محتاجالك يا خالد_6

خالد انعزل عن العالم
خالد فقد كل معانى الحب .. الاخلاص .. الوفاء .. التضحية .. الارتباط
خالد اتحول من قلب نابض بالحنين والاشتياق للرجوع لمصر
لأله شغل لا ينقطع عملها
شغل ليل مع نهار
بيحاول يحط كل همه فى الشغل

خالد كان المفروض معاد رجوعه مصر اخر الشهر ده

علاء اخو خالد بيتصل بيه

خالد: الو
علاء: ايوة يا خالد ازيك
خالد: الحمد لله .. ازيكو انتو عاملين ايه .. امى كويسة؟؟
علاء: كويسين الحمد لله .. هنستناك امتى يا خالد .. النهارده 25 فى الشهر
خالد: تستنونى فين
علاء: نتستناك هنا.. مش انت راجع اخر الشهر ده؟؟
خالد: لا لسه شوية .. انا مديت مدة اقامتى 6 شهور كمان
علاء: ليه كده يا خالد .. انت بقال كتير اوى عندك .. ومنزلتش ولا اجازة حتى
خالد: معلش يا علاء الشغل عايز كده .. ربنا يقدم اللى فيه الخير

عدا 3 شهور كمان والحال كما هو عليه
خالد مبيعملش حاجة غير انه يشتغل

علاء بيتصل بخالد
خالد: سلام عليكم .. ازيك يا علاء
علاء: خالد يابنى ازيك عامل ايه .. كده متسالش عن امك خالص يا خالص
خالد: امى؟ ازيك يا حبيبتي .. مشاغل يا امى والله
ام خالد: امك موحشتكش يا خالد .. بقي هنت عليك تسيبنا كده كل الفترة دى
خالد: اعمل ايه بس يا امى .. مش احسن من القعدة فى مصر
ام خالد: لا يا خالد مش احسن .. رب هنا هو رب هناك
ووقت ما ربنا هيفرجها عليك .. هيفرجها فى اى حته
ارجع بقي يا خالد .. عايزة افرح بيك قبل ماموت يابنى
ولا انت مش عايز تفرحنى؟؟
خالد: بعد الشر يا امى .. ربنا يديكي الصحة وطولة العمر
ام خالد: يا خالد انا مستنياك .. ومش هرتاح ولا يهدالى بال الا لما اشوفك ادامى وافرح بعيالك كمان
خالد: ان شاء الله يا امى .. ان شاء الله

هما يا دوبك اسبوعين
وبعد الحاح من اهل خالد انه يرجع
قرر انه يحزم الامتعه ويرجع بلده
خالد صفي كل شغله فى السعودية وقرر انه ينزل مصر
واكتفي بسنتين من الانقطاع الكامل عن كل وسائل الحياه
سنتين عدو مشافش فيهم غير المر والتعب

رجع خالد مصر
استقبله اهله بعد طول غياب

ام خالد: ازيك يا خالد يابنى .. كنت عامل ايه هناك
خالد: والله يا امى حالتى كانت زفت .. زى الطور اللى مربوط فى ساقية
ولا اعرف حاجة عن حد ولا حد يعرف عنى حاجة
ام خالد: وايه يابنى اللى غاصبك على كده
متقعد فى بلدك بكرامتك .. ورزقك هيجيلك بردو
انساها بقي يا خالد .. ربنا هيرزقك بست ستها
خالد: :) حاضر يا امى .. حاضر

خالد رجع كبير اوى
قضي سنتين من الشغل المتواصل وصل بيهم لحاله مادية كويسة اوى

خالد اللى راح السعودية عكس اللى رجع منها تماما
كان رايح بقلب مليان وجيب فاضي
رجع بقلب فاضى وجيب مليان
وبكده بقي خالد اللى يستاهل اى بنت يشاور عليها
بس مش دا خالد اللى بيعتبر الجواز سفقة من ضمن صفقات الشغل

خالد فتح شركة محاسبة كبيرة وربنا كرمه من وسع
خالد بيفتكر ايامه قبل ما يسافر .. وايامه بعد ما جه
سبحان مغير الاحوال

