محتاجالك يا خالد_7

خالد: ساره !!
ساره: ايوة ساره .. انت لسه فاكر صوتى :)
خالد: ازيك
ساره: انت ازيك .. حمد الله ع السلامة يا خالد
خالد: الله يسلمك
ساره: وماما عاملة ايه واخوك
خالد: كويسين الحمد لله
ساره: وحشتنى يا خالد
خالد: اكتفي بضحكة باهته
ساره: خالد انا ...
خالد: انتى عامله ايه فى دنيتك
ساره: تعبانة يا خالد
خالد: ليه بس .. خطيبك عامل ايه
ساره: سيبته
خالد: ليه كده
ساره: ماتفقناش
خالد: يا خسارة .. دا كان جاهز وجاركو كمان .. معلش تتعوض ان شاء الله
ساره: خالد .. انا
خالد: ايوة
ساره: انا بحبك يا خالد
خالد: ههههههههه .. بحبك يا خالد؟؟
من امتى لامتى
اديني المواعيد
ساره: يا خالد ارجوك انا مش جاية اقولك اعذار .. انا عارفه ان مفيش اعذار مقبولة بالنسبالى
انا بحبك يا خالد .. بحبك فى كل وقت .. وعمر حبي ليك ما قل يوم واحد
انا عارفه انى غلطت .. وعارفه انها غلطة فظيعة
خالد: دى مش غلطة .. دى ماسمهاش غلطة .. دى اسمها .. اسمها .. اسمها ايه بس
مش عارف
مش لاقيلها اسم
ساره: يا خالد سيبك من الاسماء .. خلينا نبدأ صفحة جديدة
خالد: لااااء .. ابوس ايدك .. كفاية صفحات بقي
انا تعبت
دا مش جرح وهيلم .. دى علامة ومبتروحش
فى حاجات بتتحفر يا ساره .. مش موقف ويتنسي
ساره انا سافرت عشانك
مش عشان اى حاجة تانية
اخترت اكون بعيد عن اهلى وبلدى .. اخترت ازل نفسي واستحمل البهدلة
اخترت اضيع سنتين من عمرى فى مرمطة ووحده .. اخترت الحاجة اللى تقربنى منك فى اسرع وقت
واخترت كل حاجة بارادتى مش بضغط من حد .. كان كل ما اتمنى انى اكون حد يستاهلك بس
ساره انا كنت ماشي بخطاكى .. كنت بستمد منك ثقتى
ساره انتى كنت كل حاجة فى حياتى
ساره: وليه كنت يا خالد .. ماحنا فيها
خالد: فيها؟؟ .. فيها ازاى بس
احنا كل واحد فى طريق من يوم ما فكرتى ترتبطى بحد غيري
ساره انا مش ستبن .. الفردة الاصلية تنام تحطيني مكانها
انا بني ادم وليا كرامه .. انا مش هكون واحد فى طابور مستنى دوره .. دا لو جه دوره
ساره: يا خالد انت ..
خالد: .. انا ايه
انا ايه بس .. مفيش حاجة هتخليني ابقي خالد بتاع زمان
ساره انتى بتقولى سبته عشان ماتفقناش .. يعنى لو اتفقتو كنا هنقولكو مبروك
ومعنى كده انك لو ماتفقتيش معايا هنقول لغيري مبروك
ساره: انا راضيه بكل اللى تحكم بيه
خالد: معادش ينفع .. خلاص مبقاش وقته الكلام ده
انا كنت راضي بكل اللى انتى تقولى عليه .. عملت حاجات من غير مافكر
عشان بس اثبتلك ان انا اد كلمتى مع باباكى
ازاى هاجى تانى واحط ايدي فى ايده وهو بس عاوز واحد مجرد لائق ماديا
وازاى هكمل معاكى حياتى مع حد كان فى يوم من الايام ايده فى ايد غيري
لو قلبي قدر كرامتى مش هتقدر
ساره: هو احنا في بينا كرامتى وكرامتك يا خالد
خالد: اه بقي فى .. دلوقتى فى .. لازم يبقي فى
ساره: يا خالد انا مش طالبه منك اكتر من انك تبقي رحيم بيا .. وتقدر ان انا محبتش ولا هحب فى حياتى غيرك
خالد: وانتى مكنتيش رحيمة بيا ليه لما اترميت فى بلد تانية ومعزول عن العالم عشان بس اعجب وارضي واتقبل
ساره: يعنى مش هتسامحنى يا خالد
خالد: ممكن اسامح فى اي حاجة غير ان حد يمس كرامتى
ساره: خالد احنا كرامتنا واحدة
خالد: كانت .. او كانت هتكون واحدة
سارة انتى بعتى .. وبعتى برخيص اوى .. عينك اتعمت عن حاجات كتير اوى
انا لو رجعتلك عمرى ما هسامح نفسي على غلطة غلطها فى حق نفسي
ساره: انا غلطة يا خالد؟
خالد: اسف
ساره: متتاسفش .. انا عارفه ان من حقك تقول اى حقك .. ومش هعاتبك ولا هلومك .. ومش طالبه منك اكتر من انك تفتح قلبك وتسيب نفسك للى هيوديك ليه قلبك
خالد: معادش فى قلب خلاص .. جزء فى جسمي وفقد فاعليته .. والبركة فيكي
ساره: خالد انا بتعذب .. ارجوكــ..
خالد: ارجوكى انتى كفاية بقي .. كفاية لحد كده .. ولا تتعبي نفسك ولا تتعبيني .. ربنا يكرمك وتلاقي حد كويس وبردو يرضي طموحك وطموح بابا
معادش ليكي فى قلبي غير دعوة .. معنديش اللى اديهولك غير كده
ساره: خالد .. انا محتاجالك يا خالد
((محتاجالك يا خالد))
............
خالد: بصوت مختلط بالبكاء .. يا خساره
يا خساره يا ساره .. ضيعتى كل اللى بنيناه .. خسرتيني وخسرتى نفسك
وخسرتى حياة كاملة كانت هتتغير مسارها بالنسبة لشخصين
محتاجالى؟؟ .. مانا ياما احتجتلك
دانا كمان عمرى ما احتاجت من الدنيا غيرك .. وادى الدنيا ادتنى كل حاجة غيرك
كل حاجة موجودة الا ساره
ساره: بصوت منفطر من العياط .. انا معاك اهو يا خالد .. انا ملك اديك
خالد: لا .. مش دى ساره
مش دى ساره اللى عرفتها ولا حبيتها ولا بنيت احلامى عليها
ساره اللى اعرفها ماتت من حياتى
خلاص مفيش ساره
.........

