مجـدى_2

الساعة 7 ..عادل بيتصل

عادل: الو .. ايه يابو الامجاد .. مش يالا
مجدى: يالا انت معدتش عليا ليه
عادل: ياخى خلى عندك دم هو مين اللى معاه العربية
متعدى عليا خليك جدع .. انا مكسل اجيلك
وبصراحة الواحد مش عايز يفرهد نفسه من اولها كده
مجدى: طيب انا جايلك اهو .. بس اجى الاقيك جاهز
عادل: لا انا جاهز اهو .. تعالى انت بس
مجدى: طيب سلام
عادل: سلام
.
.
تييييييييييت تيت تيت تيييييييييييييت
عادل: ايوااااااا نازلك اهو
مجدى: يابنى انت مش قولت جاهز .. يخرب بيتك يا شيخ
عادل: معلش يا بوب .. نازل اهو والله
.
.
عادل: يالا يا معلم هتودينا فين
مجدى: اى حتة ادينا ماشيين
عملت ايه فى شقتك
عادل: اهو شغال باديا وسنانى والله
فى التشطيبات الاخيرة
مجدى: جبت العفش ولا لسه
عادل: الاسبوع الجاى هننزل دمياط نجيبه على طول
تبقي تيجي معايا بقي
مجدى: اجى معاكو .. من قلبك دى
عادل: بصراحة لا :D
مجدى: طب مانا عارف
اهم حاجة تاخد الحاجة انت
عادل: انهى حاجة
مجدى: الحاجة ام العروسة طبعا
عادل: ههههه يا راجل وانا اخد حماتى ليه
مجدى: انت عبيط يابنى .. دى القوة العظمى اللى بتحرك كل حاجة
انت فكرك انتو اللى بتحركو الكلام ده
عادل: لا يا اخى .. انا ومروة متفقين على كل حاجة تقريبا
كل اللى باقيلنا كام مشوار كده وكل حاجة هتخلص ان شاء الله
مجدى: طيب كويس .. ابقي عدى عليا بيانتكو عشان اعملكو كارت دعوة حلو كده
عادل: بعتهم يا بوب من بدرى .. ودى حاجة تفوتنى بردو
بكرة هتلاقيهم على مكتبك الصبح
مجدى: ال ل ل ل .. لا دانت مبتنساش حاجة بقي
عادل: لو مكنتش افتكر دلوقتى .. امال افتكر امتى يعنى
مجدى: ماشي يا عم ربنا يتمم بخير
عادل: يا رب .. اركن هنا بقي ننزل نتعشي
مجدى: لا يا حلو .. امى فى البيت لوحدها هتعشي معاها
عادل: طب استنى اجيب عشايا انا يا عم .. يا رب توب علينا
.
.
عدى اسبوعين .. والنهارده فرح عادل

مجدى: يالا يا ماما الساعة بقت 9
يا دوب عشان منتأخرش ع الفرح
امه: يالا انا جهزت اهو .. يا رب اشوفك عريس زيه كده يابنى
مجدى: متستعجليش يا امى .. لسه بدرى .. ربنا يديكي الصحة وطولة العمر
امه: يابنى محدش ضامن عمره .. نفسي اشوف عيالك قبل ماموت
مجدى: بعد الشر متقوليش كده .. ان شاء الله هتشوفيهم وتربيهم على ايدك كمان
.
.
وصلو النادى اللى فيه الفرح

مجدى: الف مبروك يا بوب
عادل: ههههههههههه الله يبارك فيك يا حبي .. بتاعتى بوب دى يالا مش مشكلة
مجدى: ههههههههههه .. خلاص بقي بتاعتك ايام العذوبية .. انت راجل رب اسرة دلوقتى
عادل: ماشي يا سيدي .. عقبالك
.
.
عدى اسبوع

ام مجدى: مش هنروح نبارك لصاحبك يابنى
مجدى: ماحنا روحنا الفرح يا ماما .. هى شغلانة
امه: لا عيب يابنى .. لازم تباركله بردو فى بيته
مجدى: فكرك كده .. اعتقد انه مش عايز يشوف حد دلوقتى :D
امه: بطل يالا قلة ادب .. ويالا قوم فز دا صاحبك
مجدى: طيب يالا
.
.
مجدى: سلام عليكم
مش دا بيت عادل .. العريس
بنت ما: ايوا هو اتفضلو
مجدى: ايه دا يا ماما الواد غير العروسة ولا ايه !!

يتبع..

12 Comments:

  1. morgana said...
    ياااااااااااارب تكون العروسة اتغيرت
    أهو ع الاقل عشان الاسم:D

    /دى القوة العظمى اللى بتحرك كل حاجة/
    دايما ظالمين الحموات كده

    مستنيين يتبع..
    MOROOOO said...
    يااااااااااااااا مسهل

    يلا بقى بسرعه كمل الباقى

    اقولك حطهم كلهم فى بوست واحد :D

    نسيت

    مالها مروة بقى ؟
    !! a7mad sala7 !! said...
    مورجانة

    ههههههههههههه
    وماله الاسم
    مهو زى الفل اهو ;;)

    وبعدين مش انا اللى ظالم الحماوات والله
    دا مجدى :D
    !! a7mad sala7 !! said...
    مورو

    صبرااااااااا


    ومالها مروة
    دى ست البنات ;;)

    هما شوية ساسبينس بس :D
    أنشودة said...
    السلام عليكم ورحمة الله وبركاته
    جميله بداية القصه متابعين ان شاء الله

    الى فتحت الباب دى اكيد اكيد واحده تبع
    مروه او قريبة عادل :D
    والباقى بقى ........
    بلاش نفضل نتوقع زى كل مره :D
    ЯậŇ MỗŘỹ said...
    بنت ما؟؟؟
    طيب
    المهم ان اسمى بعيد مش زى مروه ههههههههه
    Unknown said...
    ايوة انا عارف ان كلامي عليها كتير

    عذرا يا ابوصلاح
    هرد بالاكونت بتاع صاحب الجهاز
    حاكم انا مصدع والنت عندي مصدع
    والشقه عندي مصدعه

    وكله مش بيس خالص
    لدرجة اني مقريتش المكتوب
    بس اكيد هقرا وارد عليك

    امضاء
    متصل من وقت قريب
    !! a7mad sala7 !! said...
    انشودة

    وعليكم السلام

    توقعاتك منطقية
    وانا احب كده بقي
    عاوز روح اللتشويق دى :D

    واحدة واحدة علينا بس كده
    عشان نطلعلكو حاجة حلوة :D
    !! a7mad sala7 !! said...
    روح

    لا اسمك بعيد متخافيش

    لو عايزاه قريب احنا فى الخدمة :D
    !! a7mad sala7 !! said...
    سلطان بزى العزازى

    بيتكو ايه اللى صدع يالا
    بيقع ولا ايه

    طيب مستنيك اما تقرا بقي وترد وتقولى اخرة الصداع ايه
    e_emy said...
    هههههههههه

    عسل جداااااااااااااا بجد

    (:
    !! a7mad sala7 !! said...
    دا من بعض ما عندكم والله :)

    وبعدين من الاول كده .. احنا لسه معملناش حاجة
    طب نكمل بقي نشوف رايك هيبقي ايه :)

Post a Comment



رسالة أحدث رسالة أقدم الصفحة الرئيسية

Blogger Template by Blogcrowds