مجـدى_6

Mahmoud was calling in the previous part :D

وعكس ما كله كان متوقع .. علا كنسلت ومرضيتش ترد

ام علا: مين يا علا اللى كان بيتصل
علا: مفيش يا ماما دا رقم غلط

وغيرت علا رقم موبايلها
وقطعت كل وسائل الاتصال مع محمود

مروة بتكلم علا

مروة: ازيك يا لووولو
علا: الله يسلمك عاملة ايه يا مروة
مروة: انا تمام .. انتى ايه الاخبار ;)
علا: الحمد لله ماشي الحال
مروة: ها مقولتيليش .. حددتو معاد الفرح ولا ايه
علا: مش عارفه والله يا مروة
مروة: امال مين اللى عارف ياختى .. انا اللى هعرف
علا: لا محددناش لسه .. هشوف واقولك
مروة: مممممم
.
.
مروة: مكلمكيش من ساعتها
علا: كلمنى وكنسلت عليه
مروة: كنسلتى على مجدى :O .. يا لهوى ليه كده
علا: ايه ده مجدى ايه .. لالا .. رديت رديت
مروة: مالك يا بت تايهة ليه كده .. فى مشكلة ولا ايه
علا: لا مفيش .. مفيش حاجة
مروة: انتى غيرتى رفم موبايلك ليه
علا: مفيش زهقت منه بس

..
..

عادل: بس يا معلم .. اظن معادش فى حاجة ناقصة كده
مجدى: مش عارف يا اخى .. حاسس ان لسه حاجة بردو
بكرة هجيب علا وامها ونشوف كده يمكن عاوزين حاجة تانى
عادل: يابنى انت مش جبتهم قبل كده .. هى شغلانة
مجدى: بردو يا عم يمكن فى حاجة احنا مش شايفينها ولا حاجة
وبعدين عروسة بقي خليها تعمل اللى هى عاوزاه
عادل: مدلعها اوى انت يا ميجو ;) .. مانت طلعت حنين اهو
امال كنت عاملى فيها الراهب الاعظم ليه
مجدى: هههههه .. ولا راهب ولا حاجة يا عم .. انا اللى مكانش فى دماغى بس
وبعدين علا طيبة وبنت حلال وتستاهل احسن حاجة فى الدنيا
عادل: ااااااااه .. فينك يا ست علا تسمعى الكلام ده
متخليهاش تقعد مع مراتى كتير يا عم .. مش عايزنكو تفتحو علينا فاتوحه
الستات برغى فى كل حاجة .. والتانية تيجي تقولى اشمعنا واشمعنا
مجدى: ههههههه .. يالا يا معفن
عادل: ههههههههه .. الفرح امتى يا سيدي
مجدى: خلاص حجزت الاسبوع اللى جاى
الخميس فى نادى التعاون
عادل: التعاون كمااان .. ال ل ل ل .. دى شكلها لحست دماغك خالص يا معلم
مجدى: ههههههههههههههههه

.
ومجدى اتجوز علا
وبعد شهرين من جوازهم
.

علا: الو..
؟؟؟: اخيرا رديتي يا علا
علا: انت مين
؟؟؟: انا مين؟ .. مش عارفه انا مين
علا: ايوة انت جبت رقمى منين .. وبتتصل بيا ليه
؟؟؟: ليه عملتى معايا كده يا علا .. دانا بحبك
علا: بتحبني ازاى .. لو كنت بتحبني كنت اتحركت عشانى
انا ياما اتحايلت عليك عشان تاخد خطوة واحدة بس تحسسني بيها انك عاوزنى
؟؟؟: بس انتى عارفه ان انا عاوزك يا علا
علا: معادش ليه لزمة الكلام ده خلاص يا محمود
محمود: امال كان ليه لزمة امتى .. مانا حاولت اكلمك كتير وانتى مكنتيش عاوزه تردى عليا
علا: يا محمود انا حكيتلك على كل حاجة .. وعرفتك موقفي .. وانت رديت عليا بكل استهتار ولا مبالاه
محمود: انا عارف انى غلطت .. بس انا مش قادر اعيش من غيرك يا علا
حاولت كتير انساكى بس مش قادر
يا علا انا بقالى 3 شهور عايش فى نار .. مبعملش حاجة غير انى بشتغل
يا علا انا من غيرك مش عارف اعيش
علا: ياما اتحايلت عليك يا محمود .. ياما كنت هبوس رجلك عشان تتحرك
محمود انا بقيت متجوزة دلوقتى .. مينفعش نتكلم بالطريقة دى
محمود: يعنى انتى نسيتيني يا علا ؟؟
علا: يا محمود بلاش الكلام ده عشان خاطرى .. ربنا يوفقك فى حياتك وتلاقي اللى تستاهلك و..
محمود: لا
لا متكمليش .. انا مش هدور على حد .. انا مش متخيل انى ممكن اكمل حياتى من غيرك
علا: لازم تنسانى يا محمود .. وانا هختفي من حياتك خالص
محمود: وانا مش هسيبك يا علا .. انا لو فكرت انساكى يبقي بحكم على نفسي بالموت
ارجوكى حسي بيا .. انا بتقطع .. هشوفك امتى
علا: تشوفنى؟ .. لا تشوفنى امتى .. انسي الموضوع دا خالص
محمود: انا هشوفك يا علا
لازم اشوفك
علا: محمود انا متجوزه
محمود: انا هشوفك يا علا...

