زمان لما كنا بنتكلم عن الديموقراطية وعن حرية الرأى والتعبير
والاختلاف فى الرأى لا يفسد اللى مش عارف ايه
وياما اتناقشنا وجادلنا .. واحيانا اتخانقنا :D

والادهى والامر لما وصلت لامور الدين
وبقت الناس تدخل الدين فى المجادلة تحت مسمى حرية التفكير والتعبير والذى منه
طبعا احنا موصلناش للى احنا فيه ده الا من بعد ما عرفنا مصطلح الديموقراطية

تعرفو
كلمة ديموقراطية دى بتستفذنى جدا :D
مش عشان مبدأ الديموقراطية نفسه
ولا عشان انا ديكتاتور مثلا
لا خالص

بس عشان احنا شعب .. لا يصلح معه الديموقراطية
طبعا اللى بيقرا دلوقتى هيقولك ايه المتخلف ده !!
هعمل نفسي مش واخد بالى دلوقتى وهكمل

هههههههههههههههههه
افتكرت صديقي الصدوق محمد صلاح لما كان يقولك انا ديكتاتور .. ودا شعب مينفعش معاه الا الديكتاتورية
وكنت بضحك واقوله ايوة صح
وكنت بقولها عن اقتناع
بس كنت تلاقي الناس مش بالعاها من محمد صلاح
المهم

لو خدنا الموضوع بتأنى شوية وهقنعك
مهو يا تقنعنى يا اقنعك
انا ماعرفش حاجة اسمها الاختلاف فى الرأى لا يفسد للود قضية
دى مش فى قاموسي

الاختلاف دا ممكن ينفع فى حاجات محدودة جدا
وانت قاعد تحلل ماتش كورة مثلا
وانت بتتخانق مع مراتك فى البيت
ولو ان دى كمان ماعتقدش بردو :D

دايما اقول لـ مى ايه
انا ديكتاتور ديموقراطى
تقولى ازاى

اقولها يعنى هنختلف هنتخانق هتشرحيلي وجهة نظرك
هسمعها للاخر وهفهمها
اقتنعت هقولك حاضر وهو كذلك
ماقتنعتش هقولك لا انا هعمل كذا لان دا هو الصح
ومش هعمل غيره .. انا معنديش معارضة
ههههههههههه

يعنى بردو مفهاش لا يفسد للود قضية

نرجع لموضوعنا
هى فعلا لا تفسد للود قضية ؟
لا بتفسد والله
دى بتودينا فى داهية كمان
ازاى ؟

تعرف ان الديموقراطية دى بتقوم على الكفر !!
كفر ؟
اه بتقوم على الكفر
ليه ؟

لما يطلع واحد يقولك مثلا احنا هنجوز راجل لراجل
الموافق يرفع ايده
ده ود وده موافقون
اغلبية

وايه هى الديموقراطية ؟
هى رأى الاغلبية من الشعب
الاغلبية عايزة كده ؟ .. اه .. يبقي يمشي

طب هل دا يعقل ؟؟

مثال تانى

جه واحد قالك احنا هنعمل الصلوات 3 بس مش 5
الموافق على هذا القرار يتفضل برفع ايده
ده وده وده
اغلبية .. موافقة
هل دا يعقل ؟؟

اكيد لا طبعا
يبقي مفيش حاجة اسمها ديموقراطية
امال فى حاجة اسمها ايه يا عم انت

اقولك فى حاجة اسمها شورى
الشورى

وكان امرهم شورى بينهم
واحد يقولك طب متقول ديموقراطية
طب واقول ديمواقراطية ليه هى اسمها شوري
يقولك ايوة يعنى ديموقراطية
اقوله لا مش ديموقراطية

فى فرق واضح بين الشورى والديموقراطية

الديموقراطية زى ما قولنا هى رأى الاغلبية
واللى مش موافقين دول اسمهم معارضة

الشوري مفهاش معارضة .. احنا معندناش معارضة فى الاسلام
حتى كمان الحاجة اللى ورد فيها نص او موجوده فى المنهج مفهاش شوري

يعنى لما كان يبقي فى حرب او غزوة مثلا
كان الامر شوري
مين موافق يطلع
انا وانا وانا
والباقي لا
الباقي دا يقعد واللى موافق بس هو اللى يروح ؟؟
لا طبعا
هيطلعو بردو
كله بيطلع
هنا اصبح مفيش معارضة
وهو دا كان سر قوة الاسلام

ان كلهم بيجتمعو على قلب رجل واحد
كان لما يتفقو على حاجة كلهم بيوصلو لحل واحد
وبكده مش هتحصل مشاكل ومش هتظهر احزاب

واول ما فكرو يختلفو
ايام خلافة سيدنا على ظهرت السنة والشيعة
ولسه فى المشكلة دى لحد النهارده

يبقي خدنا ايه من الديموقراطية!!

