متستغربش ..




فى ناس انت اللى بتسيبها .. بعد ما بيك اهتمت !
وناس بتعلقك بيها .. وبتسيبك عشان ملت !!
متستغربش ,, تدان كما تدين .. هى دى القوانين :)

سوون

كامنج سوون :)

2012




مش باقي منى غير شوية رحمة من ربي ،، انا مش عايز



.



.
.




غيرهم :)


فى ليلة من الليالى الهادية
كنت مريح ع السرير كده شوية .. و ال ايه ياخويا شوية شباب كده
ع الفيس بوك بيقولو بكرة هنعمل اعتصام باين لا مش عارف وقفة احتجاجية

بكرة يوم عيد الشرطة !!

سرحت شوية كده مع كلامهم وقعدت اتخيل بقي ان ممكن يحصل ايه بكرة
ماتخيلتش ابدا ان ممكن ناس كتير تنزل وتهتف وتنادى
وضحكت فى سري كده وقولت بكرة الامن المركزى يحميهم بالخراطيم

ماسك ريموت التليفزيون كده وبقلب ابص الاقي خير اللهم اجعله خير
ناس كتير متجمعة ورايحين ناحية التحرير
وعمالين ينادو ॥ عيش حرية عدالة اجتماعية !!
وال ايه خير اللهم اجعله خير الناس بتزيد
وصلو ميدان التحرير لقيت الميدان اتملا

بقلب كده على قنوات تانية يقولك مظاهرات فى السويس واسكندرية ومش
عارف فين :O
ابص الاقي الناس بتتسحل والضرب شغال
قولت اهو كده صح .. دا اللى نعرفه
المهم الناس خدو اللى فيه النصيب وروحو
تانى يوم ابص الاقي الناس اكتر من اليوم اللى قبله :O
المطالب بتزيد والناس بتزيد
شوية يقولك بكرة جمعة الغضب .. غضب !! .. من امتى المصريين
بيغضبو ॥ واشمعنى غضبانين يوم الجمعة :D

بصراحة انا الموضوع شدنى .. كنت لا ليا فى السياسة ولا كنت احب
اقعد مع حد بيتكلم فى السياسة
صحيت تانى يوم روحت صليت ورجعت .. بفتح التليفزيون لقيت الناس
بتتسحل وناس بتموت وناس بتتخطف
قولت امن الدولة اشتغل اهو .. بس بردو الناس بتزيد !!
ابص الاقي فى اسماعلية عندنا الاقسام بتولع .. والناس عاملين مظاهرات
بردو فى الممر !!

لا دا كده الموضوع دخل فى الجد
ويوم ورا التانى والموضوع بيكبر .. والجزيرة واخواتها شغالين
اقلب على التليفزيون المصري الاقي الكوبري والدنيا هادية
اقلب على الجزيرة الاقي سحل !!
قولت مهو حاجة من اتنين .. ياما دا التليفزيون الصربي .. ياما الناس
دى فوتوشوب :D:D
بس من امتى والجزيرة بتشغل ديزاينرز عندها .. انا اعرف انهم بيشغلو
مراسلين !!

بعد كام يوم الاقي بيقولك حسني مبارك اتنحى .. وسلم السلطة للجيش !!
معقول حسنى ابونا وقدوتنا .. اللى وعيت ع الدنيا لقيته .. زى ما
لقيت ابويا وامى كده
حسنى اللى كان علامة زى الهرم كده وبرج القاهره اتنحى !!

كام يوم والاقي مظاهرات فئوية .. فتنة طائفية .. اعتصامات وحاجات
مش من اللى هى
ولقيت بقي حاجات كده يقولك سلفيين .. لا اخوان .. لا 6 ابريل
دا معرفش بتوع خالد سعيد .. شوفت معرفش حزب المش عارف ايه
دا حسنى مبارك عيان فى المستشفي .. دا ولاده مسجونين
دا البرادعى وحازم ابو اسماعيل

بسال واحد صاحبي انت عمرك سمعت عن حد من ولاد ابو اسماعيل ؟؟
قالى ولا ولاد ابو ابراهيم
قولتله ادينا سمعنا
وقالك مجلس عسكري بقي واستفتائات وانتخابات وكلام كبير عمرنا ما كنا
بنسمع عنه !!

طب وبعدين يا اخوانا
الغريب ان مع كل الاحداث دى حاسس ان جنبي بيوجعنى !!
طب ايه علاقة جانبي بالاستفتائات !!
وهل الاستفتاء ده كان عشان تختار جنبي بيوجعنى من الاملاح ولا انا خدت
برد فى جانبي !؟؟
ايه ده هو فى برد بييجي فى الجنب !؟؟

