متتكلمش معايا تانى !!


المكان: المدينة الجامعية للبنات


سلمى: شوفى يا امل
امل: اللــــــــــه .. تحفة يا سلمى .. وريني كده
سيبيه بقي هلعب بيه شوية
مين جابهولك ده ؟؟
سلمى: دا وليد جابهولى فى عيد ميلادى
امل: اه .. ربنا يوفقكو
.
.
بعدها بيومين

سلمى: ايه يا امل بتعيطي ليه
امل: حسام مبيردش عليا
بتصل بيه بقالى يومين .. مفيش مرة رد ولا حتى اتصل بيا
سلمى: ليه هو حصل ايه اخر مرة
امل: مفيش .. مشكلة عادية .. خلاف بسيط زى كل مرة
لقيته بيتعصب عليا وبيقولى متتكلميش معايا تانى
سلمى: طب وانتى عملتى ايه
امل: عادى .. انا بحسب زى كل مرة .. هيتصل بعدها بشوية يصالحنى
حسام مبقاش بيحبنى يا سلمى
سلمى: لا متقوليش كده .. حسام بيحبك .. بس تلاقيه مشغول شوية اليومين دول
امل: بصي انا زهقت بقي .. انا مش عايزة منه حاجة تانى
اصلا مفيش ولد كويس .. كلهم بيمثلو .. وكلهم ميستاهلوش
سلمى: ليه بس بتقولى كده .. خير ان شاء الله
امل: يا بختك انتى مبسوطه مع وليد .. مش بيعاملك وحش زى مانا متهببة كده
سلمى: ههههههههههه .. والله كلهم متعبين يا امل
.
.

المكان: صالة بلياردو

هانى: مترد يابنى على التليفون دا ولا اقفله خالص .. دماغنا وجعتنا
مين يا عم امل دى اللى عمالة تتصل مبتسكتش
حسام: يا عم سيبك منها .. دى بت خنيقة
لفيت معاها شوية وخلاص .. خدت وقتها وكفاية عليها كده
.
.

فى المدينة

امل: انتى رايحه الجامعة النهارده
سلمى: اه .. ووليد هيعدى ياخدنى بعد ماخلص
امل: ممممم .. حصره عليا .. بتنفخ فى المواصلات وانا مروحه
سلمى: ليه يا بنتى هتروحى معانا مفيش حاجة
.
.

فى الجامعة

سلمى: وليد دى امل صاحبتى
امل دا وليد بقي :D
وليد: اهلا وسهلا
امل: ايوة يا استاذ انت بقي وليد .. الاخت دى قلبتلنا دماغنا بحكياتكو
وليد: هههههههههه .. مفيش فايدة فى البنات
.
.

فى مكالمة تليفونية بالليل

سلمى: ايوة يا استاذ
ايه خدتو واديتو مع بعض
كنت عاوزه اجيبلكو 2 لمون
وليد: ومجبتيش ليه
سلمى: اه مانت مبسوط .. وشغال دودودو .. فرحان انها بترغى معاك
هتفضل طول عمرك رمرام
وليد: انا رمرام ؟؟
سلمى: اه بقي
وليد: ليه يعنى .. انا اللى جريت وراها .. ولا انا اللى قولتلك عرفيني عليها
وبعدين احنا اتكلمنا فى ايه يعنى .. مهو كله كلام عادى .. هى اللى رغاية اصلا
سلمى: اه وانت مبتصدق..
وليد: بقولك ايه .. اعقلي بقي .. ولا انتى طالبه معاكى خناقه
سلمى: ايوة كل ما اجى اكلمك تقولى انتى نكديه .. وانتى اللى بتحبي المشاكل وانتى وانتى
وليد: لا انا اللى وحش يا ستي .. انا هروح انام
.
.

تانى يوم

سلمى: وليد .. اوعى تكون زعلت منى .. انت عارف انى بغير عليك
وبتضايق لما اشوفك بتكلم اى حد
وليد: بس دى مش اى حد .. دى صاحبتك
سلمى: ايوة .. خلاص انا غلطانة متزعلش منى
وليد: طيب خلاص
سلمى: طيب مش زعلان منى ؟
وليد: لا مش زعلان
سلمى: بجد
وليد: خلاص يا بت .. الله
.
.

