حد عاوز يشتغل فى الخليج ؟؟


ايا كان الوضع دلوقتى فهو احسن من اللى قبله
احنا عمرنا ما هنبقي فى فترة زى اللى كنا فيها دى
عمرنا ما هنوصل لحجم النكبة اللى كنا فيها
بأى حال من الاحوال احنا للاحسن ان شاء الله

التغيير ده اقل مكاسبه هو كسر حاجز الخوف والجبن والصمت
كفاية اننا عرفنا ازاى نعترض بشكل حضارى
عرفنا ازاى لما نتظلم نمشي فى الاتجاه الصح
ازاى نوصل صوتنا للعالم ونقولهم احنا مش عاوزين كذا
هو دا الحد الادني للمكاسب اللى وصلنالها

عموما دا مش موضوعى

بزعل اوى لما الاقي زمايلى وقرايبي وهما لسه فى الدراسة
اقصي طموحهم انهم يسافرو يشتغلو برا
وبالاخص لما يكون فى الخليج

والله العظيم الموضوع دا شاغل دماغى من قبل موضوع الثورة ده
انا كنت عاذرهم الى حد ما

عارف ان مفيش شغل والحالة صعبة
وحتى لو فى شغل مش بيبقي بالمقابل اللى يعيش حد عيشة كريمة

بس اللى اعرفه بردو ان لو حد عايز يشتغل هيشتغل
مش هقول بقي يثبت نفسه والكلام ده
خلينا نتكلم ابسط من كده شوية

انا عندى اعيش هنا باى شكل من الاشكال
وماسافرش اشتغل برا
ليه ؟؟

يا جماعة لو بصيتو على الوضع ايام الثورة دى وبعدها وازاى الدول العربية دى كانو خايفين اكتر مننا وازاى بيعرضو علينا يصلحولنا اللى اتخرب .. مع انهم ملهمش ذنب فى كده
دا معناه ايه !!

مصر تعتبر اكبر واهم دولة فى المنطقة بتاعتها
بغض النظر عن الفقر ولا الفساد اللى فيها فهى بردو بوضعها دا اكبر دولة
ولو وقعت بقيت الدول هتقع وراها واحدة ورا التانية

فحرام لما يبقي احنا وضعنا الطبيعي كده
واحنا بنبعت ناسنا تشتغل هناك عشان الفلوس

ملعون ابو الفلوس لما تخلى واحد طور مبيفهمش حاجة يتنطط عليك
والامثلة كتير موجوده
دا غير نظرتهم لينا ان احنا شحاتين ورايحين ناكل عيش هناك

انا بجد مش عارف ازاى الناس دى بتروح تشتغل هناك
مفيش دولة من دول الخليج تملك انها تعيش نفسها بنفسها رغم الفلوس المتلتلة اللى هناك دى
نظرا لانهم شعب خامل بطبعه
عاوز كل حاجة ع الجاهز .. وشعاره هو كلمة بفلوسي

والمصيبة ان هو شايف ان ليه فضل عليك
مع ان لو حسبتها صح هتلاقي انت اللى ليك فضل عليه
لانك لو انسحبت من حياته هيضطر ينزل يشتغل بايده
ولانه ماشتغلش بايده قبل كده بالتالى مش هيعرف يعيش
واحنا اللى بكل سلبيه ساعدناهم على كده

انا باصص للموضوع من ناحية الكرامة اكتر شوية
اظن احنا بعد الثورة دى عرفنا العالم كله يعنى ايه كرامة
احنا نخدم نفسنا بنفسنا
انشالله نلحس شوارعنا بلسانا بس محدش يبصلك بنظرة انه بيعطف علينا

وحتى لو مش بالعطف
زى مثلا .. ابسط مثال
بيحز فى نفسي اوى لما الاقي كليتي كل ما يبان فيها شخصية ليها قيمتها من دكاتره اومعيدين اول حاجة تتوقعها انه يسافر برا
ليه كده !!