وفى وسط الحيرة والتسائلات دى كلها .. اتفاجئ بحاجة غريبة
احس ان الاصوات كلها بتسكت والنور بيتطفي !!
هنا بقي انا مقدرتش اسكت اكتر من كده
قومت نطرت نفسي فجاة كده
.
.
.
.
.
.
.
الاقينى كنت نايم على الريموت .. وجانبي واجعنى عشان كده !!
ولقيت ابويا شافنى نايم راح قافل التليفزيون والنور وطلع برا !!
ببص فى النتيجة لقيت النهارده 25-1 !!
امال ايه الهلوسة دى .. ومين ابو اسماعيل ده !!
مسكت الريموت وفتحت التليفزيون تانى لقيت فيلم بوحه كان شغال قبل مانام
!!
طب كده عرفت ابو اسماعيل .. طب والريس .. دا كان عيان ؟؟
بقلب القناة بحسن نية كده .. لقيت اللى ريح قلبي وادخل السرور عليا
الريس بيقول خطاب تهنئة بمناسبة عيد الشرطة :)
يا حبيبي يا ريس .. انت واقف اهو وصحتك كويسة .. ربنا يخليك لينا
يا ريس
قولت اما اشوف الجزيرة كده الاقي مكتوب فى شريط الاخبار تحت

"مجموعة من الشباب المتطرفين فى مصر قامو باعمال شغب فى انحاء مختلفه
من البلاد .. وقد قامت الشرطة المصرية بالسيطرة على الموقف .. والقاء
القبض على المتطرفين" !!
معقول الجزيرة بتشتغلنى فى الحلم !!!

قومت لبست ونزلت روحت لصاحبي اللى بيقولى ولا ولاد ابو ابراهيم ده
بقوله انت جاى تألش عليا فى الحلم كمان .. حتى فى الحلم مش راحمنى
قالى ايه اللى حصل .. لسه بقوله ثورة وتغير نظام
قالى هوس هوسسسس .. ايه يا عم دا محل اكل عيش .. انت جاى
تجيب درفه من اولها !!!
طب بتوع الفيس بوك دول ناس فاضية وبتتكلم على مزاجها .. خليك انت
عاقل يا عم

وعلى الفور اعتذرتله .. وابتسملى .. وشربنا اتنين فيروز اناناس
.
.
وروحنا نرشح الريس لفترة انتخابية جديدة !!!

25 مارس
======
عاجل:-

مظاهرة الفية امام مالتيميديا حاسبات تطالب برحيل رموز الفساد

الدكتور (ع ا) صرح بانه سيشارك بداية من غد فى المظاهرات الالفية وانه لن يترشح لانتخابات العمادة القادمة

انباء عن قدوم الدكتور (ت ن) من المملكة العربية السعودية على طائرة الخميس للمشاركة فى التظاهرات

اختفاء الناشط (أ ص) وانباء عن اعتقاله

الدكتور (ح ن): لا صحة لما تردد من اشاعات عن وجود اعتصام فى الكلية .. ووصف الاحداث الجارية بانها نشاط طلابي
كما صرح سيادته ان الكلية تتمتع بكامل الديموقراطية فى التعبير عن الاراء
----------------------

26 مارس
======

استمرار تدفق الحشود الى ملعب الكلية مطالبين بسقوط النظام

دكتور (ه ا) يصرخ: طالما حذرنا من الطاقات المكبوتة للطلاب .. وهذه هى النتيجة

المعيدين يعلنون: عدم تدريسنا على الوجه المطلوب ناتج من نظام سيئ فى الاساس

دكتور (ع ع): لم يكن بمقدورى البقاء فى بيئة محاطه بالفساد والاستهتار .. وهذا ما كنت اتوقعه

الناشطة (أ م): يجب ان تستمر اعتصاماتنا بشكل سلمى .. وما بداناه سويا يجب ان ننهيه سويا

المتحدث باسم العمادة يعد بعدم التمديد .. وجموع المتظاهرين تطالب بالرحيل الفورى ولا تقبل باى وعود او تصريحات

طلبه حاسبات: لن نتحرك من امام المالتميديا قبل رحيل عناصر الفساد

جهات اخباريه تعلن:(م ص) مجند من قبل البوليس السري

الناشطة (ا م): تلقيت تدريبات فى امريكا مقابل 30 الف دولار

وفدان من حاسبات الزقازيق والمنوفية فى الاسماعليه غدا لمؤازره الشباب
---------------------

27 مارس
======

الدكتور (أ خ) والعديد من اعضاء هيئة التدريس يتقدمون باستقالتهم على غرار الاحداث الجارية فى الكلية

انباء عن مقتل 3 طلاب امام ملعب الشطرنج برصاص رجال الامن

الحرس الجامعي يتلقي تعليمات عليا بالهروب من الجامعه والفوضي تجتاح المكان

تجميد ارصيدة الدكتور(ح ا) ومنعه من السفر للخارج لحين التحقيق معه

اتحاد الطلبة: لن نقبل بان تتسلق الاحزاب على اكتافنا .. نحن من قمنا بالثورة ونحن من ننهيها .. ولم نفوض احد للتحدث باسمنا

الناشط (ا غ): رأيت طلاب يتم ضربهم وخطفهم في سيارات شرطه

الناشط (ا ش): انا مع التغيير ولست من الاخوان

المتحدث الرسمي لاتحاد الطلبة (ع ب) يعلن عن خروج مظاهره مليونية غدا وتوجهها لمقر شئون الطلبة

المفكر السياسي (م و): رحيل العميد فى الوقت الحالى امر مستحيل نظرا للاوضاع فى المنطقة

انباء عن اندلاع حريق فى المبني التعليمي واختفاء غير مبرر لرجال الامن والمطافي
-----------------------

28 مارس
======

الجيش يحيط مبني المالتيميديا ويحرص علي الحفاظ على سلامة الطلاب

قنابل مسيلة للدموع تقذف من اعلى مبني المالتيميديا واشتباكات عدة فى مناطق متفرقة من الجامعة

خطاب جديد من عمادة الكلية بعد قليل ..

