ايوة بغير



وبقول لها .. ايوة بغير
ايوة بغير .. لا انا نقصان ولا ضعفان .. ولا مسطول ولا سكران .. ولا زايغ من عيني الضي
ولا حد احسن منى فى شي
بس بغير

واللى قالولك غيرة الراجل قلة ثقة أو قلة فهم .. خلق حمير
غيرة الراجل نار فى مراجل
نار بتموت .. مبتحرقش
واحنا صعايدة مبنستحملش
شمسنا حامية وعرقنا حامى وطبعنا حامى
واللى تخلى صعيدي يحبها .. يبقي يا غلبها

اصلنا ناس على أد الطيبة .. كلنا هيبة
والنسوان فى بلادنا جواهر
طب لو عندك حتت ماس .. هتخليها مداس للناس؟؟
ولا هتقفلى اوضة عليها بمية ترباس
يمكن حتى تأجرى ليها جوزين حراس
يبقي انا لا غافل ولا جاهل
كل الفرق اللى ما بيني وبينك انى صعيدى

لو كان بايدي كنت اعملك هندى بريك
واقلب شعرى كانيش كراويك
والبسلك سلسلة متدلدلة خرزة وقلب
بس ازاى البسلك سلسلة .. هو انا كلب؟؟

ثم العبرة مهيش باللبس
اصل المشكلة مش فى اللبس
اصل المشكلة عَندك عِندك (عنادك)
قولت هسيبها وبكرة تحس
بعده تحس
بعده تحس
دانا لو جبس .. كنت زعقت

ماشي صداقة وماشي زمالة
بس مجاتش على الرجالة
مهى نسوان الدنيا كتير
وانا مبقولش تخاصمى الناس
ولا تتحجبي عن الرجالة
ولا تعتكفي وتسكنى دير
بس يا ريت حبة تقدير
انى بحبك وانى بريدك .. وانى زرعت حياتى بايدك
وانى غزلت بنات الدنيا عقود على جيدك
وانى تعبت من التفكير
وانى بغير..
هشام الجخ

7 Comments:

  1. !! a7mad sala7 !! said...
    طبعا الصعايدة اللى يقصدهم دول صعايدة الطبع
    مش الصعايدة بتوع دلوقتى

    الصعايدة بتوع دلوقتى بقو اسبور خالص :D
    OlivE said...
    ولو سمعتها بصوته
    جامده جدا

    بصراحه عجبانى :)
    halaS demahoM said...
    \\
    هشام الجخ
    \\
    بتشتغلنا
    هو في حد اسمه ( الجخ )
    ويسمي ابنه هشام
    ناقص تقولي ان الجخ ده مراته اسمها رشا
    أنشودة said...
    ده الى كان كاتب 3 خرفان تقريبا
    كانت جامده جدا
    ودى بردو حلوة
    !! a7mad sala7 !! said...
    اوليف

    اه سمعتها
    هى وكام واحدة كده

    طبعا جميلة


    وكويس انها عجبت سيادتك يعنى
    وقولتيلنا الصراحة :P
    !! a7mad sala7 !! said...
    راجل الكيف


    هههههههههههههههههههههه

    روح شوفه ع اليوتيوب يابو لماضة
    !! a7mad sala7 !! said...
    انشودة

    مش عارف موضوع الخرفان ده :D

    بس هو كاتب حاجات جميلة

    عودا حميدا يا انشودة :)

Post a Comment



رسالة أحدث رسالة أقدم الصفحة الرئيسية

Blogger Template by Blogcrowds