عجبا لحواء


ناهد: راامى .. عاوزه اسالك سؤال
رامى: اسألى يا حبيبتي :)
ناهد: بس اوعدنى تجاوبني بصراحة
رامى: بصراحة طبعا .. انا عمرى كدبت عليكي؟
ناهد: لا مبتكدبش

انت حبيت حد قبل كده؟
رامى: ههههههههههههههه :)
ناهد: بتضحك ليه .. هو انا مجنونة؟
رامى: لا يا حبيبتي انتى مش مجنونة
ناهد: امال بتضحك ليه .. كلامى مش عاجبك؟
رامى: هههههههه الله .. انا قولت كده؟
ناهد: امال ضحكتك دى معناها ايه بقي؟
رامى: يعنى بلاش اضحك .. اعيط يعنى .. وبعدين انتى عاوزانى اشوف القمر دا وماضحكش ;;)
ناهد: ايوة البكش هيشتغل اهو .. يالا جاوب بقي ومتهربش من السؤال
رامى: بكش بردو .. اخص عليكي دايما ظالمانى كده :(
ناهد: بردو بتتوه .. شفت بقي انت مش عايز تقولى ازاى .. ماشي ماشي
رامى: اتوه ايه بس يا حبيبتي .. هو انا عامل عملة .. وبعدين انتى الموضوع دا يهمك فى ايه .. مانا معاكى اهو ومش شايف حد غيرك
حتى دورى جوا كده (بيشاور على قلبه) مش هتلاقي غير ناهد وبس .. هتلاقيه بيتكلم بصوت واطى كمان
ناهد: هو ايه اللى بيتكلم؟؟
رامى: قلبي عمال يقول ناهد ناهد ناهد
ناهد: :"> بطل بقي .. يا لهوى عليك .. دانت فظيع .. ورد ع السؤال يالا

حبيت قبلي ولا لا؟
رامى: بيفكر فى سره شوية ..( اقولها ولا ماقولهاش)..
ناهد: سرحت فى ايه .. شكلك مش عاوز تقول
رامى: والله عادى .. بس دى حكاية قديمة ملوش لزمة نقول ونعيد يعنى
ناهد: لا والله لتقول .. مش هزعل
رامى: امممممم :-? .. طيب يا ستي كنت بحب واحدة زمان .. بس محصلش نصيب يعنى .. وكل واحد راح لحاله
ناهد: (وشها بدأ يقلب) ممممممم محصلش نصيب .. ليه خير انشالله؟؟
رامى: اهو محصلش نصيب وخلاص .. اختلفنا على شوية تفاصيل .. وسبنا بعض بهدوء .. حتى هى اتخطبت دلوقتى
ناهد: ربنا يوفقها يا سيدي .. وانت زعلان طبعا
رامى: زعلان ليه يعنى؟؟
ناهد: عشان محصلش نصيب وكده
رامى: دا ايه الكلام دا بقي .. ازعل ليه يعنى .. مانا ربنا عوضنى باحسن بنت فى الدنيا اهو
ناهد: (باستهبال كده) فين دى؟؟
رامى: (باستهبال اكتر) وسعى شوية كده .. شايفة العربية اللى هناك دى .. جنبها كده
ناهد: واللــــــــه
رامى: والله يسخطك يا شيخة .. ال فين ال :-<
ناهد: خلاص متزوقش .. :(
رامى: مااااااااااالك .. كشرتى ليه
ناهد: مفيش :(
رامى: لا اله الا الله .. مالك يا بنتى بس
ناهد: مفيش .. كمل الحكاية .. اختلفتو على ايه بقي؟؟
رامى: اكمل ايه بس .. مفيش حكايات
ناهد: ازااااى .. كمل حكاية اللى اتخطبت
رامى: ايه يا ناهد الاسلوب ده .. ماحنا قولنا كل واحد راح لحاله .. وانا مش فاكرها خلاص ولا عاوز منها حاجة
انا غلطان انى قولتلك اصلا
ناهد: والله .. يعنى كنت عايز تكدب عليا كمان
رامى: لا مش كدب .. بس دى حاجة عدت ونستها .. ومفيش داعى نفتكرها تانى
ناهد: خلاص مفيش حاجة :( (وضاربه بوز زى الفل)
رامى: مفيش ايه بس .. انتى مش شايفه نفسك .. والله دى حكاية من زمان بقالها ييجي 3 سنين .. من ايام ما كنا فى الجامعة
ناهد: عارفه .. قولتلى انه من كام سنة .. وعارفه انك بتحبني ..
رامى: طيب زعلانة ليه بقي؟؟
ناهد: بس اصل انا كنت فاكره ان انا اول حب فى حياتك :(
رامى: :) .. طب وهتفرق فى ايه يا ناهد .. المهم انك اخر حب فى حياتى ومفيش حد فى حياتى غيرك
ناهد: :(
رامى: والله يا ناهد ما فى حد فى حياتنى غيرك .. اثبتلك ازاى طيب
رامى: (فى سره) .. حلفت لاقول .. يا رتنى قولتلها محبتش قبل كده ....