زى واحد بيقول للتانى يا حمار
قاله انا مش حمار ومتشتمنيش
قاله لا حمار
قاله خلاص ناخد راى الناس وديموقراطية بقي
ويروح يجيب اغلبية الناس تشهد
يقومو معلقينله ديل ويبقي حمار
طب هل يعقل ؟؟

نرجع لفوق خالص
يبقي ليه بقي كنت بقول احنا شعب لا يصلح معه الديموقراطية
لان احنا بالذات احسن شعب يفتى فى العالم
لو بطلنا نفتى نموت
وكل واحد عايز يبقي مختلف وكل واحد عايز يبقي ليه رأى لوحده
وكل واحد عايز يبين للى حواليه ان هو حاجة تانية غير كل الناس
ولو سمعنا لكل واحد لوحده وهو دا اللى بيحصل دلوقتى
تلاقي كل واحد ماشي فى سكة
وكله بيشتم فى كله وكله بيغلط كله
والنتيجة اننا وصلنا للحال اللى احنا وصلناله ده !!

عارفين
مش هى دى بس المصيبة
المصيبة لما توصل للدين
لما تلاقي واحد عنده مدونة زى كده مثلا وقام جايب موضوع فى الدين
وراح عامل افتكاسه
وقالك دا رأيي :|
ربنا خلقلى عقل عشان افكر بيه
ويبدا بقي يخش فى مناطق محظورة
ويدخل نفسه فى جدل هو مش اده
والمصيبة الاكبر لما يدخل اللى بيقروله معاه فى الجدل ده
والدايرة توسع !!

كل دا عشان ايه
عشان كلمة ليه
ليه دى متتقالش لربنا
احنا المفروض متأدبين مع الله
ربنا سبحانه وتعالى لما يأمر نقول سمعنا واطعنا

لما ربنا يبيح ويحل
يبقي سمعنا واطعنا
هتجادل انت وتقول بعقلى ؟؟

طب مهو دا الدين
هو الدين ايه غير تشريعات .. تحليل وتحريم
مش عاوز تسلم بالاوامر يبقي انت مش عاوز دين
المسلم المؤمن بيقول سمعنا واطعنا
ربنا قال منتدخلش فى الجزء ده يبقي سمعنا واطعنا
لكن لما تحط مناخيرك فى كل حاجة
وتقول ليه واشمعنى يبقي انت دخلت فى دايرة المحظور

ابسط مثال
انت بتتوضا ليه
اوعى تقولى نضافة
بدليل انك ممكن تكون مستحمى ومتطهر ومتعطر
وبتطلع بردو تتوضي
ليه ؟
ربنا امر بكده يبقي سمعنا واطعنا

حاجة تانية اوضح
ربنا حرم الاصنام وعبادة الحجارة
وفى نفس الوقت احنا بنطوف حول الكعبة
وبنقبل الحجر الاسود
بتطوف حوالين حجر وبتقبل حجر
بتمسك حجر وترجم حجر

نقول ليه ؟؟
مفيش ليه
لان دا منهج
هكذا امرنا الله وهكذا نفعل
سيدنا عمر ابن الخطاب بيقبل الحجر الاسود وبيقول "اعلم انك حجر واعلم انك لا تضر ولا تنفع
ولولا انى رأيت رسول الله يقبلك ما قبلتك"
ايمان كامل ويقين تام

يبقي دى مفهاش بالعقل
هتقولى ربنا قال نحن قوم يعقلون
اقولك ماشي
قوم يعقلون فى علم الشهادة
"الحواس الخمسة"
اى حاجة من الخمسة دول فكر فيها بعقلك زى مانت عايز
انما اوامر ربنا نقول سمعنا واطعنا

امور كتير هتفكر فيها مش هتوصل لحل
بالعكس تفكيرك هيوصلك لاصل الكينونة والربوبية
والنتيجة انك هتلحد !!
ليه
لان انت مش اله
احنا بشر ووظيفتنا العبادة
"وما خلقت الانس والجن الا ليعبدون"
فى اطار طبيعتك كانسان اتكلم
اذا كان انت مش عارف تبص للشمس ولو بصتلها تتعمى
يبقي تبص لربنا وتقوله ليه ؟
اعرف حجمك .. قيم قدراتك

