اول مرة اروح محافظة فى الصعيد
كان مشوار علقة اينعم
حوالى 8 ساعات ونص سفر
بس بصراحة الموضوع طلع يستاهل السفر
هبقي احكى بالتفاصيل لما ارجع
بس اللى عاوز اقوله
ان اسيوط محافظة كويسة جدا
اقل محافظة زورتها فيها مسلمين
وجامعة اسيوط احسن بكتير كتير كتير مما كنت اتصور
جامعة جميلة جدا
وكلية حاسبات هنا تحفة
اكيد الاسباب سياسية من الدرجة الاولى
مش هوضح اكتر من كده بقي
بالنسبة للقصة اللى كاتبها
بقيت اجزائها عندى فى البيت
اول مارجع هكمل ان شاء الله
وهرد ع الناس اللى ردت فى الجزء اللى فات
بمجرد عودتى لارض الوطن ان شاء الله :D

مجـدى_1

ترررررررررررر
رررررررررررررررررر
ررررن
>>بس يخرب بيتك دانت مؤرف
عرفت ان الساعة 7 ونص والله
اوففففف يا سااااااتر .. لازم كل يوم اصحى بالعافية .. ولازم كل يوم مانامش بدرى .. ولازم كل يوم اصحى افش غلى فى المنبه المسكين ده
ترررررررررررررررررن .. او على رنة البني ادم ده

مجدى: الو ايوة يا عادل
- ايوة صحيت .. ومش هنام تانى .. مش هتأخر متقلقش .. ومش هنسي الساندوتشات امى عاملاها برا اهى
- حاضر همون العربية .. وعارف اننا خارجين باليل .. سلام
عادل: اااايوة طب مانت حلو اهو .. يالا سلام
مجدى: سلام
.
.

مجدى معلق الفوطه على كتفه وطالع م الاوضة

مجدى: صباح الخير يا ماما
امه: صباح الخير يا حبيبي .. الساندوتشات اهى .. واللبن ع النار على ما تطلع م الحمام هكون عملتلك الكاكاو
مجدى: تسلم ايدك يا امى :*

مجدى نزل راح شغله
صباح الخير يا جماعة
ايه الاخبار .. كله تمام
طيب الحمد لله
محدش شاف عادل النهارده؟؟
.
.
دخل على مكتبه
لقي عادل قاعدله ع المكتب

عادل: ايه يا بوب .. ازيك
مجدى: اهلا ياخويا .. صباحك زى وشك
عادل: زي بعضه .. يالا عايزين نفطر .. يا رب ارحمنى من الفطار مع البنى ادم ده
كلها اسبوعين بالظبط وافطر فى بيتي .. مع مراتى حبيبتي
مجدى: مش عاجبك الفطار يا معفن .. خلاص سيبه
عادل: لالالا .. ايه يا حبي هو انا اقدر اكمل اليوم من غير ساندوتشات الحاجة امو مجدى حبيبتنا
بس الواحد عايز يستقر يعنى
مجدى: تستقر ازاى يعنى .. امال انت طاير ولا ايه .. مانتى زى الفل اهو
عادل: بكرافتتك دى .. زى الفل؟
يا راجل بص لنفسك بقي فى المرايا كده
فين اللمسة .. فين السينس
فين دى .. فين دى
مجدى: اوعى يالا يا تافه يالا .. مالها الكرافاته مهى حلوة اهى
عادل: ايوة اعدل اعدل .. مش مظبوطة وبردو :P
مجدى: يالا يلا من هنا .. مفيش فطار
عادل: هههههههههههههه يا عم هدى اعضائك .. انت نرفوز ليه كده
انا عايز مصلحتك يا بوب .. الجواز بيفرررق
مجدى: ربنا يسهل .. ربنا يسهل

اليوم خلص والمروحين

عادل: ايه يا بوب .. مش يالا
مجدى: ايه بوب دى يابنى .. دانتى بنى ادم فصيل
عادل: ههههههه على اساس ان فصيل هى اللى طبيعية .. يالا نمشي يا عم
فكك من الضمير اللى نزل عليك ده .. نكمل بكرة
مجدى: خلاص خلصت يالا
.
.
عادل: راكن عربيتك فين؟
مجدى: هناك اهى .. هتعدى عليا الساعة كام بالليل
عادل: يعنى 7 كده .. هكلمك قبل ماجى
مجدى: طيب تمام
عادل: صبركو عليا بس .. هما اسبوعين ومش هعبر حد فيكو
اخرج مع مراتى بقي \:d/
مجدى: هههههههههه ايوة يا عم
عادل: يابنى صدقنى تفرق كتير .. خليك انت كده
مجدى: يا عم خليني كده .. ايه شايفنى ماشي بعرج .. مانا حلو اهو
عادل: ماشي يابو لماضة .. نزلنى يالا .. هجيب اكل من هنا
لسه هجيب اكل واطلع احضر .. حاجة تقرف
مجدى: هاءااااااااو .. انا هروح الاقي الاكل جاهز
ربنا يخليلي الحاجة .. من غيرها ولا هعرف اتحرك
عادل: ربنا يديها الصحة يا سيدي .. يالا سي يو
مجدى: وهو كذلك :D

يتبع ..




