نــااااس

بنقــابل نااس
ونفــارق ناااس
ومش قادريــن ننسي اللى كــان
!!!

===============

اللى عايز اقوله
انك ممكن تنسي ناس .. بس متنساش حاجة معينة عملوها .. تبقي فاكر الموقف ومش فاكر تفاصيل البني ادم اللى مشترك معاك فى الموقف
ودا اللى بيخليك تفتكرهم

القصد انك ممكن تفتكر ناس من مجرد حدث معين دار بينك وبينهم
ايا كان الحدث بقي .. حاجة كويسة او وحشة
فى حين انك ممكن تنسي ناس تانية ظهورهم فى حياتك كان افضل كتير من غيرهم
بس انت منسيتش غيرهم دول رغم ان ظهورهم فى حياتك كان مش مريح بالنسبالك
بس هى الدنيا كده

ان صح التعبير هى الذاكرة كده

روح على جنب تانى
ممكن ناس شوفت منهم حاجات وحشة كتير يشغلو تفكيرك اكتر بكتير من ناس شوفت منهم حاجات كويسة
مش عشان انت وحش ولا ندل
بس هى كده غصب
تلاقي عقلك بيودى ويجيب فى حاجات كانت رخمة بالنسبالك اوى
اكيد انت مش عايز تفتكرها .. بس هى بتيجي فى بالك غصب بردو

فى حين ان ناس تانية كانو كويسين معاك اوى ولا يزالو
بس بردو مش شاغلين حيز كبير من تفكيرك
دا بردو مش عيب منك انت ولا ندالة
بس هى فعلا بتيجي كده

يمكن عشان انت متعود منهم على كده !!
يمكن عشان هو دا اللى المفروض متعارف بين البني ادمين .. فى العلاقات البشرية يعنى (الفطرة فى الخير)!!

بس اللى عايز اقوله انه مش عدل ابدا
ان عقلك وتفكيرك تتحكم فيهم ذكرى مش كويسة بالنسبالك فى حين انت اولى بذكرى حلوة تديك امل فى اللى جاى !!

مدونى حاسبات؟
اه مدونى حاسبات
هو احنا مش مدونين ولا ايه؟ اه مدونين
هو احنا مش حاسبات ولا ايه؟ ايوة يا عم حاسبات
خلاص نبقي مدونى حاسبات

طيب دا تقريبا اللقاء الاول من نوعه
للمدونين من نفس المجال .. اللى هو حاسبات

بعد عدة مشاورات واتفاقيات توصلنا للاتى
موعدنا ان شاء الله يوم الخميس القادم _اول خميس فى شهر مارس_
المكان : حاسبات الزقازيق
الساعة 11 صباحا ان شاء الله

اللقاء غير قاصر ع المدعوين .. الدعوة عامة
واكيد اى حد هيكون موجود هينورنا .. وهيبقي على راسنا من اباف

اظن المعاد دا مناسب جدا للجميع .. انسب المواعيد يعنى
نهاية اسبوع .. غير اننا اول الترم محدش شد جامد فى الدراسة لسه

على مدونى حاسبات الزقازيق توفير المناخ المناسب على قدر المستطاع
دى كليتكو .. واهل مكة ادرى بشعابها

اللقاء هيبقي فيه ناس معظمها هتتقابل لاول مرة
اذا لا داعى للحرج من اولها .. محدش يقول انا معرفش مين هييجي
ومعرفش فلان الفلانى .. ومعرفش ايه كداهوان
كلنا زيكو

اللقاء فرصة للتعارف وتلاقي الوجوه
فرصة لتقوية العلاقات بين ابناء المجال الواحد
فرصة لتبادل الافكار والاقتراحات
فرص كتير .. واكيد اللى مش هيحضر هو الخسران

مقدرش اقولكو بروجرام كامل للى هيحصل لان دا اول لقاء ومحصلتش قبل كده
فاحنا جايين واللى هيكتبه ربنا هيكون

لا مانع من اصطحاب بعض الاصدقاء الغير معنيين بالامر
وكلامى موجه خصيصا لسام وان .. هو عارف نفسه ;)
احنا مش هندخلكو بدعاوى ولا كارنيهات
اللى هييجي اهلا وسهلا بيه .. ويا ريت نشوف منكم تفاعل كويس

يا ريت الناس بتاعة الزقازيق يدونا التمام لان انتو الاساس

اللى عنده اى ملاحظات او اقتراحات يقول من دلوقتى

بس .. يا رب يكون يوم كويس
نشوفكم على خير ان شاء الله..