انباء عن وجود اعمال نهب وشغب فى مدرج 4

الدكتور (ع ش): يدعو المسئولين للرحيل فورا حقنا للدماء

هجوم مسلح على مكتبة الكلية وانباء عن وجود ضحايا .. شاهد عيان يؤكد سرقه 8 كتب خاصه بلغه الجافا من المكتبه
واللجان الطلابية امام المدرجات حفاظا على الممتلكات العامة

جمال وخيول فى مظاهرات الاحد فى ظاهرة نادرة الحدوث فى الجامعة!!

الدكتور (ا ط) يحث الطلبة على اكمال ما بداوه من ثورة مشروعة

حركة مناصري اى اس تطالب العميد بالتخلى عن منصبه فورا

عميدى كلية التربية والاداب يبحثان تطورات الاوضاع فى حاسبات
-------------------

29 مارس
======

تفجير كافتريا الجامعة من قبل ملثمين وانباء عن وجود ضحايا ومصابين

عميد كليه حاسبات المنصوره .. خطاب العميد لم يضف اي جديد .. والرحيل هو الحل

اقالة كل من (م ع) و (ع س) و (غ ا) وتشكيل هيئة تدريس انتقالية

تعين (ص ز) وكيلا للكلية و(ه ا) و (ع ا) رئيسان لقسمى سي اس واى اس نظرا لتمتعهم بقبول لدى طلبة الكلية

بكاء كثير من الطلاب واهليهم عقب خطاب العميد الثاني

خروج مظاهرات مناصرة للنظام وهتافات ما بين مؤيد ومعارض

شهود عيان: هناك وجبات من شيخ البلد ومبالغ نقدية تقدم لمناصري النظام

حراسة امنية مشددة على غرفة الكنترول

العميد يتمسك بمنصبه ويتمنى تسليم العمادة سلميا

طلاب تالتة سي اس يهتفون: مش هنمشي هو يمشي .. ورابعه اي اس تصرح : الرحيل اول واهم مطالبنا

صاحب مكتبة دينا: سمعنا صوت طلقات ناريه مساء امس ولا نعلم مصدرها .. ولا صحة لما قيل اننى كنت احرض الطلبة .. واجتماعات الناشطين كانت تتم فى قهوة الفيشاوى
--------------------

30 مارس
======

اتحاد طلاب الكلية يهتف: اللي يحب حاسبات ميخربش حاسبات

الافراج عن الناشط (أ ص) المفجر الحقيقي لثورة الشباب

>> وكيل الكلية يعلن عن تخلى العميد عن منصبة وتسليم السلطة لامين الكلية لحين اقامة انتخابات <<

احتفالات كبيرة فى الجامعة بسقوط النظام .. والجوده تطالب باقامة انتخابات نزيهة

دعوة لتغيير اسم ملعب الكلية لملعب الشهداء .. ودقيقة حداد على روح الشهداء فى بداية محاضرات كلية التجارة

الناشط (م ص): انا واحد من المجموع وكل ما اتمناه هو ان يعتبرنى الطلاب الاب الروحي للثورة

الدكتور (ح ا) يعلن بعد التحفظ عليه للتحقيق معه: لن اكون كبش فداء لاحد .. وامتلك تسجيلات كافية باقالتنا جميعا من مناصبنا

نقلا عن وكالة انباء عالمية: ميزانية الكلية تفوق 8 مليون جنيه سنويا .. بخلاف الاعانات والمكافئات

الدكتور (ع ا) يعلن برنامجه الانتخابي غدا .. وترحيب شديد فى الرأى العام

عميد حاسبات القاهرة: استوعبنا الدرس جيدا .. والقاهرة ليست الاسماعيلية ..

LOL

******************************************

السؤال الذى يثير الجدل فى الكلية
====================

مين الواد اللى كان بيقف ورا صاحب مكتبة دينا واحنا بنصور الورق ؟؟

1-البلياتشو اللى طلع هو هو عمو حسام !!
2-الناشط (أ ص) مفجر ثورة التغيير !!
3-ابن صاحب المكتبة والناس طلعت شاغله نفسها بحاجة هبلة ..


