شيخ العرب .. بتنجان


اولا كده
اخوانا الصعايده ياخدو الكلام بصدر رحب :D
انا مش عامل الموضوع ده عشان اجر شكل حد ولا اى حاجة من هذا القبيل
ولكن احساس حسيته بمجرد ما انتهت الحلقة الاخيرة

انا مش من هواة التليفزيون
بس دايما فى رمضان البيت كله بيبقي متابع المسلسل اللى بيبقي شغال ع الفطار
واللى هو كان شيخ العرب ده السنادى على الحياة

اينعم يحيي الفخرانى راجل ملوش حل
ومعظم مسلسللاته بتعجبني .. العيب مش عيبه يعنى
العيب عيب السيناريست او المؤلف بتاع المسلسل
ايا كان بقي المسلسل قصة حقيقية او مش حقيقية

طبعا واضح ان المسلسل بيتكلم عن فترة من الزمن
بتظهر فيها بطولة الصعايدة وحنكتهم .. وشوية صفات حلوة كده للصعايدة
هى كانت فترة فيها الحكم العثمانى .. وكان المماليك ماسكين مصر

المسلسل باختصار ماشي من الاول كويس اوى
وبيوريك عادات الصعايدة اللى احنا عارفينها
الكرم والشهامة والطيبة والشجاعة و و ...

الراجل اتجوز اتنين عشان بس يخلف وقولنا ماشي
وواحد تانى سايب بنته تتضرب من جوزها وقولنا ماشي

لكن لما تفضل 30 حلقة بتقنعنا ان دى فترة هيمنه من الصعايدة على ارضهم
وفى الاخر يرويلك تفاصيل الخطة اللى عملها شيخ العرب
وانه جمع جميع فرسان الصعيد ورجالتها عشان يصدو خطر المماليك
اللى كانو عايزين ياخدو ارضهم ويشردوهم ويهينو كرامتهم وكرامة ستاتهم

ويبينلك هيبة شيخ العرب واد ايه كل الدنيا عاملاله حساب
حتى العثمانيين وشيخ الازهر وغيرهم

ويطلع الراجل من اقصي الصعيد يلم فى الجيوش
وماشي فى رحلته للقاهرة عشان يطرد المماليك .. او يصد خطرهم
وفجأة يتعب وهو فى السكة
فى النص الاخير من الحلقة الاخيرة من المسلسل
ويقرر يرجع بلده ويسيب الليلة فى ايد ابن عمه يكمل مكانه

وفجاة يبعت قائد من المماليك رسالة لابن عمه ده
يقوله شيخ العرب مبيحبكش واحنا شايفينك انت شيخ العرب
بيعهم وانسحب بالجيش بتاعك واحنا هنخليك شيخ العرب بفرمان من الحاكم

ويقومو يعملو خدعه هبلة
ياخدو كام واحد صعيدي ويقتلوهم
ويولعو فى جثثهم ويبعتوها محروقة للصعايدة
على اساس ان معاهم سلاح بيقتل بالكبشة
يقتل كام واحد كده ويولع فيهم كمان
وان بقي خطره كبير وهيعمل الفرق فى الحرب

يقوم اخوانا الصعايدة يصدقو ويتهزو
ويوقفو الزحف ناحية القاهرة
رغم ان موقفهم كان اقوى بكتير

يقوم ابن عم شيخ العرب الشيطان يضحك عليه
ينسحب بجيشه كله لورا فى لحظه
وفى خلال دقيقتين من المسلسل تتغير واجهة كل حاجة
تبقي السيطرة فى ايد المماليك على كل زمام الامور
ويخشو بلد شيخ العرب
يخربوها ويقلبو عاليها واطيها ويشردو الناس ويقتلوهم
وياخدو الستات بتاعتهم ويمرمرطو اهل بيت شيخ العرب
وتتهان كرامة الاشراف المصونة وتقع الصورة اللى محطوطة فى ازهان المشاهدين عن الصعايدة
يستخبي شيخ العرب فى مخبئ تحت الارض .. رغم انه هو المفروض بطل الابطال

