يا اسماعلية .. يا اسماعلية



محافظة الاسماعيلية

على غرار البوست اللى قريته عند ستنا ستيتة
ومن زمان حتى وانا نفسي اكتب حاجة عن اسماعلية
الاسماعيلية مسقط الرأس ومكان المعيشة حاليا ومستقبلا ان شاء الله

الاسماعيلية مدينة مش قديمة النشأة .. مدينة من احدث المدن المصرية
عمرها لا يتعدى ال140 عام .. نشأت مع افتتاح قناة السويس سنة 1869
الاسماعيلية ككلمة نسبة للخديوي اسماعيل
طب حد هيقولى مهى بورسعيد نسبة للخديوي سعيد .. بس بورسعيد فيها مينا اللى هى بور فسموها بورسعيد
زيها بورتوفيق فى السويس وبورفؤاد البر التانى من بورسعيد

لكن اسماعلية بناءا على موقعها فى منتصف القناة مفيش فيها مينا تبقي الاسماعيلية

من الطبيعي ان اهل اسماعيلية يبقي مصدرهم الرئيسي هجرات
الناس اللى جت اسماعلية ايام حفر قناة السويس وفضلو فيها ومرجعوش بلدهم
ودول يعتبرو سكان البلد الاصليين
والناس اللى جت بعد حفر قناة السويس ولقو فيها مصدر رزق جديد القايم على بحيرة التمساح والقناة
والناس اللى جت بردو بعد نهاية الحرب واستوطنو فيها
معظم الناس دى كانو الشرقاوية .. تلاقي معظم اهل اسماعلية اصلهم شرقاوية وبالذات الزقازيق

يذكر ان الاسمعلاوية هاجرو ايام الحرب عشان مكانش ينفع يعيشو فى البلد وهى فى حالة حرب
كانت معظم الهجرات للقاهرة والدلتا والدن البعيدة عن الضرب

الناس اللى عاشت ايام الاستنزاف فى اسماعلية هما دول اللى حسو فعلا بمرارة الاحتلال
مش تقولى ناس كانت جنب بيوتها طول الفترة دى وقاعدين جنب الراديو يسمعو الاخبار

موقع اسماعلية جغرافيا اكيد كان اهم اسباب اختيار الناس لاسماعلية
موقع اسماعلية يعتبر استيراتيجي فى منطقتها .. تقريبا مفترق الطرق
فوق بورسعيد وتحت السويس .. يمينها سينا وشمالها القاهرة والدلتا
يعنى اى حد من اى مكان من دول مضطر يعدي عليها وهو مسافر لحتة تانية بردو من دول

اسماعلية مدينة ساحلية .. وفى نفس الوقت زراعية .. ودا صعب جدا تلاقيه فى اى محافظة فى مصر
مدينة ساحلية بتطل على قناة السويس وبحيرة التمساح والبحيرات المرة
مصايف وقرى سياحية وبلاجات فى اسماعلية وفايد .. صيد وملاحه وهيئة قناة السويس
فى نفس الوقت زراعة ومساحات خضرا .. واسماعلية مشهورة بالمانجه والفراولة وغيرها..

اسماعلية اكتر مدينة فى مصر مشهورة بالمساحات الخضرا والجناين
اسماعلية يعنى الكورة .. والكل يعرف مين هو الاسماعيلي
وكام لاعب فى المنتخب عدو ع الاسماعيلي او كان هو سبب شهرتهم

اسماعلية يعنى الهدوء والجمال .. طرقها وشوراعها وكرانيشها

اسماعلية كمساحة مش كبيرة .. وفى نفس الوقت مش زحمة
لان اهلها متوزعين فيها .. مش متكدسين فى منطقة واحدة

اسماعلية مدينة تاريخية
عرابي والتل الكبيرة .. والطابية المشهورة

النصب التزكارى
دا نصب لذكرى الحرب والجندى المجهول
ويشمل بانوراما لحرب اكتوبر

تبة الشجرة
دا موقع تبة الشجرة
اللى كان فيه معسكرات الاسرائيليين ايام الحرب
وادامه الساتر الترابي وخط بارليف اللى اتدمر
وهناك فى اثار من الحرب وادوات كان بيستخدمها الاسرائيلين والخنادق والاسلحة بتاعتهم وهكذا..