ايا كان الوضع دلوقتى فهو احسن من اللى قبله
احنا عمرنا ما هنبقي فى فترة زى اللى كنا فيها دى
عمرنا ما هنوصل لحجم النكبة اللى كنا فيها
بأى حال من الاحوال احنا للاحسن ان شاء الله

التغيير ده اقل مكاسبه هو كسر حاجز الخوف والجبن والصمت
كفاية اننا عرفنا ازاى نعترض بشكل حضارى
عرفنا ازاى لما نتظلم نمشي فى الاتجاه الصح
ازاى نوصل صوتنا للعالم ونقولهم احنا مش عاوزين كذا
هو دا الحد الادني للمكاسب اللى وصلنالها

عموما دا مش موضوعى

بزعل اوى لما الاقي زمايلى وقرايبي وهما لسه فى الدراسة
اقصي طموحهم انهم يسافرو يشتغلو برا
وبالاخص لما يكون فى الخليج

والله العظيم الموضوع دا شاغل دماغى من قبل موضوع الثورة ده
انا كنت عاذرهم الى حد ما

عارف ان مفيش شغل والحالة صعبة
وحتى لو فى شغل مش بيبقي بالمقابل اللى يعيش حد عيشة كريمة

بس اللى اعرفه بردو ان لو حد عايز يشتغل هيشتغل
مش هقول بقي يثبت نفسه والكلام ده
خلينا نتكلم ابسط من كده شوية

انا عندى اعيش هنا باى شكل من الاشكال
وماسافرش اشتغل برا
ليه ؟؟

يا جماعة لو بصيتو على الوضع ايام الثورة دى وبعدها وازاى الدول العربية دى كانو خايفين اكتر مننا وازاى بيعرضو علينا يصلحولنا اللى اتخرب .. مع انهم ملهمش ذنب فى كده
دا معناه ايه !!

مصر تعتبر اكبر واهم دولة فى المنطقة بتاعتها
بغض النظر عن الفقر ولا الفساد اللى فيها فهى بردو بوضعها دا اكبر دولة
ولو وقعت بقيت الدول هتقع وراها واحدة ورا التانية

فحرام لما يبقي احنا وضعنا الطبيعي كده
واحنا بنبعت ناسنا تشتغل هناك عشان الفلوس

ملعون ابو الفلوس لما تخلى واحد طور مبيفهمش حاجة يتنطط عليك
والامثلة كتير موجوده
دا غير نظرتهم لينا ان احنا شحاتين ورايحين ناكل عيش هناك

انا بجد مش عارف ازاى الناس دى بتروح تشتغل هناك
مفيش دولة من دول الخليج تملك انها تعيش نفسها بنفسها رغم الفلوس المتلتلة اللى هناك دى
نظرا لانهم شعب خامل بطبعه
عاوز كل حاجة ع الجاهز .. وشعاره هو كلمة بفلوسي

والمصيبة ان هو شايف ان ليه فضل عليك
مع ان لو حسبتها صح هتلاقي انت اللى ليك فضل عليه
لانك لو انسحبت من حياته هيضطر ينزل يشتغل بايده
ولانه ماشتغلش بايده قبل كده بالتالى مش هيعرف يعيش
واحنا اللى بكل سلبيه ساعدناهم على كده

انا باصص للموضوع من ناحية الكرامة اكتر شوية
اظن احنا بعد الثورة دى عرفنا العالم كله يعنى ايه كرامة
احنا نخدم نفسنا بنفسنا
انشالله نلحس شوارعنا بلسانا بس محدش يبصلك بنظرة انه بيعطف علينا

وحتى لو مش بالعطف
زى مثلا .. ابسط مثال
بيحز فى نفسي اوى لما الاقي كليتي كل ما يبان فيها شخصية ليها قيمتها من دكاتره اومعيدين اول حاجة تتوقعها انه يسافر برا
ليه كده !!

محدش يقولى بيكملو دراستهم .. انا بتكلم عن الدكاتره على الاقل

لما الاقي كليتي بتفضي عليا وعدد الناس اللى تقدر تعتمد عليهم بجد معدودين على الصوابع
حاجة تخلى ثقتك فى كليتك تقل
وبالتالى ثقتك فى نفسك .. وتلعن اليوم اللى فكرت فيه تيجي الكلية دى

احنا لو انسحبنا من شغلهم بشكل كامل هما هيعرفو اد ايه احنا احسن منهم
وساعتها هما اللى هيتحايلو علينا نشتغل معاهم
مش عندهم

بس للاسف نبرة اليأس اللى كنا بنتمتع بيها قبل كده مسيطرة على تفكير معظم الشباب المصريين
يمكن انا كنت واحد منهم لحد وقت من الاوقات
ولما بدأت اغير تفكيري ده واواجه حد منهم يقولى طب خليك انت هنا اشتغل ب300 جنيه

بس بيتهيالى بعد الاحداث الاخيرة دى
وبعد ما اثبتنا للدنيا اننا نقدر نغير كل حاجة بنفسنا
بطاقات الشباب اللى كانو بيتفهو من كلمته
احنا نقدر نقولهم احنا مش مستنيين منكو عطف

انا مقولتش متسافرش هناك
بس تسافر لما تحس ان هما اللى محتاجينك .. مش انت اللى محتاجلهم
تسافر تنقذهم مش هما اللى ينقذوك

تسافر باعتبار انها رحلة تغيير جو قبل ما تكون رحلة عمل
نروح خبرا ومستشارين .. مساعدات يعنى
وبالمرة تعدى على دبى عشان انا هموت واروحها :D

بجد يا جماعة من ضمن امنياتى المحدودة انى ازور دبي دي
من اللى بسمعه عنها بس

اروح عشان اتفسح وهما يخدمونى مش عشان اروح اخدمهم ويتنططو عليا
زى ما هما بييجو هنا ونخدمهم ويتنططو علينا
وللاسف خدمة الناس دى بقت هى المصدر الاول للربح فى مصر
اللى هى السياحة
ملايين الناس شغالين خدامين للاجانب فى مقابل لقمة العيش
بجد حاجة تحزن !!

