نص العمــــــــا


موضوع كان فى بالى من فترة

عندنا مثل بيقولك:
نص العما ولا العما كله

انا عايز اعرف رأيكو فى المثل ده
وهل هو صالح لجميع تعاملات حياتنا

لما يكون عندك سماعة بمايك مثلا
والمايك يتكسر
تقول يالا مش مشكلة اشغل السماعة
اهو نص العما ولا العما كله

طيب تعالو ناخدها من ناحية تانية
لما تكون بتحب شخص اوى _ بأى صفة_
كـ أخ .. كـ حبيب .. كـ صديق
أيا كانت العلاقة

وفجأة تلاقي اختلاف فى المعاملة
بيحاول يبعد عنك
او بيحاول يقلل معاملته معاك
لو حبيبك يقولك خلينا اخوات
ولو معتبره اخوك يقولك خلينا صحاب

ممكن يكون كان بيحبك فعلا وانت بقيت متعلق بيه جدا
وفجاة الدنيا اتغيرت
مشاغله زادت مثلا
زهق منك وعنده رغبه فى التجديد مثلا
لقي الناس اللى ممكن يعوضوه عنك مثلا

وفجاة لقيت نفسك فى طابور بنى ادمين مستنى الحسنة اللى هتاخدها منه
رغم انه كان كل حياتك فى يوم من الايام
وكان هو طابور واحد مكون من شخص واحد هو الانسان ده
واى حد بيظهر تانى فى حياتك بتحطه فى طابور تانى خارج الحسبان

اكيد انت مش ملاك ولا انت معصوم من الغلط عشان هو يبقي كده من نفسه
بس اكيد زى مانت بتغلط هو بيغلط
واكيد طالما هو بيحبك هيسامحك وهيعديلك
زى مبيقولو حبيبك يبلعلك الظلط
سيبك من الظلط خليه بس يبلع موقف او 2

لنفترض انه مش قادر يبلعلك
وخلاص حطك فى كفة بكل حاجة عملتهاله
وحط غلطة منك فى الكفة التانية
رغم انها ممكن متكونش غلطة بالمعنى المقصود
وحتى لو غلطة
انت بلعت ادامها غلطااااات

سيبنا من الغلط دلوقتى
لنفترض ان الشخص دا مش عايزك فى حياته بس مش عارف يوصلهالك ازاى
وانت هتفهم طبعا
مسيرك هتفهم
وبدات تبعد انت كمان ودا الوضع الطبيعي

الغريب بقي انك تفاجأ ان الشخص دا بيدور عليك تانى
وعايز يضمك لممتلكاته تانى
بس المرادى بقي عايزك زى ما هو عايزك
بالصفة اللى تناسبه هو
واهو نص العما ولا العما كله

وانت طبعا اكيد هيكون عندك الحنين للشخص ده مهما كان عمل
بتلاقي نفسك بتتشدله غظب عنك
بس المرادى مش هترجع تلاقيه الشخص اللى عرفته
هترجع تلاقيه واحد عايش حياته على مزاجه
وعايز يعرفك على مزاجه بردو
ومعتقد ان مفهاش حاجة انك تتأقلم على الوضع ده


انت بقي يلى بتقرا دلوقتى
مستعد تحجز مكانك فى الطابور وتستنى دورك فى المعاملة؟؟
مستعد تتأقلم على وضع صعب عليك عشان مش قادر تتغلب على حنينك للشخص ده؟؟
واهو نص العما

ولا تقتل الحتة دى فى قلبك؟؟
ويبقي العما كله

يعنى هل ببساطه
موافق على اسلوب نص العما ولا العما كله؟؟

فوتكم بنص العما..

19 Comments:

  1. Catch Me If You Can said...
    با ابني يا حبيبي احنا هنعيد ونزيد فيه ليه
    بص يا سيد أحمد
    قبل اي حاجه الموضوع ده عن العشرين سنه ولا العشرين شهر
    مش بسيح ولا حاجه
    بس بص انا من الناس المؤيدين للمثل ده اوي اوي اوي
    وعندي الواحد في الميه احسن من الصفر في الميه
    يكون مثلا في امتحان عملي الناس تقولك مش عارفين حاجه ندخل نعمل ايه؟
    يا جماعه يلا انشالله نجيب واحد اهو اكيد احسن من الصفر واهو نص العما ولا العما كله
    ااااااااااااااه
    طيب يا ابوصلاح اللي هو انا انت بطبق المثال ده في كل حياتك
    لاء طبعا
    في حالات شاذه
    زي اللي انت كاتبه دلوقت
    يعني مثلا
    لما اعمل حادثه مثلا لا قدر الله
    يبقي عندي الموت احسن من اني اعيش ورجلي مقطوعه مثلا
    طبعا كل اللي يجيبه ربنا كويس
    بس بيتهيأ لي يبقي العما كله في الحاله دي احسن من نصه