يتبع..

الموعـظـة الحسنـة

بحسن الوعظ تمتلك القلـــوب***و صخر الطبع من لين يذوب

فقل للمسرفين ألا رجعتم *** فإن الله يقبل من يتوب

و رحمته لأوسع من خيال***و لو كثرت من العبد الذنوب

اخص عليك يا سد

عيب يا حضري اللى انت عملته ده
عيب فى حقك وفى حق كرامتك

للاسف خسرت حب وتعاطف ناس كتير
ووقعت من نظرهم

وفى نفس الوقت اخدت صابونة من الاهلى
اشرب بقي

مجـدى_5

عادل: يالا يا باشا خدتلك منهم معاد
مجدى: معاد ايه
عادل: عشان نروح نقابلهم
مجدى: نقابل مين
عادل: نقابل علا وامها يا عم
مجدى: علا مين .. هما فى الدور الكام
النمرة غلط يا عااادل !!!
عادل: ههههههههههههههههه .. لذيذ لذيذ يعنى .. طب انا هتصل اقولهم هو اعتذر .. ومحصلش نصيب بقي
مجدى: ههههههه .. استنى يا عم انت .. الواحد ميهزرش معاك ابدا .. انت خلقك ضاق ليه كده
عادل: لا انا اللى تخنت .. خلقي زى ما هو
مجدى: عاااااااهاهاا .. طب مانت حلو اهو وبتهزر
عادل: اه طبعا .. بس الواحد مستنى الفرصة :D
المهم يا سيدي .. حضر نفسك الخميس الجاى .. هنروحلهم البيت
مجدى: طيب يا سيدي .. ربنا يسهل
.
.

ام علا بتنادى

يا علا .. يا علا
علا: ثوانى يا ماما معايا تليفون
.
علا: طب واخرتها يا محمود .. انت بقالك كام سنة متخرج دلوقتى
ومش عايز تتحرك ولا تتعب نفسك فى التدوير على شغل
محمود: ومين قالك انى مبدورش .. انا كل ما بنزل بدور على شغل
علا: كل ما بتنزل .. يعنى انت بتدور على شغل عشان نزلت
مش بتنزل من بيتكو عشان تدور على شغل
محمود: مالك يا بنتى مستعجلة اوى كده ليه .. مانتى لسه بيبي اهو .. مستعجلة ع الجواز اوى
علا: يا محمود انت مستهتر اوى .. معتمد على ابوك ومش عايز تشيل مسئولية
محمود: يا لولو انا بحبك .. ومش ممكن هفرط فيكي .. بس كله بأوانه
علا: مانا كمان بتهبب على عيني وبحبك .. هو لو مش بحبك كنت هفضل فوق دماغك كده
محمود: وتفضلى فوق دماغى ليه يا حبيبتي .. مهو ربنا موسعها علينا اهو .. انزلى انزلى يا شيخة
علا: خليك افضل هزر كده .. خلى بالك انا جايلي عريس بكرة
محمود: واااااااو .. عريس .. ودا العريس الكام .. يالا اسطوانة كل مرة
علا: انا مش عارفه ايه اللا مبالاه اللى انت فيها دى .. يا محمود انا تعبت
محمود: انتى اللى عاوزة تتعبي نفسك .. الموضوع سهل وبسيط وغير معقد ولا يحتاج لاى ارهاق زهنى
علا: يا محمود ابوس ايدك خليك جد شوية .. انا مش عارفه هعمل ايه بكرة
محمود: هتعملى ايه يعنى .. هتعمليلهم حاجة يشربوها
وبعدين هتقعدى .. وانتى قاعدة اعملى كده .. اوعى تعمليلهم كده .. شايفانى
علا: :| .. محمود انت كده بتضيعنى من ايدك
محمود: واضيعك ليه .. انتى اللى بتضيعي نفسك
عريس وجايلك .. زى اى عريس .. لا .. وشكرا على كده .. هو فيلم
علا: بالبساطة دى .. صحيح مانت اتعودت على انى اتصرف فى كل حاجة .. وحضرتك باشا
محمود: طول عمرى يا بنتى
علا: يعنى ايه يا محمود .. انت مش هتاخد اى خطوة فى موضوعنا كده
محمود: خطوة واحدة؟؟ .. يا سلام دانا امشيلك كيلو على رجليا .. استنى بس البس كوتشي
علا: محمود .. انا مش هقدر ارفض .. انا خلاص مبقيتش عارفه اتصرف ازاى مع امى
محمود: يعنى ايه .. العريس الجديد متريش ولا ايه
علا: شوف انت بتكلمنى ازاى يا محمود .. انا بقيت احس ان انت مبتحبنيش
محمود: انتى اللى متسربعة مش عارف على ايه .. لو عاوزانى هتستنيني عمرك كله
علا: انا استناك عمرى كله بس لما احس ان انت عاوزنى
محمود: ومين قال انى مش عاوزك
علا: اهو افعالك بتقول كده يا محمود .. انت مخدتش خطوة واحدة تقول ان انت عاوزنى
محمود: عاوزانى اعمل ايه يعنى .. اقفلك تحت الشباك واحدف طوب .. ولا اطلعلك ع الشجرة واغنى
علا: :(
محمود: بطلى دلع .. نفسي مرة نتكلم من غير ما نجيب سيرة الموضوع ده
علا: حاضر يا محمود .. انا مش هجيب سيرة الموضوع ده تانى .. فعلا انا اللى غلطانة
انا رخصت نفسي اوى كده .. مش هدوشك تانى يا محمود .. ومش هتشوف خلقتى تانى
محمود: يالا يا بت .. اجرى من هنا
.
.
النهارده الخميس