ليه دى تفوق قدرة العقل البشري
حاجة انت عقلك كأنسان يعجز عن فهمها
يبقي هكذا امرنا وهكذا نفعل
سمعنا واطعنا

نرجع بسرعة لحتة الديموقراطية
ومثلا موضوع شغل الستات

ربنا خلق المرأة ل4 وظائف
ارجل راجل فى الدنيا ميقدرش يشارك المرأة فيهم

الانجاب - تربية الاطفال - حضانة الزوج - البيت

فيهم الشغل ؟
لا

يعنى الستات متشتغلش خالص ؟؟
لا مش كده بردو

فى حاجة اسمها ضرورة
والضرورات تبيح المحظورات

لو تخصصها دا نادر والناس فى حاجة ماسه ليه
او لو واحدة مثلا ارملة .. واحدة مطلقة .. ولا تجد من يعولها .. واحدة جوزها مستواه المادى ضعيف
ومحتاجين انها تشتغل عشان تساعده على مصاريف المعيشة
وركز معايا على مصاريف المعيشة دى

يعنى متجيش واحدة تقولك انا بشتغل عشان اشترى مايكرو ويف
اصل احنا عندنا عربية 128 وعايزين نجيب واحدة احسن
حاجات زى كده

لا طبعا احنا بنقول الامور الصعبة اوى اللى هى مصاريف المعيشة
الاكل والشرب والمسكن
غير كده شغلها غلط

دلوقتى تيجي تكلم واحدة تقولها الشغل لا
تقولك دا كيانى .. دى شخصيتي
وتلاقيها اصلا قاعدة على مكتب بتأور بتنجان
يا ريتها حتى بتعمل عمل جليل يعنى هيفيد البلد

زمان لما كانت الستات بتطلع الغزوات
عشان عارف ان فى ناس هترد تقولى كده

الستات كانت بتطلع الغزوات عشان يعالجو الجرحى
كانت ستات طبيبات
وكان اول حاجة بيأمنوها فى الحرب هى الستات
واول حاجة بيفكرو فيها ساعة الهزيمة هى الستات

ودى طبعا حجة فاشلة مدخلينها فى دماغ الستات عشان يخلوهم متمسكين بالشغل
لان زى ما قولنا عملها دا لازم يبقي حاجة للناس مينفعش يعملها غيرها

لكن يقولو للستات ايه
هتقعدى تخدميه فى البيت ؟؟ .. هتخدمى سي السيد ؟؟
لا اطلعى برا اخدمى ناس تانية
تحت مسمي الشخصية والكيان

يقولك مطلوب انسه للعمل
ليه انسه يا عم
عشان تجيب زباين
عشان هى وجه حسن
لا حول ولا قوة الا بالله .. هو دا الكيان ؟؟

ودخلنا نفسنا فى متاهة الاختلاط
وظهر التحرش والزفت وبقينا فى مصايب
ويرجعو يقولولك ظاهرة التحرش ايه اسبابها
مهو انتو اسبابها من البداية !!

تحت مسمي حرية المرأة بقت المرأة دى سلعة

طب والراجل
الرجال قوامون على النساء
مش بالفردة ولا بالعافية
امال بايه
بما فضل الله بعضهم على بعض وبما انفقو من اموالهم
يعنى قوامة تكليف .. مش قوامة تشريف

يعنى جوزك دا هو اللى بيخدمك قبل مانتى تخدميه
وانتى معززة مكرمة مصونة

لو بصيتي لدينك
الاسلام هو اللى بيديكي كيانك وهى اللى بيديكي قيمتك

خلاصة الكلام

نحن قوم اعزنا الله بالاسلام فأنا اردنا العزة بغيره اذلنا الله


يا رب يكون كلامى خفيف ع الناس
انا بقالى كتير مبكتبش لان مكانش فى دماغى موضوع حاسس انه يتقرى
المرادى جاى بموضوع طويل اهو
اقرو بقي لو عاوزين :D

