانية انه افيد لينا احنا

    الوقت اللى بنضيعه فى النت _بالنسبة للناس اللى مبتستفيدش منه_ هما اولى بيه

    وبالنسبة للناس اللى شغالة داون لود على الفاضي هما احرار بس من جيبهم بقي

    واللى محتاج الداون لود فعلا لشغل _ودول موجودين انا مأنكرتش_ دول ممكن يدفعو زيادة مفهاش مشكلة
    لانك زى ما بتدفع فى شغلك بيجيلك مقابل
    انت مش بتدفع لله

    اينعم سياسة سلبية بس ايجابية لغالبية الشعب اللى مبيستفيدش
    واعتبرها يا سيدي ضريبة النجاح
    واعتبر النت مادة خام بتستخدمها فى شغلك وبتشتريها بالفلوس


    كون النت اتحدد بقي او لا
    انا والله العظيم مش متابع
    ومش مهتم انى اعرف هو اتحدد ولا لا
    والمفروض انتو تبقو كده
    وتخليكو فى اللى هيفيد احسن

    لو انت شايف ان ده فساد والمفروض نواجهة من باب الايجابية

    يبقي روح خليك ايجابي فى حاجة افيد
    واعتصم وبينلنا ايجابيتك فيما هو مهم


    الايجابية مش فى الصوت العالى واليفط والفرح بالانتصار على الحكومة

    الشهامة فى انك تبص للحاجة من كل النواحى وتشوف ايجابياتها اد ايه وسلبياتها اد ايه
    واللى سلبياتها اكتر فى داهية مش عايزينها


    مش عارف وجهة نظرى مفهومة ولا لا
    بس هو دا اللى عندى
    ومش لاقي شرح اكتر من كده

    كفاية اوى على الموضوع ده لانه طول واخد اكتر من حجمه

    ودمتم

Post a Comment



رسالة أحدث رسالة أقدم الصفحة الرئيسية

Blogger Template by Blogcrowds