شكل للبيع

زمان لما كنا فى ثانوى
كنا خدنا حاجة فى الاقتصاد اسمها المنفعة الحدية
وكنا عرفنا ان المنفعة الحدية بتقل بزيادة الوحدات
يعنى مثلا
لما تكون عطشان
اول كوباية بتشربها بتبقي دى اهم كوباية بالنسبالك
وبتشربها بلهفة كده وبتحس ان هى اللى بتحققلك اكبر اشباع
ممكن بعدها تبقي لسه عطشان بس لما تيجي تشرب كوباية تانية مش هتحققلك نفس الاشباع .. هيبقي اقل شوية
ممكن بعدها تخش فى كوباية تالتة .. على اساس ان بطنك بلاعة يعنى .. بس هتلاقي نفسك خدت منها بؤ ورميت بقية الكوباية
مع ان سبحان الله هى فيها نفس محتوى الكوباية الاولانية
والاولانية دى كنت هتموت عليها .. لدرجة انك كنت ممكن تقرقش الكوباية وانت بتشرب
بس مع نفس المحتوى فى المرة التالتة رميت بقيتها .. دا لو شربت منها اصلا

طيب دا بالنسبة للاشياء .. فما بالك لو بقت بالنسبة للبني ادمين
يعنى اللى هتعمله فى كوباية الميا ده تعمله فى حد
اظن الوضع هيبقي صعب اوى
وقاسي على اللى بيحصل فيه كده

طيب نخش على جزئية تانية
معظم الناس .. يمكن تكون طبيعة بشرية .. مش عارف
تلاقي وهو عطشان اوى .. كل همه انه يشرب وبس
يعنى لو رميته على بير ميا هينزل يشرب
او بمعنى قريب لينا .. تلاقيه وقف عند اى كولدير كده وملقاش كوبايه .. يعمل ايده كده على هيئة مغرفة
ويشرب منها
تلاقي واحد تانى يقولك لا انا عاوز ميا كوباية .. لا عاوز ميا ساقعة
لو مش سقعة مش هشرب
واحد غيره يقولك لا انا ماشربش ميا من دى اصلا
انا عايز ميا معدنية .. حياة من اللى بيعلن عنها عمرو دياب :D

باختصار بتتعدد الحاجات فى الجزئية دى
وكل واحد عاوز الحاجة بتاعته فى صورة معينة
وكل واحد عارف ايه البدائل اللى ممكن يستخدمها والحاجة دى مش موجودة
وكل واحد عارف ايه اقصي طموحه فى الحاجة دى

لما يخش فيها عنصر الطمع بقي .. بتبقي حاجة صعبة اوى
يمكن الطمع مش مرفوض فى حاجات معينة

زى الراجل اللى هيتحاسب مثلا
وعرف انه هيروح النار
يقول يا رب بس لو انجو من النار .. ومش عاوز حاجة تانى
ربنا ينجيه من النار .. يبص بعيد كده يلاقي شجرة ليها ضل .. يقول يا رب بس لو اقعد تحت الشجرة دى .. استظل بيها
ربنا يسمحله بكده .. يبص كده يلاقي مكان فى الجنة .. يقول يا رب بس لو اجرب اقعد فى الجنة دى شوية
ربنا يسمحله بكده .. يبص يلاقي مكان اعلى من الجنة .. يقول يا رب ..... وهكذا

تعالى بقي فى العلاقات والمعاملات الانسانية
تلاقي حد معجب بحد اوى
ونفسه بس يبقي قريب منه .. باى صورة
ويفضل يتمنى كده ويسعى عشان يوصل لكده
ولما تتحققله الامنية دى .. تلاقي طموحه زاد وبقي نفسه يقرب شوية كمان من الشخص ده
ولما تتحقله الامنية يبقي نفسه يرتبط بيه .. مع انه ممكن يبقي عارف ومتاكد انه عمر الارتباط ده ما هيستمر .. وعارف ان العلاقة محكوم عليها بالفشل .. وبردو واهم نفسه بس بالارتباط
وحتى لو اتحققت امنيته .. وارتبطو .. تلاقيه بقي عاوز مطالب تانيه .. وهكذا