يا سااااااااااتر
الفرح لسه خلصان .. والواحد دماغه ورمت
حتت فرح كان شغال تحت .. غتيـــــــــــت
الفرح كله على نفس الوتيرة
دى جى محطوط .. وحبلين نور .. وشوية تعابين عمالة تتلوى
لا والله دا مش رقص .. الرقص الرقص اللى نعرفه دا لا مش هو
دا حاجة كده وصفها مختلف

الدى جى بقي مشغل ايه
حبة اغانى .. حرام يتقال عليها اغانى
محدش يقولى شعبي .. الشعبي دا بالنسبالها فن

زماان
ايام عدوية .. اول ما طلع عدوية
يمكن دا اول واحد غنى شعبي صريح
قابل هجوم فظيـــــــع .. محدش سابه فى حاله
وقالو دا بيخل بالغناء العربي وقاول دا هابط وكلام كده .. ورغم كده نجح جدا ومعلم فى الناس كلها

الشعبي فضل ينحط ينحط لحد مثلا من سنتين تلاتة كده
ايام العنب :D
فى عصر العنب بردو اول ما طلعت فضلنا نقول ايه ده وعنب ايه بس والناس غضبت عليها
ورغم كده هى مقبولة .. بالنسبة للافراح مقبولة

لكن تعالى دلوقتى بقي وصلنا لمرحلة
بجد بجد حاجة تكسف
دى مش اغانى .. ودول مش مغنيين .. واللى بيسمعوها دول مش بنى ادمين
حاجة اخر قلة ادب والله
موسيقي غريبة .. وواحد او مجموعة ناس بيتفننو انهم يوحشو صوتهم .. بيتفننو للوصول لنبرة معينة تخليك تسمعها تتف عليهم
وكلام غريب مش مفهوم .. شوية مغيبين بيغنو .. وشوية مغيبين بيرقصو
واحد بيقول انا نازل يا سعاد .. خلى بالك م الولا
ناقص يقولها طب اجيب ايه وانا طالع
واحد تانى بيقول تاريخ وعمال يكرره .. 14-2 .. 14-2 .. حاجة زى كده
انت عامل اغنية للذكرى مثلا ولا ايه
وبصوت يحسسك فعلا بالاشمئزاز .. والغريب انك تبص ع الناس تحس انهم فى المود بتاعه
انا مش فاهم مين اللى فتح لدول استوديو .. ومين اللى سمحلهم يسجلو حاجة زى كده .. ومين اللى وافق على نشرها
تحس انهم قاعدين بيحششو وبيعدو المايك على بعض .. ويخش واحد ييحي وينقط
والموضه بقي العيال .. شوية عيال كده بتسجل
يعنى بجد جو كده يا سااااااااتر .. تحس انك عاوز تقطع عليهم النور

قيس بقي حبة اغانى على كده نازلين دفعة واحدة .. وسوقهم ماشي اوى
فى الافراح .. نفس الرتم .. نفس الغباء .. والناس مبتزهقش ودا اللى غايظنى
طب هنوصل لايه بعد كده .. مش عايز حد يقولى دا شعبي
دا فضيـــــحــة

انتو فضيحة .. عار على البني ادمين
ده لا يمس الشعبي بصله
حتى الشعبي برئ منكو ومن امثالكو

No Title


يمكن عشان حسيته نفسي تحس بيهـ ..

بعد ما خمنا .. ووشوشنا الودع
واللى قال وجهة نظره فى الكلمتين اللى فاتو
اخش انا بقي بوجهة نظرى

معروف طبعا ان التعليم عندنا فى الثانوى _وهو مش فى الثانوى بس يعنى_ ياما علمى يا اما ادبي
ظاهرة بقي حاسسها من ايام ما كنت فى ثانوى
ليه بحس ان ادبي دى شتيمة ؟؟

ليه لما تيجي تتكلم عن حد
تقول دا ثانوى .. ومبيزاكرش
يقولك يا عم عادى دا ادبي ؟؟
ليه لما تيجي تسال واحد كان مستواه حلو فى التعليم وتعرف انه ادبي
تقول ايييييه؟؟ .. ادبي؟؟ :O
وكانه عمل جريمة
يا عم دا ادبي والله عادى .. مش معهد الرقص الشرقي

ليه لما تلاقي واحد كده تيجي تسأله انت دخلت ايه
يرد عليك وهو مدلدل راسه كده .. وتبدو عليه علامات الحزن والاسي
ويقولك دخلت ادبي :(
وكأنها وصمة عار ؟؟ .. زى اللى تيجي تساله زمان خلفت ايه يقولك جبت بنت :(
نرجع لموضوعنا ..