كل دا عشان ايه
ابن عم شيخ العرب اتضحك عليه بكلمتين من واحد مملوك
وبناءا عليه ..
يخونوه طبعا ويقتلوه .. بعد ما مراته وعياله واخواته اتبرو منه

حتى بنته اللى كان رافض جوازها عشان منشف دماغه ع الفاضي
وامها كانت موافقة وكل حاجة
بعد ما مات الراجل .. هى كمان مبقتش موافقة .. ليه بقي
لان هما الصعايدة كده .. لازم تنشف دماغها زى ما بيعملو _كما وجدنا ابائنا وهكذا نحن فاعلون_

وبناءا عليه البت تتعقد وتتخرس
واللى كان عايز يتجوزها يقعد يندب حظه لحد ما يموت

وشيخ العرب يتصدم ويبقي مش عارف يعمل ايه
يقوم يقرر يروح ياخد جيش من النوبه .. من الجنوب تحت
اللى كانت ايامها من اسوان وانت نازل ع السودان
رايح يحارب بالسودانيين .. واحنا محرمناش ورايحين نلاعب الجزائر هناك :D

طبعا دا بعد ما البلد خربت
وموتو الناس وهانو كرامة الشرفاء .. يعنى بعد ما خربت مالطة

لا دا مش بس كده
وهو واخد المركب ورايح النوبة
مات فى المركب

يقوم يحصل ايه تانى ؟؟
ولا حاجة .. خلص المسلسل على كده
والمماليك اللى ملهمش اصل ضحكو علينا واخدو البلد بخدعه هبلة
عشان واحد صعيدي اتضحك عليه

ومكسبناش احنا الا الصلا ع النبي !!

ايا كانت القصة بقي حقيقية ولا متألفه
بس مجرد ان الفكرة تلاقي استحسان ويختارها يحيي الفخرانى
وتتعمل وتتزاع فى رمضان .. يبقي اكيد قصة ليها قيمتها

وادى اخرة اللى يرمى ودنه لمسلسل صعايدة 30 يوم متصلين :D

كل سنة وانتو طيبين :)

21 Comments:

  1. halaS demahoM said...
    وانت طيب ياخويه
    وابقي شوفه بقي في مسلسل محمد علي السنه الجايه بردوا

    وابقي قابلني (روبي)
    غير معرف said...
    الحمد لله متفرجتش عليه :d
    كده بقى كائنى شوفته

    //يستخبي شيخ العرب فى مخبئ تحت الارض .. رغم انه هو المفروض بطل الابطال//
    طب معملش استنساخ لنفسه على ناس تانين زى صدام ؟ اصل التاريخ بيعيد نفسه :))

    كويس ان انا مشوفتوش كنت هاتشل من النهايات الزفت دى
    عموما كل سنه وانت طيب وتعيش وتاخد غيرها :d
    !! a7mad sala7 !! said...
    سلطان

    التاريخ بيتجمل يابو صلاح
    انا متفق معاك

    من ساعة موضوع احمد عرابي اللى وقف ادام الخديوي ده :D
    !! a7mad sala7 !! said...
    ميوش

    كويس ان فى حاجة مشوفتيهاش
    دانتى تليفزيون متنقل


    كل سنة وانتى طيبة
    وعقبالك كده :D
    غير معرف said...
    لا حول ولا قوة إلا بالله

    اللهم اهدنا جميعا وردنا لكتابك ردا جميلا

    يا أخى هداك الله ,النصارى يريدون حرق المصحف والشيعة يسبون أمنا عائشة ونحن مازلنا نتحدث عن المسلسلات !!
    halaS demahoM said...
    هههههههههههههههههه
    طب والله الراجل ده عنده حق
    ايه رايك بقي؟
    !! a7mad sala7 !! said...
    الغير معروف