عادل: سلاااام عليكم
ام علا: وعليكم السلام .. اتفضلو
عادل: ازيك يا حاجة .. ازى صحتك
ام علا: ازيز يا حبيبي .. الحمد لله .. نحمده ونشكر فضله
ازيك يا مجدى .. عامل ايه فى شغلك يا حبيبي
مجدى: الله يسلمك يا حاجة .. الحمد لله ماشي الحال
ام علا: يستاهل الحمد ..

ترنن
سلام عليكم جميعا
ام علا: وعليكم السلام .. تعالى يا كامل
كامل اخويا .. خال علا
مجدى: اهلا وسهلا .. ازيك يا عمى
كامل: اهلا بيك .. منورين يا شباب
ام علا: عن اذنكو ..
.
.
ام علا: يا علا.. يا علا
ايه يا بنتى مالك .. ايه ده انتى بتعيطي .. مالك يا حبيبتي
علا: مفيش يا ماما
ام علا: مالك يا بنتى بس .. حد يعيط فى يوم زى ده .. فى ايه
علا: مفيش حاجة
ام علا: يا بنتى صارحيني انا امك .. مش موافقه ع العريس؟
علا: لا موافقة
ام علا: يا بنتى قوليلي .. دا جواز .. مش مستريحاله؟
علا: لا موافقة .. موافقة
ام علا: امال بتعيطي ليه بس
علا: مفيش حاجة .. خلاص اهو
ام علا: خلاص ازاى بس .. مش هسيبك الا لما افهم
علا: مفيش حاجة يا ماما .. اناا بس .. مش متخيله هسيبك ازاى
ام علا: يا حبيبتي .. دانا يوم المنى لما اشوفك عروسة مع عريسك
ولما تجيبيلي عيل صغير كده اربيه على ايدي
علا: :)
ام علا: يالا يا حبيبتي .. قومى كده اغسلي وشك واجهزى .. الناس مستنيين برا
علا: حاضر
ام علا: يالا يا حبيبتي .. عاوزه اشوف قمر برا :)
.
.

كامل: خلاص على بركة الله .. الخطوبة الشهر الجاى
ايه رايك يا علا؟
ام علا: اتكلمى يا علا
عادل: ايه يا جماعة السكوووووووت
كامل: ههههههههههه يبقي نقرا الفاتحة
مجدى: ولا الضااااالين .. امين
عادل: مبروك يا مجدى .. الف مبروك :)
.
.
مروة: مبروك يا لووولو
علا: الله يبارك فيكي
مروة: واتخطبنا اهو .. وبقينا عرايس ;)
علا: اظن انتى مبسوطة كده
مروة: هههههههه .. ال يعنى انتى مش مبسوطة
ايه حددتو معاد الفرح ولا لسه
علا: لسه يا مروة .. دا الخطوبة كانت اول امبارح .. احنا لحقنا
مروة: ااااه .. انتى عاوزه تتخطبي شوية بقي .. وخروجات وهدايا والجو ده ;)
علا: ههههههههههههههههه
مروة: ههههههههههههه .. ربنا يتمملك بخير يا حبيبتي
.
.
علا فى البيت

ام علا: يا علاااااا .. تليفونك بيرن
علا: طيب يا ماما هشوفه
.
.
mahmoud is calling..
!!!
يتبع..

shocked !!!