طب ليه بقي دى نظرتنا للادبي على انه مستوى متدنى من التعليم
او كأن هرم التعليم الثانوى انه الدبلومات والمدارس الداخلية وبعدهم الادبي العام وعلى قمة الهرم العلمى بقي
دول الكريم شانتيه بتوع البني ادمين

مع ان لو حسبتها صح هتلاقي ان مفيش فرق
بتوع الادبي بياخدو دروس ويحفظو ويصمو
وبتوع العلمى بردو بياخدو دروس ويحفظو ويصمو
بس الفرق بقي ان بتوع علمى دول قدرتهم على الصم اعلى شوية .. يا جااااامد انت يابو 95% ;)
يعنى انت بتحفظ كويس وبتدش كويس وذاكرتك حلوة كده .. هتخش ترمى الكلمتين اللى حفظتهم فى ورقة اجابة وتطلع تجيب درجة حلوة
وتبقي بنى ادم حلو كده وتخش كلية من كليات القمة .. قمة اه :|

بتاع الادبي ده بقي مستهتر شوية ومقضيها طول السنة قهاوى وبلاى ستيشن وبلياردو
فده مبيصمش اوى بقي وبيخش يكتب الكلمتين اللى فاكرهم وخلاص ويطلع يجيب درجة وحشة
ويتقال عادى مهو ادبي .. هو دا الرينج بتاعهم .. ويخش كلية كوخه الناس بتقول عليها يع

واحد هييجي يقولى ايه
يا عم دى مناهجهم كلها حفظ .. ومبيشغلوش مخهم خالص
بيدشو الكلام ويروحو يكتبوه
طب يابنى يا حبيبي لما هو كده بياخدو دروس ليه
متقعدت تحفظ فى بيتكو .. تشترى اى مذكرة من بتوع الجهابزة اللى عارفين الامتحانات بتيجي ازاى
هو الحفظ محتاج ايه غير كده

واحد تانى ييجي يقولى لا يا عم العلمى غير بردو
ناس دماغها عالية ودا قسم الفهم وتشغيل المخ
يابنى انت بتقول لمين الكلام ده .. ماحنا كنا ثانوى وعارفين الدنيا ماشية ازاى
هو احنا نازلين من القمر ع الكلية
بتروح الدرس يقولك خد ام القاعدتين دول احفظهم
وادى الاسئلة المتوقعة فى الامتحان .. لن يخرج عنها الامتحان .. يا فرحتى
حتى الرياضة والاحصا بقو يديوهم مسائل يحفظوها
انا افتكر ايام ما كنت فى تالتة .. كان امتحان الاحصا جاى سم _هما بيقولو كده_
بقيت قاعد فى اللجنة الناس عمالة تشد فى شعرها .. واللى ينفخ واللى يكسر فى القلمة
واللى عمال يطلع برشام .. يخرب بيتك يا شيخ هتغش ايه دى رياضة
بس هو معتقد انه هيفتح البرشام يلاقي الاجابة مثلا
وسيبك من كده .. بقي هو دا اللى جايب 93% فى تانية مثلا
وكمان كام شهر هيبقي مهندس اد الدنيا
مش عارف يتصرف فى مسألتين رياضة
ويطلعو يقولو الامتحان صعب .. احنا مخدناش الحاجات دى
دا ليه .. لانه متعود يحفظ ليس الا

انا مش هنكر ان فى ناس مخها نضيف فعلا وبتحل وتتفوق
وان فى مدرسين بيركزو على ازاى تعرف تفكر تحل .. مش ازاى تعرف تحفظ عشان تجيب درجة
بس دول قليلين اوى .. والدليل اننا كل سنة بنلاقي الناس عمالة تنتحر .. واللى تتشحتف واللى يغم عليها
وعربيات الاسعاف بتعمل سبوبة حلوة يومين الامتحانات دول

ويقولك اه يا عم دول علمى
اما دول بقي ادبي ياااااى .. دول حسالة المدرسة .. وبقايا الطلبة

يا سااااااادة التعليم فى مصر حفــــــــظ

هتقولى علمى .. هتقولى ادبي .. السياسة واحدة
صم اكتر تجيب درجات اكتر

انت يابنى يا بتاع ادبي خد احفظ سطرين التاريخ دول
وانت يابنى يا بتاع علمى خد احفظ القاعدتين دول .. وشوية اسئلة علل فيزيا .. وشوية معادلات الكيميا دول .. على كام مسئلة
وظبط نفسك يا معلم .. ويطلع يقولك انا علمى

