مجـدى_5

عادل: يالا يا باشا خدتلك منهم معاد
مجدى: معاد ايه
عادل: عشان نروح نقابلهم
مجدى: نقابل مين
عادل: نقابل علا وامها يا عم
مجدى: علا مين .. هما فى الدور الكام
النمرة غلط يا عااادل !!!
عادل: ههههههههههههههههه .. لذيذ لذيذ يعنى .. طب انا هتصل اقولهم هو اعتذر .. ومحصلش نصيب بقي
مجدى: ههههههه .. استنى يا عم انت .. الواحد ميهزرش معاك ابدا .. انت خلقك ضاق ليه كده
عادل: لا انا اللى تخنت .. خلقي زى ما هو
مجدى: عاااااااهاهاا .. طب مانت حلو اهو وبتهزر
عادل: اه طبعا .. بس الواحد مستنى الفرصة :D
المهم يا سيدي .. حضر نفسك الخميس الجاى .. هنروحلهم البيت
مجدى: طيب يا سيدي .. ربنا يسهل
.
.

ام علا بتنادى

يا علا .. يا علا
علا: ثوانى يا ماما معايا تليفون
.
علا: طب واخرتها يا محمود .. انت بقالك كام سنة متخرج دلوقتى
ومش عايز تتحرك ولا تتعب نفسك فى التدوير على شغل
محمود: ومين قالك انى مبدورش .. انا كل ما بنزل بدور على شغل
علا: كل ما بتنزل .. يعنى انت بتدور على شغل عشان نزلت
مش بتنزل من بيتكو عشان تدور على شغل
محمود: مالك يا بنتى مستعجلة اوى كده ليه .. مانتى لسه بيبي اهو .. مستعجلة ع الجواز اوى
علا: يا محمود انت مستهتر اوى .. معتمد على ابوك ومش عايز تشيل مسئولية
محمود: يا لولو انا بحبك .. ومش ممكن هفرط فيكي .. بس كله بأوانه
علا: مانا كمان بتهبب على عيني وبحبك .. هو لو مش بحبك كنت هفضل فوق دماغك كده
محمود: وتفضلى فوق دماغى ليه يا حبيبتي .. مهو ربنا موسعها علينا اهو .. انزلى انزلى يا شيخة
علا: خليك افضل هزر كده .. خلى بالك انا جايلي عريس بكرة
محمود: واااااااو .. عريس .. ودا العريس الكام .. يالا اسطوانة كل مرة
علا: انا مش عارفه ايه اللا مبالاه اللى انت فيها دى .. يا محمود انا تعبت
محمود: انتى اللى عاوزة تتعبي نفسك .. الموضوع سهل وبسيط وغير معقد ولا يحتاج لاى ارهاق زهنى
علا: يا محمود ابوس ايدك خليك جد شوية .. انا مش عارفه هعمل ايه بكرة
محمود: هتعملى ايه يعنى .. هتعمليلهم حاجة يشربوها
وبعدين هتقعدى .. وانتى قاعدة اعملى كده .. اوعى تعمليلهم كده .. شايفانى
علا: :| .. محمود انت كده بتضيعنى من ايدك
محمود: واضيعك ليه .. انتى اللى بتضيعي نفسك
عريس وجايلك .. زى اى عريس .. لا .. وشكرا على كده .. هو فيلم
علا: بالبساطة دى .. صحيح مانت اتعودت على انى اتصرف فى كل حاجة .. وحضرتك باشا
محمود: طول عمرى يا بنتى
علا: يعنى ايه يا محمود .. انت مش هتاخد اى خطوة فى موضوعنا كده
محمود: خطوة واحدة؟؟ .. يا سلام دانا امشيلك كيلو على رجليا .. استنى بس البس كوتشي
علا: محمود .. انا مش هقدر ارفض .. انا خلاص مبقيتش عارفه اتصرف ازاى مع امى
محمود: يعنى ايه .. العريس الجديد متريش ولا ايه
علا: شوف انت بتكلمنى ازاى يا محمود .. انا بقيت احس ان انت مبتحبنيش
محمود: انتى اللى متسربعة مش عارف على ايه .. لو عاوزانى هتستنيني عمرك كله
علا: انا استناك عمرى كله بس لما احس ان انت عاوزنى
محمود: ومين قال انى مش عاوزك
علا: اهو افعالك بتقول كده يا محمود .. انت مخدتش خطوة واحدة تقول ان انت عاوزنى
محمود: عاوزانى اعمل ايه يعنى .. اقفلك تحت الشباك واحدف طوب .. ولا اطلعلك ع الشجرة واغنى
علا: :(
محمود: بطلى دلع .. نفسي مرة نتكلم من غير ما نجيب سيرة الموضوع ده
علا: حاضر يا محمود .. انا مش هجيب سيرة الموضوع ده تانى .. فعلا انا اللى غلطانة
انا رخصت نفسي اوى كده .. مش هدوشك تانى يا محمود .. ومش هتشوف خلقتى تانى
محمود: يالا يا بت .. اجرى من هنا
.
.
النهارده الخميس

