خلينا اخوات احسن


هى حبته واخلصتله وعلقت امالها عليه
رسمت الحياة الوردية اللى بتتمناها اى بنت
وبنت احلامها الجميلة اللى هتبدا من البيت اللى هيجمعهم ايا كان شكله زى بنات كتير
وخلاص بقي هو دا الانسان اللى شكلت مخيلتها عليه

هو حب بردو .. حب احساس الحب .. محبهاش هى
حب جو الارتباط والتحكم والسيطرة
حب نظرة الناس ليهم وكل واحد يكلمه فى الموضوع ده يعمله كده:
;) .. ايواا يا عاااام .. ;) .. الله يسهلك .. ;) لا عرفت تنقي .. ;) لا ذوقك طلع حلو اهو
حب منظر شعلقة البنت فى ايده .. حب تعلق البنت بيه .. حب صوت عياطها .. شكل دموعها وهى بتتحايل عليه
حب منظر كتر الرسايل .. وكتر الميسدات اللى بتملا موبايله مع كل مشكلة بتحصل بينهم

بدت علاقتهم فى الاول ناجحه .. لايقين على بعض .. مرتاحين نفسيا
معناوياتهم بترتفع .. كل ما هو صحابه يغمزوله بنظرات الغبطة (التمنى بالحصول على نفس الشيئ او شبيهه .. مع عدم تمنى زواله من صاحبه)
وكل ما صحباتها تفكرها بيه وبمواقف الجنتله بتاعته .. وبالفرق بينها وبين اللى مش مرتبطة زيها

وفى عز الانسجام .. راح الانسجام .. واتاريني !!

هو بدأ يحس ان العلاقة مش متكافئة
كان متسرع شوية فى اختياره
فى صعوبات فى اتمام ارتباطهم الرسمي
احساسه بالفشل وقلة الحيلة واستحاله الوصول للغرض المطلوب
.
أو
.
اكتشافه ان الظروف اقوى منه ومنها وان مفيش حاجة بارادته ممكن يعملها .. أو
ظهور فى حياته البنت اللى شايفها اكفأ من اللى معاه .. أو
ظهور فى حياته البنت اللى بتشاغله باستمرار .. أو
احساس بالفتور والملل فى العلاقة .. أو
احتياجه للتغير من باب التغيير .. أو
ظهور بعض المشاكل التى تحول دون استمرارهم نظير تقديمه لشوية تنازلات عشان الكفة تمشي .. أو .. أو ...
(( سواء كان السبب بأيده .. او حاجة خارجه عن ارادته ))

قرر انه يواجهها بالقرار اللى خده .. بداعى خوفه عليها .. وانه عايز مصلحتها
ويقولها:
احنا مننفعش لبعض .. احنا ملناش نصيب فى بعض .. الظروف اقوى مننا .. احنا معرفناش نقدر علاقتنا صح من الاول
(( او اى جملة من الجمل اللى بتوازى دى فى المغزى ))
ويقوم يقولها:

>> خلينا اخوات احسن <<

متتصوروش اد ايه الجملة دى بتنرفزنى
والانيل لما يقولها خلينا صحاب .. دى قمة العصبية بالنسبالى
مش عصبيه عشان اللى فى الموقف مثلا .. لا لمدى انحطاط الاحساس فى الجملة دى

هو مثلا متصور انه ممكن يشكل العلاقة فى وسطها كده على مزاجه
ولو هو قدر فدا اكيد لانه محبهاش .. لا هو حب الوضع اللى كانو فيه ده .. جربه شوية .. واكتفي بكده
وعايز يحط صورة للشكل الجديد لعلاقتهم .. اللى من خلالها متظهرلوش شوية عقبات كده تمنعه فى خوض علاقة تانية زيها

مستحيل حد يقدر يكون اخ لبنت بعد ما حبها والعكس صحيح .. مستحيل بنت تقدر تكون اخت لولد بعد ما حبته
ومحدش يقولى طب صحاب ؟؟ .. لان الكلمة دى ملهاش وجود فى قاموس العلاقات بين ولد وبنت
طيب لو افترضنا ان هو قدر يبقي كده .. لان هو محبهاش .. او حتى مقدرش بس قدر يوهم نفسه بكده
ودا لانه محتاجها كـ ودن عشان تسمع لفضفضته .. كـ وسيلة مساعدة عشان هى اللى كانت فاهماه وبتعرف تريحه
او حتى محتاجها بأى صفة عشان بس صعبان عليه العشرة اللى كانت بينهم