قيس بقي على الكلية .. المستوى الاعلى شوية
هتكلم عن كليتنا احنا .. احنا عندنا قسمين .. علوم حاسب ونظم معلومات _للى ميعرفوش_

تعالى بص على طالب تانية بقي اللى عاوز يختار يا عيني
يمسكوه المقربين من ذوى الخبرة
يابنى خش علوم .. دى اسمها علووووووووووم .. وكأنه بياخد سكاشنه فى المختبر
يابنى احنا اللى بناخد الاسس .. احنا لب الكلية .. احنا اللى بنينا السد العالى :D
هتخش نظم .. دى ادبـــــــــي .. بعد ما كنت علمى اد الدنيا فى الثانوى .. وجبت 95% جاى تضيع نفسك يا عبيط
دول مبياخدوش حااااااجة .. وكل حاجة عندهم حفــــظ

والواد يا عيني يتخض .. يقولك ادبي؟؟ .. لااااااااا ادبي لا .. وكأنها الحقنة ال13 سنتى

تعالى احسبها بالراحة كده
بتاع النظم بياخد ايه .. مبياخدش حاجة ماشي .. انا موافقك .. بالنسبالك مبياخدش حاجة
بياخد كلام يحفظه ويرصه فى الامتحان وخلاص على كده .. يطلع مش عارف حاجة

انت بقي يا بتاع علوم بتاخد ايه
بتاخد حبة الجورزمات تحفظها .. شوية كونسبت على اسمبلي
تحفظـــــهم بردو وتمتحن فيهم .. وتطلع تركنهم جنب اخواتهم
حتى الاسمبلي اللى فيه شوية شغل .. لما الامتحان بييجي تقيل شوية
وتقيل دى بمعنى انها حاجات مخدوهاش بالنص فى المحاضرات
يعيطو ويصوتو ويقولك الامتحان صعب .. احنا مضطهدين .. احنا بيفترو علينا
يابنى يا حبييب قلبي مانت اللى اخترتها .. هو حد كان ضربك على ايدك
يعنى انت عايز تاخد اسمبلي تحفظهم وتروح تمتحن فيهم .. مهى طبيعة المادة كده
عشان تدور وتدرب نفسك وتشغل دماغك .. لا هما علمى بدماغ ادبي
قصدي علوم بدماغ نظم

هديك دليل كمان .. لما تروح تسال حد منهم على حاجة اخدوها الترم اللى فات .. يقولك لا والله معلش اصلى نسيت _ ايوة ماحنا بناخد نفس المواد تقريبا :D تصدق؟؟_ لانك لو مكنتش حافظه مكنتش نسيته يااا .. يا علوم

يعنى هو خد نت ورك وذكاء اصطناعى الترم اللى فات تاخدهم انت الترم ده .. انت خدت بي اتش بي وداتا بيز الترم ده ياخدها هو الترم الجاى .. وبنظام نلف حوالين بعض بقي .. غير المواد المشتركة اصلا
نسيت ايه بقي .. مانت نسيت اللى كنت حافظه .. واللى انا هحفظه وانساه الترم الجاى بردو

بس انت اتنفخت فى الامتحانات وجبت تقدير تعبان .. لانك علوووووووم .. انت التوب بتاع الكلية .. انت وانت .. وانت اللى هتعيط فى الاخر
وهو اللى جاله امتحان سهل بقي وجاب تقدير عالى .. لانه نظم .. ادبي يعنى .. هو اللى بيحفظ وخلاص يا عم .. راعيه بقي على اد تفكيره .. وهو اللى هيضحك عليك فى الاخر بقي :D

وبعدين اصلا لو بصيتلها من فوق شوية
هتلاقي ولا اللى هما بياخدوه بيفيد .. ولا اللى بتوع نظم بياخدوه بيفيد
مناهج ملهاش اى علاقة بالشغل الخارجى .. ولا هتفيدك فى حياتك العملية خالص

هتقولى بس بتوع علوم بياخدو فكرة شوية .. بياخدو فكرة عن ايه اصلا
دول بياخدو الفكرة غلط اساسا .. لانه بياخدو الفكرة يحفظوها .. مش يطبقوها
والفكرة اللى بياخدوها بيسيبوها فى ورقة الامتحان قبل ما يروحو

طب مانت زيك زي بتاع الادبي بالظبط .. اللى هو بتاع النظم يعنى
فرقت ايه عنه؟؟
متقولش مفرقتش .. لانك فعلا فرقت