:(

45 Comments:

  1. !! a7mad sala7 !! said...
    البوست الجاى مناقشة عامة للقصة
    MOROOOO said...
    اوكـ يا كبير

    نهاية مأساوية بحتة :((

    بس هو كده واد جدع جداااااا :)

    تسلم ايدك على القصة
    lostlove said...
    تمام التمام
    كده صح
    كنت هتغاظ اوي واتعصب لو كنت خليتو داس علي كرامتو
    ورجع ليها
    هي باعت مره
    بجد نهايه حزينه اه
    بس خالد اتعزب في القصه
    تحياتي ليك
    اتمني التوفيق
    lostlove said...
    صح نسيت

    هات قصه تاني
    بقي
    عشان يتبع بتاعتك اكتر حاجه فكرها في كل جزء:D:D

    تحياتي
    ShiMOo said...
    اممممممم طيب يا ترى لو كان هو اللي اهله ضغطو عليه وسابها وخطب
    ورجعلها تاني بعدها, كانت هتسامحه لما يقولها "سامحيني" ؟

    خلي السؤال ده بقى لمناقشة البوست :)

    عموما من وجهة نظري نهاية متوقعه
    e_emy said...
    )):

    نهاية صعبة اوووى
    بس هو عنده حق ف كل الى بيعمله

    بس برضه الى بيحب بيسامح وبينسى الجرح ):

    يمكن لو حصل مشكله يفتكره تانى
    بس الدنيا مش هتقف طالما الاتنين بيحبوا ويسامحوا وينسوااا هتمشى الدنيا احلى
    Boba said...
    عاقبها بدبحه
    :(
    غير معرف said...
    عين العقل
    انا said...
    نهاية طبيعية
    ولكن ينتصر القلب احيانا..
    !! a7mad sala7 !! said...
    MOROOOO

