انت 120؟؟

سلاااااام عليكو
نهاردنا ابيض ان شاء الله
او حتى مساء الورد
:D

ما علينا
النهارده وانا قاعد فى بيتنا
بتوضا ونازل اصلى لقيت جرس الباب بيرن
خير اللهم اجعله خير بفتح
لقيت شيخ كده بذقن
اول ما فتحت قلت دول اخوان وجايين يقبضو عليا
المهم عم الشيخ اول كلمة نطقها
انت 120؟
بقوله نعم.؟
قالى انت الاى بي بتاعك 120؟
قلتله اااااااه
هنا بقي ادركت انه بيتكلم على الاى بي بتاع الشبكة
قلتله اه انا 120
قالى انا 13
قلتله اهلا وسهلا
هههههههههههههههههههه
ايه انا 13 دى...تشرفنا يا سيدي
الراجل جاى يتعرف عليا بالارقام
كاننا فى السجن ومترقمين
بقوله خير يا عم
قالى يا عم انت قاطع عنى النت بقالك فترة
وانا جربت معاك كل البرامج اللى تتخيلها
مفيش حاجة محوقة معاك
قلتله ليه كده يا عم دانا غلبااااان
:D
قلتله اولا انا مبقطعش عليك لوحدك
انا قاطع ع الشبكة كلها
صاحبكو بقي واقع مع حتة شبكة ما يعلم بيها الا ربنا
غابة يا صاحبي
واللى بيبلطج فيها بياكل اللى مبيبلطجش
خش على اى جهاز هتلاقى برامج الكت والانتى نت كت والسنيفر والانتى ار بي
كانها حرب الكترونية
ولو مكنتش تعمل كت مش هيوصلك نت 5 دقايق على بعض
قلتله دا رد فعل طبيعي ليا يعنى
وبعدين هو محدش بيشكتى غيرك
م الناس كلها بتعمل كت على بعضها انا بس اللى اذيك يعنى
قالى اه انت بس اللى مأثر عليا
قلتله سبحان الله
طب والعمل
قالى اعمل كت ع اللى انت عايزة الا انا
خلينا حلوين مع بعض عشان ماعملش حاجات وحشة
(دا الشيخ اللى بيقولى كده)
يعنى مشغل برامج الدنيا كلها ع الناس
وزعلان ان فى واحد عامل عليه كت
لا وشيخ كمان
ما علينا
فى الاخر بيقولى ايه
شكلك كنت رايح تصلى
يالا نروح نصلى جماعة
ههههههههههه بجد شر البلية ما يضحك
كان بيقول ايه من شوية ودلوقتى بيقولى يالا نروح نصلى

فى الاخر راح 120 مع 13 يصلو العشا جماعة
ورجعو بيوتهم يكملو الحرب الاكترونية
:D
اقعدو بالعافية :)

12 Comments:

  1. النسر الاصلع said...
    هههههههه


    يا 120

    ازيك ده الشيخ ده بقى خطير

    جابك ازاي , اكيد من منظمة الفجرة والتفجير

    بص يا بني

    ده زمن خداع

    وخلي بالك ربنا يسترها

    وبلاش شهبصة في الخبايص
    MOROOOO said...
    ههههههههههههههههههههههههههههه
    حلوه القصه موووووووت يا 120
    وعلى فكره قطتى متغلاش عليك
    نورت البلوج
    Dreams said...
    120 راح يصلى مع 13 و 16 بيقولكم تقبل الله

    حلوة القصه دى يا 120 وابقى سلملى على 13 واخواتها
    دريم كبير said...
    ابعد ياض عن الناس دي وبلاش تتكلم فيهم

    انا لو منه وانت بتقطع علي النت هخبط عليك واقوللك انت 120 لو قلت اه مش هخليك تكملها

    وعينك ماتشوف الا النور...
    a7mad sala7 said...
    النسر الاصلع

    جابنى يا عم
    اتصل بصاحب الشبكة وساله علي الاي بي بتاعى
    واخد اسمي وعنوانى منه
    شكله عمل عليا تحريات كمان :D
    a7mad sala7 said...
    MOROOOO

    ههههههههه
    انا بقي اسمى 120 خلاص ولا ايه

    ربنا يخليكي
    القطة عسل اوى
    خدى بالك منها بقي

    والنور نورك طبعا :)
    a7mad sala7 said...
    Dreams

    ههههههههههه

    نورتى التوبيك يا 16
    ويوصل ان شاء الله :D
    a7mad sala7 said...
    دريم كبير

    ههههههههههههههههههه

    ليه يابنى كده
    شكلك معاهم ولا ايه
    اعترف والا لاشرحنك ;)
    نورت يا حبيب قلبي :)
    mo7mad sala7 3rafa said...
    فكرتني بقصه نسيتها اول ما افتكرتها لانها محصلتش بس انا توقعتها ان تحصل ولكن العكس اللي حصل
    هعمل ايه بقي؟؟؟؟؟؟ محدش فاهم حاجه

    نصيحه متحاولش تقرا اللي فوق تاني لانك مش هتفهمه

    مش الموضوع اسمه بعد التعديل 7 تهييس

    علي فكره
    بيعمل قاضي؟؟؟؟؟؟؟؟
    اشغل وقت يا واد

    سلامي
    Mohamed Al-Sayed ... Soul Life said...
    ههههههههههههههههه

    بجد ربنا يعينكم على اللي انتم فيه

    بس الراجل 13 برده كان تصرفه كويس يا 120

    وانت يا عم بالراحة على الناس شوية

    ولا اكمنك في حاسبات

    ربنا يوفقك ويبعد عنك 13 وأمثاله
    a7mad sala7 said...
    mo7mad sala7 3rafa

    يا رااااجل
    دانت عايز تتعالج وتجيلنا
    احنا ناقصين لبخة فى الكلام يا عم الحاج

    بس شرفتنا معاليك بردو

    وقول يا رب
    a7mad sala7 said...
    Mohamed Al-Sayed

    كلاكيت تالت مرة
    ايه الهنا اللى انا فيه ده
    بقي 3 ردود ورا بعض
    ايه يا باشا ده
    زودت النور اللى نورته فى الموضوعين اللى قبل دول :)

    وبعدين اما مافترتش والله يا محمد
    انا بعمل زى الناس :D
    لو معملتش كت مش هيجيلى نت
    دى غااااابة يا صاحبي ههههههه

    اللى عايز اقولهولك بقي
    انه جالى تانى :D
    بس مكنتش موجود للاسف

    يالا لما نشوف اخرتها ايه

Post a Comment



رسالة أحدث رسالة أقدم الصفحة الرئيسية

Blogger Template by Blogcrowds