26-4-2010

مجـدى_4

عادل مروح من شغله
ترنن

عادل: سلام عليكم
مروة: وعليكم السلام .. تعالى يا حبيبي .. اتاخرت ليه كده
عادل: الدنيا زحمة اوى النهارده .. ومجدى عربيته بايظة .. جايين مواصلات
مروة: عاوزين نجيبلنا عربية يا عادل .. هتنفعنى وتنفعك
عادل: قريب ان شاء الله .. اخبار الغدا ايه
مروة: جاهز اهو ومستنياك من بدرى .. غير هدومك على ماغرف
.
.
عادل: اللــــــــــه .. تسلم ايدك يا حبيبتي
عاوزين بقي اكله من اديكي الحلوة دى عشان عزومة قريب
مروة: خير .. هتعزم مين
عادل: مش انا بس .. انا هعزم وانتى هتعزمى
مروة: دا ايه ده بقي
عادل: الاول قوليلي .. علا صاحبتك .. اللى جت زارتنا بعد الجواز
مروة: مالها
عادل: اللى كانت هنا يوم ما مجدى وامه الله يرحمها جم
مروة: ايوة مالهاااا
عادل: انتى تعرفيها من امتى وازاى وكده
مروة: يااااه .. علا دى عسل .. اعرفها من زمان ايام المدرسة
انا دخلت تربية وهى دخلت اداب .. بس فضلنا صحاب يعنى
عادل: ممممممممم وايه كمان
مروة: هو ايه اللى كمان .. انت مالك اصلا .. متلم نفسك ياخويا
عادل: هههههههههههه .. لا مش كده انتى فهمتيني غلط
مروة: امال ايه الصح
عادل: هقولك بس خليكي معايا .. هى مرتبطة او كده؟
مروة: لا مش مخطوبة .. دا اللى اعرفه عنها .. ليه بردو
عادل: انتى ضامناها يعنى .. اخلاقها كويسة وهادية كده؟
مروة: بقولك ايييييييييييه .. متخلينيش اتنرفز عليك بقي .. هى عجاباك ولا ايه
عادل: هههههههههه يا بنتى اهدى بس .. انا بفكر اكلم مجدى ياخدها
مروة: اااااااااه .. مــــــــجدى
عادل: ايوة
مروة: لا هى محترمة جدا .. وعيلتها كويسة اوى .. واخلاقها ممتازة .. ومشوفتش منها حاجة وحشة بصراحة
عادل: يعنى نتوكل على الله
مروة: خلاص ماشي .. انت ناول تعمل ايه
عادل: بصي حركة الترقيات قربت .. وانا ليا ترقية المرادى ان شاء الله
هنعزمهم بمناسبة الترقية .. انا هعزمه .. وانتى اعزميها هى ومامتها
مروة: خلاص ماشي
.
.

عادل اترقي

مجدى: مبروك يا باشا .. اظن فيها قفش جامد الترقية دى
عادل: قفش؟ .. اعوذ بالله من عينك يا اخى
مجدى: هههه يا عم قول الله يبارك فيك .. هو انا هحسدك يعنى
عادل: الله يبارك فيك يا سيدي .. وبالمناسبة دى انا عازمك ع الغدا يوم الخميس
مجدى: ال ل ل ل .. غدوه كده مرة واحدة
عادل: لا هجيبك تشم الاكل .. وتبقي تتغدى فى يوم تانى
مجدى: ههههههههه .. ايه يا عم مالك سخن عليا ليه كده
عادل: اصل انت رايق اوى النهارده .. مش عارف مالك
مجدى: هتحسدنى على روقانى .. ولا بتردهالى عشان بحسدك على الترقية :D
عادل: هههههههههههه .. حبيبي يا ميجو :)
.
.

يوم الخميس

عادل: تعالى يا مجدى .. خش
مروة: ازيك يا مجدى
مجدى: الحمد لله .. عايشين
عادل: ايه يا مروة هتأكلينا ايه النهارده
مروة: عامله مكرونة بالبشاميل .. مش انت بتحبها يا مجدى
مجدى: جداا .. بالذات اللى كانت بتعملها الحاجة الله يرحمها
عادل: الله يرحمها .. وايه تانى يا ستنا
مروة: ورقاق .. وملوخية .. ومسقعة
عادل: حلو .. بقيت الضيوف مش جايين ولا ايه
مروة: جايين ان شاء الله .. هقوم اتصل بيهم استعجلهم
مجدى: ضيوف مين .. انت جايب حد يشاركنا ليه يا عم
عادل: هههههههههه .. متخافش دول مش مزعجين خالص ;)
مجدى: اوبا .. يبقي فى جنس ناعم :D
.
.
ترنن
سلاااام عليكم
مروة: وعليكم السلام .. ازيك يا طنط
ام علا: الله يخليكي يا حبيبتي .. مبروك يا عادل
عادل: الله يبارك فيكي .. ازى صحتك كده
ام علا: الحمد لله ماشي الحال