انا مبقولش منشتغلش فى السياحة
بس بقول ليه ميكونش عدد سياحنا المصريين عند الناس دى اد عددهم عندنا مثلا
مش مستحيل والله .. بس محتاجه شوية شغل

على الاقل عشان الروس تتساوى وميدخلش فيها مصطلح التنطيط

انا لا بهاجمهم ولا كارهم
عشان محدش يفتكر ان كلامى دا من منطلق الحقد عليهم مثلا
لان ببساطة هما معملوش اللى احقدهم عليه
احنا اللى بنعملهم كل حاجة عشان نحقد عليهم بعد كده
يعنى نتحسر على مجهودنا

الموضوع مش موضوع حقد او هجوم
الموضوع غيره على بلدى وعلى ناسها
وحرام عقولنا وطاقاتنا دى منفيدش بيها نفسنا
محدش يقولى ان احنا كده بنستفيد
اللى بيسافر هناك ويستقر مبيرجعش
وانتو عارفين كده كويس
بيفضل حنفية فلوس لاهله وعياله لحد ما يموت
واهله هما اللى بيتمتعو بيها
حرااام .. بجد حرام

احنا عاوزين نتمتع بنتيجة مجهودنا فى بلدنا .. وسط اهلنا
سيبك يا اخى من حتة التحدى وانك عاوز تبقي احسن منهم
كفاية انك تعيش حياة كريمة وسط اهلك وناسك
تنام فى بيتك مستريح مش شايل هم اهلك اللى متعرفش عنهم حاجة
تفتكر دا مش مبرر كافي ؟؟

طيب الجانب الايجابي من الموضوع بقي

نحاول من دلوقتى نقنع نفسنا ان احنا نقدر
زى ما صدقنا نفسنا وغيرنا النظام .. لازم نصدق نفسنا ونغير نفسنا احنا

جميلة اوى حملة ابدا بنفسك اللى شوفتها ع الفيس بوك
حاول تطبقها على نفسك من دلوقتى
ابدا باتفه الامور .. متستهيفش حاجة

اتفه حاجة انك ترد دلوقتى تقولى انت كلامك صح ولا غلط
لو غلط تقولى ايه الصح .. ولو صح يبقي نحاول نعمل كده

بعد كده نختار اللى هيرأسونا ومنعتمدش على بعضنا
كل واحد يروح يعمل بطاقة انتخابيه وينتخب بنفسه
انتخابات رياسه وانتخابات مجلس شعب
تختار كل جهة هترأسك عشان متجيش بعد كده تلاقي نفسك عاجز
ولما تختار حد ويطلع كويس تساعده وتشكره وتأيده
ولو طلع وحش متكسلش وتسيبه .. تسعى انك تغيره وتجيب الكويس

يبقي
شغلك + نظام يساعدك
اكيد
= وصول للى احنا عاوزينه

وافتكرو ان اهم حاجة فى الموضوع دا كله حاجة واحدة بس هى الضمير
لو كل واحد فينا عنده ضمير صاحى عمرنا مهنلاقي دروب فى اى خطوة

ضمير فى انك تبدأ بنفسك
ضمير فى انك تختار الانسب
ضمير فى انك لو حسيت بالظلم متسكتش
ضمير بانك لو شوفت الوحش متسيبوش وحش

الضمير فى كل حاجة


نقدر ؟؟

ارجوك متفتيش


النهارده 15 فبراير 2011
يعنى بعد ثورة 11 فبراير بكام يوم كده
خلصت الثورة .. والناس رجعت بيوتها وفى اللى مرجعش

طبعا انا مكتبتش كلمة واحدة هنا من يوم 25 لحد النهارده
دا مش معناه انى مكنتش فاضي مثلا اكتب او انا مطنش
لا خالص
بس بجد انا لما لقيت الناس كلها بتتكلم
من الطفل اللى عنده 10 سنين لحد الراجل المسن
مرورا باللى مش عايش فى البلد اصلا
باللى فاهم واللى مش فاهم
باللى متابع واللى مش متابع

فانا قررت انى ماكتبش ولا كلمة واتفرغ للقراءة :D

سبق وقولت ان اللى مودينا فى داهية هى الفتاوى
وناس تضلل ناس .. وناس اساتذه فى اثارة الاشاعات والفتن
يمكن يكونو مش قاصدين يعملو مشكلة .. بس كانت بتحصل
ومشكلتنا اننا بنصدق وننساق ورا اى كلام يتقال .. الا من رحم ربي