    اشطه يا كبيرة
    مفيش يتبع تانى اهو :D

    يتبع فى القصة الجاية بقي
    !! a7mad sala7 !! said...
    lostlove

    شكرا لحسن استماعكم
    ولحسن شحاته
    ولكل الحسنات

    وانتظرونا فى قصة اخرى :D
    !! a7mad sala7 !! said...
    ShiMOo

    ماشي هنتكلم عنها دى

    شكلك كنتى متابعة فى صمت ;;)
    !! a7mad sala7 !! said...
    e_emy

    مش كل جرح بيتنسي
    ودا بالذات مش جرح
    انا بعتبرها خيانة
    ودى ملهاش حل من وجهة نظرى

    يعنى هو لو كان كمل معاها حياته
    كل ما يفتكر انها كانت فى يوم ايدها فى ايد غيره وهو موجود مش هيبقي مستريح
    ولا هيسامح نفسه

    وبالتالى هى مش هتبقي مستريحة
    انا شايف ان دى انسب نهاية
    !! a7mad sala7 !! said...
    Boba

    يا امرأة قلبت تاريخي :: انى مذبوح فيكي
    من الشريان .. الى الشريان
    :D

    الله يمسيك بالخير يا كاظم


    ابدا

    هو اصلا مدبوح فيها
    ولو كمل معاها بردو مدبوح فيها

    لكن لو بعد عنها جرحه هيلتأم شوية بشوية

    هنفسر بعدين
    !! a7mad sala7 !! said...
    الغير معروف


    وعقل العين كمان
    !! a7mad sala7 !! said...
    انت


    احيانا


    ولكن لضعاف الشخصية
    sadness princess said...
    تماااااااام
    دا اللى فعلاً كان لازم يحصل عشان يرجع كرامته اللى داستها بكل سهوله ومفرقش معاها اللى عمله عشانها وعشان بيحبها

    قصه جميله اوى يا احمد ياريت تستمر فالكتابه دايماً

    تسلم ايديك

    تحياتى
    !! a7mad sala7 !! said...
    sadness princess


    ربنا يخليكي يا نادين
    يعنى ييجي منى :D
    ЯậŇ MỗŘỹ said...
    السلام عليكم و رحمة الله و بركاته
    اقول ايه بس
    ده انا لسه مبطله عايط و ما صدقت ابطل عايط اجى اعيط هنا تانى
    اااااااااااااااه يا بنى المفروض تقدر انى لسه مديه لنفسى حقنه و تخف العيار
    يعنى لما اموت من العايط هترضى
    شكرا برده يا بشمهندس احمد على النهايه النكديه دى
    halaS demahoM said...
    \\
    البوست الجاى مناقشة عامة للقصة
    \\
    طب والامتحان امتي ان شاء الله

    انا ليه وجهة نظر اخاف اقولها
    اصلها هتتعارض مع معظم اللي علقوا هنا

    بس هقول لحضرتك علي حاجه
    الواحد لما بيقيم حد او يقرر يبقي عليه ولا لاء
    عمرها ما بتتحسب زي ما الاستاذ خالد عمل كده
    لاء في ميزان
    كفه بتكون فيها الحلو وكفه بتكون فيها الوحش
    والكفه اللي بتوزن اكتر هيا اللي بتحدد
    اعتقد كون الاخت ساره استنت فتره كبيره
    اتقل بكتير
    من كونها اتخطبت وسابت خطيبها
    رغبة من اهلها في كده

    وفين التسامح بقي وفين وفين وفين

    ونبقي نتناقش في حصة المناقشه
    اللي الناس هتخبط في بعضها وهتفجر قنابل فيها
    وادي اول قمبله مسيله للدموع
    زقطط بقي
    lemoo said...
    هو انا عامتا مبحبش النهايات الحزينه بس قصه جميله من مؤلف رائع
    sandra said...
    اسلوب جميل اوي فى السرد والحوار


    مزيد من التقدم ان شاء الله
    !! a7mad sala7 !! said...
    روان

    انتى بتموتى فى العياط يا بنتى

    لو حكيتلك نكتة هتعيطي

    صعب اعمل نهاية غير دى
    !! a7mad sala7 !! said...
    juegth night


    الامتحان وقت ما يكون
    العملى بتاعنا 9
    بس هكتب بردو

    ونتناقش فى الحصة بقي
    !! a7mad sala7 !! said...
    lemoo

    ربنا يخليكي
    وممكن تدينا النهاية اللى كانت فى دماغك بقي البوست الجاى :)
    !! a7mad sala7 !! said...
    sandra