مروة: ازيك يا علا
علا: تمام .. مين الاخ اللى جوا ده
مروة: دا واحد صاحب عادل
علا: مقولتيليش يعنى ان فى حد جاى
مروة: هو عزمة يا علا فيها ايه يعنى
علا: :-? .. مش مستريحالك
مروة: ليه يا لولو .. دانتى حبيبتي
علا: طب يالا ياختى نحط الاكل
.
.
عادل: اعرفكو على بعض بقي
دا مجدى .. صاحبي وحبيبي من زمان
ودى علا .. صاحبة مروة يا مجدى .. ودى الحاجة والدتها

مجدى: اهلا وسهلا
علا: اهلا بيك
.
.

تانى يوم

عادل: ايه يا ميجو .. ايه رايك فى بتاعة امبارح
مجدى: مش دى اللى كانت فتحتلنا الباب وانا جاى ازورك ؟ .. وبعدين انا مالى بيها يا عم
عادل: يا ولا .. انا اقصد المكرونة ;)
مجدى: بس يا سخيف .. مش قاعد معاك خالص .. هروح اقعد فى مكتبي
عادل: ههههههههههه .. استنى بس .. بهزر معاك يا عم .. اتكسفتى يا بيضة
مجدى: لا ماتكسفتش يا فرخة
عادل: بقولك ايه طيب .. انت ايه رايك بجد
مجدى: دانت قاصدها بقي .. تجيبني فى نفس اليوم .. وعازمك ومش عارف ايه
عادل: يعنى الحق عليا يعنى .. كان زمانك بتاكل الاكل الملخبط بتاعك ده
مجدى: خلاص يا عم .. هى كويسة وهادية .. هى عندها كام سنة
عادل: اد مروة .. يعنى اصفر منك ب3 سنين
مجدى: مممممممم
عادل: هاا ايه رايك مروة تكلمها
مجدى: ماشي خليها تكلمها
عادل: ع البركة
.
.

علا: لا يا مروة .. وبعدين انا زعلانة منك بجد
كده تجيبيني عشا نيشوفنى .. هو انا تلاجة
مروة: يا بنتى ليه بتقولى كده .. هو شافك عندنا قبل كده وسال عادل قاله هى مش مخطوبة ولا متجوزة
علا: بس انتى عارفه انى مش عاوزه اتجوز بالطريقة دى
مروة: ومالها الطريقة دى .. هو جايبك من الشارع
وبعدين بصراحة هو مفهوش حاجة تتعيب .. فكرى وردى عليا
.
.

علا: شوفتى يا ماما .. الراجل اللى كان معزوم معانا عند مروة
امها: ماله .. طالب ايدك؟
علا: الله .. وانتى عرفتى منين بقي
امها: ههههه .. بيبان يا بنتى
علا: بيبان؟ .. دانا اللى هبلة بقي
امها: انتى رايك ايه
علا: لا يا ماما انا مش عاوزه اتجوز بالطريقة دى
امها: يا بنتى فيها ايه .. طالما الراجل شغال .. وعنده بيته .. وجاهز وشاريكي
ايه اعتراضك عليه
علا: مفيش اعتراض عليه .. بس .......
امها: بس ايه بطلى دلع .. عاوزه حب وغراميات وتليفونات وكلام فارغ
علا: حب ايه بس يا ماما .. الحب دا مش لينا .. خلى الحب لاصحابه :(
امها: خلاص اتكلى على الله .. خليه ييجي يتكلم معانا وباذن الله هتتوفقو

يتبع..

++?



مجـدى_3

مجدى: مش دى مروة .. انا عارفها كويس
ام مجدى: يابنى تلاقيها واحدة ضيفة عندهم
مجدى: اممممممممم
.
.
ام مجدى: الف مبروك يا حبيبتي .. عقبال مانشوف الاولاد
مروة: الله يبارك فيكي يا طنط .. عقبال مجدى
ام مجدى: يا رب يا بنتى .. ريقي نشف معاه .. مش عارفه مستنى ايه
عادل: هو كده يا حاجة .. مش وش نعمة انا عارفه
مجدى: خلاص يا خفيف .. اهدى شوية
عادل: اه .. اه .. شوفتى يا حاجة بيزغدنى ازاى :P
.
.
اسبوع كمان وهما فى الشغل