الاسبوع اللى بعده

...: الو
وليد: الو .. ايوة مين
...: ايوة يا وليد انا امل
وليد: امل !! .. ايوة يا امل ازيك
امل: انا تمام .. انت كويس ؟؟
وليد: انا ؟
امل: انا كنت بتصل عشان سلمى
انااا كنت خدت رقمك من عندها .. يعنى عشان ابقي اتطمن بس لو فى حاجة
اصلها مجاتش الاسبوع ده وموبايلها مقفول
وليد: مش عارف .. هى كانت قايلالى انها هتيجي .. طيب انا هتصل بيها وهخليها تكلمك
.
.

وليد بيتصل بسلمى
وليد: مهو بيرن اهو .. مقفول ايه بقي
سلمى: الو
وليد: ايوة يا بنتى انتى فين
سلمى: انا هنا فى البيت .. صحيت متاخر النهارده معرفتش اجى
احتمال اجى بكره .. ياما هاجى الاسبوع الجاى بقي
وليد: انتى كويسة يعنى
سلمى: اه الحمد لله مفيش حاجة
وليد: طيب مع السلامة
.
.

وليد: ييييييييييه .. نسيت اقولها على صاحبتها

.
.

بعدها بيومين

وليد: الو
امل: ايوة ازيك يا وليد .. انا امل
وليد: ايوة ازيك يا امل .. على فكرة انا كلمت سلمى .. مش هتيجي الاسبوع ده .. بس هى كويسة يعنى
امل: اه .. وانت معندكش جامعة ولا ايه
وليد: لا عندى بكره
امل: طيب ممكن اشوفك بس عاوزه اخد رايك فى حاجة
وليد: طيب انا هخلص بكره الساعة 12 هشوفك فى الجامعة

.
.

تانى يوم

امل: ايه يا عم الشياكة دى
وليد: هههههههههه .. يا سلام
امل: اه مظبط نفسك انت اليومين دول
وليد: لا عادى والله مفيش حاجة .. دا حتى سلمى مش عاجبها التي شيرت ده
امل: سلمى دى نكد .. على طول كده تحب المشاكل .. ولازم تطلع القطط الفاطسه فى الحاجة
وليد: بس غلبانة والله وعلى نياتها خالص
امل: اه
وليد: ايه الموضوع اللى قولتيلي عليه امبارح
امل: مفيش كنت مخنوقة شوية .. وقولت طالما انت جاى وانا جايه
نتكلم مع بعض شوية .. ولا احنا مش صحاب
وليد: لا صحاب طبعا
امل: مش دايما تحس ان الناس بتتركب على بعضها بالمشقلب
وليد: ازاى يعنى
امل: يعنى .. تلاقي واحدة بتموووت فى النكد .. واقعة مع واحد دماغه عاليه زيك كده
وتلاقي واحده زى حالاتى واقعه مع واحد ميستاهلش يتقال عليه بنى ادم
وليد: مممممم .. والله مش عارف .. بس كل واحد بياخد نصيبه
امل: مالك يا عم متنشن ليه كده .. احنا بنفضفض يعنى عادى
وليد: مش متنشن ولا حاجة
.
.

الاسبوع اللى بعده

سلمى: تعالى بقي يا استاذ .. ليلتك سودا
كنت بتعمل ايه مع صاحبتي الاسبوع اللى فات
وليد: بعمل ايه يعنى ايه
سلمى: مش كنتو قاعدين لوحدكو
وليد: قاعدين فين يعنى ع البلاج ؟ .. كنا فى الكافتريا
سلمى: مهى بتبدا بالكافتريا
وليد: يوووووووووه .. بدأنا بقي
سلمى: ايه يا وليد انت مش طايقلى كلمة كده ليه
وليد: اصلك بقيتي اوفر اوى .. يا بنتى خلى عندك ثقة فى نفسك شوية
سلمى: ماشي يا وليد براحتك
.
.