محدش يقولى بيكملو دراستهم .. انا بتكلم عن الدكاتره على الاقل

لما الاقي كليتي بتفضي عليا وعدد الناس اللى تقدر تعتمد عليهم بجد معدودين على الصوابع
حاجة تخلى ثقتك فى كليتك تقل
وبالتالى ثقتك فى نفسك .. وتلعن اليوم اللى فكرت فيه تيجي الكلية دى

احنا لو انسحبنا من شغلهم بشكل كامل هما هيعرفو اد ايه احنا احسن منهم
وساعتها هما اللى هيتحايلو علينا نشتغل معاهم
مش عندهم

بس للاسف نبرة اليأس اللى كنا بنتمتع بيها قبل كده مسيطرة على تفكير معظم الشباب المصريين
يمكن انا كنت واحد منهم لحد وقت من الاوقات
ولما بدأت اغير تفكيري ده واواجه حد منهم يقولى طب خليك انت هنا اشتغل ب300 جنيه

بس بيتهيالى بعد الاحداث الاخيرة دى
وبعد ما اثبتنا للدنيا اننا نقدر نغير كل حاجة بنفسنا
بطاقات الشباب اللى كانو بيتفهو من كلمته
احنا نقدر نقولهم احنا مش مستنيين منكو عطف

انا مقولتش متسافرش هناك
بس تسافر لما تحس ان هما اللى محتاجينك .. مش انت اللى محتاجلهم
تسافر تنقذهم مش هما اللى ينقذوك

تسافر باعتبار انها رحلة تغيير جو قبل ما تكون رحلة عمل
نروح خبرا ومستشارين .. مساعدات يعنى
وبالمرة تعدى على دبى عشان انا هموت واروحها :D

بجد يا جماعة من ضمن امنياتى المحدودة انى ازور دبي دي
من اللى بسمعه عنها بس

اروح عشان اتفسح وهما يخدمونى مش عشان اروح اخدمهم ويتنططو عليا
زى ما هما بييجو هنا ونخدمهم ويتنططو علينا
وللاسف خدمة الناس دى بقت هى المصدر الاول للربح فى مصر
اللى هى السياحة
ملايين الناس شغالين خدامين للاجانب فى مقابل لقمة العيش
بجد حاجة تحزن !!

انا مبقولش منشتغلش فى السياحة
بس بقول ليه ميكونش عدد سياحنا المصريين عند الناس دى اد عددهم عندنا مثلا
مش مستحيل والله .. بس محتاجه شوية شغل

على الاقل عشان الروس تتساوى وميدخلش فيها مصطلح التنطيط

انا لا بهاجمهم ولا كارهم
عشان محدش يفتكر ان كلامى دا من منطلق الحقد عليهم مثلا
لان ببساطة هما معملوش اللى احقدهم عليه
احنا اللى بنعملهم كل حاجة عشان نحقد عليهم بعد كده
يعنى نتحسر على مجهودنا

الموضوع مش موضوع حقد او هجوم
الموضوع غيره على بلدى وعلى ناسها
وحرام عقولنا وطاقاتنا دى منفيدش بيها نفسنا
محدش يقولى ان احنا كده بنستفيد
اللى بيسافر هناك ويستقر مبيرجعش
وانتو عارفين كده كويس
بيفضل حنفية فلوس لاهله وعياله لحد ما يموت
واهله هما اللى بيتمتعو بيها
حرااام .. بجد حرام

احنا عاوزين نتمتع بنتيجة مجهودنا فى بلدنا .. وسط اهلنا
سيبك يا اخى من حتة التحدى وانك عاوز تبقي احسن منهم
كفاية انك تعيش حياة كريمة وسط اهلك وناسك
تنام فى بيتك مستريح مش شايل هم اهلك اللى متعرفش عنهم حاجة
تفتكر دا مش مبرر كافي ؟؟

طيب الجانب الايجابي من الموضوع بقي

نحاول من دلوقتى نقنع نفسنا ان احنا نقدر
زى ما صدقنا نفسنا وغيرنا النظام .. لازم نصدق نفسنا ونغير نفسنا احنا

جميلة اوى حملة ابدا بنفسك اللى شوفتها ع الفيس بوك
حاول تطبقها على نفسك من دلوقتى
ابدا باتفه الامور .. متستهيفش حاجة

اتفه حاجة انك ترد دلوقتى تقولى انت كلامك صح ولا غلط
لو غلط تقولى ايه الصح .. ولو صح يبقي نحاول نعمل كده

بعد كده نختار اللى هيرأسونا ومنعتمدش على بعضنا
كل واحد يروح يعمل بطاقة انتخابيه وينتخب بنفسه
انتخابات رياسه وانتخابات مجلس شعب
تختار كل جهة هترأسك عشان متجيش بعد كده تلاقي نفسك عاجز
ولما تختار حد ويطلع كويس تساعده وتشكره وتأيده
ولو طلع وحش متكسلش وتسيبه .. تسعى انك تغيره وتجيب الكويس