مجدى: هل هلالك يا عريس .. اخيرا افتكرتنا
عادل: والله يابنى ما كنت عاوز افتكركو اصلا
مجدى: ههههههههه .. طول عمرك واطى
اخبار الجواز ايه يا بوب
عادل: ملاكش دعوة .. خليك جنب الحاجة
مجدى: ماشي يا عم مانا مخليني اهو
مش هتفطر معايا؟
عادل: لا يا حبيبي .. سبقتك .. زمن الفطار هنا دا راح خلاص
مجدى: حقك يا عم .. تفطر هنا ليه بقي مخلاص .. معادش فى اكل الحاجة ام مجدى دلوقتى .. فى اكل حبيبة القلب
عادل: لا ياخى ام مجدى دى الخير والبركة بردو .. هى عاملة ايه
مجدى: تعبانة والله يا عادل .. انا قلقان اوى .. المرادى غير كل مرة
عادل: خير ان شاء الله .. باذن الله تقوم بالسلامة
مجدى: يا رب المرادى غير كل مرة .. امى مش عاجبانى خالص :(
.
.
تانى يوم مجدى مجاش الشغل

عادل: الو .. ايه يابنى مجيتش ليه النهارده
مجدى: امى تعبانة اوى يا عادل .. انا فى المستشفي
عادل: اهدى بس .. حصل ايه
مجدى: جالها غيبوبة الصبح ونقلتها المستشفي .. فى العناية المركزة دلوقتى
عادل: يا خبر .. طب انا جايلك اهو .. سلام
.
.
عادل: ايه هى عاملة ايه دلوقتى
مجدى: جيب العواقب سليمة يا رب
امى بتموت يا عادل
عادل: متقولش كده يابنى .. هتخف وتروح معاك ان شاء الله
مجدى: يا رب
.
.
باب العناية المركزة فتح

عادل: ايه يا دكتور الحاجة عاملة ايه
الدكتور: البقاء لله...
.
.

بعد العزا

عادل: شد حيلك كده يا مجدى .. قضاء ربنا ونفذ
مجدى: ونعم بالله .. انا بس مش عارف هرجع البيت ازاى من غيرها
عادل: هترجع والحياة هتكمل .. ادعيلها انت بس
مجدى: ربنا يرحمها ..
.
.

عدى 6 شهور .. ومجدى حالته مش كويسة

عادل: ايه يابنى مالك كده .. مش عهاجبني اليومين دول خالص
مجدى: امى كانت كل حاجة بالنسبالى يا عادل .. من غيرها مش عارف اروح ولا اجى
كانت شايله عنى كل حاجة
عادل: ايوة بس دا قضاء ربنا .. امك مش هتفضل عايشاك طول العمر
وبعدين انت ازاى معملتش حساب يوم زى ده
مجدى: اعمل حسابه ازاى يعنى
عادل: يعنى لازم تتجوز يا مجدى .. انت مبقيتش صغير
وانت فى امس الحاجة للجواز دلوقتى
انت بقيت لوحدك .. ولازم يكون ليك بيت واسرة وتعيش حياتك زى بقيت الناس
مجدى: انا مبفكرش فى الموضوع دا خالص
عادل: لا لازم تفكر .. امال هتفضل ع الحال دا كتير ولا ايه
مجدى: طب اديني فكرت .. ايدي على كتفك يا سيدي
عادل: سيبلي انت الحكاية دى .. انا هظبطك
مجدى: يا خوفي منك انت
عادل: عيب يا ميجو دانت حبيبي ;)

يتبع..

مجـدى_2

الساعة 7 ..عادل بيتصل

عادل: الو .. ايه يابو الامجاد .. مش يالا
مجدى: يالا انت معدتش عليا ليه
عادل: ياخى خلى عندك دم هو مين اللى معاه العربية
متعدى عليا خليك جدع .. انا مكسل اجيلك
وبصراحة الواحد مش عايز يفرهد نفسه من اولها كده
مجدى: طيب انا جايلك اهو .. بس اجى الاقيك جاهز
عادل: لا انا جاهز اهو .. تعالى انت بس
مجدى: طيب سلام
عادل: سلام
.
.
تييييييييييت تيت تيت تيييييييييييييت
عادل: ايوااااااا نازلك اهو
مجدى: يابنى انت مش قولت جاهز .. يخرب بيتك يا شيخ
عادل: معلش يا بوب .. نازل اهو والله
.
.
عادل: يالا يا معلم هتودينا فين
مجدى: اى حتة ادينا ماشيين
عملت ايه فى شقتك
عادل: اهو شغال باديا وسنانى والله
فى التشطيبات الاخيرة
مجدى: جبت العفش ولا لسه
عادل: الاسبوع الجاى هننزل دمياط نجيبه على طول
تبقي تيجي معايا بقي
مجدى: اجى معاكو .. من قلبك دى
عادل: بصراحة لا :D
مجدى: طب مانا عارف
اهم حاجة تاخد الحاجة انت
عادل: انهى حاجة
مجدى: الحاجة ام العروسة طبعا
عادل: ههههه يا راجل وانا اخد حماتى ليه
مجدى: انت عبيط يابنى .. دى القوة العظمى اللى بتحرك كل حاجة
انت فكرك انتو اللى بتحركو الكلام ده
عادل: لا يا اخى .. انا ومروة متفقين على كل حاجة تقريبا
كل اللى باقيلنا كام مشوار كده وكل حاجة هتخلص ان شاء الله
مجدى: طيب كويس .. ابقي عدى عليا بيانتكو عشان اعملكو كارت دعوة حلو كده
عادل: بعتهم يا بوب من بدرى .. ودى حاجة تفوتنى بردو
بكرة هتلاقيهم على مكتبك الصبح
مجدى: ال ل ل ل .. لا دانت مبتنساش حاجة بقي
عادل: لو مكنتش افتكر دلوقتى .. امال افتكر امتى يعنى
مجدى: ماشي يا عم ربنا يتمم بخير
عادل: يا رب .. اركن هنا بقي ننزل نتعشي
مجدى: لا يا حلو .. امى فى البيت لوحدها هتعشي معاها
عادل: طب استنى اجيب عشايا انا يا عم .. يا رب توب علينا
.
.
عدى اسبوعين .. والنهارده فرح عادل