فى المدينة

امل: مالك يا بنتى بتعيطي ليه
سلمى: وليد متغيريا امل .. مبقاش زى الاول
بقي على طول يزعقلى .. وبقي بيزهق من كلامى على طول
مش عارفه ايه اللى مغيره كده
امل: مانا قولتلك يا بنتى الولاد كلهم كده .. عايزين الحرق
سلمى: بس وليد مكانش بيعمل معايا كده
امل: كنتو لسه فى الاول يا ماما
سلمى: يعنى ايه .. انا كنت مخدوعة فيه !!
امل: معرفش بقي .. اللى اعرفه ان مفيش حد يستاهل انك تعيطي عليه
خديها نصيحه من واحدة مجربه .. جمدى قلبك كده وميهمكيش حد
.
.
فى نفس اليوم بالليل

امل: الو
وليد: ازيك يا امل
امل: عرفتنى على طول يعنى
وليد: خلاص بقي سجلت رقمك .. احنا مش صحاب ولا ايه :D
امل: ماشي يا سيدي .. انت عامل ايه .. والست سلمى
وليد : انا كويس .. لسه مخلص موشح غم من شوية مع الهانم
امل: هههههههههه .. تانى
وليد: وتالت ورابع .. مبتزهقش
امل: هى سلمى كده من يوم ما عرفتها
وليد: المهم انتى اخبارك ايه
امل: انا تمام .. رايح امتى بكره
وليد: وانتى عرفتى منين انى رايح
امل: شوفت جدولك فى الكلية .. ايه يعنى صعبة دى
وليد: ممممممم .. رايح 9 بكره
امل: لازم تروح 9 يعنى
وليد: امال اروح امتى
امل: يا عم فكك من شغل الملزمين ده .. يعنى اللى بيحضرو اخدو ايه
وليد: على رايك
امل: ايه رايك نتمشي شوية بكره
وليد: ممممممم .. امتى
امل: 9
وليد: وااااااو .. 9 ؟
امل: اه .. اهو تكون الهانم فى المحاضرة وتترحم من موشح كل يوم
وليد: ههههههههههههه
امل: ها قولت ايه
وليد: ماشي
.
.
نفس اليوم بالليل

سلمى: ايه يا وليد انت محضرتش ليه النهارده
وليد: كنت تعبان شوية ومجيتش
سلمى: امل بردو كانت تعبانة
وليد: ايه بقلدها انا يعنى
سلمى: يا وليد براحة انت بقيت خلقك ضيق ليه كده
وليد: انتى مش شايفه انتى بتتكلمى ازاى
سلمى: وفيها ايه يا وليد .. دا جزائى عشان خايفه عليك
وليد: خايفه ايه هو انا بعدى الطريق .. اعقلي يا ماما شوية
سلمى: ماشي يا وليد .. براحتك
.
.

امل: الو
وليد: ايوة
امل: ايه يابنى هنخرج امتى بكره
وليد: بكره مفيش جامعة اى وقت انا فاضي
امل: طيب اشطه الساعة 10 كده هنتقابل عند الكلية وننطلق
وليد: ماشي
.
.
الساعة 10

سلمى هتموت من الحيرة .. قررت تنزل الكلية
سلمى راحت الكلية

وليد وامل ماشيين اديهم فى ادين بعض

سلمى اتفاجئت بالموقف
انفجرت فى العياط .. بتجري مش عارفه هتروح فين

وليد فك ايده .. وشه قلب الوان

امل بتبصله
امل: ايه فى ايه .. مالك
وليد: ها .. سلمى دى اللى شافتنا .. صح ؟
امل: اه هى .. عادى .. هتعيط شوية زى كل مرة وهتسكت .. مالك بقي
وليد: تعيط شوية ايه بس .. انتى شايفه شكلها عامل ازاى
امل: ايه ده .. يا حنين .. انت خايف عليها
وليد: يعنى ..
امل: اخص .. كنت بحسب عندك شخصيه .. اوعى كده ومتكلمنيش تانى

امل حست ان اللى حصل دا كله ماستفادتش منه بحاجة

جريت على حسام تترمى فى حضنه
حسام زقها ولطشها قلمين
طبعا المعلم دا عارف كل حاجة .. بيتفرج من بعيد وساكت

امل: يا حسام انا بحبك
حسام: لا يا شيخة .. امال كنتى ماسكاه ليه ده .. بتعديه الطريق ولا ايه
انتى عارفه من الاول انى مش بتاع حب وكلام من ده
وانا عارف كويس انك مقضياها
امل: يا حسام..