    واخر حاجه احب اقولها
    لو انت رضيت بالمثل ده
    تأكد انه هييجي عليك يوم وينطبق عليك المثل ضربوا الاعمي علي عينه
    قال ما هي كده كده بايظه
    وصلت
    حاجه بعد الاخيره من باب نرفزتك
    يا رب يكون ده اول رد
    اول رد
    روح بلا فرح (روان) said...
    المثل ده ممكن يتطبق فى حالات اه و حالات لا
    بس بالنسبه بقى لطابور الانتظار لحد تانى
    لالالالالا انا انجرحت بما فيه الكفايه من ناس كتير و يا اما استنيت فى طوابير علشان حتى اقرب منهم اشوفهم و لو لحظات او اسمع اسمى على لسانهم علشان اعرف انهم بيفكروا فيا
    انا زهقت بقى من الطوابير دى
    المشاعر مش طابور علشان كل واحد ياخد دوره و اللى يصحى بدرى ياخد الاول
    المشاعر اسمى من ذلك بكثير
    ما انت ممكن تفضل واقف فى الطابور مستنى اهتمام من شخص و تفضل واقف لحد ما تتعب و تقع و ساعتها ممكن يكون فى حد تانى واقف فى طابورك مستنيك تلمحه و تحس بيه و انت ممكن تحس بيه فعلا بس احيانا بيكون بعد فوات الاوان
    فى ناس حوالينا بيحبونا و احنا اللى مش حاسين بيهم
    اكيد هتلاقى حد يحبك و يمسح كل جرح مريت بيه فى حياتك
    شكلى طولت
    امشى بقى
    سلام عليكم
    e_emy said...
    "نص العما ولا العما كله"

    ف حالات كتير ممكن اوافق واحمد ربنا

    لكن ف الحالة الى انت قولتها دى
    هجرب لو زى ما قولت الوضع صعب عليا
    وانى مش قادرة اغير من نفسى

    يبقى مش هرضى
    لسبب بسيط
    اننا هنبقى ف مشاكل ع طول
    واكيد هتنتهى بنفس الى حصل قبل كده
    البـــعد

    يبقى من اولها احسن

    بوست جميل جدااااااا بجد (:
    Olivetree said...
    موضوع هايل
    بس يمكن مثالك الاول اوك نص العما ولا العما كله واهى حاجة تمشى وتكنولوجيا والسلام

    اما المثال التانى مهما كان حب او اخوه او احترام ما بين شخصين مينفعش فيه نص العما ولا العما كله يا بحترمك وبقدرك يا لا يا انت اخويا ومعاملتى معاك زى اخويا ياما لا وقيس عليها اى حاجة بعد كدا

    الحب والصدق مفيش فيهم طابور مينفعش اصلا طابور ازاى كل واحد عنده قلب واحد بس مش اتنين او ثلاثه
    مينفعش اكون بقدر وبحب حد ويجى واحد يقف بعده على ما اخلص مع دا والقلب مينفعش يتجزا لشخصين انا بتكلم هنا عن الحب
    وفى كلمه يمكن كتير بتتردد فى ودانى وجع ساعه فرق ولا وجع كل ساعه قرب وفيها جرح يتعبنا ويسبب جراح اكتر


    //مستعد تحجز مكانك فى الطابور وتستنى دورك فى المعاملة؟؟//

    نو واى
    استحاله

    هختار البعد ولو هموت من جوايا


    ثانكس تو ماتش على الموضوع دا
    كان نفسى ارد اكتر بس دا اللى جه فى بالى دلوقتى

    سلام
    SH_ATEF said...
    مش دايما كل المقولات المأثورة صح!
    لكن حسب الموقف نفسه.
    soul life said...
    كل اللي اعرفه ان اللي يبيعني مرة مشتريهوش ولو ببلاش