    يادى النور
    يادى النور


    ودا بقي الرد المجمل
    بعد المتابعه فى صمت

    اسعدنى متابعتك جدا
    نورتى :)
    ЯậŇ MỗŘỹ said...
    \\
    انتى بتموتى فى العياط يا بنتى
    لو حكيتلك نكتة هتعيطي
    \\
    و ربنا مش نكديه للدرجه دى
    ميرسى على النهايه
    هفضل فاكراهالك على طول انك نكدت عليا
    جراسيس سنيور
    !! a7mad sala7 !! said...
    يادى النيلة

    هتشيلنى ذنبها اهو :(
    غير معرف said...
    نهايه كويسه بس كان لازم علي الاقل يسمعها يعرف مبررتها هي اه غلطت انها خبت عنه واتحججت بمرض مامتها كانت لازم تحكيله حتي عشان تبرا نفسهابس للصبر حدود معتدقدش انه من السهل علي اي بنت انها تقف في وش اهلها ابدا حتي ولو لسنه واحده مش تلت سنين ده بيبقي موقف محرج قوي خصوصا ان اول حجه بتقولها (انها رافضه المبدأ ككل )وبيبقي صعب انها بعدين تقولهم انه هو ده ومفيش غيره هيقوللها يعني رفضك في الاول كان علي شانه والنظرات بقي تبتدي انتي يطلع منك كل ده بقي البنت الصغيره كبرت وبقي ليها راي ويقسروا كل تصرفتها القديمه وخروجها من البيت ووقفتها قدام المرايه علي ان ده كان السبب واحراج مش ممكن يحس بيه الا اللي جربه لما كل يوم تنام وتصحي وهي بتفكر يعالم ايه اللي هيحصل النهارده هيزعقوا ويغصبوا عليا ولا ايه لان مبررها في نظرهم مش حاجه واصلا هي بتبقي مكسوفه وحاسه باحراج الدنيا كلها وهي بتقوله انا معاك انه جرح مش هيتنسي ابدا لكن بالتفاهم بانها تعرفه حجم الضغط اللي كان عليها وانهاكانت من جواها موافقه علي الخطوبه دي لحد مهو يرجع عشان تسكت اهلها بس كان هو بنفسه هيعتذرلها عن سوء ظنه وغيبته وعن ظروفه اللي اضطرته يسافر عشان يكون نفسه بس اسلوب متميز وتفصيلي ملمبالاحداث
    !! a7mad sala7 !! said...
    احم احم

    ايه الكلام الكبير ده
    او يمكن عشان كتير :D

    بس كل اللى مدايقنى انه غير معروف
    ليه طيب كده زعلنى

    ما علينا

    على فكرة هو ممنعهاش تتكلم
    وهى قالت بنفسها انا عارفه ان مفيش مبررات ليا وطلبت انه يكون رحيم بيها
    هى كان المفروض هتستناه سنة بس وكان هيحصل
    هو طول هناك لان مكان ليه نفس يرجع
    وبعدين كونها تستنى سنة او تلاتة فدا كان باختيارها
    وهى اللى قالت هستناك
    لان هى بتحبه .. ولو مش بتحبه متقولش كده
    وحتى لو بتحبو ومش هتعرف توفى بوعدها مكانتش تعلقه بيها

    وهى لو صريحة مع اهلها من اول يوم مش هتحصل المشاكل اللى بتقول عليها

    وبعدين يا جماعة محدش يقولى غصبوها
    لان الكلمة دى اتلغت من معجم الجواز
    مفيش حاجة اسمها غصب دلوقتى

    موافقة العروسة شرط اساسي لاتمام الجواز
    مفيش حد بيتجوز غصب عنه

    والبنات دلوقتى ما شاء الله بقي عندها الوعى الكافى جداااا انها توافق وترفض وتحدد مصيرها
    فدى مش شماعة نعلق عليها المشكلة

    اولا واخيرا اسعدنى ردك جدا
    وكنت اتمنى يكون من شخص معروف
    حصل خير :)
    Unknown said...
    نهاية مؤلمة ...

