(عن) اسيوط احدثكم



عدنا بحمد لله

الزمان: من 10 ل 14-4-2010
الحدث: ملتقي كليات الحاسبات ونظم المعلومات
المكان: اسيوط

الملتقي السنادى كان مقره اسيوط
كان بيضم حاسبات من 6 جامعات
القاهرة واسيوط والمنصورة وقناة السويس والمنوفية والزقازيق

اعتقد ودا رأيي الشخصي
انه ليس فى الامكان افضل مما كان

جامعة اسيوط انسب جامعة ممكن يتعمل فيها ملتقي زى ده
جامعة راقية جدا
مدينة سكنية للطلبة لا بأس بيها
وجنب الجامعة بالظبط
خدمات لا يعلى عليها باستثناء حاجات بسيطة
اهل اسيوط ناس قمة فى الذوق والكرم والاخلاق
القائمين على الملتقي ناس قمة فى التفاهم والضمير

اكيد الاماكانيات ساعدت بشكل كبير
جامعة اسيوط يقال انها منشأة حديثا
مكانها لا يعلى عليه بصراحة
فى وسط المدينة وفى حى راقي جدا
الجامعة نفسها نضيفة جدا .. مفيش ورقة ع الارض
الجامعة مليانة ورد وشجر
اينعم الجو حر هناك بس دا بالنسبة للصعيد عامة كويس جدا
يمكن الموقع الجغرافي هو العيب الوحيد فى الملتقي ده
محافظة اسيوط بعيدة جدا عن معظم حاسبات مصر

لو تعمقنا فى امكانيات الجامعة شوية
هتلاقي ان فى حمام سباحة خاص بالجامعة
موجود 2 صالة مغطاه خاصين بالجامعة
نادى مجهز خاص بالجامعة موجود فيه معظم الملاعب اللى ممكن تحتاجها
السكن الطلابي مزود ب جيم ومركز كمبيوتر وانترنت

لو تعمقنا فى امكانيات الكلية شوية
هتلاقي ان المدرج يحتوى على 6 تكييفات وفيديو كونفيرانس
المدرجات نفسها شكلها يفتح النفس
المعامل مزودة بنت بعضها لان وبعضها واير ليس
طبعا الكلام ده مش موجود هنا خالص
فعشان كده تحس نبرة الحرمان اللى بتكلم بيها

لو اتكلمنا عن البروجرام اللى كانو محضرينه لا يقل عن جيد جدا
استقبال ولا اروع
اقامة كويسة جدا
الاكل كان جيد الى حد ما
المعاملة ممتازة بصراحة غير اللى بسمعه بيحصل هنا خالص

حفل استقبال اول يوم الصبح
طابور العرض دا اللى ضايقنى شوية
مكانش ليه لزمة غير ان الجو كان حر الصبح
حفلة فنية كانت تانى يوم .. فرقة من معهد موسيقي تقريبا كانت كويسة اوى
الجولة النيلية+الغدا تالت يوم
حمام السباحة رابع يوم
والجولة الحره اللى عملناها احنا .. اتفرجنا على البلد نفسها
مخبيش عليكو كنت متوقع ناس بجلابيات وعمم وحاجات زى كده
صعايدة يعنى
طلعنا احنا اللى صعايدة :D

بصراحة اسيوط طلعت اجمل كتير مما كنت اتوقع
البلد تقريبا ال 3/4 مسيحيين
يعنى نادرا لما تلاقي ست محجبة وانت ماشي
البلد نفسها متظبطة جدا من حيث النضافة والكبارى والنافورات والمحلات والشوارع والذى منه

اهل اسيوط نفسهم جدعان جدا بصراحة
يمكن استغربت شوية من ان نادر لما تلاقي حد بيهزر
لما تكلم اى حد هناك غالبا تلاقيه مشدود كده وبيكلمك بجدية زيادة .. صعايدة بقي :D
مش عيب فيهم .. بس يمكن هنا الناس اخف شوية فى الحتة دى
الاسعار هناك اخف شوية من هنا فى حاجات كتير
غير ان حتت الاستغلال هناك اقل شوية من هنا