    ولو عاملته بعد كدة هيبقى عشان مكسرش خاطره بس بلا اي مشاعر وعارف انها صعبة

    بس اقعد ابكي زي ما انت عايز على انك مش قادر تقوله عللي جواك زي زمان

    يوم واتنين وتلاتة وعشرة .. بس صدقني مش هتبكي عليه العمر كله

    وانا بالنسبة ليا انا لا أؤمن بالمثل ده ولكن لو خيروني

    فهختار العمى كله

    مع انه في الحالة دي هتكون أول مرة تشوف بجد لانك خرجت من تاثير الحب ده عليك

    وأكيد هتكون أحسن وهتكون ايامك كل الهنا

    وفي الاخر طول ما انت ربنا قدامك

    صدقني ولا اي حد يفرق معاك يا بو حميد

    اسف على الاطالة والازعاج
    ma said...
    بالنسبة لموضوع نص العما ماينفعش التعامل بيه فى الاشياء المعنوية مثل المشاعر والاخلاق والعبادات
    يعنى فى الحالة اللى ذكرتها دى ماينفعش خالص بالنسبة لى ان اتعامل بمبدأ نص العما
    لكن يمكن ان نتعامل باسلوب "نص العما" فى اغلبية المشاكل المادية الملموسة يعنى مثلا لما الواحد يكون فى امتحان وفى سؤال مش عارفه, لمايكتب فيه اجزاء بسيطة احسن من انه ميكتبش حاجة خالص "و اهو نص العما"
    او زى المثال اللى ذكرته فى اول الموضوع يمشى معاه برضه الاسلوب ده
    وغيره كثير بس زى ماقلت فى اشياء ملموسة وليست اشياء معنوية مجردة
    بولا حلمي said...
    :|
    موافقه .. مش موافقه ؟
    مممممم مش عارف
    يعني تقدر تقول حسب الموقف.
    a7mad sala7 said...
    Catch Me If You Can

    هههههههههههههههههه

    مبروك على اول تعليق


    وبالنسبة للعين
    عندك حق
    مهى كده كده بايظة
    a7mad sala7 said...
    روح بلا فرح

    //المشاعر مش طابور علشان كل واحد ياخد دوره و اللى يصحى بدرى ياخد الاول
    المشاعر اسمى من ذلك بكثير//

    جيبتى المفيد يا بنتى


    تحيات كتير منى ااااااد كده :)
    a7mad sala7 said...
    e_emy


    //اننا هنبقى ف مشاكل ع طول
    واكيد هتنتهى بنفس الى حصل قبل كده
    البـــعد

    يبقى من اولها احسن//

    تمام
    ذاتس رايت :)
    a7mad sala7 said...
    Olivetree


    اوليف الحكيمة
    من غير كوتيشنز

    دايما بوافقك


    وسلام :D
    a7mad sala7 said...
    SH_ATEF

    شيمااااء
    منورانى فى اول زيارة
    ويا رب متكونش الاخيرة


    وتحيا الدبلوماسية
    اشطه ع الدبلوماسية :D
    a7mad sala7 said...
    soul life

    محمد باشا
    فينك يا راجل

    //يوم واتنين وتلاتة وعشرة .. بس صدقني مش هتبكي عليه العمر كله//


    شكرااا على ازعاجك
    احلى ازعاج فى الدنيا يا حبي :)
    a7mad sala7 said...
    ma


    كلام سليم تماما

    منورانا يا دكتورة :)
    a7mad sala7 said...
    بولا حلمي


    //موافقه .. مش موافقه ؟
    مممممم مش عارف//

    طيب هفكر واشرب كاس فى ساعة
    على ما تاخديلنا قرار :D

    منورة دائما :)
    a7mad sala7 said...
    thanx 4 all

    قضي الامر :)
    MOROOOO said...
    // انت بقي يلى بتقرا دلوقتى
    مستعد تحجز مكانك فى الطابور وتستنى دورك فى المعاملة؟؟ //
    أكيد طبعا لا
    على رأى حلمى :اللي يبيعني مرة مشتريهوش ولو ببلاش

    موضوع جامد قوى جدا خالص :)
    a7mad sala7 said...
    الله ينور على حلمى

    قصدى عليكي :D


    ميرسي جدا اوى خالص





    مالص

    :)

Post a Comment



رسالة أحدث رسالة أقدم الصفحة الرئيسية

Blogger Template by Blogcrowds