الغريب فى الموضوع بقي
ان الانسان ده بعد ما كان مجرد نفسه بس انه يبقي قريب من الشخص التانى
دلوقتى بعد ما ارتبط بيه واتمكن منه بقي يحط شروط للعلاقة .. وبقي بيتفنن فى خلق مشاكل .. وبعد كده يدورلها على علاج

يعنى بعد ما كانت كل مشكلته انه بس يبقي قريب من الشخص التانى
ولما اتطورت شوية بقي كل مشكلته ان الشخص التانى دا مجرد يحس بيه
وصلت لانها بعد ما الوضع استقر بقي يدور على مشكلة من العدم ويعيش نفسه فى جو نكد .. وبعد كده يدور على حلول
فى حين ان فى نفس الوقت ده لما بتحصل مشكلة كبيرة ممكن تؤدى لانفصال .. بينسي كل التفاهات دى وبيرجع تانى يدور على ازاى يحافظ على بقاء العلاقة

يعنى من الاخر .. شكل للبيع

فى ناس كده .. هوايتها انها تخلق مشكلة
صفو العلاقة دا زى ما يكون مش متعودين عليه

عايز بس يتخانق مع صاحبة على طول
عايز يبقي فى شد كده وفى تاتش بينهم

واحدة مخطوبة عايزة على طول تبقي على خلاف مع خطيبها .. وتخليه يتصل بيها ويتحايل عليها ويراضيها

واحد مرتبط بواحدة بقي عاوز على طول يحس بالشك .. على طول يحط فى دماغه انها بتعمل حاجات مش كويسة .. فى حين انه كان هيموت عليها فى الاول .. وكان كل همه انها تعبره بس

واحدة مرتبطة بواحد وبقي عندها على طول احساس ان هو متغير من ناحيتها .. وبقي ميحسش بيها زى الاول .. وبقي بيبص لكل البنات .. فى حين كان الاول كل همها انه يحس بيها بس

كل واحد عايز يمشي حياته بالاحساس
شغالين فى مباحث الاحاسيس

فهو سبحان الله .. محدش عاجبه حاله ابدا .. ومحدش عاوز يرضي بوضعه .. دايما باصص على اللى مش متوفر

حتى فى المشاكل .. الناس بقت تعشق المشاكل
لو حياتك عدت من غير مشكلة متستريحش

يمكن دا نوع من الفراغ .. كان زمان الستات الكبيرة تقول ايه .. الحياة من غير مشاكل متبقالهاش طعم
المشاكل هى البهارات اللى بتدى للحياة طعم
بس انا مش مؤيد للموضوع دا بصراحة :D

حتت ان الوضع يبقي مستتب دى تشكلى ازمة وتعملى ملل .. انا مبحبهاش
بس للاسف فى ناس بتحبها..

14 Comments:

  1. سلطان الاسيوطي said...
    \\
    اول كوباية بتشربها بتبقي دى اهم كوباية بالنسبالك
    وبتشربها بلهفة كده وبتحس ان هى اللى بتحققلك اكبر اشباع
    \\
    مين قال كده؟؟؟
    انت لو جعان وجيبت شوية ساندوتشات
    وكلت اول ساندوتش بيجوعك اكتر
    لسبب
    انه فكرك بالاكل وعرفك انك ممكن تتخلص من الجوع اللي انت فيه ده
    بالعكس ده عدمه احسن منه
    ماهو يا نعيش عيشه زي الفل لنموت احنا الكل
    انما اول كوب وتاني كوب والكلام المتكوب بتاع التربيه والتعليم ده مبياكلش عيش اسمع كلامي
    الجمله دي ممكن تكون صحيحه ميه في الميه في حاله انه مفيش غير كبايه ميه واحده
    انما مادام متوفر اكتر من كوبايه
    صدقني ... اول كبايه مبتعملش اي حاجه
    دي بتوسع السكه للي بعدها
    وسيبك من تناقص المنفعه الحديه خلاص حفظناه وجيبنا فيه 22,5 زي الفل
    بس عن نفسي لو عطشان
    يا اشرب لغيت ما اشبع يا ما اشربش خالص

    \\
    مع ان سبحان الله هى فيها نفس محتوى الكوباية الاولانية
    \\
    هههههههه
    شوف سبحان الله


