فى ليلة من الليالى الهادية
كنت مريح ع السرير كده شوية .. و ال ايه ياخويا شوية شباب كده
ع الفيس بوك بيقولو بكرة هنعمل اعتصام باين لا مش عارف وقفة احتجاجية

بكرة يوم عيد الشرطة !!

سرحت شوية كده مع كلامهم وقعدت اتخيل بقي ان ممكن يحصل ايه بكرة
ماتخيلتش ابدا ان ممكن ناس كتير تنزل وتهتف وتنادى
وضحكت فى سري كده وقولت بكرة الامن المركزى يحميهم بالخراطيم

ماسك ريموت التليفزيون كده وبقلب ابص الاقي خير اللهم اجعله خير
ناس كتير متجمعة ورايحين ناحية التحرير
وعمالين ينادو ॥ عيش حرية عدالة اجتماعية !!
وال ايه خير اللهم اجعله خير الناس بتزيد
وصلو ميدان التحرير لقيت الميدان اتملا

بقلب كده على قنوات تانية يقولك مظاهرات فى السويس واسكندرية ومش
عارف فين :O
ابص الاقي الناس بتتسحل والضرب شغال
قولت اهو كده صح .. دا اللى نعرفه
المهم الناس خدو اللى فيه النصيب وروحو
تانى يوم ابص الاقي الناس اكتر من اليوم اللى قبله :O
المطالب بتزيد والناس بتزيد
شوية يقولك بكرة جمعة الغضب .. غضب !! .. من امتى المصريين
بيغضبو ॥ واشمعنى غضبانين يوم الجمعة :D

بصراحة انا الموضوع شدنى .. كنت لا ليا فى السياسة ولا كنت احب
اقعد مع حد بيتكلم فى السياسة
صحيت تانى يوم روحت صليت ورجعت .. بفتح التليفزيون لقيت الناس
بتتسحل وناس بتموت وناس بتتخطف
قولت امن الدولة اشتغل اهو .. بس بردو الناس بتزيد !!
ابص الاقي فى اسماعلية عندنا الاقسام بتولع .. والناس عاملين مظاهرات
بردو فى الممر !!

لا دا كده الموضوع دخل فى الجد
ويوم ورا التانى والموضوع بيكبر .. والجزيرة واخواتها شغالين
اقلب على التليفزيون المصري الاقي الكوبري والدنيا هادية
اقلب على الجزيرة الاقي سحل !!
قولت مهو حاجة من اتنين .. ياما دا التليفزيون الصربي .. ياما الناس
دى فوتوشوب :D:D
بس من امتى والجزيرة بتشغل ديزاينرز عندها .. انا اعرف انهم بيشغلو
مراسلين !!

بعد كام يوم الاقي بيقولك حسني مبارك اتنحى .. وسلم السلطة للجيش !!
معقول حسنى ابونا وقدوتنا .. اللى وعيت ع الدنيا لقيته .. زى ما
لقيت ابويا وامى كده
حسنى اللى كان علامة زى الهرم كده وبرج القاهره اتنحى !!

كام يوم والاقي مظاهرات فئوية .. فتنة طائفية .. اعتصامات وحاجات
مش من اللى هى
ولقيت بقي حاجات كده يقولك سلفيين .. لا اخوان .. لا 6 ابريل
دا معرفش بتوع خالد سعيد .. شوفت معرفش حزب المش عارف ايه
دا حسنى مبارك عيان فى المستشفي .. دا ولاده مسجونين
دا البرادعى وحازم ابو اسماعيل

بسال واحد صاحبي انت عمرك سمعت عن حد من ولاد ابو اسماعيل ؟؟
قالى ولا ولاد ابو ابراهيم
قولتله ادينا سمعنا
وقالك مجلس عسكري بقي واستفتائات وانتخابات وكلام كبير عمرنا ما كنا
بنسمع عنه !!

طب وبعدين يا اخوانا
الغريب ان مع كل الاحداث دى حاسس ان جنبي بيوجعنى !!
طب ايه علاقة جانبي بالاستفتائات !!
وهل الاستفتاء ده كان عشان تختار جنبي بيوجعنى من الاملاح ولا انا خدت
برد فى جانبي !؟؟
ايه ده هو فى برد بييجي فى الجنب !؟؟

وفى وسط الحيرة والتسائلات دى كلها .. اتفاجئ بحاجة غريبة
احس ان الاصوات كلها بتسكت والنور بيتطفي !!
هنا بقي انا مقدرتش اسكت اكتر من كده
قومت نطرت نفسي فجاة كده
.
.
.
.
.
.
.
الاقينى كنت نايم على الريموت .. وجانبي واجعنى عشان كده !!
ولقيت ابويا شافنى نايم راح قافل التليفزيون والنور وطلع برا !!
ببص فى النتيجة لقيت النهارده 25-1 !!
امال ايه الهلوسة دى .. ومين ابو اسماعيل ده !!
مسكت الريموت وفتحت التليفزيون تانى لقيت فيلم بوحه كان شغال قبل مانام
!!
طب كده عرفت ابو اسماعيل .. طب والريس .. دا كان عيان ؟؟
بقلب القناة بحسن نية كده .. لقيت اللى ريح قلبي وادخل السرور عليا
الريس بيقول خطاب تهنئة بمناسبة عيد الشرطة :)
يا حبيبي يا ريس .. انت واقف اهو وصحتك كويسة .. ربنا يخليك لينا
يا ريس
قولت اما اشوف الجزيرة كده الاقي مكتوب فى شريط الاخبار تحت

"مجموعة من الشباب المتطرفين فى مصر قامو باعمال شغب فى انحاء مختلفه
من البلاد .. وقد قامت الشرطة المصرية بالسيطرة على الموقف .. والقاء
القبض على المتطرفين" !!
معقول الجزيرة بتشتغلنى فى الحلم !!!