شعار الانسان المصري " انا افتى اذا انا موجود "
بجد حرام .. الفيس بوك اشتكى .. الايميل دا مكانش بيبطل رسايل .. وما زال
مش ممكن .. كل واحد لازم يقول حاجة .. كل واحد لازم يبقاله رأى ولازم يبقي مختلف
لدرجة ان الاحزاب المعارضة مكانلهاش صوت
احنا كنا 80 مليون حزب :D

فمكانش هيحصل حاجة لما يبقو 80 مليون الا 1
واهو نوع من الاختلاف بردو :D

ارجوكم متفتوش
سيبو اللى فاهم يتكلم .. وادو الناس فرصة تشتغل وتورينا اللى عندها
ومعلش تعالى على نفسك وخلى الكلمتين اللى عندك ليك :D

يالا مبروك على الشعب المصري كله ويا رب الجاى يبقي احسن

وكل سنة وانتو طيبين جميعا
عشان المولد النبوي ها .. مش حاجة تانية
الفلانتاين والكلام الفارغ ده :D


زمان لما كنا بنتكلم عن الديموقراطية وعن حرية الرأى والتعبير
والاختلاف فى الرأى لا يفسد اللى مش عارف ايه
وياما اتناقشنا وجادلنا .. واحيانا اتخانقنا :D

والادهى والامر لما وصلت لامور الدين
وبقت الناس تدخل الدين فى المجادلة تحت مسمى حرية التفكير والتعبير والذى منه
طبعا احنا موصلناش للى احنا فيه ده الا من بعد ما عرفنا مصطلح الديموقراطية

تعرفو
كلمة ديموقراطية دى بتستفذنى جدا :D
مش عشان مبدأ الديموقراطية نفسه
ولا عشان انا ديكتاتور مثلا
لا خالص

بس عشان احنا شعب .. لا يصلح معه الديموقراطية
طبعا اللى بيقرا دلوقتى هيقولك ايه المتخلف ده !!
هعمل نفسي مش واخد بالى دلوقتى وهكمل

هههههههههههههههههه
افتكرت صديقي الصدوق محمد صلاح لما كان يقولك انا ديكتاتور .. ودا شعب مينفعش معاه الا الديكتاتورية
وكنت بضحك واقوله ايوة صح
وكنت بقولها عن اقتناع
بس كنت تلاقي الناس مش بالعاها من محمد صلاح
المهم

لو خدنا الموضوع بتأنى شوية وهقنعك
مهو يا تقنعنى يا اقنعك
انا ماعرفش حاجة اسمها الاختلاف فى الرأى لا يفسد للود قضية
دى مش فى قاموسي

الاختلاف دا ممكن ينفع فى حاجات محدودة جدا
وانت قاعد تحلل ماتش كورة مثلا
وانت بتتخانق مع مراتك فى البيت
ولو ان دى كمان ماعتقدش بردو :D

دايما اقول لـ مى ايه
انا ديكتاتور ديموقراطى
تقولى ازاى

اقولها يعنى هنختلف هنتخانق هتشرحيلي وجهة نظرك
هسمعها للاخر وهفهمها
اقتنعت هقولك حاضر وهو كذلك
ماقتنعتش هقولك لا انا هعمل كذا لان دا هو الصح
ومش هعمل غيره .. انا معنديش معارضة
ههههههههههه

يعنى بردو مفهاش لا يفسد للود قضية

نرجع لموضوعنا
هى فعلا لا تفسد للود قضية ؟
لا بتفسد والله
دى بتودينا فى داهية كمان
ازاى ؟

تعرف ان الديموقراطية دى بتقوم على الكفر !!
كفر ؟
اه بتقوم على الكفر
ليه ؟

لما يطلع واحد يقولك مثلا احنا هنجوز راجل لراجل
الموافق يرفع ايده
ده ود وده موافقون
اغلبية

وايه هى الديموقراطية ؟
هى رأى الاغلبية من الشعب
الاغلبية عايزة كده ؟ .. اه .. يبقي يمشي

طب هل دا يعقل ؟؟

مثال تانى

جه واحد قالك احنا هنعمل الصلوات 3 بس مش 5
الموافق على هذا القرار يتفضل برفع ايده
ده وده وده
اغلبية .. موافقة
هل دا يعقل ؟؟

اكيد لا طبعا
يبقي مفيش حاجة اسمها ديموقراطية
امال فى حاجة اسمها ايه يا عم انت

اقولك فى حاجة اسمها شورى
الشورى

وكان امرهم شورى بينهم
واحد يقولك طب متقول ديموقراطية
طب واقول ديمواقراطية ليه هى اسمها شوري
يقولك ايوة يعنى ديموقراطية
اقوله لا مش ديموقراطية

فى فرق واضح بين الشورى والديموقراطية

الديموقراطية زى ما قولنا هى رأى الاغلبية
واللى مش موافقين دول اسمهم معارضة

الشوري مفهاش معارضة .. احنا معندناش معارضة فى الاسلام
حتى كمان الحاجة اللى ورد فيها نص او موجوده فى المنهج مفهاش شوري