فكرة التار والعار والكلام القديم ده ماعتقدش ان بقاله اثر دلوقتى
على الاقل فى اسيوط المركز الام .. المدينة نفسها
بس يمكن امن الدولة هناك شادد حيله شوية .. عشان مشاكل المسلمين والمسيحيين والحاجات دى

اجمل ما فى الملتقي الفكرة
اننا اتقابلنا بناس من نفس مستوانا فى التعليم
اينعم كان فى فرق فى القدرات والامكانيات
بس اكيد استفدنا كتير
الاحتكاك علمنا حاجات كتير اوى .. وورانا حاجات مكناش شايفينها

يمكن وفد المنصورة عكر صفو الملتقي شوية
حصل منهم حبة حاجات كده مش كويسة
الناس جايين بطبلة وكل شوية تلاقي غنا ورقص
حتى فى الجولة النيلية كنت حاسس انها حنة فرح
الدي جي شغال شعبي وهما قايمين بالواجب تمام
طبعا دا ادى فرصة للناس تقول عليهم كلام كتير مش كويس .. مش عايز اقوله
حتى فى المسابقات حصل اكتر من حركة مش كويسة .. جايبين شغل جاهز من ع النت .. وحصل مشاكل بسبب الحتة دى
حتى فى دورة الكورة كان بيحصل تصرفات بردو مش كويسة :D
مش عاوز افسر .. بس دا كان رأى معظم الناس فى الملتقي

وفد المنوفية ناس جدعان اوى وعشريين
وفد الزقازيق شباب طيبين جدا ومحترمين
وفد القاهرة ماحتكيناش بيه كتير .. بس مصدرش منهم اى مشاكل

بعيد عن الدراسة خالص
كانت فرصة حلوة اننا نتقابل بصحابنا وزمايلنا اللى مبيتجمعوش مع بعض خالص
اللمة كانت حلوة جدا بصراحة .. وحسينا انه جو رحلة اكتر منه جو مسابقات
اكيد ال5 ايام دول مش هيتنسو
وعلى رأى واحد صاحبي .. يمكن دى الحاجة الوحيدة اللى ممكن افتكرها من ايام الكلية بعد كده :D

عاوز اشكر علاء .. طالب تالتة حاسبات اسيوط
كان مشرف علينا ومتابعنا طول فترة الملتقي
بصراحة الراجل تعب معانا اوى .. ومكانش بيفارقنا لحظة
زى متقول كده كان مقطوعلنا
من غيره كنا هنتعب كتير اوى على ما نتأقلم ع الجو العام .. وعلى المكان هناك
احنا كنا فى امس الحاجة ليه .. وهو قام بالواجب وزيادة 3 حبات

الملتقي ادانا انطباع ممتاز عن اسيوط .. وعن جامعة اسيوط .. واهل اسيوط

وانا شخصيا اتمنى اروح هناك تانى
:)

13 Comments:

  1. sadness princess said...
    أيه يا أحمد
    مهو الأمكانيات متفرقش كتير عن هنا
    تقريباً كله موجود إلا ان المدرجات وحشه ومفيش تكيفات ولا نت ولا حمام سباحه ولا جيم ونت فالمدينه والاجهزه بايظه والمكان مليان زباله وورق الشجر فكل حته
    ومافيش حته نعد فيها وبيتردونا من المعامل لما بيكون عندنا مشروع بنشتغل فيه من غير معيد
    مش حاجات كتير يعنى :D