    حته تانيه اتكلمت فيها
    بص ريح دماغك
    كل واحد فيه دماغه اللي مريحاه
    منهم اللي بيحب المشاكل ومنهم اللي بيكرهها وده عاجبه حاله وراضي بيه والتاني كذلك
    اهم حاجه انك مادام كده يبقي اشرب
    ولازم تتقبل اللي قدامك as it is
    زي ماهو كده ... بعيوبه بسلطاته ببتنجاناته بين قوسين بابا غنوجه
    مش عاجبك حاجه فيه اقلب وشوف غيره من اولها خصوصا لو كان مصمم علي كده
    متوجعش دماغك معاه
    لانك بكده انت اللي خالق للمشاكل لانك قبلت وضع وعارف انه مش هيريحك

    وريح دماغ اهلك بقي واتكلم في حاجه عدله الواحد يعرف يتكلم فيها

    ماهو لو كل واحد لم نفسه واحترم نفس اهله مفيش مشاكل ولا حاجه
    ومفيش دخان من غير نار










    الا الدخان الالكتروني
    سلامي
    sony2000 said...
    هههههههههههههههههههههههههههههه
    طب تصدق فعلا صح
    بس دي بتبقي طيبعه مكتسبه اوييييي من حجات بتحصل حولينا
    يلا..ربنا يهدي:)
    غير معرف said...
    نفففففففففففض

    الناس دى حلها التنفيض والله
    !! a7mad sala7 !! said...
    ٍسلطان

    لا انت كده بتتفلفسف
    ساندوتش ايه اللى بيفكرك
    انت لو مش فاكر الاكل مش هتروح تشتريه اصلا




    وهريح دماغى حاضر :D
    !! a7mad sala7 !! said...
    سونى

    :D
    طب والعمل يا سونى


    ايوة صح
    العمل عمل ربنا :D
    !! a7mad sala7 !! said...
    الغير


    اوك
    غير معرف said...
    انت لو مش فاكر الاكل مش هتروح تشتريه اصلا


    هههههههه
    يعني اقتنعت
    !! a7mad sala7 !! said...
    لا مش اقتنعت بالفلسفة دى


    بس اقتنعت بالنتيجة
    Lady E said...
    تصدق كويس ان انا مخدتش اقتصاد :) أصل انا بلا فخر كنت علمي :)

    مفيش حد في الدنيا معندوش مشاكل حتى البيبيهات لكن المشكلة انك تدور على مشكلة علشان تحس انك ضحية !
    ساعات المشاكل بتبقى تحديات الانسان لما بيواجهها وبيتغلب عليها بيحس بالنجاح وبشعور جميل اوي فلو كانت الدنيا بيس ونجاح على طول هتحس بقيمتهم ازاي

    عندك في الدنيا سكر وملح ونور وظلام وصبح وبالليل كل ده تضاد بيوضح المعنى بتحب السكر لأنك جربت الملح ده نفس موضوع المشاكل

    فكرتني بمقولة في رواية غادة الكاميليا ارمان حبيب غادة الكاميليا كان بيقول أليس لمطامع الانسان من حد ام هو كلما بلغ مطلبه جد في مطمع أخر
    MOROOOO said...
    ما هو زى ما انت بتقول فى ناس هدفها فى الحياة تقول شكل للبيع لاى حد على اى حاجة فى اى حتة
    والحل الامثل ليهم فعلا انك تعملهم اجنور :D
    !! a7mad sala7 !! said...
    ليدي

    انا كنت علمى بردو على فكرة :d
    بس كان الاقتصاد المادة الادبية بتاعتى


    ومعنى كده اننا ندور على مشكلة عشان نحس بحلاوة الحياة :D

    طب انا ممكن ادور من غير مشكلة
    بس هجرب واقولك :D
    !! a7mad sala7 !! said...
    مورووو


    تفتكرى انها توصل للاجنور :-?
    اقصوصه said...
    {مضان كريم

    وكل عام وانتم بخير :)
    !! a7mad sala7 !! said...
    الله اكرم

    كل سنة وانتى طيبة :)

Post a Comment



رسالة أحدث رسالة أقدم الصفحة الرئيسية

Blogger Template by Blogcrowds