    بس قصة جميلة

    نتعلم منها ..
    كتيييييييييير

    خليها لبوست المنقشة بئا..
    !! a7mad sala7 !! said...
    ماشي بئا


    :)
    صاحب رأى said...
    استااااااااااااااااااااااااااذ
    ايوه كدا
    احب انا النهايات الواقعيه
    قسورة الزواوي said...
    اجد ني مضطر لاعادة ردي في الجزء السابق هنا ولا حول ولا قوة الا بالله
    فلا تكن اخي كالذي قيل له اتق الله اخذته
    العزة بالاثم واعيذك من ذلك .

    الرد


    ..

    سلام عليكم ورحمة الله وبركاته

    همسة بسيطة في اذنك اخي الكريم

    لو نظرت نظرة خاطفة على هذه القصص وما ترسخه في نفوس
    الشباب , من أختلاط أولا
    ونظر محرم الى الحديث عن الحب والعشق
    والى ما لا يحصى مما لا يرضي الله تعالى

    كأنك هنا ترسخ لفكرة الاختلاط والعشق
    والحديث بين الرجل والمرأة , أرجوك
    لاتنسى أنها كلها مخالفات شرعية

    فلكم جرتنا تلك القصص الى التوهم
    والعيش في دنيا التخيل وقصص الهوى

    لي سؤال واحد يجب أن يسأله كل شخص
    يقدم على عمل أي عمل

    هل يقربنا هذا العمل الى الله ؟
    أم هل يرضاه الله تعالى ؟
    أو يسرنا أن يكتب في صحائفنا يوم
    العرض على الله تعالى ؟

    أو سؤال أخر نسأله أنفسنا

    هل يا ترى سيكتب عملنا هذا ملك اليمين
    أو ملك الشمال ؟

    والله نسأل الهداية والثبات

    معلش نسيت

    في موضوع على منتدى كليات حاسبات
    ومعلومات مصر

    http://www.forums.fci4all.com/index.php?showtopic=18184

    يا رب الجميع يشوفه

    انا مش عاوز اكتر من انك تقرأ
    بقلبك , وتستبرأ لدينك
    سلام عليكم
    halaS demahoM said...
    Qasswrah
    بعد اذنك يا ابوصلاح اسمحلي بالطلعه دي

    اولا جزاك الله عنا كل خير
    ثانيا شكرا علي رد سيادتك واصرارك عليه
    ثالثا شكرا عــ اللينك
    رابعا بقي ندخل في الموضوع

    \\
    فلكم جرتنا تلك القصص الى التوهم
    والعيش في دنيا التخيل وقصص الهوى
    \\
    اعتقد ان كل الناس اللي متابعه المدونه دي كبار بما فيه الكفايه
    وكل واحد عارف الكلام ده كويس
    وفاهم معانيه وابعاده
    ومعظمهم جربه كمان
    يعني معاليك مش بتكلم اطفال في ابتدائي ولا اعدادي
    مجرد انهم يقروا قصه هيسرحوا بخيالهم ويقعدوا يخمنوا ويتخيلوا حاجات
    اي نعم القصص دي بتودي في داهيه فعلا
    بس لو حضرتك مشفتش في حياتك كلها غير القصه دي يبقي ليك الحق انك تعلق وتزعل وتقول وتعيد وتكرر رد
    انما في ظل الجو اللي عايشين فيه دلوقت
    بتلاقي افلام واغاني وحاجات القصه دي بالنسبالها صفر عــ الشمال
    وكونك مشفتش غير دي
    فده تقصير منك
    ولو هتعدل يبقي تكلم كل اللي تشوفه
    مبقولكش متعلقش هنا
    لاء البلوج مفتوحلك ولكل الناس
    بس خليك عادل
    ونصيحه ليك
    لما تبدأ في الضرب ... اضرب في اقوي حاجه
    مش في قصه علي بلوج محدش بيتابعه غير عشرين تلاتين واحد
    انا مبجادلش معاك في حاجه
    انا اتفقك ميه في الميه
    بس بردوا
    احرجت الراجل مره ومعرفش يرد عليك
    خلاص مش هتقعد تنطله كل شويه وتعلق بقي
    واعتقد انك لو دخلت دخله غير دي وفتحت باب للمناقشه من جهه اخري كان هيبقي افضل
    لما يبقي في مرض مينفعش نتخلص من حامله بل نحاول نعالجه
    اتمن مكونش دايقتك