19 Comments:

  1. mayosh said...
    وحشتنا مواضيعك
    بصراحه الموضوع ده عجبنى اوى
    بالذات الجزء بتاع الديمقراطيه اللى فى الدين ده
    برافوا عليك وصلت المعنى بالظبط
    واقتنعت بكلامك
    بس انا هابلغ عنك جمعيات حقوق المراه :))
    واحد من الناس said...
    الموضوع طويل فعلا يستاهل القراية
    انا علشان اكتب فيه كتبته في 11 بوست تلاته سمتهم البربراريون ودي ترجمة لليبراليين و8 قصة متخيلة لو ان النساء هما اللي بيحكموا الدنيا ممكن تختصرهفي 3 بتاع الشيخ و7 بتاع الرد عليه و8 النهاية التراجيدية لنوعية الحكم ده
    سلطان said...
    \\
    ربنا خلقلى عقل عشان افكر بيه
    ويبدا بقي يخش فى مناطق محظورة
    ويدخل نفسه فى جدل هو مش اده
    \\
    هو مش اده
    انت قلبت شرقاوي مره واحده كده ليه
    هيا الاسماعيلي مكسبش من زمان ولا ايه
    اسمه مهواش
    ده حتي المفروض ان الكلمه تبقي خفيفه علي لسانك

    ع العموم فاكر انا الافتكاسه دي
    لما رحنا بيضنا عليه بيض التنين انا وانت
    بس عنده حق برده يا ابوصلاح
    ربنا خلقه عشان يفكر
    ههههههههههه
    وخلقنا عشان نتوبه عن فكره


    بس ايه الموضوع ده
    انا غيرت منك وكنت هروح اخبط صاروخ سياسي في البيت كمان شويه
    يا خراشي بقي انت تكتب موضوع سياسي وانا اعلق عليه بس
    بس حلوه فكرة الديمقراطيه دي
    ابقي فكرني ابعتلك قصيده ولا ابقي دور عليها انت اسمها الديمولوخيه
    ال ديمقراطيه ال
    يا عم اوعي بلا قلة ادب

    \\
    الانجاب - تربية الاطفال - حضانة الزوج - البيت
    \\
    بس انت ممكن تعمل الاربع حاجات دول الا حاجه واحده
    البيت
    الا يعني ايه بيت صحيح؟؟؟؟؟؟؟؟
    يا عم سيبك منهم
    دول نسوان دماغهم مخروشه
    ال يشتغلوا ال
    هما الرجاله لاقيين شغل لما تشتغلي انتي
    morgana said...
    البوست تحفه بصراحه
    و بعد ما قريت
    قررت اني لازم اشتغل بصراحه :D
    :P
    لما نشوف اخرتها ايه
    غير معرف said...
    موضوع جميل وانا متفقة معاك في اغلب اللي انت قولته فعلا
    !! a7mad sala7 !! said...
    ميوش

    هههههههههههههههه
    الحمد لله انه عجب سيادتك

    وجمعيات حقوق المرأة دى بتوزع فراخ ولا بتاعة تموين بس ؟ :P
    !! a7mad sala7 !! said...
    واحد من الناس


    منور يا فندم


    يعدت بمرورك
    ويا رب متكونش اخر مرة
    !! a7mad sala7 !! said...
    سلطان

    ههههههههههههههههههههه
    ولا ولا مش تبقي بارد :))

    ال مش ال


    عموما يابو السلاطين
    احنا ملناش دعوة بحد يا عم
    انا بدافع عن مبدأ مش بهاجم اشخاص
    ربنا يهدينا جميعا ويبعد عنا شوشو


    .
    .
    .

    هههههههههههههههههههه
    يخرب بيت فقرك يا شيخ
    هو سلطان بعينه
    !! a7mad sala7 !! said...
    مورجيحه :P


    لما تلاقي شغل متنسيناش والنبي :D
    الواحد بقي متفرغ دلوقتى وبيدور اهو
    !! a7mad sala7 !! said...
    الغير معرفة


    الحمد لله
    نورتى يا فندم :)
    هو said...
    \\
    هو سلطان بعينه
    \\
    طب هو مبن بقي
    مادام انت وثيق من الفوز اوي كده
    بس الاكيد انه مش بتاع غبي منه فيه
    !! a7mad sala7 !! said...
    ايه يا عم اللى بتقوله ده

    افلامك كلها منفدة على بعضها كده ليه
    بت خيخة وأي كلام said...
    اسفة يا احمد