عادل: سلاااام عليكم
ام علا: وعليكم السلام .. اتفضلو
عادل: ازيك يا حاجة .. ازى صحتك
ام علا: ازيز يا حبيبي .. الحمد لله .. نحمده ونشكر فضله
ازيك يا مجدى .. عامل ايه فى شغلك يا حبيبي
مجدى: الله يسلمك يا حاجة .. الحمد لله ماشي الحال
ام علا: يستاهل الحمد ..

ترنن
سلام عليكم جميعا
ام علا: وعليكم السلام .. تعالى يا كامل
كامل اخويا .. خال علا
مجدى: اهلا وسهلا .. ازيك يا عمى
كامل: اهلا بيك .. منورين يا شباب
ام علا: عن اذنكو ..
.
.
ام علا: يا علا.. يا علا
ايه يا بنتى مالك .. ايه ده انتى بتعيطي .. مالك يا حبيبتي
علا: مفيش يا ماما
ام علا: مالك يا بنتى بس .. حد يعيط فى يوم زى ده .. فى ايه
علا: مفيش حاجة
ام علا: يا بنتى صارحيني انا امك .. مش موافقه ع العريس؟
علا: لا موافقة
ام علا: يا بنتى قوليلي .. دا جواز .. مش مستريحاله؟
علا: لا موافقة .. موافقة
ام علا: امال بتعيطي ليه بس
علا: مفيش حاجة .. خلاص اهو
ام علا: خلاص ازاى بس .. مش هسيبك الا لما افهم
علا: مفيش حاجة يا ماما .. اناا بس .. مش متخيله هسيبك ازاى
ام علا: يا حبيبتي .. دانا يوم المنى لما اشوفك عروسة مع عريسك
ولما تجيبيلي عيل صغير كده اربيه على ايدي
علا: :)
ام علا: يالا يا حبيبتي .. قومى كده اغسلي وشك واجهزى .. الناس مستنيين برا
علا: حاضر
ام علا: يالا يا حبيبتي .. عاوزه اشوف قمر برا :)
.
.

كامل: خلاص على بركة الله .. الخطوبة الشهر الجاى
ايه رايك يا علا؟
ام علا: اتكلمى يا علا
عادل: ايه يا جماعة السكوووووووت
كامل: ههههههههههه يبقي نقرا الفاتحة
مجدى: ولا الضااااالين .. امين
عادل: مبروك يا مجدى .. الف مبروك :)
.
.
مروة: مبروك يا لووولو
علا: الله يبارك فيكي
مروة: واتخطبنا اهو .. وبقينا عرايس ;)
علا: اظن انتى مبسوطة كده
مروة: هههههههه .. ال يعنى انتى مش مبسوطة
ايه حددتو معاد الفرح ولا لسه
علا: لسه يا مروة .. دا الخطوبة كانت اول امبارح .. احنا لحقنا
مروة: ااااه .. انتى عاوزه تتخطبي شوية بقي .. وخروجات وهدايا والجو ده ;)
علا: ههههههههههههههههه
مروة: ههههههههههههه .. ربنا يتمملك بخير يا حبيبتي
.
.
علا فى البيت

ام علا: يا علاااااا .. تليفونك بيرن
علا: طيب يا ماما هشوفه
.
.
mahmoud is calling..
!!!
يتبع..