****************************

فعلا .. عجبا لحواء

11 Comments:

  1. Soul Life said...
    بص بقى

    هي احلى ما في الحياة

    وهي اللي عايزة الحرق

    معذرة يا بنات يعني .. ومحدش يزعل بالله عليكم

    بس مقدرش اقولك تعليقي على القصة الأمورة دي الا حينما ...

    أتهبل وأتخبط في عقلي واتهبب أتجوز حبيبة قلبي اللي معرفهاش ومش عايز اعرفها قبل عشر ست سنين كدة

    هبقى اقولك بقى

    عارف عارف .. أنا في نظر الكثيرات والكثيرين أيضا بعد هذا التعليق انسان معقد

    بضحك معاكم وبهيس شوية والساعة الآن 4.40 ومش عارف انام .. هع هع


    sorry for disturbance
    الشعب لابد له من حكومه تشكمه said...
    قالتلى قول حبتها ولا محبتهاش,قلتلها بلاش حبيبتى بلاش,دى حكايه وعدت من بدرى هتفدنا بايه,حلفت لقول وياريتنى قلت محبتهاش:))

    سورى ياناهد,,اكتر سؤال غبى من بنت وبيكون اغبى من راجل لما يقولوا: انت حبيت قبلى؟؟؟
    قمة الغباء انت مالكو بالماضى حاسبوا بعض من اول يوم بداتو فيه مع بعض..
    !! a7mad sala7 !! said...
    Soul Life

    يا تحليلك

    متنساش بس بعد عشر ست سنين دى تبقي تيجي ترد ع الموضوع :D

    ونام بقي كفاية كده الساعة زمانها بقت 5 عندك :))
    !! a7mad sala7 !! said...
    الشعب لابد له من حكومه تشكمه

    اايون بالظبط كده :D
    هى الاغنية دى


    هو فعلا بيبقي سؤال غبي اوى بس بيبقي بدافع الفضول اكتر

    مع انه ماضي ومش هيرجع بس نعمل ايه بقي لعقل البنات :P

    نورتيني فى الزيارة الاسبيشال دى :)
    !! a7mad sala7 !! said...
    يقال ان الولد لما يحب يريد ان يكون لحبيبته اول حب فى حياتها

    والانثي لما تحب تريد ان تكون لحبيبها اخر حب فى حياته

    يمكن

    بس انا مش شايف انها غالبا يعنى


    ايه رايكو ؟؟
    morgana said...
    /ما بلاش نتكلم في الماضي/
    الاستاذ عمرو دياب

    هيا غلطانه اه
    بس لو معملتش رد الفعل ده هو اللي هيبقي مدايق:D

    عجبا لادم هو كمان:-P
    !! a7mad sala7 !! said...
    طب هيبقي متضايق ليه بقي

    هو عايز وجع الدماغ يعنى ولا ايه

    وبعدين هو مكانش هيقول اصلا
    هى اللى طلبت


    عجبا لحواء بس بقي :P
    Unknown said...
    السلام عليكم ورحمه الله وبركاته
    لو قلتلها تغير وتقرفك ...
    ولو ماقلتلهاش...
    تكذب عليها وضميرك يأنبك.
    أحمد ربنا علي كدا ...
    وعالج الأمر بالحكمه..
    سلامي ... 
    !! a7mad sala7 !! said...
    فركشاوي ..ناوي

    وعليكم السلام

    نورت يابو الفراكيش :D


    الحمد لله على كل حال


    والله يكون فى عونك يا رامي
    ههههههه
    صاحب رأى said...
    انا معاك ان بنات حواء دايما كدا
    بس المفروض ان بن آدم يفهم انها بتحاول تلفت انتباهه انها مهتمة بيه جدا
    وهى كمان المفروض تهتم بحدود
    واخنا الرجالة لازم نكبر عقلنا شوية عشان المركب تمشى
    بلاش نقفش بسرعه يعنى

    موضوعك حلو يابو ضلاح
    !! a7mad sala7 !! said...
    الله ينور يا باشا

    دا ايه ده
    صوت الحكمة ياخواتى :D

Post a Comment



رسالة أحدث رسالة أقدم الصفحة الرئيسية

Blogger Template by Blogcrowds