حسام: بلا حسام بلا بتنجان
.. متتكلميش معايا تانى ..


.
.

وليد راح لسلمى
وليد: سلمى..
سلمى: خلى عندك ثقة فى نفسك .. صح؟
بطلى نكد .. صح؟؟
اعقلي يا ماما .. صح؟؟
هى دى النتيجة .. يا خسارة يا وليد
وليد: يا سلمى انا بحبك
سلمى: انت مبتحبش الا نفسك .. عايز تعمل اللى على مزاجك وبس

.. متتكلمش معايا تانى ..

24 Comments:

  1. sony2000 said...
    يااااااااااه
    بتحصل كتير اوي
    واحيانا بتوصل لحجات ماحدش يصدقها او يتخيلها
    ربنا يزيحهم عننا اللي ذي امل دول
    ياااااااااارب
    :) said...
    جميل جامد جدا
    امل دي فظيعة فظيعة ربنا يهدي اللي زيها ويهدينا جميعا
    غير معرف said...
    //وليد: بقولك ايه .. اعقلي بقي .. ولا انتى طالبه معاكى خناقه
    سلمى: ايوة كل ما اجى اكلمك تقولى انتى نكديه .. وانتى اللى بتحبي المشاكل وانتى وانتى
    وليد: لا انا اللى وحش يا ستي .. انا هروح انام//


    ياختي عليهم ايه الجمال ده !!! D:

    عموما انا شايفه ان كل ده كان في مصلحة الكل وكلواحد عرف مين اللي يستاهله ومين ميستاهلوش :)


    ٍShiMOo
    غير معرف said...
    :(
    سلطان said...
    حاااااااااااارمنا من انسك ليه؟
    ليه
    ليه
    ليه
    .
    .
    .
    امال حكاوينا راحت فين
    فين
    فين
    فين
    .
    .
    .
    هبقي اقرا الموضوع واقولك رايي
    سلامي مقدما
    مقدما
    مقدما
    مقدما
    !! a7mad sala7 !! said...
    سونى

    عارفه
    العيب مش عليها
    العيب على الاهبل ابو رياله اللى مشي وراها ده
    !! a7mad sala7 !! said...
    :)

    امين يا رب

    منورانى :D
    !! a7mad sala7 !! said...
    شيمو

    شوفتى بقي النهاية :D

    طلع محدش يستاهل حد
    وكله لبس فى الحيط

    اموت انا فى الخراب :))
    !! a7mad sala7 !! said...
    ميوش

    عارف انا النهاية مش عاجباكى :D
    !! a7mad sala7 !! said...
    سلطان

    ههههههههههههههههههه
    ماشي مستنيك
    !! a7mad sala7 !! said...
    يا جماعة القصة يمكن غريبة شوية
    ومش اسلوبي حتى انى انهى قصه فى جزء واحد وكروته كده

    بس دا اعتبروه موقف بيحصل كتير اوى فى حياتنا

    الفكرة مش فكرتى
    فكرة ميوش

    بس انا صاحب السيناريو :D
    غير معرف said...
    بعد التحية
    أنا عندي فكرة عن التدوين
    أنا قيمت أو انتقدت مدونتي،ممكن تشارك و تقيم مدونتك!
    http://shayunbiqalbi.blogspot.com/2010/10/2.html
    أنت مدعوة للمشاركة في حملة مدونات في الميزان
    مع خالص تقديري للمشاركة
    ابوهم said...
    اديها يا انسان
    اديها في الكلتش كمان
    انت عارف الساعه اللي في ايدك دي بكام
    بكام
    بكام


    مشكلة العيال دي انهم مش شايفين غير اللي قدامهم بس
    بصرف النظر عن حركة مصدره
    !! a7mad sala7 !! said...
    سونت