13 Comments:

  1. أنشودة said...
    السلام عليكم ورحمةالله وبركاته
    كل ما اقرأ قصص من النوع ده
    بتعجب اوى ايه الى يخلى واحده تربط نفسها بحد وتفضل العلاقه مستمره ويوم ما تنتهى بتتسمى فى النهايه انها هى الى خانت ومش وفت بالعهد والكلام الفاضى ده وتلاقى
    نفسها فى دايره بتلف حواليها طيب ما ابقى حرة نفسى ومخليش حد يتحكم فيا والى كتبه ربنا هيكون من غير ما اعلق نفسى بحد اصلى شوفت من ده كتير للاسف
    واتينج الباقى ان شاء الله
    sony2000 said...
    يااااااااااااااااااعم انت بتقطع ليه
    كمل مره وااااااحده
    halaS demahoM said...
    استاذ ورئيس قسم يا ابو صلاح
    امض يا اشول
    ولو مبتعرفش
    مسموحلك تبصم ... عادي يعني

    أشول أشول
    مش اي كلام يعني

    الفكره جامده جدا جدا
    ومخيبه للتوقعات

    بس انت كده هتطول علينا

    \\
    عادل: ازيك يا حاجة .. ازى صحتك
    \\
    هو ده
    فينك من زمان ... ابقي فكرني اكلمك في الحته دي

    لالالالالالا
    احنا كده في منطقه غلط
    نشوف المكالمه الاول
    وبعد كده نحكم يا ابوصلاح

    ت ح ي ا ت ي
    e_emy said...
    هو ليه بتجيب البنت هى الى تتخطب وتسيبه

    ايه الانحياز ده(;

    انا اعترض D:

    بس عامة كل شىء نصيب (:

    وطبعا حلقة انهرده لذيذة (:
    !! a7mad sala7 !! said...
    انشوده

    وعليكم السلام

    انا بتفق معاكى لحد كبير

    بس محدش قال ان هى اللى خانت ولا باعت

    وبعدين دا مش اسمه تحكم بردو
    لو فى اتفاق وحاطين النقط على الحروف
    مش هيحصل مشاكل
    ومش هيبقي فى مجال للقيل والقال

    حلوة القيل والقال دى :D
    !! a7mad sala7 !! said...
    سونى

    مهو لاااااااازم كده
    الله

    امال اجيبهالكم كلها مرة واحدة ع الجاهز يعنى

    لازم فى ضريبة كده
    عشان اضمن انكو هتتابعو

    ولسه بقي الجاى كله تشويق
    وكل مرة هوقفها على حتة زى كده :D
    !! a7mad sala7 !! said...
    رجل الكهف

    حبيبي .. واحشنى والله
    وواحشانى رزالتك

    خليك كده اتصل ومتردش .. وشوية حركات من موبايلك العجيب ده
    بس مش هتصل بيك تانى لعلمك

    الاقل اهمية .. انت عايز فكرتى متعجبكش ولا ايه .. عيب عليك

    ولسه شوية لما نتعمق فى الاحداث
    هتلاقي دراما اجتماعية فظيعة :D

    انا راهنت ان القصة هتحلو وهيزيد الاقبال تانى
    واهو حصل

    وبالنسبة للجملة اللى انت محددها دى .. مش فاهم قصدك .. ومش بشوفك عشان نتكلم .. يا واطى
    !! a7mad sala7 !! said...
    ايمي