    \\
    هل يقربنا هذا العمل الى الله ؟
    أم هل يرضاه الله تعالى ؟
    أو يسرنا أن يكتب في صحائفنا يوم
    العرض على الله تعالى ؟
    \\
    شكرا علي الجزئيه دي
    بس
    مش عارف اعلق صراحه
    مش عشان مفيش كلام
    عشان الكلام كتير اوي ومش هيكون مترتب
    بس هقولك
    لما نتسلم لناس اهل للثقه ويعلمونا حاجات غلط
    اعتقد انك تروح تحاسبهم هما
    لما تلاقي دكاترة جامعه قد الدنيا
    مهمله في وقتها وبتضيع وقت في حاجات تافهه
    مينفعش انت تيجي تحاسب الطلبه
    وكمان مش عاوز تحاسب الدكاتره
    ولما تلاقي وجهة نظر الراي العام
    ماشيه في اتجاه كده لوحدها
    متجيش تحاسبنا احنا
    مش عارف اتكلم صراحه

    \\
    هل يا ترى سيكتب عملنا هذا ملك اليمين
    أو ملك الشمال ؟
    \\
    وما خفي كان اعظم

    \\
    انا مش عاوز اكتر من انك تقرأ
    بقلبك , وتستبرأ لدينك
    \\
    بصراحه الموضوع تحفه وجميل ومفيش بعد كده
    وجزاكم الله خير عليه
    وجعله الله في ميزان حسناتكم

    \\
    والله نسأل الهداية والثبات
    \\
    والله نسأل الهداية والثبات
    والله نسأل الهداية والثبات
    والله نسأل الهداية والثبات

    س ل ا م ي
    قسورة الزواوي said...
    بسم الله وكفى والصلاة والسلام على المصطفى

    حقيقة كبداية رد كرد حضرتك متوقع

    كلامك دل على حاجة انا عاوز اوصلها

    ان القصة على صغرها غلط , وبتقولي

    اغاني وافلام , والقصة دي صفر على

    الشمال بالنسبة للكلام ده , جميل جدا

    بس حضرتك أبقى تخيل الموضوع لما ترد

    بشكل اكبر , هو في هنا فيلم ولا

    أغنية ؟ لا طيب في قصة

    فيها مخالفات للشريعه الاسلامية وكلام

    بين شباب وبنات وحاجات كتير لم يسمح

    الاسلام , يبقى الواحد يقول كلمة الحق

    مع صغر القضية من وجهة نظرك , بس

    حاجة غلط , وقولنا غلط , اضربلك مثل

    أممممممممم ,عن أبي هريرة رضي الله عنه

    قال: قال رسول الله صلى الله عليه وسلم

    : "الإيمان بضع وسبعون – أو بضع

    وستون – شُعبة، أعلاها: قول: لا إله إلا

    الله. وأدناها: إماطة الأذى عن الطريق.

    والحياء شعبة من الإيمان" متفق عليه

    يعني حضرتك لو لاحظت اماطة الاذى عن

    الطريق من الايمان , ميبقاش الامر

    بالمعروف والنهي عن المنكر قل أو

    أوجب . تمام

    التغيير بيبدأ واحدة واحدة والحاجات

    الصغيرة , بكرة تبقى اكبر , وياريت

    بدل التخذيل والصد عن سبيل الله , على

    الاقل تسكت ,لو هتجادل يبقى تجادل في

    حاجة أنا غلطان فيها وخالفت الشريعه

    وياريت تقرأ الموضوع الي حاطط اللينك

    بتاعه , يارب تستفيد , وهرحب بأي

    أستفسار. اسف على الاطالة

    واعتذر لصاحب المدونة
    halaS demahoM said...
    بعيد عن الكلام الكتير
    عشان مقولش حاجه اتحاسب عليها
    انا مبجادلش في حاجه
    بس
    هسال حضرتك سؤال
    بالله عليك
    انت مقريتش القصه دي كلمه كلمه ولو سالتك فيها اي سؤال هتجاوبني؟
    ولاحظ اني حلفتك بالله

    يمكن حد يفهم قصدي
    !! a7mad sala7 !! said...
    Qasswrah

    لا متجدش ولا حاجة
    انا شوفت ردك ووصلنى فكرتك بس مكانش فى وقت ارد ساعتها
    وكنت هرد عليك والله بس فى وقته