يعنى لما كان يبقي فى حرب او غزوة مثلا
كان الامر شوري
مين موافق يطلع
انا وانا وانا
والباقي لا
الباقي دا يقعد واللى موافق بس هو اللى يروح ؟؟
لا طبعا
هيطلعو بردو
كله بيطلع
هنا اصبح مفيش معارضة
وهو دا كان سر قوة الاسلام

ان كلهم بيجتمعو على قلب رجل واحد
كان لما يتفقو على حاجة كلهم بيوصلو لحل واحد
وبكده مش هتحصل مشاكل ومش هتظهر احزاب

واول ما فكرو يختلفو
ايام خلافة سيدنا على ظهرت السنة والشيعة
ولسه فى المشكلة دى لحد النهارده

يبقي خدنا ايه من الديموقراطية!!

زى واحد بيقول للتانى يا حمار
قاله انا مش حمار ومتشتمنيش
قاله لا حمار
قاله خلاص ناخد راى الناس وديموقراطية بقي
ويروح يجيب اغلبية الناس تشهد
يقومو معلقينله ديل ويبقي حمار
طب هل يعقل ؟؟

نرجع لفوق خالص
يبقي ليه بقي كنت بقول احنا شعب لا يصلح معه الديموقراطية
لان احنا بالذات احسن شعب يفتى فى العالم
لو بطلنا نفتى نموت
وكل واحد عايز يبقي مختلف وكل واحد عايز يبقي ليه رأى لوحده
وكل واحد عايز يبين للى حواليه ان هو حاجة تانية غير كل الناس
ولو سمعنا لكل واحد لوحده وهو دا اللى بيحصل دلوقتى
تلاقي كل واحد ماشي فى سكة
وكله بيشتم فى كله وكله بيغلط كله
والنتيجة اننا وصلنا للحال اللى احنا وصلناله ده !!

عارفين
مش هى دى بس المصيبة
المصيبة لما توصل للدين
لما تلاقي واحد عنده مدونة زى كده مثلا وقام جايب موضوع فى الدين
وراح عامل افتكاسه
وقالك دا رأيي :|
ربنا خلقلى عقل عشان افكر بيه
ويبدا بقي يخش فى مناطق محظورة
ويدخل نفسه فى جدل هو مش اده
والمصيبة الاكبر لما يدخل اللى بيقروله معاه فى الجدل ده
والدايرة توسع !!

كل دا عشان ايه
عشان كلمة ليه
ليه دى متتقالش لربنا
احنا المفروض متأدبين مع الله
ربنا سبحانه وتعالى لما يأمر نقول سمعنا واطعنا

لما ربنا يبيح ويحل
يبقي سمعنا واطعنا
هتجادل انت وتقول بعقلى ؟؟

طب مهو دا الدين
هو الدين ايه غير تشريعات .. تحليل وتحريم
مش عاوز تسلم بالاوامر يبقي انت مش عاوز دين
المسلم المؤمن بيقول سمعنا واطعنا
ربنا قال منتدخلش فى الجزء ده يبقي سمعنا واطعنا
لكن لما تحط مناخيرك فى كل حاجة
وتقول ليه واشمعنى يبقي انت دخلت فى دايرة المحظور

ابسط مثال
انت بتتوضا ليه
اوعى تقولى نضافة
بدليل انك ممكن تكون مستحمى ومتطهر ومتعطر
وبتطلع بردو تتوضي
ليه ؟
ربنا امر بكده يبقي سمعنا واطعنا

حاجة تانية اوضح
ربنا حرم الاصنام وعبادة الحجارة
وفى نفس الوقت احنا بنطوف حول الكعبة
وبنقبل الحجر الاسود
بتطوف حوالين حجر وبتقبل حجر
بتمسك حجر وترجم حجر

نقول ليه ؟؟
مفيش ليه
لان دا منهج
هكذا امرنا الله وهكذا نفعل
سيدنا عمر ابن الخطاب بيقبل الحجر الاسود وبيقول "اعلم انك حجر واعلم انك لا تضر ولا تنفع
ولولا انى رأيت رسول الله يقبلك ما قبلتك"
ايمان كامل ويقين تام

يبقي دى مفهاش بالعقل
هتقولى ربنا قال نحن قوم يعقلون
اقولك ماشي
قوم يعقلون فى علم الشهادة
"الحواس الخمسة"
اى حاجة من الخمسة دول فكر فيها بعقلك زى مانت عايز
انما اوامر ربنا نقول سمعنا واطعنا

امور كتير هتفكر فيها مش هتوصل لحل
بالعكس تفكيرك هيوصلك لاصل الكينونة والربوبية
والنتيجة انك هتلحد !!
ليه
لان انت مش اله
احنا بشر ووظيفتنا العبادة
"وما خلقت الانس والجن الا ليعبدون"
فى اطار طبيعتك كانسان اتكلم
اذا كان انت مش عارف تبص للشمس ولو بصتلها تتعمى
يبقي تبص لربنا وتقوله ليه ؟
اعرف حجمك .. قيم قدراتك