    انا معرفش انك مشعلق التعليقات فوق كدة

    اصل جرى العرف ان التعليقات عادة بتكون تحت الموضوع

    اتاريك انت عاملها فوق جنب العنوان

    فعلشان كدة انا علقت على البوست ده في كومنتات البوست اللى قبله


    عموما شكرا على ردك وشكراعلى الموضوع اللى جاى فى وقته بالنسبالى


    سلام

    اختك خيخة
    !! a7mad sala7 !! said...
    ههههههههههههههههههههههههه

    انا معملتش حاجة والله

    انا اتفاجئت زيك كده بردو
    جيت فى يوم لقيتها فوق كده


    الشكر لله

    ويا رب دايما نكون عند حسن الظن :)
    أنشوده said...
    السلام عليكم

    بقالى كتير مش جيت هنا

    عجبنى اوى الجزءالى بعدالديموقراطيه

    اسلوب بسيط وسهل ^_^

    جزاك الله خيرا

    ولكن جزء الديموقراطيه
    مش هقدر اتفق او اختلف كليا عليه
    لان له تعريفات تانيه
    مش معنى كل امر دخيل على الاسلام يبقى
    بدعه مالم يمس الثوابت والرسول صلى الله
    عليه وسلم قال الحكمة ضالة المؤمن يأخذها أينما وجدها

    بس انا كده مش بفتى او قولت رايي فى الكلام الى قولته عن الديموقراطيه فى الاسلام او اعترضت عليه انا بس بقول انا
    متفقه فى ايه

    ويمكن رايي يتغير بعد ما اقرأ عن الجزء ده بشكل كافى واتفق كليا على الكلام المكتوب

    جزاك الله خيرا
    أنشودة said...
    اكرر علشان كلامى ميتفهمش انى بعترض
    على الى قولته فى الديموقراطيه انا فقط
    ابحث عن الى قرأته عندك ومدى صحته
    ولقيت اراء لعلماء ثقه مختلفه مع الكلام ده واراء متفقه
    بس لقيت ده للدكتور يوسف القرضاوى اتمنى تقرأه ومش بالضروره
    تتبناه فقط للمعرفه
    http://www.ikhwan.net/forum/showthread.php?121352-%C7%E1%CF%ED%E3%DE%D1%C7%D8%ED%E5-%E6%C7%CA%DD%C7%DE%E5%C7-%E3%DA-%D1%E6%CD-%C7%E1%C7%D3%E1%C7%E3%28%C8%DE%E1%E3-%C7%E1%D4%ED%CE-%ED%E6%D3%DD-%C7%E1%DE%D1%D6%C7%E6%ED%29
    morgana said...
    ربنا يكرمك وتلاقي فرصة شغل كويسه قريب :)
    !! a7mad sala7 !! said...
    انشودة

    وعليكم السلام


    قريت الموضوع

    بصي
    زى ما قولت انا مش حابب كلمة ديموقراطية
    مش عشان مبدأ الديموقراطية نفسه

    عشان احنا ممكن نستخدمها بشكل ميناسبناش


    ولو جيتي تبصي للكلام اللى فى اللينك كله
    ماتفقش مع حاجة من مساوئ الديموقراطية خالص
    بالعكس هو بيتكلم عن الديموقراطية على اساس ان هى شورى
    وهو دا اللى انا قولته بردو
    ليه تقول ديموقراطية
    طب متقول شوري

    للاسف معظم اللى بيتكلمو فى المواضيع الحساسة دى بيتكلمو بدبلوماسية اوى
    لان عاملين حسابهم ان فى ابعاد سياسية للكلام
    وعشان يحاولو يرضو جميع الاطراف
    هما فى نفس الوقت مقالوش حاجة غلط تمس الدين
    لكن بحس ان الكلام متلون شوية

    الكلام اللى متقال كله ماقدرش اعترض عليه
    لكن اظن لو قال انه بيتكلم عن الشوري هيبقي احسن

    وبعدين احنا مقولناش انها بدعة او حاجة
    بس احنا بنقول ليه يبقي عندنا منهجنا ودين كامل متكامل من قبل ما ييجي مصطلح الديموقراطية
    ونلجأ لحاجات تانية مستحدثة لا هتزودنا ولا هتنقصنا

    يا رقب اكون قدرت اوضح قصدي

    مبسوط اوى ان حد بيناقشنى بالشكل ده
    نورتى :)
    !! a7mad sala7 !! said...
    مورجانة

    امين يا رب
    دعواتك :)

Post a Comment



رسالة أحدث رسالة أقدم الصفحة الرئيسية

Blogger Template by Blogcrowds