يبقي
شغلك + نظام يساعدك
اكيد
= وصول للى احنا عاوزينه

وافتكرو ان اهم حاجة فى الموضوع دا كله حاجة واحدة بس هى الضمير
لو كل واحد فينا عنده ضمير صاحى عمرنا مهنلاقي دروب فى اى خطوة

ضمير فى انك تبدأ بنفسك
ضمير فى انك تختار الانسب
ضمير فى انك لو حسيت بالظلم متسكتش
ضمير بانك لو شوفت الوحش متسيبوش وحش

الضمير فى كل حاجة


نقدر ؟؟

13 Comments:

  1. This .. And Only This said...
    عزيزي أحمد صلاح
    دير اهمد سالاه
    كلامي هذا ارجو الا يقلل من همتك
    بل تدافع عنه وتثبت قوة فكرتك
    ومدي المامك بما قرأت كما ذكرت سابقاً

    بدأ موضوعك بطموح السفر
    وهذا حق مشروع لدي الجميع ولا انكره علي أحد
    ولكي تتكلم عن هذا الجانب كان عليك ان تنتظر قليلا لتري ما سيحدث لاحقاً
    ولكنك استبشرت خيراً
    وكما قال الشاعر بكره ده لسه حكايه بعيده لسه في علم الغيب

    موضوعك يا سيدي شمل كثير من الجوانب والاتجاهات
    وردي يتطلب مني كذلك
    عل ما ابدأ به لا علاقة له بالموضوع
    انا كالكثيرون ممن يرفضون المنهج التعليمي في مصر
    ولكني اطلاقاً لا اعاتب نفس المنهج عندما اطلب من احد اصدقائي الخريجين ان يذكرني بالحروف الهجائية
    وقد فعل ولكنه فقط ذكر 23 حرفاً فقط
    ومن المثير للشفقة ان مجاله يفرض عليه ان يدرك انهم 26 لا اكثر ولا أقل

    ارجو ان يبلغك من مثالي ما أود أن أوصله اليك

    تعالي لي بقي يا حيلتها انت واخوك محمد نتكلم جزء جزء من كلامك

    \\
    اقصي طموحهم انهم يسافرو يشتغلو برا
    وبالاخص لما يكون فى الخليج
    \\
    واحد مش لاقي شغل هنا
    وليه زميل اقل منه سافر وبقي علي قلبه قد كده
    مسافرش زيه ليه؟؟؟
    انتي ناسي ان سبب قيام ثورتك دي هيا ثقافة التقليد
    ونص شعبك بقي بيقلد وزي ما تيجي
    لدرجة ان فيه ناس بقت بتعمل أفراحهم الصبح
    ده ايه الهيافة اللي انتوا فيها دي

    \\

    انا عندى اعيش هنا باى شكل من الاشكال
    وماسافرش اشتغل برا
    ليه ؟؟
    \\
    مبتتقاسش كده يا صاحبي
    دلوقتي يا بومبو عشان تخرج مع خطيبتك
    وعلي ايدي النهارده كمان
    خروجه اتكلفت حوالي 1200 جنيه
    ابقي قابلني بقي لو عرفت تعيش هنا
    وانا لسه ذاكرلك ثقافة التقليد فوق من شوية
    وانا اكيد مقصدكش انت في التقليد ده
    خصوصاً انهن بقوا من بتوع اشمعني
    واخد بال معاليك

    \\
    مع انهم ملهمش ذنب فى كده
    دا معناه ايه !!
    \\
    قدم السبت تلاقي الحد يا ابوهم

    \\
    مصر تعتبر اكبر واهم دولة فى المنطقة بتاعتها
    \\
    في العالم كله وحياة رحمة خالك حسن
    بس اكبرهم سناً واهمهم حضارة
    بقولك ايه ما تيجي تسمع الست وهيا بتقول وتزعل لما أقولك يوم يا ظالمني
    مع اني مزعلتش ولا حاجه
    الست حبيبة الملايين
    لكم يحزنني يا ابوصلاح انك لم تذكر قط ما كان يجب ان يذكر
    المشكله دي حلها بسيــــــــــــــط وعيبة بس انه بيلسع
    This .. And Only This said...
    \\
    مفيش دولة من دول الخليج تملك انها تعيش نفسها بنفسها رغم الفلوس المتلتلة اللى هناك دى
    نظرا لانهم شعب خامل بطبعه
    عاوز كل حاجة ع الجاهز .. وشعاره هو كلمة بفلوسي
    \\
    بفلوسك ااااااااااه وبمالك اااااااه
    هتنول اللي في بالك
    بفلوسك اااااااااااه
    ومين قالك يا عديم الثقافة ان الناس دي مش عارفه حاجه
    ده مجرد حقد منك لانك خصيتهم بالذكر دون غيرهم
    دي ناس لو شغلت دماغها هتفصل عشره من امثالك وامثالي
    وبعدين دي سونة ربنا في الكون
    ولن تجد لسنة الله تبديلاً
    روح يا شاطر هناك
    انضم للألبوم
    وبعدين المناطق دي عندها شوية جاز
    يخلوا اتخن دوله في العالم تتمني القرب منهم
    اسكت اسكت
    بتحسسني انك قاعد ساوز افريكا
    وجايز نتقابل هناك بعد رحلة دبي
    حاكم انا اللي هموت واروح البفانا بفانا