    اهلننننن

    انت جيت يا غير معروف

    انت بقي عاوزنى اعمل ايه يعنى للنصارى ؟؟

    واعمل ايه فى الشيعة ؟؟

    انت يعنى سايب الحكام والمسئولين وجاى تكلم واحد مدون

    انت بقي عملت ايه للقضيتين دول ؟؟

    وبعدين انا مبتكلمش عن المسلسلات على فكرة
    حتى الموضوع ده مقصدش بيه اتكلم عن مسلسل

    انت بتكلم عن فكرة معينه
    واضطريت انى اشرح عشان الناس تفهم
    !! a7mad sala7 !! said...
    يا سيد غير معروف احنا مفيش بادينا الا الدعاء

    والدعاء دا صله بين العبد وربه
    لا يتعلق بالتدوين من قريب او بعيد
    !! a7mad sala7 !! said...
    سلطان

    يا عم روح
    انت مستخبي ورا البلوج ولا ايه
    غير معرف said...
    \\
    يا سيد غير معروف احنا مفيش بادينا الا الدعاء
    \\

    أنى يستجيب الله لنا ونحن فى هذه الحال !!
    سألتك بالله هل دعوت الله على من ارادو حرق المصحف فى سجودك . هل وقفت تصلى وبكيت لربك وقلت لله ليس بيدى إلا الدعاء
    ... إذا كنت فعلت هذا حقا وتركت معاصيك فأنت بذلك لم تقصر ,, ولكن ما أراه هو غير ذلك .. يكفى انك كنت بتسمع مسلسلات فى رمضان . ده دليل على انك نصرت دينك صراحة لم تقصر تعبت جدا
    --
    يا سيدى الفاضل كل ما يحدث للأمة بسبب معاصينا .. كل واحد يفعل معصيةولا يتوب منها يتسبب فى هزيمة الامة
    ما الذى جعل الامة فى أخر الركب هكذا أظنها المعاصى والمسلسلات والافلام
    تخيل نفسك تموت وانت تجلس لمشاهدة هذه المسلسللات الهابطة والافلام الفذرة التى علمت الشباب الفساد والحب والغرام

    ---
    هههههههههههههههههه
    طب والله الراجل ده عنده حق
    ايه رايك بقي؟
    \\

    أظن هذه الضحكة العريضة للسخرية

    ستذكرون ما أقول لكم وأفوض أمرى إلى الله



    اللهم إنى قد لغت اللهم فاشهد
    halaS demahoM said...
    \\
    أظن هذه الضحكة العريضة للسخرية
    ستذكرون ما أقول لكم وأفوض أمرى إلى الله
    اللهم إنى قد لغت اللهم فاشهد
    \\
    هيا فعلا للسخريه
    بس مش من كلام سيادتك
    دي المفروض بالنيابه عن سيدتك
    ونصيحه ليك
    لما تحب تدعوا لحاجه يبقي تقرا الايه دي
    اعوذ بالله من الشيطان الرجيم

    ادْعُ إِلَى سَبِيلِ رَبِّكَ بِالْحِكْمَةِ وَالْمَوْعِظَةِ الْحَسَنَةِ وَجَادِلْهُمْ بِالَّتِي هِيَ أَحْسَنُ إِنَّ رَبَّكَ هُوَ أَعْلَمُ بِمَنْ ضَلَّ عَنْ سَبِيلِهِ وَهُوَ أَعْلَمُ بِالْمُهْتَدِينَ

    ماشي يا ابو الكباتن
    غير معرف said...
    هههههههههههههههههه
    على فكره انا عارفه الغير معروف أأأأأ
    بالراحه ع الغير معروف عشان لسه صغير :D
    غير معرف said...
    سلام عليكم ورحمة الله وبركاته

    \\ونصيحه ليك\\

    نصيحة مقبولة ,, جزاك الله خيرا

    وأعتذر عن اسلوبى اذا كان فيه اساءة او نوع من الشدة فقط أخذتنى الحمية
    اسأل الله ان يهدينا ويهدى بنا ويجعلنا سببا لمن اهتدى