مجدى: يالا يا ماما الساعة بقت 9
يا دوب عشان منتأخرش ع الفرح
امه: يالا انا جهزت اهو .. يا رب اشوفك عريس زيه كده يابنى
مجدى: متستعجليش يا امى .. لسه بدرى .. ربنا يديكي الصحة وطولة العمر
امه: يابنى محدش ضامن عمره .. نفسي اشوف عيالك قبل ماموت
مجدى: بعد الشر متقوليش كده .. ان شاء الله هتشوفيهم وتربيهم على ايدك كمان
.
.
وصلو النادى اللى فيه الفرح

مجدى: الف مبروك يا بوب
عادل: ههههههههههه الله يبارك فيك يا حبي .. بتاعتى بوب دى يالا مش مشكلة
مجدى: ههههههههههه .. خلاص بقي بتاعتك ايام العذوبية .. انت راجل رب اسرة دلوقتى
عادل: ماشي يا سيدي .. عقبالك
.
.
عدى اسبوع

ام مجدى: مش هنروح نبارك لصاحبك يابنى
مجدى: ماحنا روحنا الفرح يا ماما .. هى شغلانة
امه: لا عيب يابنى .. لازم تباركله بردو فى بيته
مجدى: فكرك كده .. اعتقد انه مش عايز يشوف حد دلوقتى :D
امه: بطل يالا قلة ادب .. ويالا قوم فز دا صاحبك
مجدى: طيب يالا
.
.
مجدى: سلام عليكم
مش دا بيت عادل .. العريس
بنت ما: ايوا هو اتفضلو
مجدى: ايه دا يا ماما الواد غير العروسة ولا ايه !!

يتبع..



عدنا بحمد لله

الزمان: من 10 ل 14-4-2010
الحدث: ملتقي كليات الحاسبات ونظم المعلومات
المكان: اسيوط

الملتقي السنادى كان مقره اسيوط
كان بيضم حاسبات من 6 جامعات
القاهرة واسيوط والمنصورة وقناة السويس والمنوفية والزقازيق

اعتقد ودا رأيي الشخصي
انه ليس فى الامكان افضل مما كان

جامعة اسيوط انسب جامعة ممكن يتعمل فيها ملتقي زى ده
جامعة راقية جدا
مدينة سكنية للطلبة لا بأس بيها
وجنب الجامعة بالظبط
خدمات لا يعلى عليها باستثناء حاجات بسيطة
اهل اسيوط ناس قمة فى الذوق والكرم والاخلاق
القائمين على الملتقي ناس قمة فى التفاهم والضمير

اكيد الاماكانيات ساعدت بشكل كبير
جامعة اسيوط يقال انها منشأة حديثا
مكانها لا يعلى عليه بصراحة
فى وسط المدينة وفى حى راقي جدا
الجامعة نفسها نضيفة جدا .. مفيش ورقة ع الارض
الجامعة مليانة ورد وشجر
اينعم الجو حر هناك بس دا بالنسبة للصعيد عامة كويس جدا
يمكن الموقع الجغرافي هو العيب الوحيد فى الملتقي ده
محافظة اسيوط بعيدة جدا عن معظم حاسبات مصر

لو تعمقنا فى امكانيات الجامعة شوية
هتلاقي ان فى حمام سباحة خاص بالجامعة
موجود 2 صالة مغطاه خاصين بالجامعة
نادى مجهز خاص بالجامعة موجود فيه معظم الملاعب اللى ممكن تحتاجها
السكن الطلابي مزود ب جيم ومركز كمبيوتر وانترنت

لو تعمقنا فى امكانيات الكلية شوية
هتلاقي ان المدرج يحتوى على 6 تكييفات وفيديو كونفيرانس
المدرجات نفسها شكلها يفتح النفس
المعامل مزودة بنت بعضها لان وبعضها واير ليس
طبعا الكلام ده مش موجود هنا خالص
فعشان كده تحس نبرة الحرمان اللى بتكلم بيها