متحف الاسماعيلية


اسماعلية مركز جامعة قناة السويس

اسماعلية مركز هيئة قناة السويس .. مبنى الارشاد

اسماعلية ترعة محمد على .. اللى بتجيب ميا من النيل لاهلها ولبوسعيد والسويس وسينا

تستحق بكل بساطة لقب عروس القناة

اسماعلية يعنى كورنيش محمد على .. وكورنيش نمرة 6 .. وكورنيش البلاجات

اسماعلية يعنى اسماعلية يعنى جنانين الملاحة وجناين الغابة وكل شريط اخضر تلاقيه فى اى طريق تمشي فيه فى اسماعلية

اسماعلية ملتقي اللهجات من العرب (البدو) واللهجة البورسعيدي ولهجة الفلاحين ولهجة الصعايدة ولهجة السواحلية .. ولكن بلا لهجة
اسماعلية او كما يطلق عليها البعض _اسمعلللية بشد اللام_ ملهاش كلمات مميزة ممكن يقف عليها حد انها تمييز للاسماعلاوية

لو اتكلمنا عن صفات مميزة فى شعب اسماعلية هتلاقي الطيبة .. وخفة الدم
هتلاقي الدم الحامى .. المشاهر المتأججة (بتوصل احيانا للافورة)
ويمكن دى صفة فى السواحلية عامة زى ما قالت ستنا ستيتة
من الصفات اللى بتضايقنى فى الاسماعلاوية الاستغلال .. خصوصا للاغراب .. ودى بردو مش صفة فى الاسماعلاوية بس .. بقت صفة فى الدنيا كلها .. بس يمكن بتظهر هنا شوية لانها مدينة الى حد ما سياحية

اسماعلية يعنى المهرجان السنوى والكرنفالات الشعبية

اسماعلية يعنى السمسمية والفن المميز اللى مش موجود الا بس فيها وفى مدن قليلة

اسماعلية المحطة الجديدة وعرايشية العبيد للناس البسطا .. ودول اقدم منطقتين
الشيخ زايد وحى السلام للطبقة العادية .. ودول حديثي النشأة
الافرنج للطبقة العليا شوية وكان حى الاجانب زمان ودى اول منطقة سكنية كانت فى اسماعلية

فى المحطة الجديدة والعرايشية هتلاقي مجانين الاسماعيلي والناس اللى تحس معاها بطعم وريحة اسماعلية

الشيخ زايد ودا الحى اللى انشأه الشيخ زايد ال نهيان الاماراتى كهدية للمصريين بعد الحرب
وفيها كل العماير بنفس الشكل اللى هو الطوب الفرعونى ومساكن الحجر زى ما بيقولو
وزيها بالظبط منطقة الخمسة والكاكولا والاعلام والجمعيات والالف مسكن

حى السلام ودا الحى الشعبي اللى فيها .. واللى معظم اهله اصلهم من الشرقاوية او الصعايدة .. واتطبعو بطبع الاسمعلاوية بسرعة اوى
ودا احدث حى منشأ فى اسماعلية .. وبردو تحس فيه بروح اسماعلية

حى الافرنج ودا الحى الارقي .. ودا اللى كان بيسكنة الفرانساويين والانجليز زمان
وبيتميز بالطابع المعمارى الاوروبي القديم
المساكن الخشبية بالبلاكونات الخشب والسقف المثلثي ده
ومثال على ده فيلا ديليسيبس

فيها فلل الهيئة اللى بتتميز بشجر الجوافة والمانجه واللمون
والطرق الفاضية بالرصف الاصفر فى ازرق

اللى من اسماعلية يعرف شارع البلاجات .. شارع السلطان حسين .. شارع محمد على
شارع سعد زغلول وشارع مصر .. لهواه الشوبينج :D

الاسماعلية يعنى نادى الاسماعيلي ونادى القناة ونادى الشهدا ونادى الكهربا ونادى الموانى ونادى التأديف والشراع
شواطئ الفيروز والدانفا والفرنساوى وعثماسون والتعاون والملاحة والشبان
قرى سياحية زى قرية 25 يناير وقرية النورس وفى فايد قرية شموسة وسكس كورنرز وغيرهم..