هل هى هتقدر تتأقلم على الوضع الجديد ده
وحتى لو كانت بسبب ظروف خارجه عن ارادتهم ؟؟
طبعا لا الانسان اللى يحب حد لا يمكن فى اى وقت تانى يعتبره اخوه .. ولو اعتبره كده فدا وهم بيعيش نفسه فيه
والاحساس الاقسي بقي وقت ارتباط الانسان ده بواحدة تانية
دى قمة الاحساس بالجرح لما تشوف انسانة تانية فى نفس مكانها .. وتتكرر ادامها نفس التفاصيل اللى كانت بتحصل معاها
طول مهو فى حياتها هتتجرح مية جرح وجرح كل ما تشوفه او تشوف متعلقاته
لا ومش بس كده .. حبها ليه هيقلب بكره

هو اللى بيحب ممكن يكره ؟؟
اه ممكن يكره .. دا اكتر واحد ممكن يكره
لانه جرب احساس الحب وعرف شكله .. عكس اللى مجربوش ومعرفش يعنى ايه حب
بالتالى ميعرفش يعنى ايه كره

زى ما هو قرر يصارحها .. هى كمان قررت ترد عليه
قالتله لو كنت فعلا بتقدرنى .. ويهمك مصلحتى وخايف عليا
يبقي احسن حاجة لينا اننا نبعد عن بعض تماما
انا هتجرح شوية فى الاول .. بس بعد كده لو افتكرتك اقل حاجة هحترمك
اقل حاجة هفتكرلك ذكرى حلوة كانت بينا .. احسن ما حياتنا تطول مع بعض وتتملى بالذكريات الوحشة
واتعذب فى وجودك بعد ما كنت مصدر راحتى وامانى
الوحش هيغطى ع الحلو .. وهنكره بعض .. وكمان انا هتعب وهعيش فى هم

انت هتقدر تكمل حياتك على كده لانك مش معنى فى الموضوع
لانك مش حاسس باللى انا فيه .. ولا عمرك هتحس بيه .. لانك ما حسيتش من الاول
لو حسيته مكنتش قدرت تقولى خلينا اخوات

قالها هيهون عليكي تبعدى عنى ؟؟
قالتله هيهون عليا بعادك احسن ما تهون عليا نفسي
هحترمك فى بعدك احسن ماكرهك فى وجودك
هنساك وانت صفحة كويسة فى حياتى .. احسن مانساك وانا بحرق صفحتك واكره اليوم اللى عرفتك فيه
...

8 Comments:

  1. غير معرف said...
    أبدعت فأصبت

    :(

    الكلام حلو اوووووى
    لانه بيوجع اوى اوى اوى

    وكأنك بترسم قصه سمعتها او شوفتها

    للامام دائما
    MOROOOO said...
    والحدوتة خلصت :(

    متألق كالعادة
    :( said...
    يااااااااااه
    صعب اوى
    ليه بس الناس توصل بعضها للمرحلة دى
    بجد حرام
    وحرام عليك انت كمان وجعت قولبنا :(
    سلطان الاسيوطي said...
    ايه ياد مالك؟
    هو انا طولت برع مصر اوي كده
    الدنيا اتقلب حالها كده ليه

    انا سامع صوتك وانت بتتكلم...

    الله يحرقك يا بعيد
    !! a7mad sala7 !! said...
    الغير معروف

    ميرسي جدا اوى خالص

    ومش موضوع تجربة
    القصة دى بتحصل كتير اووووووى
    وبتحرق دمى بصراحة :D
    !! a7mad sala7 !! said...
    مورو

    توتا توتا
    خلصت الحدوتة

    منورة ك العادة :)
    !! a7mad sala7 !! said...
    :(

    معلش بقي ادى حال الدنيا
    واااااااالله بنحب فى ثانية :D
    !! a7mad sala7 !! said...
    سلطااااااااعااااااان


    حاجة تنرفز يا اسيوطى

Post a Comment



رسالة أحدث رسالة أقدم الصفحة الرئيسية

Blogger Template by Blogcrowds