    //فلا تكن اخي كالذي قيل له اتق الله اخذته
    العزة بالاثم واعيذك من ذلك .//

    اولا مش اوى كده
    متحسسنيش انها جريمة

    ثانيا
    موضوع الاختلاط والنظر المحرم والكلام ده
    دا مش هييجي من قصة
    دى مجرد قصة
    وبعدين مش بحكى حاجة يحلم بيها شاب او بنت
    دى قصة من واقع الحياة
    وهتلاقيها فى بيتي او بيتك او بيت اى حد
    بتحصل يعنى
    مش هقولك امال الافلام والمسلسلات ايه لانك انت مش بتتفرج
    بس هقولك لان الناس كلها بتتفرج وبتشوف اللى افظع من كده وبتشوووف كمان مش بتقرا
    يعنى مش تدوينة فى بلوج هى اللى بتقوم الدنيا
    عارف انك هتقولى ابدا بنفسك ومتتفهمش من الامر
    مش بتفه ولا حاجة بس القصة مفهاش اللى يحسب جريمة يعنى
    اولا مش شايف اختلاط بمعناه المقصود
    ولا شايف حاجة شاذة عن المفروض
    يمكن في بعض الاخطاء الشائعة اللى عايشينها فى حياتنا
    بس هما دول البني ادمين مش هتحقق الكمال مهما كان
    الكمال لله وحده


    وبعدين حتت بيقدم ايه للدين
    او ايه وظيفته والكلام ده

    ارجع واقولك مش كل حاجة بنعملها لازم تكون لها وظيفة او تحسب فى ميزان الحسنات
    حاجات كتير فى حياتنا ملهاش محل من الاعراب

    وانا هدفي الاول من البلوج مش انى اوصل رسالة للناس او اقدم عمل خيري
    انا بعمل اللى بقدر عليه وعلى قدر المستطاع
    لكن الهدف الاول من التدوين هو التعبير عن حاجات انا لوحدى بحس بيها
    او شايفها او شيئ من هذا القبيل

    فلو بصيت لحياتك او حياة اى حد مش لازم يكون كل حاجة بتعملها ليها وظيفة

    مش بس القصة دى يعنى


    والموضوع هنقراه يا سيدي حاضر

    جزاكم الله خيرا عنا وعن الجميع

    نورت :)
    !! a7mad sala7 !! said...
    juegth night

    ابو صلاح
    سبنالك الطلعة

    بس عاتب عليك فى حتة صغيرة

    //احرجت الراجل مره ومعرفش يرد عليك
    خلاص مش هتقعد تنطله كل شويه وتعلق بقي//

    مين قالك ان انا معرفتش ارد يعنى
    وبعدين حتى لو معنديش رد هقوله انت صح


    كل طلعة وانت طيب
    أميرة علي كوكب مهجور said...
    هو كده خلاص مش هيرجعوا :(
    !! a7mad sala7 !! said...
    لا مش هيرجعو :(


    وهى دى العيشة

    مع كوك زيرو :D
    اقصوصه said...
    احنا بشر

    والبشر تغلط

    اعتقد ان من حق اي شخص فينا

    انه ياخذ فرصه ثانيه :)
    !! a7mad sala7 !! said...
    وأى غلطة

    دى ضربة قاضية

    وانا اعتقد انك مقرأتيش القصة من اولها :)

    عموما البوست الجاى للمناقشة ويا ريت تنورينا
    غير معرف said...
    Nice work, pleased to have stumbled on this place on blogs list.
    This is the type of content that should be shared
    online. It'd be great to see stuff like this on web 2.0 site list. It's a disgrace that the search engines aren't giving blogger.com a higher ranking. If you're interested, please come and consult my web site.
    Kudos

    Also visit my web-site - Asset it Management software
    غير معرف said...
    I just wanted to inform you that I found your page on and though I appreciated looking through your post, it seems your blog acts up in
    a few browsers. Whenever I view your page in Safari, it looks fine however, when opening in Firefox,
    it has a bunch of overlapping difficulties. Just so you know.



    my webpage; insurance online ireland

Post a Comment



رسالة أحدث رسالة أقدم الصفحة الرئيسية

Blogger Template by Blogcrowds