لو حكينا يا حبيبي.. نبتدي منين الحكاية
احنا قصة حبنا.. ليها اكتر من بداية
عشنا فيها يا ما عشنا..شفنا فيها.. يا ما شفنا
لكن مشينا وكملنا.. مشوار الحب ووصلنا
والدنيا ما قدرت تعاندنا.. وتفرق بينا وتبعدنا
تعالى نقول لغيرنا.. أنا وانت ازاي قدرنا
نبعد عن أي عذاب.. ونعيش على طول أحباب
نحضن فرحتنا سوا.. ونخلي الحب شباب
:)


كانو مناسبتين فى الكلية النهارده


يوم اليتيم:
جايبين مجموعة اطفال ايتام
وكان فى احتفال صغير كده وشوية جوايز
وكان فى DJ .. بس فوجئت بحبة حاجات كده
رقص وحاجات غريبة !! ..

اليوم الرياضي:
كان فى دورة كورة فى الملعب النجيلة بتاعنا
مكانتش بطالة .. ومكانتش ممتعة اوى
المهم اننا غلبنا فريق الموظفين :))
ما علينا

المهم انى بقالى 4 سنين فى الكلية
اول مرة اشوفها بالشكل ده
بجد بجد .. مختلفة :D

SOMEBODY

Moga stand up


يا اخوانا حد يكلملى بتوع موجا ستاند اب

عايز اسجل حلقة
ضروووورى
ومحدش يسالنى عن ايه
اللى هيكلمهوملى هقوله عن ايه
:D

عــك


يخرب بيت العك اللى فى الدنيا


مفيش حاجة بتتعب اكتر من الكلام الكتير والتفكير

لو الناس تبطل الداء الزفت ده كله هيستريح

عقم تدويني


ناس بتعمل بالبلوجين والتلاتة وشغالين زى السكينة فـ الحلاوة
وناس عندها بلوج واحد ومش قادرين عليه

دا اللى عنده حمارين تعبان فى تربيتهم على راى هانى رمزى
فما بالك باللى عنده 3 بلوجات
انا مش عارف الناس دى هتحدد النسل امتى .. قصدي المدونات :D

اللى عاوز اقوله انى بمر بفترة عقم تدويني اليومين دول
مش عارف ليه مفيش موضوع كامل بيتكون فى دماغى
حتى اخر بوستين بيتكلمو فى اللاشيئ تقريبا

حاسس ان مش انا بس
انا شايف ان معظم البلوجات مبتتكلمش فى حاجة واضحة حاليا
يمكن دى غيامة ومعدية ع الناس كلها
ولا يمكن دى ظروف عند كل الناس بردو
ولا هل كانت تقلبات الجو ليها دور فى هذا
مش عارف

ساعات بلاقي فترة نشاط تدويني كده
اقفل الجهاز وافتح الاقي مواضيع كتير مفتوحة
وكلها مواضيع محتاجة نقاش يعنى
او مواضيع تشد انك تقراها

كنت احيانا بيبقي فى دماغى بوستين تلاتة فى اليوم
واحيانا كنت بكتب بوستين وتلاتة فعلا فى نفس اليوم
حاليا بفتح البلوج كل يوم وتحس ان زراير كيبوردى اتمسمرت

حتى مبقيتش ليا نفس ازور اى مدونات
ولو زورت غالبا مبردش
لكن عاوز اقولكو انى متابعكو كلكو
بس من حين لاخر يعنى

سلامى لكل المدونين
اللى نسيونى واللى لسه
ودعواتكم ان ربنا يرزقنا بالذرية الصالحة
قصدي يفك العقم التدويني ده :D

:-??


حاجات غريبة بحسها وانا بين .. اديكي
كتير بخاف منك وكتير بخاف .. عليكي


لا القرب مرتاحله .. ولا البعاد هقدر عليه

!!!

رسائل أحدث رسائل أقدم الصفحة الرئيسية

Blogger Template by Blogcrowds