    انا مدعوة ؟؟

    :D

    اعتقد انتى تقصدي بنت
    !! a7mad sala7 !! said...
    ابوهم

    هههههههههههههه
    اى والله يا حلزون


    المشكلة بقي ان فيهم اللى شايف ومستهبل :D
    morgana said...
    حلوه القصه
    :)
    !! a7mad sala7 !! said...
    نورتى :)
    بنت _مصريه said...
    حدوته حلووووه اوى وللاسف متكرره كتير
    امل ديه فظيعه وللاسف في زيها كتير اوى
    وسلمى هى الى صعبت عليا ف الحدوته ديه
    !! a7mad sala7 !! said...
    بالظبط كده

    سلمى دى هى الضحية :D

    اللهم احفظنا جميعا

    نورتى البلوج :)
    Sahar Elgafary said...
    بسم الله والصلاة علي رسول الله
    عيد سعيد عليكم والأمه الأسلاميه
    للأسف العدوا زمان قوي حاول يهزم العرب لما كانت القيم والتقاليد جذورها راسخه في سابع أرض
    من خلال الحرب البارده ..حاول وحاول بشتي الطرق
    وفشل لحد ما جواسيسهم قدرت تعرف إن السيطره الوحيده عليه ويبقي مغيب عن كل تقدم هو الأحاسيس لما شاف جاسوس ليهم شاب أو جندي مش فاكره الروايه قوي ..بيقابل حبيبته وبعدين فارقته..قعد يعيط وانهار من هنا ومن يومها لهونا بالسينمات والتليفزيونات والفرس الأبيض والحصان الموف والدبدوب علي رأي ناس وهلما جر..وأصبحنا نصحي وننام علي أيه غير تفاهات ..وتخلص الدنيا فجأه في الحب والغرام وسابني وبص لصحبيتي ده مردش يادودي علي الماسدج ..والعمل ..أشترك في خدمة أهلا أتصالات
    والعمر بيجري والفلوس تروح علي ألو كلمني شكرا والقيامه قانت وشكرا..
    ويابخت من طبق سنه والنبي عرفو ونادالوا ..وياويل اللي بدع بدعه والشيطان روج هالوا
    وعجبي يادنيا فانيه
    ويا بخت اللي المدير خالوا..

    وكفايه أصلي منغاظه...
    ربنا يهدينا
    وشابابنا اللي في الهوي مالوا.

    عرضك للمشاكل رائع فهو ساخر ومبدع

    ...ومن ساعة ماحذفت التعليق سهوا ما تابعتش نسيج الحرير وصل لفين...
    كل عام وأنتم بخير.
    !! a7mad sala7 !! said...
    خيط الحرير

    ههههههههههههههههههه
    جميل اوى ردك
    بتعاملى البوست بموضوعية اوى

    عندك حق فى كلامك والله
    ربنا يهدينا جميعا


    ومعلش انا مش متابع اصلا والله
    مش نسيج الحرير بس يعنى :)
    بنت من زحل A girl from Saturn said...
    إيه الإبداع ده
    تفوقت عليا
    سلمى غلطت مرتين: اول مرة انها اختارت صديقة غلط اصلا وتانى مرة انها مشيت مع واحد باسم الحب سواء بقى هو شخص كويس او شخص مش كويس انا رافضة اصلا المبدأ ده
    بالنسبة بقى لوليد
    فواضح انه زى حسام اساسه(بيقضيها)
    يعنى لو كان لقى واحدة غير امل تصرفت نفس التصرفات معاه كان برضه هيعمل كده فى سلمى
    بس بصراحة قصة رائعة
    عجبتنى
    !! a7mad sala7 !! said...
    ربنا يخليكي
    شكرا لذوقك

    وهتابع عندك بقي نشوف اللى انا بكتب احسن منه ده :D
    غير معرف said...
    Casino Site - Lucky Club Live
    You can enjoy playing at luckyclub the casino with your friends, and we also provide live tables for table games like Blackjack, Roulette, Blackjack and  Rating: 5 · ‎2 votes

Post a Comment



رسالة أحدث رسالة أقدم الصفحة الرئيسية

Blogger Template by Blogcrowds