ليه دى تفوق قدرة العقل البشري
حاجة انت عقلك كأنسان يعجز عن فهمها
يبقي هكذا امرنا وهكذا نفعل
سمعنا واطعنا

نرجع بسرعة لحتة الديموقراطية
ومثلا موضوع شغل الستات

ربنا خلق المرأة ل4 وظائف
ارجل راجل فى الدنيا ميقدرش يشارك المرأة فيهم

الانجاب - تربية الاطفال - حضانة الزوج - البيت

فيهم الشغل ؟
لا

يعنى الستات متشتغلش خالص ؟؟
لا مش كده بردو

فى حاجة اسمها ضرورة
والضرورات تبيح المحظورات

لو تخصصها دا نادر والناس فى حاجة ماسه ليه
او لو واحدة مثلا ارملة .. واحدة مطلقة .. ولا تجد من يعولها .. واحدة جوزها مستواه المادى ضعيف
ومحتاجين انها تشتغل عشان تساعده على مصاريف المعيشة
وركز معايا على مصاريف المعيشة دى

يعنى متجيش واحدة تقولك انا بشتغل عشان اشترى مايكرو ويف
اصل احنا عندنا عربية 128 وعايزين نجيب واحدة احسن
حاجات زى كده

لا طبعا احنا بنقول الامور الصعبة اوى اللى هى مصاريف المعيشة
الاكل والشرب والمسكن
غير كده شغلها غلط

دلوقتى تيجي تكلم واحدة تقولها الشغل لا
تقولك دا كيانى .. دى شخصيتي
وتلاقيها اصلا قاعدة على مكتب بتأور بتنجان
يا ريتها حتى بتعمل عمل جليل يعنى هيفيد البلد

زمان لما كانت الستات بتطلع الغزوات
عشان عارف ان فى ناس هترد تقولى كده

الستات كانت بتطلع الغزوات عشان يعالجو الجرحى
كانت ستات طبيبات
وكان اول حاجة بيأمنوها فى الحرب هى الستات
واول حاجة بيفكرو فيها ساعة الهزيمة هى الستات

ودى طبعا حجة فاشلة مدخلينها فى دماغ الستات عشان يخلوهم متمسكين بالشغل
لان زى ما قولنا عملها دا لازم يبقي حاجة للناس مينفعش يعملها غيرها

لكن يقولو للستات ايه
هتقعدى تخدميه فى البيت ؟؟ .. هتخدمى سي السيد ؟؟
لا اطلعى برا اخدمى ناس تانية
تحت مسمي الشخصية والكيان

يقولك مطلوب انسه للعمل
ليه انسه يا عم
عشان تجيب زباين
عشان هى وجه حسن
لا حول ولا قوة الا بالله .. هو دا الكيان ؟؟

ودخلنا نفسنا فى متاهة الاختلاط
وظهر التحرش والزفت وبقينا فى مصايب
ويرجعو يقولولك ظاهرة التحرش ايه اسبابها
مهو انتو اسبابها من البداية !!

تحت مسمي حرية المرأة بقت المرأة دى سلعة

طب والراجل
الرجال قوامون على النساء
مش بالفردة ولا بالعافية
امال بايه
بما فضل الله بعضهم على بعض وبما انفقو من اموالهم
يعنى قوامة تكليف .. مش قوامة تشريف

يعنى جوزك دا هو اللى بيخدمك قبل مانتى تخدميه
وانتى معززة مكرمة مصونة

لو بصيتي لدينك
الاسلام هو اللى بيديكي كيانك وهى اللى بيديكي قيمتك

خلاصة الكلام

نحن قوم اعزنا الله بالاسلام فأنا اردنا العزة بغيره اذلنا الله


يا رب يكون كلامى خفيف ع الناس
انا بقالى كتير مبكتبش لان مكانش فى دماغى موضوع حاسس انه يتقرى
المرادى جاى بموضوع طويل اهو
اقرو بقي لو عاوزين :D

اللهم


اللهم يا من جعلت عيسى بلا أب
و جعلت سليمان يكلم من يأكل الحَب
و نصرت موسى على من قال أنه الرب
و أحببت محمد حب ليس بعده حب
و حميت مريم من القذف و السب
و أخرجت يونس من الظلمات و يوسف من الجُب
و جعلت الشجر و الحجر يسبحونك بلا روح و لا قلب
ربي أنت القريب و الصاحب
أنت المجيب و السامع
فارحم ضعفنا و يسر أمرنا
و حقق لنا نجاحا فإننا بحاجة إليك ..

i'm here

منسيتش البلوج .. ومش هنساه

ببساطة لانه افضل بيئة لقيتها على النت من يوم ما عرفته

عرفت منه حاجات كتير ولسه بعرف
ومش هبطل اعرف .. وبردو مش هبطل اكتب

بس هو كل فترة وليها ظروفها...

.
كفاية دلوقتى
.

تحياتى لكل اللى بيقرا
اللى بيقرا بس .. هه يالا بقي :P

رسائل أقدم

Blogger Template by Blogcrowds