    \\
    انا باصص للموضوع من ناحية الكرامة اكتر شوية
    \\
    قول بقي انك باصص للموضوع من ناحية الكرامه
    اذا كان كده يبقي اسيبك تقعد علي ايدي شوية
    لغيت ما اللي قاعد علي رجلي يقوم

    \\
    اول حاجة تتوقعها انه يسافر برا
    ليه كده !!
    \\
    لانك زي ما ذكرت
    شخصيات ليها قيمتها
    وبعدين انت باصص لنص الكباية الفاضي ليه
    مافي دكاتره ومعيدين قاعدين هنا وعادي
    بس انت عارف ليه؟؟

    \\
    احنا لو انسحبنا من شغلهم بشكل كامل هما هيعرفو اد ايه احنا احسن منهم
    وساعتها هما اللى هيتحايلو علينا نشتغل معاهم
    مش عندهم
    \\
    احسن منهم في ايه يالا
    وانت عمرك كنت تحلم انك تشتغل الشغل اللي هتشتغلو هناك
    مكاناً ومعاملة وناس وخبرة ولا عمرك كنت تحلم انك تشتغل بمشاريع بحجم اللي بتشتغلها هناك
    زائد انك مادام بتقبض من واحد وانت مش ليك في شركته ولا سهم يبقي بتشتغل عنده
    والله برضاك غصب عنك
    سيبك بقي من بيبي سيتر والكلام الفارغ ده
    اسمها خدامة لازمته ايه الزواق عاوز افهم؟؟؟

    \\
    وبعد ما اثبتنا للدنيا اننا نقدر نغير كل حاجة بنفسنا
    \\
    تغير ايه ياد انت ياد
    انا سايبك تتكلم شوية من غير ما أعلق والأخر تقول كده
    انت فاكر لما عدوك يبقي قاعد بيضحك عليك
    يبقي انت كده بتغير
    ياخي قشه
    يا حبيبي انت بتتكلم دلوقت علي دوله
    اللي ماسكها الجيش
    يعني لو الجيش اتخبط في جمبه
    احنا اللي هنقول أي بين قوسين اه
    انت اكيد مش متخيل الوضع السياسي اللي انت فيه
    لو الجيش انضرب ياحبيبي
    ابقي سلملي علي امك

    \\
    وبالمرة تعدى على دبى عشان انا هموت واروحها :D
    \\
    اذا كان كده معلش
    نبقي نتقابل هناك بقي

    بص يا سيدي
    الموضوع لا يتطلب تغيير حاكم ولا اي حاجه
    الموضوع فقط يتطلب تغييرثقافة
    وده سان دوت يعني بلا شك يتطلب وقت لا أكثر
    وتغيير الثقافة لا يكون الا بأن تبدأ بنفسك
    ببساطه شديدة
    ده جانبا الي ما تم ذكره بابها اعلاه
    This .. And Only This said...
    ال أيه بيه كبير طول بعرض وشنبه في وشه زي المقشه وايــــــــــــه؟؟؟
    اسمه أسامه


    عزيزك محمد صلاح
    يورز مهمد سالاه
    نبع الغرام said...
    بجد معاك حق كلامك صح بكل كلمه قلتها يسلم دماااااغك ياقمر

    كل سنه وانت طيب
    !! a7mad sala7 !! said...
    سلطان

    كل دا ومش فايق
    امال لو فايق كنت دلقت حبر فى البلوج ولا ايه

    ما علينا
    !! a7mad sala7 !! said...
    //واحد مش لاقي شغل هنا
    وليه زميل اقل منه سافر وبقي علي قلبه قد كده
    مسافرش زيه ليه؟؟؟//

    طب هو قبل على نفسه الاهانة والبعد عن اهله والعيشة فى غربة طول عمره
    عشا نيبعت لاهله فلوس
    انا اعمل زيه ليه ؟؟