    لالالالالالالالالالالالا
    انتى فهمتيني غلط

    مين قال انى جايبها هى اللى بتتخطب وتسيبه
    هو اللى واطى ويستاهل ضرب الجزمة
    هو اللى سابها مش هى
    هو لو عايزها كان عمل حاجة عشانها

    انا مش متحامل عليها خالص على فكرة
    بالعكس بقي دا ...
    ولا خليها بعدين عشان منحرقش الاحداث :D

    اتوقع القصة هتعجبك اكتر شوية كده :)
    غير معرف said...
    هتتجوز مجدى وهتعيش معاه وهى لسه بتحب الشخص التانى ده وطبعا مش هتقدر تسعده وشكلها كده ناويه تاخد حبوب عشان متجيبش بيبى صغنون يعيش الماساه واحتمال تعترفله لما يكتشف موضوع الحبوب انها عمرها ماحبته وانها كانت بتحب واحد تانى
    ده اللى انا تخيلته وانا بقرا القصه
    ان شاء الله مش هتبقى حزينه اوى كده زى ما تخيلت اصل انا باتفرج على مسلسلات عربى كتير
    بجد قصه جميله اوى ومشوقه
    بس اكتبها بسرعه عشان انا تعبت من التخيل :D
    !! a7mad sala7 !! said...
    حلو اوى تخيلك
    تقريبا اقرب حاجة للفكر ةاللى فى دماغى


    بس انا مليش دعوة بالمسلسلات
    وغالبا نهاياتى بتبقي عكس المتوقع

    والقادم افضل ان شاء الله :)
    halaS demahoM said...
    \\
    رجل الكهف
    \\
    ياد كيف مان
    دي لقب لشخصيه في فيلم كده عجبتني قصته رغم ان الاحداث كلها دارت في الصاله بتاعت البطل
    انتاجه كان ببلاش يعني
    فكك انت ... بس مش رجل الكهف خااااالص

    \\
    خليك كده اتصل ومتردش .. وشوية حركات من موبايلك العجيب ده
    بس مش هتصل بيك تانى لعلمك
    \\
    هبسطهالك
    في وضع اسمه manner عامله زي صامت كده يعني لا بيصد ولا بيرد عشان لما نبقي في مكان يستحق منزعجش حد برناتنا
    ولان العده غريبة الاطوار اتضح انه بيكنسل في وش اللي بيتصل
    ومن الطرائف اللي طلعتها علي الوضع ده
    انه مش manner خالص ولا فيه ريحة الاخلاق لانه بيقفل في وش الناس
    فهمتي يا بطه ولا اقول كمان

    \\
    انت عايز فكرتى متعجبكش ولا ايه
    \\
    لالالا شكلك فهمتني غلط
    انا بحب القصص اللي البطل بيظهر اخر واحد للجمهور
    شفت انت سيد ابو حفيظه في فيلم
    انا بداخل الكشك
    والكشك مقفول طول الفيلم
    والفيلم خلص وسيد ابو حفيظه مخرجش منه
    بفكر اعملها قصه بس مفيش وقت ولا بفتكر اساسا

    عشان كده انت معلم
    اصبت الهدف من غير ما تقصد

    \\
    يا واطى
    \\
    سو وااااااات ايه المشكله يعني
    انا لو واطي هرد عليك
    بس انا مش في راسي بطحه ولا حاجه

    ابسط يا عم اديني برخم اهون
    ربنا ما يحرمك من رخامتي
    !! a7mad sala7 !! said...
    يا عم اسكت معناها كده
    انا مالى بالفيلم
    اللى هيقراها هيفهمها اهي يعنى
    هيروح يترجمها فى الفيلم

    خليك انت فى الكشك بتاعك
    لحد ما تخلل
    MOROOOO said...
    القصة فعلا بدأت تسخن شكلها هتولع كمان شويه :D
    يا مسهل وبعدين هنستنى كتير ولا ايه ؟

    :-w

Post a Comment



رسالة أحدث رسالة أقدم الصفحة الرئيسية

Blogger Template by Blogcrowds