لو اتكلمنا عن البروجرام اللى كانو محضرينه لا يقل عن جيد جدا
استقبال ولا اروع
اقامة كويسة جدا
الاكل كان جيد الى حد ما
المعاملة ممتازة بصراحة غير اللى بسمعه بيحصل هنا خالص

حفل استقبال اول يوم الصبح
طابور العرض دا اللى ضايقنى شوية
مكانش ليه لزمة غير ان الجو كان حر الصبح
حفلة فنية كانت تانى يوم .. فرقة من معهد موسيقي تقريبا كانت كويسة اوى
الجولة النيلية+الغدا تالت يوم
حمام السباحة رابع يوم
والجولة الحره اللى عملناها احنا .. اتفرجنا على البلد نفسها
مخبيش عليكو كنت متوقع ناس بجلابيات وعمم وحاجات زى كده
صعايدة يعنى
طلعنا احنا اللى صعايدة :D

بصراحة اسيوط طلعت اجمل كتير مما كنت اتوقع
البلد تقريبا ال 3/4 مسيحيين
يعنى نادرا لما تلاقي ست محجبة وانت ماشي
البلد نفسها متظبطة جدا من حيث النضافة والكبارى والنافورات والمحلات والشوارع والذى منه

اهل اسيوط نفسهم جدعان جدا بصراحة
يمكن استغربت شوية من ان نادر لما تلاقي حد بيهزر
لما تكلم اى حد هناك غالبا تلاقيه مشدود كده وبيكلمك بجدية زيادة .. صعايدة بقي :D
مش عيب فيهم .. بس يمكن هنا الناس اخف شوية فى الحتة دى
الاسعار هناك اخف شوية من هنا فى حاجات كتير
غير ان حتت الاستغلال هناك اقل شوية من هنا

فكرة التار والعار والكلام القديم ده ماعتقدش ان بقاله اثر دلوقتى
على الاقل فى اسيوط المركز الام .. المدينة نفسها
بس يمكن امن الدولة هناك شادد حيله شوية .. عشان مشاكل المسلمين والمسيحيين والحاجات دى

اجمل ما فى الملتقي الفكرة
اننا اتقابلنا بناس من نفس مستوانا فى التعليم
اينعم كان فى فرق فى القدرات والامكانيات
بس اكيد استفدنا كتير
الاحتكاك علمنا حاجات كتير اوى .. وورانا حاجات مكناش شايفينها

يمكن وفد المنصورة عكر صفو الملتقي شوية
حصل منهم حبة حاجات كده مش كويسة
الناس جايين بطبلة وكل شوية تلاقي غنا ورقص
حتى فى الجولة النيلية كنت حاسس انها حنة فرح
الدي جي شغال شعبي وهما قايمين بالواجب تمام
طبعا دا ادى فرصة للناس تقول عليهم كلام كتير مش كويس .. مش عايز اقوله
حتى فى المسابقات حصل اكتر من حركة مش كويسة .. جايبين شغل جاهز من ع النت .. وحصل مشاكل بسبب الحتة دى
حتى فى دورة الكورة كان بيحصل تصرفات بردو مش كويسة :D
مش عاوز افسر .. بس دا كان رأى معظم الناس فى الملتقي

وفد المنوفية ناس جدعان اوى وعشريين
وفد الزقازيق شباب طيبين جدا ومحترمين
وفد القاهرة ماحتكيناش بيه كتير .. بس مصدرش منهم اى مشاكل

بعيد عن الدراسة خالص
كانت فرصة حلوة اننا نتقابل بصحابنا وزمايلنا اللى مبيتجمعوش مع بعض خالص
اللمة كانت حلوة جدا بصراحة .. وحسينا انه جو رحلة اكتر منه جو مسابقات
اكيد ال5 ايام دول مش هيتنسو
وعلى رأى واحد صاحبي .. يمكن دى الحاجة الوحيدة اللى ممكن افتكرها من ايام الكلية بعد كده :D

عاوز اشكر علاء .. طالب تالتة حاسبات اسيوط
كان مشرف علينا ومتابعنا طول فترة الملتقي
بصراحة الراجل تعب معانا اوى .. ومكانش بيفارقنا لحظة
زى متقول كده كان مقطوعلنا
من غيره كنا هنتعب كتير اوى على ما نتأقلم ع الجو العام .. وعلى المكان هناك
احنا كنا فى امس الحاجة ليه .. وهو قام بالواجب وزيادة 3 حبات

الملتقي ادانا انطباع ممتاز عن اسيوط .. وعن جامعة اسيوط .. واهل اسيوط

وانا شخصيا اتمنى اروح هناك تانى
:)

رسائل أحدث رسائل أقدم الصفحة الرئيسية

Blogger Template by Blogcrowds