    الحمد لله أنها كانت حلوه وأهو تغيير جو قبل الميد ترم :D
    غير معرف said...
    بصراحه انت شخص ممتاز وان شاء الله هيكون لك مستقبل فوق الممتاز لاحترامك لذاتك واخترامك لغيرك وتقديرك لنفسك ولغيرك وديه حاجه ممتازه جدا فى اى انسان
    فعلا جامعةاسيوط عموما من انظف الجامعات بالرغم ان الناس كلهم بينظروا ليهم بنظره قليله بس احب اقولك هوه ده اللى خلاهم احسن منا وده طبعا ميزه كبيره فيهم انهم بيبصوا للوحش ويحسنوا منه
    sony2000 said...
    اهم حاجه بجد انك عملت حاجه حسيت بيها انك فخور بنفسك
    وانك اتبسطت مع ناس انت حابب تكون وسطهم
    يارب تكون بخير وفسعاده يدمن
    اللهم امين:)
    morgana said...
    حمد لله علي سلامتكو
    وبنقر طبعا ع الناس اللي راحت
    بس جبتو ايه من أسيوط وشاركتو في ايه وكده؟
    a7mad sala7 said...
    سادنيس رنسيس

    اه فعلا كله موجود الا الحاجات البسيطة دى


    حاجات بسيطة جدا متفرش يعنى
    احنا اللى محسوكين

    حلوة محسوكين دى ؟ :D

    اهم حاجة فعلا اننا غيرنا جو

    كل اسيوط واحنا طيبين :)
    a7mad sala7 said...
    الغير معروف

    ربنا يخليك
    دا بس من ذوقك

    انا بس قولت اللى شوفته هناك من غير اى تحيز لينا او ليهم
    بس بجد الناس دى تعبت على ما بقت كده

    على الله نوصل لكده
    او حتى نتحط ع اخريطة بس ونبدا المشوار

    عقبال كده ما اشوف اولادى واولادك :D
    a7mad sala7 said...
    سونى

    الحمد لله استفدنا كتير
    وشوفنا حاجات مكناش نعرف عنها حاجة

    وبردو تجديد


    :)
    a7mad sala7 said...
    مورجانه

    الله يسلمك

    وقرى براحتك بقي
    احنا جينا خلاص :P

    الملتقي كان مسابقات علمية وثقافية ورياضية


    وبلاش اتكلم عن النتايج
    عشان لو اتكلمت هخش على حاجات تانية
    وهنخبط فى سياسة الكلية :D

    خلينا نعدى الشهرين اللى فاضلين دول على خير

    بس كان فى كئوس كده للفايزين يعنى
    ومفيش حد ماخدش جوايز

    غير شهادة تقدير كده للكل

    لمزيد من التفاصيل
    اتصل على 099999999

    مش هينفعش ارغى هنا اكتر من كده
    الناس بتقول عليا رغاى :(
    e_emy said...
    هههههههههههههههههههههه

    انا مش من المنصورة D:


    حمد الله ع السلامة (:
    !! a7mad sala7 !! said...
    هههههههههههههههههههههههههههه

    وحتى لو منها
    اكيد زى ما فى كده
    فى ناس مش كده :)


    والله يسلمك يا سيدي :) :)
    غير معرف said...
    الدقهليه موجوده مرتين على الخريطه
    نحن نختلف عن الاخرون :D
    !! a7mad sala7 !! said...
    هههههههههههههههههههههههه

    يا فرحتى
    taitos7 said...
    انا كنت موجود فى الملتقي "جامعة المنصورة " احنا مش وحشين زي ما انت متخيل ولا جايين نهيص وخلاص ... ساعة الشغل شغل وساعة اللعب لعب

    بالنسبة للدف اللي احنا جايبنه ده بتاع جوالة الكلية
    الدجي اشتغل شعبي ومحدش جه قال غير الاغاني

    واحنا مجبناش شغل من على النت فى مسابقة الويب كل حاجة مكتوبة بنفسنا

    فى النهاية احنا مش فشلة او صايعين زي ما انت متخيل .....

Post a Comment



رسالة أحدث رسالة أقدم الصفحة الرئيسية

Blogger Template by Blogcrowds