    ---

    \\هههههههههههههههههه
    على فكره انا عارفه الغير معروف أأأأأ\\

    لا حضرتك متعرفنيش ولا انا اعرفك

    \\بالراحه ع الغير معروف عشان لسه صغير :D\\

    no comment
    جزاكى الله خيرا كلك ذوق
    !! a7mad sala7 !! said...
    الغير معروف

    //أنى يستجيب الله لنا ونحن فى هذه الحال !! //

    يا سيدي الفاضل
    هذا الحال ايه بس
    هو انا عملت معصية
    دا كلام عادى والله

    صليت ودعيت وخشعت بين يدي الله
    هو انا لازم اقولك كده يعنى
    وبعدين مسلسلات ايه اللى سمعتها
    انا مش من هواة التليفزيون اصلا

    على فكرة اسلوبك بيدل على انك سنك صغير
    وبتتكلم بحماس من غير ماتوزن الكلام اللى بيتقال

    تعبنا من كتر الهتافات دى
    !! a7mad sala7 !! said...
    سلطان

    شكرا للمداخله
    !! a7mad sala7 !! said...
    ميوش

    انا حسيت بردو
    لان الكلام باندفاع وجاى بهتاف اكتر منه بعقل

    انا ورد عليا الكلام ده كتير

    ربنا يهدى الجميع
    halaS demahoM said...
    \\
    شكرا للمداخله
    \\
    نايس تو ميت يو مسيو اهمد
    !! a7mad sala7 !! said...
    :D
    خواطر شابة said...
    بداية سعيدة اني تعرفت على المدونة وان شاء الله يدوم التواصل
    تانيا بالنسبة لشيخ العرب همام انا تابعته الى منتصفه وبعدها مللت من المكائد والحروب ومن قصة ليلى التي لاتريد ان تنتهي دون مبرر لما يحصل وكنت اتسائل ترى بما انتهت القصة واليوم كأني شاهدتها من حكيك
    دمت بكل الود
    !! a7mad sala7 !! said...
    انا اسعد طبعا بمعرفتك

    ان شاء الله يدوم التواصل

    كويس انك مكملتيش المسلسل :D

    نورتى :)
    غير معرف said...
    مصر فى مهب الريح

    فى خلال الثلاثين عاما الماضية تعرضت مصر الى حملة منظمة لنشر ثقافة الهزيمة بين المصريين, فظهرت أمراض اجتماعية خطيرة عانى ومازال يعانى منها خمسة وتسعون بالمئة من هذا الشعب الكادح . فلقد تحولت مصر تدريجيا الى مجتمع الخمسة بالمئه وعدنا بخطى ثابته الى عصر ماقبل الثورة .. بل أسوء بكثير من مرحلة الاقطاع.

    1- الانفجار السكانى .. وكيف أنها خدعة فيقولون أننا نتكاثر ولايوجد حل وأنها مشكلة مستعصية عن الحل.
    2- مشكلة الدخل القومى .. وكيف يسرقونه ويدعون أن هناك عجزا ولاأمل من خروجنا من مشكلة الديون .
    3- مشكلة تعمير مصر والتى يعيش سكانها على 4% من مساحتها.
    4 – العدالة الاجتماعية .. وأطفال الشوارع والذين يملكون كل شىء .
    5 – ضرورة الاتحاد مع السودان لتوفير الغذاء وحماية الأمن القومى المصرى.
    6 – رئيس مصر القادم .. شروطه ومواصفاته حتى ترجع مصر الى عهدها السابق كدولة لها وزن اقليمى عربيا وافريقيا.

    لمزيد من التفاصيل أذهب إلى مقالات ثقافة الهزيمة بالرابط التالى www.ouregypt.us

Post a Comment



رسالة أحدث رسالة أقدم الصفحة الرئيسية

Blogger Template by Blogcrowds