بس عارف فرقت ايه بقي؟؟
فرقت انك حرقت اعصابك طول السنة .. وربيت لنفسك الخفيف
وعشت سنتين فى رعب .. وحفظ وطحنت نفسك
وفوق كل ده مجيبتش تقدير عدل فى الاخر .. اللى بيجيبه بتاع نظم بمجهود مزاكرة 3 ايام

روح بص على نتيجة نظم كده هتلاقي التقديرات فى السما .. وباقل مجهود
ويقولك يا عم دول نظم
نظم دول بيشترو درجات مثلا ولا بيعملو ايه؟؟

وفى الاخر دا بيتخرج .. ودا بيتخرج .. وبياخدو نفس الشهادة
والاتنين بيتقابلو فى نفس مركز الكورسات اللى برا
الاتنين بياخدو كورس اوركل 3 ايام فى الاسبوع
وبيتقابلو ال3 ايام التانيين فى كورس الجافا

واحد بيقولى اشمعنى دول؟؟ .. مهو هما دول اللى شغالين فى مصر
دلوقتى 90% من الشغل اللى حضرتك هتطلع تدور عليه
اوركل وجافا .. وحبة ويب كده فى اللذيذ تشتغلهم على ما تبقي جامد فى الاوركل
وتروح تشتغل اوركل بردو .. دا لو عايز تشتغل يعنى

فى نفس الكورس دا بقي فى واحد تالت .. بس مش حاسبات خالص بقي
واحد من كلية تانية .. ايا كانت ملتها
وجاى ياخد الكورس زيه زيك .. وهياخد شهادتها زيه زيك .. وهيشتغل بردو زيه زيك
ولا زاكر وطحن نفسه طول السنة زى بتاع علوم .. ولا حتى زاكر 3 ايام قبل الامتحان زى بتاع نظم
لا دا زاكر ساعتين قبل الامتحان الصبح فى كلية تانية

الفرق بين دا وده وده ان كل واحد فيهم عرف ينقى طريقة
واحد بيحب وجع الدماغ والقرف ودخل علوم .. واحد دخل الكلية غلط واشترى دماغه لما فاق ودخل نظم .. وواحد تالت اشترى دماغه من الاول او مجموعه اجبره انه يشترى دماغه من الاول ودخل كلية تانية

زى مثال جميل اوى كنت سمعته من اسمو ايه داهوان .. كان بيقولك ايه
الفرق فى الطعمية :D
يعنى ايه يا كبير:-

بيقولك بتاع الادبي بيخلص امتحاناته ويروح يبيع كتبه لبتاع الطعمية وبيرجعوله تانى قراطيس

بتاع علمى بيقولك لاااااا .. كتبي لا .. دا العلم .. ويديه لابن خالته اللى اصغر منه يزاكر فيهم بعده .. اللى بيروح يديهم لنفس بتاع الطعمية .. وبردو بيرجعوله فى قراطيس

بتاع ولا علمى ولا ادبي معندوش كتب اصلا .. فموداش لبتاع الطعمية اصلا .. بس بردو رجعله شوية من عند نفس بتاع الطعمية من كتب الاتنين اللى فاتو فى قراطيس :D

لا تقولى بقي علمى .. ولا تقولى ادبي .. ولا تقولى ثانوى كمان ان جيت للحق
انت تخلص اى حاجة .. باقل مجهود .. واقل تكاليف .. واقل وقت
وتشوف نفسك هتنفع فى ايه .. وتقوى نفسك فيه .. وتشتغل زى الناس المحترمين

يعنى م الاخر تجارة انجلش يا مى :D

انا لو اتكلمت عن نفسي .. لو رجعت بالزمن 4 سنين لورا
اخش تجارة مع صاحبي زيزو حبيبي .. واعيش حياتى على رأى تامر لمدة 4 سنين .. واطلع اخد كورسين الاوركل والجافا وشوية الويب
وهبقي بنفس الحال اللى هتخرج بيه كمان 6 شهور ان شاء الله فى موقفى ده

انا كده .. سبرايت

وسلملى ع العلمى وع العلوم ;)

طب ادبي ولا علمى؟؟

مشوار كده وهاجى احكى معاكو شوية

بيس

ولا بلاش بيس دى قدمت اوى..

ولا وجع القلب


بكرة الايام تعدى
تضحك وتقول .. مش معقول
انا كنت بعمل كده ؟!!