قومت لبست ونزلت روحت لصاحبي اللى بيقولى ولا ولاد ابو ابراهيم ده
بقوله انت جاى تألش عليا فى الحلم كمان .. حتى فى الحلم مش راحمنى
قالى ايه اللى حصل .. لسه بقوله ثورة وتغير نظام
قالى هوس هوسسسس .. ايه يا عم دا محل اكل عيش .. انت جاى
تجيب درفه من اولها !!!
طب بتوع الفيس بوك دول ناس فاضية وبتتكلم على مزاجها .. خليك انت
عاقل يا عم

وعلى الفور اعتذرتله .. وابتسملى .. وشربنا اتنين فيروز اناناس
.
.
وروحنا نرشح الريس لفترة انتخابية جديدة !!!

12 Comments:

  1. Olivetree said...
    ههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههه



    بس اظاهر ان الحلم دا كان ان بابليك
    الشعب كله حلم بيه مش انت بس


    حلوة منك يا احمد سلمت يسارك :)
    !! a7mad sala7 !! said...
    هههههههههههههههههههههههه
    اه دا حلم كلنا بنحلمه

    بس يا ترى هو اتحقق فعلا ولا احنا لسه بنحاول !؟


    نورتينا يا ستي وكويس انك لسه فاكره العنوان :D
    MOROOOO said...
    like forever :)
    !! a7mad sala7 !! said...
    thanx 4ever :)
    غير معرف said...
    والنبي لما الشعب بذات نفسه يتنحي :D

    البلد مش هتتغير بردو



    ويلكم باك :)
    morgana
    !! a7mad sala7 !! said...
    يا وليكم بيكي
    ايه جرعة التفاؤل دى :D:D

    دا لو الشعب كله بذات نفسه بيفكر كده
    كنا هاجرنا كلنا ^_^
    Morgana said...
    ههههههههههه أنا مش متشائمه خالص
    ولا لدرجة اني اسيب البلد واهاجر
    انا بس مش حاسه بتغيير

    اتمني لو في تغيير يبقي للافضل ان شاء الله :)
    !! a7mad sala7 !! said...
    ان شاء الله

    اللى احنا متاكدين منه دلوقتى ان عمر ما هنبقي فى موقف اسوء من اللى كنا فيه
    فاكيد خير ان شاء الله :)
    اموت واعرف مين صاحبك اللي ألش عليك said...
    ما انت لو وراك حاجه شاغله دماغك مكنتش حلمت حلم زي ده وبعدين ده كان سيد ابو حفيظه مش عمرو دياب بين قوسين كابوس

    بس ارجع واقولك لا يغير الله ما بقوم حتي يغيروا ما بانفسهم

    وابقي استغطي كويس عشان متجيش تحلم بعد كده ببنات ماشيه في الجامعه بميكرو جيب
    !! a7mad sala7 !! said...
    اموت واعرف مين صاحبك اللي ألش عليك .. بين قوسين سلطان الاسيوطى


    اولا دا مش حلم يا شاويش مغاورى
    وبعدين محدش الش عليا .. انا اللى بألش على نفسي وعليكو :D


    وبعدين ايه استغطى دى ..
    فى حاجة اسمها استغطى ؟؟
    اتغطي مش استغطي said...
    قولت لابويه في مره علمني الهيافه يابه
    قالي تعالي في الهايفه واستصدر

    بتقولوا عليها اتغطي مش استغطي يعني ولا ايه
    طب لما حد بيستحمي عندكوا بتقولوا عليه اتحمي؟؟

    مكنتش اتوقع منك كده يا ابوصلاح
    كنت بحسبك هتعلق علي ما انت قال ما انت قال نسي نفسي الواطي بيقولي ما انت
    وبعدين هو عشان ربيت الشنب بقيت شاويش خلاص
    ولما هو مش حلم خدعتني وخليني اصدقك ليه واعيش معاك الحلم واحلم معاك بسفينه ونجاة وفيروز اناناس
    يلا يا عم لو بطلنا نحلم نبيض
    احلم احسن ما تبيض علينا وعلي نفسك
    !! a7mad sala7 !! said...
    قولتله مرة واحدة بس ؟؟


    شكلك كده الحقنة عامله عمايلها معاك :D

Post a Comment



رسالة أحدث رسالة أقدم الصفحة الرئيسية

Blogger Template by Blogcrowds