اسماعلية تاريخيا لا غبار عليها
بداية من ايام الانجليز وحفر القناة
وعرابي وديليسيبس

مرورا بالعدوان الثلاثي والمقاومة الشعبية

وختاما بحرب الاستنزاف ولحد نصر اكتوبر

عثمان احمد عثمان .. اللى كان احد اسباب النصر فى 73 بمدافع الميا اللى عملها دى :D
وصاحب شركة المقاولين العرب

لو اتكلمنا عن اسماعلية عامة
الاسماعلية المدينة عاصمة الاسماعلية المحافظة
اللى بتشمل القنطرة شرق وغرب والفردان دول فى طريق بورسعيد .. شمالا
وفايد وابو سلطان وابوعطوة فى طريق السويس .. جنوبا
وابوصوير والقصاصين والتل الكبير فى طريق الزقازيق .. الطريق للغرب عامة
والشرق المعدية اللى بتودى سينا

دى كانت اسماعلية فى سطور .. اينعم عمرى ما هشتمل وصف دقيق ليها .. بس على حد ما تذكرت يعنى
بجد بلد تستحق الكلام عنها .. تستحق الزيارة .. تستحق الفخر .. ومين ادك يا بلدى :)

20 Comments:

  1. halaS demahoM said...
    يا اسماعيلية يا اسماعيلية
    احب ازورك فى المغربيية
    اركب فلوجة انا وحبايبى
    ونغنى غنوة على السمسمية
    اه يالالى حبيبى يا لالى يا روحى يا لالى

    ع اللي اتغرب راح ولا قالي
    !! a7mad sala7 !! said...
    احسن ناااااااااس
    ستيتة said...
    احمد
    انا فاتحة بالفاير فوكس والقالب مطلع شرط سوداء ومعاه كتابة خضراء مش باينة خالص
    في بعض اجزاء البوست واجزاء تانية لأ

    هل ده عيب عندي ولا ده القالب فعليا؟
    ده مش اول بوست اقرأه عندك بس اول بوست يطللع لي كده
    !! a7mad sala7 !! said...
    لالا مش من القالب

    القالب زى الفل

    اكيد عطل فنى عندك


    ننتظر الطلة بعد اصلاح العطل
    islamz said...
    يااااه فكرتنى باحلى ايام حياتى .. بصدد كتابة ذكرياتى عن الاسماعيلية .. احلى ايام حياتى ..
    ЯậŇ MỗŘỹ said...
    السلام عليكم و رحمة الله و بركاته
    طبعا اسماعيليه روعه كفايه ان ليا قرايب فيها
    و كمان الدقهليه عسوله و أموره و زى الفل
    بص يا بنى أحسن حاجه أننا من الأمه الاسلاميه
    OlivE said...
    السلام عليكم

    موضوع شامل وأكيد طبعا دا من حبك ليها مش عارف تكتب عنها ايه ولا ايه

    انا يمكن عمرى ما نزلتها ومشيت فيها
    بس عديت عليها فى المواصلات وفعلا اكتر حاجة لفتت انتباهى هى الخضره وحاجة تسحر فعلا


    بمناسبه الحرب والهجره
    فى مدرسه الثانوى بتاعتنا كانو عملين نظام غرف او مخبأ للناس المهجرين كانوا من اسماعيليه وبورسعيد
    ولحد دلوقتى لسه اثار الحرب على المخابىء دى موجوده


    اسفه على الاطاله

    سلامى
    !! a7mad sala7 !! said...
    islamz

    طيب الحمد لله انى فكرتك بزكريات حلوة

    ونورت فى اول زيارة
    !! a7mad sala7 !! said...
    روان

    وعليكم السلام


    سلام


    :D
    !! a7mad sala7 !! said...
    OlivE

    وعليكم السلام

    طبعا
    ويعتبر مكتبتش حاجة
    كان فى دماغى انى اكتب اكتر من كده
    بس اللى افتكرته دلوقتى بقي


    اسماعلية من برا حتى بتديك انطباع كويس اوى

    الناس اللى مبتحبش اسماعلية مش بيبقي عيب فى اسماعلية نفسها
    بيبقي لانهم كانو مضطرين ييجو غصب عنهم
    عشان ظروف كلية او شغل
    فبتاخدهم من اهلهم وشيئ طبيعي انها متكونش عندهم ذكرى حلوة

    حتى لو هما حاولو يكونو ذكرى حلوة مبيعرفوش

    لانهم بيبقو من الجامعة للسكن وخلاص كده
    ويحكمو على اسماعلية من خلال المكانين دول

    مع انك لو فى اى بلد فى الدنيا عشان ظروف دراسه هيبقي دا نفس رد فعلك ناحية البلد دى