ججـ

ادى نتيجة اى اس

الحمد لله .. وربنا يكرم اللى اتكعبل فى حاجة
ربنا يوفق الجميع

كان ياما كان

a7mad: هحكى الحكاية كلها والله الغنى
a7mad: الحب مهما تعملو لا فيه فقير ولا غنى
a7mad: كان فى ولد
a7mad: ملوش بلد
a7mad: غير عين حبيبته المخلصة
a7mad: فلاح وغاوى
a7mad: بيقول غناوى
a7mad: وبيلعب الخيل والعصا
a7mad: قام الولد
a7mad: لم البلد
a7mad: وراح لابوها فى المسا
a7mad: يطلب ايديها وينول مراده ويكتب كتابه تانى مسا
a7mad: قاله ابوها مهرها غالى اوى
a7mad: تشوف معاه الويل والاسي
a7mad: قاله يا عمى
a7mad: متزودش همى
a7mad: الحب ازاى يتنسي
a7mad: خرج الولد
a7mad: برا البلد
a7mad: يشق فى بلاد ربنا
a7mad: يتعب ويشقى لكنه عارف ان المعين دا ربنا
a7mad: رجع الولد
a7mad: تانى البلد
a7mad: ومعاه من الخير مدد
a7mad: الكل وسع للولد
a7mad: فرحان وراجع بالمدد
a7mad: حبيبته فرحت بيه اوى
a7mad: ما الحب كان بينهم قوى
a7mad: رجع الولد نفس المكان
a7mad: لاخواته وصحابه والجران
a7mad: والشبكة مال حبه اللى كان بدر وتمام زى القمر
a7mad: طلب اديها من زمان والمهر كان ويل وسهر
a7mad: ابوها قاله لينا الشرف والحكم فى الحال صدر
a7mad: فرح الولد
a7mad: عمر بيوت وعاش فى البلد من غير حسود
a7mad: والفرح بقي ملوش حدود
a7mad: والكل فرح فى البلد
a7mad: وتوتا توتا فرغة الحدودتة :)

overrrrr

لا كده كتير كتير
اوفر

X-(



محافظة الاسماعيلية

على غرار البوست اللى قريته عند ستنا ستيتة
ومن زمان حتى وانا نفسي اكتب حاجة عن اسماعلية
الاسماعيلية مسقط الرأس ومكان المعيشة حاليا ومستقبلا ان شاء الله

الاسماعيلية مدينة مش قديمة النشأة .. مدينة من احدث المدن المصرية
عمرها لا يتعدى ال140 عام .. نشأت مع افتتاح قناة السويس سنة 1869
الاسماعيلية ككلمة نسبة للخديوي اسماعيل
طب حد هيقولى مهى بورسعيد نسبة للخديوي سعيد .. بس بورسعيد فيها مينا اللى هى بور فسموها بورسعيد
زيها بورتوفيق فى السويس وبورفؤاد البر التانى من بورسعيد

لكن اسماعلية بناءا على موقعها فى منتصف القناة مفيش فيها مينا تبقي الاسماعيلية

من الطبيعي ان اهل اسماعيلية يبقي مصدرهم الرئيسي هجرات
الناس اللى جت اسماعلية ايام حفر قناة السويس وفضلو فيها ومرجعوش بلدهم
ودول يعتبرو سكان البلد الاصليين
والناس اللى جت بعد حفر قناة السويس ولقو فيها مصدر رزق جديد القايم على بحيرة التمساح والقناة
والناس اللى جت بردو بعد نهاية الحرب واستوطنو فيها
معظم الناس دى كانو الشرقاوية .. تلاقي معظم اهل اسماعلية اصلهم شرقاوية وبالذات الزقازيق

يذكر ان الاسمعلاوية هاجرو ايام الحرب عشان مكانش ينفع يعيشو فى البلد وهى فى حالة حرب
كانت معظم الهجرات للقاهرة والدلتا والدن البعيدة عن الضرب

الناس اللى عاشت ايام الاستنزاف فى اسماعلية هما دول اللى حسو فعلا بمرارة الاحتلال
مش تقولى ناس كانت جنب بيوتها طول الفترة دى وقاعدين جنب الراديو يسمعو الاخبار

موقع اسماعلية جغرافيا اكيد كان اهم اسباب اختيار الناس لاسماعلية
موقع اسماعلية يعتبر استيراتيجي فى منطقتها .. تقريبا مفترق الطرق
فوق بورسعيد وتحت السويس .. يمينها سينا وشمالها القاهرة والدلتا
يعنى اى حد من اى مكان من دول مضطر يعدي عليها وهو مسافر لحتة تانية بردو من دول

اسماعلية مدينة ساحلية .. وفى نفس الوقت زراعية .. ودا صعب جدا تلاقيه فى اى محافظة فى مصر
مدينة ساحلية بتطل على قناة السويس وبحيرة التمساح والبحيرات المرة
مصايف وقرى سياحية وبلاجات فى اسماعلية وفايد .. صيد وملاحه وهيئة قناة السويس
فى نفس الوقت زراعة ومساحات خضرا .. واسماعلية مشهورة بالمانجه والفراولة وغيرها..