    //وعلي ايدي النهارده كمان
    خروجه اتكلفت حوالي 1200 جنيه//

    يا سيدي على اد لحافك مد رجليك
    وانا لو روحت اتجوز واحدة وقالتلى اشمعنى هقولها مع السلامة متلزمينيش

    \\
    مع انهم ملهمش ذنب فى كده
    دا معناه ايه !!
    \\
    قدم السبت تلاقي الحد يا ابوهم


    اديك قولت اهو
    عشان احنا اهم منهم
    فعيب لما تركبهم عليك فى حاجة زى دى

    //ومين قالك يا عديم الثقافة ان الناس دي مش عارفه حاجه//

    اسال انت ابوك اقرب حاجة
    قوله عندكو فى دبي بيعرفو يعملو ايه
    والعمال معظمهم منين وانت تعرف

    //وبعدين المناطق دي عندها شوية جاز
    يخلوا اتخن دوله في العالم تتمني القرب منهم
    //

    اديك قولت
    هى دى الحاجة اللى منططاهم علينا
    حتى الحاجة دى هما متعبوش فيها

    //مكاناً ومعاملة وناس وخبرة ولا عمرك كنت تحلم انك تشتغل بمشاريع بحجم اللي بتشتغلها هناك//

    وايه المانع لما تكون الحاجات دى هنا
    مهو طول ماحنا بنجري على هناك
    عمر ما هيبقي فى كده هنا
    هى دى السلبيه بقي
    ثقافة الاستسهال

    للاسف الطريقة المحبطة اللى بتتكلم بيها دى هى اللى مش مخليانا نتحرك
    ولعلمك لو الكل بيفكر بالطريقة دى مكناش هنتحرك وهنفضل محلك سر

    اللى خلى الناس دى تنزل وتعرض نفسها للموت فى سبيل تغيير انت بتتريق عليه
    ميخليهمش يبقو مع الجيش لو حد فكر يضرب؟؟

    وبعدين انت فاكر ان الوضع قبل الثورة دى كان احسن من ناحية السياسة
    ابدا ولا حاجة اتغيرت
    الناس اللى كانت موجوده دى ناس مغيبة ولا هيزودو ولا هينقصو
    يعنى اللى مشيو دول مش هما اللى مانعين حد يضرب

    متستقلش بنفسك ولا تستقل بقدراتك
    انت اه شايف شباب خواجات وملهمش فى حاجة
    بس فى زيهم بردو ناس محترمة ممكن يعتمد عليها
    انت بتتكلم كده بس دلوقتى لما تروح الجيش هتعرف ايه اللى بيحصل
    كلها كام شهر !!!
    !! a7mad sala7 !! said...
    متفق معاك من زمان فى حتت الثقافة دى

    ودايما اقول لو كل واحد عمل اللى عليه
    وحكم عقله وضميره الدنيا كلها هتتظبط


    بس طالما هى ثقافة زى ما بنقول
    يبقي انت لازم تغيير ثقافتك فى اعتبار ان هناك هو الصح وهنا عمره ما هيبقي صح

    لو اهتمينا بهنا هيبقي صح الصح


    زى بريزيدون كده
    !! a7mad sala7 !! said...
    نبع الغرام


    ربنا يخليكي
    دا من ذوقك :)

    كل سنة وانتى بصحة وسلامة
    sony2000 said...
    بجد عندك حق
    وخد دي هديه بجي:)
    http://www.akherakhbar.info/showarticle.asp?id=1243
    sony2000 said...
    لالالالالا مش ديييييي
    دي
    http://www.youtube.com/watch?v=Ek-QNp-jtmo
    !! a7mad sala7 !! said...
    سونى


    طب ومالها الاولانية
    هو فى احسن من الشهداء :)





    اما التانية بقي
    دى توووووحفة
    بموت انا فى هشام

    ميرسي جدا اوى خالص
    ONLY SMILE said...
    ههههههههههههههههههههههههههههه

    ههههههههههههههههههههههههههههه


    ههههههههههههههههههههههههههههه

    ههههههههههههههههههههههههههههه

    ضحكات متقطعه

    انا مش بضحك على الموضوع
    انا بضحك على حاجة تانية خالص

    DDDDDDDDDDDDDDDDDDDDDD:
    !! a7mad sala7 !! said...
    :D


    ربنا يزود من ضحكاتك يا سيدي :D

Post a Comment



رسالة أحدث رسالة أقدم الصفحة الرئيسية

Blogger Template by Blogcrowds