    بالعكس كمان هتحس بالفرق بينها وبين اسماعلية

    اسماعلية وفرت على ناس كتير اوى سفر بعيد وتكاليف اكتر ومسافة اكبر

    بس تقول لمين بقي
    ربنا يهدى :D
    !! a7mad sala7 !! said...
    وبالنسبة لموضوع المخابئ دا سمعت عنه

    وموجود النظام دا فى بلاد كتير

    ايام الغارات بردو والكلام ده :D

    عندنا زمارة الغارة دى فى المدرسة بتاعة الثانوى شغالة لحد دلوقتى
    !! a7mad sala7 !! said...
    لما تمشي بردو فى شوارع المحطة الجديدة دلوقتى بتلاقي اثار الشظايا والطلقات موجودة ع الحيط بتاع البيوت

    فى حفر كده ظاهرة جدا من اثار الضرب فى البيوت القديمة اوى

    اهالى البيوت دى محتفظين بيها لحد دلوقتى
    بيقولو انها احسن من البيوت المبنية دلوقتى مية مرة
    halaS demahoM said...
    ما تبطل يا دوشه ووجع دماغ

    كل واحد بيتكلم عن امه علي انها احلي ست في الدنيا
    وهيا مش احلي ست ولا حاجه
    بس هيا امه
    ولو كانت ليه ام تانيه كان هيقول عنها كده بردوا

    متعممش بس
    ولما تتكلم ابقي قول ده من وجهة نظري

    واستخدم النظريه النسبيه
    يعني لما تييجي تقيس حاجه
    قيسها بالنسبه لحاجه تانيه
    الكيلو بيساوي 15
    طب 15 ايه ما تحدد
    لوك لوك لوك
    ولا حد بيقرا

    بتحسسني انك بتتكلم عن شلالات نياجرا ياخي
    !! a7mad sala7 !! said...
    اولا

    انت لو شايفها دوشة ووجع دماغ متقراش
    سبق وقولتلك البؤ دا تلاتة وتمانين مرة
    انا مش بحكى فى ودنك .. دى مدونتى
    يعنى بكتب فيها اللى على مزاجى
    يعنى انا مبجيش اقولك متكتبش دى واكتب دى لو انا شايف انها حاجة مزعجة بالنسبالى

    ثانيا

    انا مقولتش هى احلى بلد ولا حاجة
    ولو قولت احلى بلد اكيد محدش هيصدقنى
    كل ما فى الامر انى عرضت اللى عندى
    القيت تعابيني يعنى
    واللى عنده تعابين يلقيها
    لكن انا مش هقارن واقول دى احسن من دى فى كل نقطة بكتبها

    الحاجة اللى فيها مقارنة واضحة قولتها
    غير كده لا

    وبعدين اللى عايز يقرا يقرا
    واللى مش عايز ميقراش
    كل واحد حر .. انا مبرغمش حد يخش يقرا

    دا انت عجيب يا اخى
    بتحسسنى انى بكتب فى جريدة الوفد
    وشاغلك عمودين مهمين
    halaS demahoM said...
    عمالين نقوله بطل دوشه بطل دوشه
    وهو ولا في باله
    \\
    انت لو شايفها دوشة ووجع دماغ متقراش
    سبق وقولتلك البؤ دا تلاتة وتمانين مرة
    \\
    83 بالمره دي ولا من غيرها
    ثم انك بتتكلم علي اساس اني قريت ليه؟

    بس بردوا هرجع واقول

    يا اسماعيلية يا اسماعيلية
    احب ازورك فى المغربيية
    اركب فلوجة انا وحبايبى
    ونغنى غنوة على السمسمية
    اه يالالى حبيبى يا لالى يا روحى يا لالى
    !! a7mad sala7 !! said...
    ههههههههههههههههههههههههههههههههه


    :D
    morgana said...
    جميله الاسماعليه اوي
    انا رحتها كتير

    بس الواحد مهما راح اي مكان بيفضل بلده عنده نمبر وان مهما اشتكي من اي حاجه فيها

    المهم ان كلنا في مصر:D
    !! a7mad sala7 !! said...
    اكيد

    وطالما كلنا مصر
    يبقي مفيش مشاكل


    يا حبيبتي يا مصر :D
    غير معرف said...
    /*يا اسماعلية .. يا اسماعلية*/
    ردى يا اسماعلية :P


    اسماعلية كمان احسن من اللى وصفته ده
    !! a7mad sala7 !! said...
    ههههههههههههههههه
    صح

Post a Comment



رسالة أحدث رسالة أقدم الصفحة الرئيسية

Blogger Template by Blogcrowds