اسماعلية اكتر مدينة فى مصر مشهورة بالمساحات الخضرا والجناين
اسماعلية يعنى الكورة .. والكل يعرف مين هو الاسماعيلي
وكام لاعب فى المنتخب عدو ع الاسماعيلي او كان هو سبب شهرتهم

اسماعلية يعنى الهدوء والجمال .. طرقها وشوراعها وكرانيشها

اسماعلية كمساحة مش كبيرة .. وفى نفس الوقت مش زحمة
لان اهلها متوزعين فيها .. مش متكدسين فى منطقة واحدة

اسماعلية مدينة تاريخية
عرابي والتل الكبيرة .. والطابية المشهورة

النصب التزكارى
دا نصب لذكرى الحرب والجندى المجهول
ويشمل بانوراما لحرب اكتوبر

تبة الشجرة
دا موقع تبة الشجرة
اللى كان فيه معسكرات الاسرائيليين ايام الحرب
وادامه الساتر الترابي وخط بارليف اللى اتدمر
وهناك فى اثار من الحرب وادوات كان بيستخدمها الاسرائيلين والخنادق والاسلحة بتاعتهم وهكذا..

متحف الاسماعيلية


اسماعلية مركز جامعة قناة السويس

اسماعلية مركز هيئة قناة السويس .. مبنى الارشاد

اسماعلية ترعة محمد على .. اللى بتجيب ميا من النيل لاهلها ولبوسعيد والسويس وسينا

تستحق بكل بساطة لقب عروس القناة

اسماعلية يعنى كورنيش محمد على .. وكورنيش نمرة 6 .. وكورنيش البلاجات

اسماعلية يعنى اسماعلية يعنى جنانين الملاحة وجناين الغابة وكل شريط اخضر تلاقيه فى اى طريق تمشي فيه فى اسماعلية

اسماعلية ملتقي اللهجات من العرب (البدو) واللهجة البورسعيدي ولهجة الفلاحين ولهجة الصعايدة ولهجة السواحلية .. ولكن بلا لهجة
اسماعلية او كما يطلق عليها البعض _اسمعلللية بشد اللام_ ملهاش كلمات مميزة ممكن يقف عليها حد انها تمييز للاسماعلاوية

لو اتكلمنا عن صفات مميزة فى شعب اسماعلية هتلاقي الطيبة .. وخفة الدم
هتلاقي الدم الحامى .. المشاهر المتأججة (بتوصل احيانا للافورة)
ويمكن دى صفة فى السواحلية عامة زى ما قالت ستنا ستيتة
من الصفات اللى بتضايقنى فى الاسماعلاوية الاستغلال .. خصوصا للاغراب .. ودى بردو مش صفة فى الاسماعلاوية بس .. بقت صفة فى الدنيا كلها .. بس يمكن بتظهر هنا شوية لانها مدينة الى حد ما سياحية

اسماعلية يعنى المهرجان السنوى والكرنفالات الشعبية

اسماعلية يعنى السمسمية والفن المميز اللى مش موجود الا بس فيها وفى مدن قليلة

اسماعلية المحطة الجديدة وعرايشية العبيد للناس البسطا .. ودول اقدم منطقتين
الشيخ زايد وحى السلام للطبقة العادية .. ودول حديثي النشأة
الافرنج للطبقة العليا شوية وكان حى الاجانب زمان ودى اول منطقة سكنية كانت فى اسماعلية

فى المحطة الجديدة والعرايشية هتلاقي مجانين الاسماعيلي والناس اللى تحس معاها بطعم وريحة اسماعلية

الشيخ زايد ودا الحى اللى انشأه الشيخ زايد ال نهيان الاماراتى كهدية للمصريين بعد الحرب
وفيها كل العماير بنفس الشكل اللى هو الطوب الفرعونى ومساكن الحجر زى ما بيقولو
وزيها بالظبط منطقة الخمسة والكاكولا والاعلام والجمعيات والالف مسكن

حى السلام ودا الحى الشعبي اللى فيها .. واللى معظم اهله اصلهم من الشرقاوية او الصعايدة .. واتطبعو بطبع الاسمعلاوية بسرعة اوى
ودا احدث حى منشأ فى اسماعلية .. وبردو تحس فيه بروح اسماعلية

حى الافرنج ودا الحى الارقي .. ودا اللى كان بيسكنة الفرانساويين والانجليز زمان
وبيتميز بالطابع المعمارى الاوروبي القديم
المساكن الخشبية بالبلاكونات الخشب والسقف المثلثي ده
ومثال على ده فيلا ديليسيبس

فيها فلل الهيئة اللى بتتميز بشجر الجوافة والمانجه واللمون
والطرق الفاضية بالرصف الاصفر فى ازرق

اللى من اسماعلية يعرف شارع البلاجات .. شارع السلطان حسين .. شارع محمد على
شارع سعد زغلول وشارع مصر .. لهواه الشوبينج :D

الاسماعلية يعنى نادى الاسماعيلي ونادى القناة ونادى الشهدا ونادى الكهربا ونادى الموانى ونادى التأديف والشراع
شواطئ الفيروز والدانفا والفرنساوى وعثماسون والتعاون والملاحة والشبان
قرى سياحية زى قرية 25 يناير وقرية النورس وفى فايد قرية شموسة وسكس كورنرز وغيرهم..

اسماعلية تاريخيا لا غبار عليها
بداية من ايام الانجليز وحفر القناة
وعرابي وديليسيبس

مرورا بالعدوان الثلاثي والمقاومة الشعبية

وختاما بحرب الاستنزاف ولحد نصر اكتوبر

عثمان احمد عثمان .. اللى كان احد اسباب النصر فى 73 بمدافع الميا اللى عملها دى :D
وصاحب شركة المقاولين العرب

لو اتكلمنا عن اسماعلية عامة
الاسماعلية المدينة عاصمة الاسماعلية المحافظة
اللى بتشمل القنطرة شرق وغرب والفردان دول فى طريق بورسعيد .. شمالا
وفايد وابو سلطان وابوعطوة فى طريق السويس .. جنوبا
وابوصوير والقصاصين والتل الكبير فى طريق الزقازيق .. الطريق للغرب عامة
والشرق المعدية اللى بتودى سينا

دى كانت اسماعلية فى سطور .. اينعم عمرى ما هشتمل وصف دقيق ليها .. بس على حد ما تذكرت يعنى
بجد بلد تستحق الكلام عنها .. تستحق الزيارة .. تستحق الفخر .. ومين ادك يا بلدى :)

احنا

بشعر ساعات ان الفضا خيمة .. واشعر ساعات ان المدى قضبان
وساعات بحس ان البكا غيمة .. ينزل مطر ويطهر الانسان

بحلم يكون لى فى الغنا صاحب .. بحلم يكون لى فى الوجود عنوان 
والاقى ضل ومساكن ... والاقى ضل ومساكن

احنا اللى وقت الشدة حارسينها .. واحنا اللى وقت الفرح منسيين
تغرق ومين غيرنا اللى شايلينها .. وتقب نبقى احنا اللى محنيين
احنا ضحايا العشق والواجب .. ولا يوم هتعلى العين على الحاجب
ده هواها فى الدم ساكن ...
ده هواها فى الدم ساكن

بتقولى الحنين .. طب فين الحنين


حسن باشا .. عمى وعم التدريب الكروى كله
جايبلك بقي يا باشا حتت بطولة .. مش هتقلب مصر بس .. دى هتقلب الوطن العربي كله
كأس العالم

كأس العالم؟؟ .. مش دا اللى كان بيشربه عوكل وهو بيفكر فى ساعة

صبرك عليا بس يا باشا .. اشتغلو

ايه يابنى ده .. شوية عيال بسكاكين وشوم

ولسه يا باشا بقي لما تشوفهم وهما بيضربو فى جماهير مصر

يضربو الجماهير؟؟
دانت عايز تحط دماغنا فى التراب بقي
انســــــــــى

ليه بس يا باشا
دى بطولة بتلعب فيها احسن منتخبات العالم
البرازيل وايطاليا واسبانيا و ...

مشي يابنى شوية العيال الرمم دى .. والحق سافرلهم انجولا

استاذ .. استاااااذ

(( فى السنة اللى رفضنا فيها كأس العالم .. فزنا بكأس الامم الافريقية
كأس الامم الافريقية فرحت 80 مليون مصرى غير بقيت العرب .. واحزنت 40 مليون جزائرى
كأس افريقيا .. ام كاس العالم ))

back ;;)

بعد اجازة شهر من التدوين
وبعد شهر من الامتحانات بمختلف انواعها
رجعنالكو تانى
عودة جديدة للتدوين :)

رسائل أحدث رسائل أقدم الصفحة الرئيسية

Blogger Template by Blogcrowds