سلوى بتتصل بخالد
خالد: الو
سلوى: ازيك يا خاااااااالد .. عامل ايه يا واد .. ولا خلاص انت كبرت على واد دى
خالد: هههههه ازيك يا سلوى .. لا طبعا منكبرش عليكى سوسو
سلوى: يا لهوى انت لسه زى مانت يابنى .. مش هتبطل بقي
خالد: ههههههه لازم انكشك كده يا سووو
سلوى: ههههههه عامل ايه يا خالد .. حمد الله ع السلامة يابنى
خالد: الله يسلمك .. انا تمام الحمد لله
سلوى: تمام؟ عليا بردو
خالد: قصدك ايه يعنى
سلوى: انت عارف قصدى كويس
خالد: طيب اعمل ايه يعنى .. نصيب بقي
سلوى: ايوة نصيب ونعم بالله .. كل واحد بياخد نصيبه طبعا
خالد: الحمد لله
سلوى: ساره مش بتكلمك خالص؟
خالد: ساره؟
سلوى: ايوة .. ساره
خالد: لا مكلمتنيش .. وتكلمنى ليه بقي
سلوى: الله .. تقولك حمد الله ع السلامة يا اخى .. احنا مش زمايل بردو ع الاقل
خالد: ايوة .. زمايل
سلوى: اخص .. بت ندلة .. انا هشدهالك لما اشوفها
خالد: لالالالالالالا .. لا تشدى ولا بتاع .. ربنا يسهلها
سلوى: لا تشدى ولا بتاع؟ .. من قلبك الكلام ده؟
خالد: ايوة من قلبي
سلوى: لا يا خالد مش من قلبك
خالد .. روحت فين
خالد: ايوة معاكى
سلوى: معايا فين بس .. مش هتتصل بساره؟
خالد: لاء
سلوى : براحة بس .. لا ليه
خالد: بتتكلمى ازاى يا سلوى .. انا اللىاتصل بيها بردو .. مــ
سلوى: خالد .. ساره فشكلت خطوبتها
خالد: أأ .. ايه
سلوى: زى مانت سمعت
خالد: وانا اعمل ايه يعنى
سلوى: لا تعمل كتير .. يالا اتصل بيها
خالد: لا بردو يا سلوي
سلوى: متبقاش عندى بقي .. بالزمة مش واحشاك؟
خالد: مش هتصل
سلوى: واحشاك ولا لا .. رد
خالد: خلاص يا سلوى الموضوع ده انتهى
سلوى: لا مانتهاش يا خالد .. انت بتحب ساره وهى بتموت فيك
خالد: زمان .. كان زمان
سلوى: زمان وكل زمان .. متركبش دماغك وخليك كويس
خالد: اخليني كويس؟ .. وانا كده وحش ولا ايه
سلوى: لا خالد مش وحش .. خالد قلبه طيب وكمان خالد عاقل
خالد: طيب ايه يا سلوى .. انتى ترضيهالى؟
سلوى: بص اصل ..
خالد: ترضيهالى؟
سلوى: يا خالد متبصلهاش كده .. وسيب قلبك يدلك
خالد: لا مش هسيب قلبي يا ساره .. قلبي دا اللى مشانى وراكو اول يوم شوفتها فيه
وقلبي دا اللى ودانى وراها المكتبة
وقلبي دا اللى خلانى اشوف نتيجتها قبل نتيجتي
وقلبي دا اللى خلانى استنى بالساعات فى الجامعة بعد ما الناس مشيت عشان افرحها بنفسي .. عشان بس مجرد اشوف نظره فرح فى عنيها وابقي انا اللى بشرتها
قلبي دا اللى خلانى احبها 6 سنين ورا بعض من غير مابص لغيرها ولا افكر فى حد تانى
قلبي دا اللى خلانى اشتغلت حاجات مش بتاعتى عشان اعمل اى حاجة توصلنى ليها
قلبي دا اللى خلانى اروح اكلم باباها وانا عارف انه هيرفض لمجرد انى ارضيها
وقلبي اللى خلانى اسافر سنتين اتعذب فيهم عشان ابقي حاجة تستاهلها
قلبي؟
قلبي ايه بقي
قلبي ايه بس
سلوى: يا خالد حرام عليك نفسك .. متعملش فى نفسك كده .. متشيلش نفسك اكتر من طاقتها
خالد: يا سلوى ساره دى اللى حببتني فى الدنيا .. وهى بردو اللى كرهتنى فى الدنيا
هى اللى خلتنى اسافر وانا نفسي ارجع تانى يوم عشان الحقها
وهى اللى خلتنى مش عاوز ارجع من هناك خالص بعد ما الحياة مبقالهاش طعم
سلوى: لا ليها يا خالد .. سامح انت بس .. وسيبك م اللى فات
خالد: اسيبنى؟ .. انتى بتتكلمى ازاى
اسيبنى من البهدلة والمرمطة اللى شوفتهم فى مصر
ولا اسيبنى من الذل والغربة اللى شوفتهم برا مصر
ولا اسيبنى من سنتين ضيعتهم من عمرى بعيد عن اهلى وبعيد عن الدنيا كلها كل همى انى اعمل اللى يخليني اعجب فى عين ابوها
اسيبنى من ايه ولا ايه
لا يا سلوى .. لا
سلوى: راجع نفسك يا خالد .. ومتخليش الحماس ياخدك
انت بتحب ساره .. ومش هقولك اكتر من كده
ومتكلمش ساره يا خالد .. اعمل اللى يريحك
سلام

خالد مقضي وقته كله فى الشغل
نجاحاته متتالية .. لكن حالته النفسيه مش مظبوطه

ام خالد: مالك يا خالد
خالد: مليش يا امى .. انا كويس الحمد لله
ام خالد: كويس ايه يابنى هو انا مش عارفاك
خالد: مفيش حاجة يا امى .. شوية ارهاق من الشغل بس
ام خالد: ريح نفسك شوية يا خالد .. الشغل مش هيطير
خالد: حاضر يا امى
ام خالد: وشد حيلك بقي يا خالد .. عايز افرح بيك قبل ماموت
خالد: بعد الشر عنك .. ربنا يديكي الصحة وطولة العمر
ام خالد:يا خالد انت بقيت شاب ميتعيبش .. شاور على اى بنت .. عايزة اشوف عيالك بقي
خالد: ربنا يسهل .. ربنا يسهل يا امى
ام خالد: ربنا يوقعك فى بنت الحلال يا رب
خالد: يا رب

خالد دخل ينام
موبايله بيرن .. رقم غريب

خالد: الو
ساره: خالد..
خالد: ساره؟؟!!!

يتبع .. ولا بلاش؟ :D

40 Comments:

  1. ЯậŇ MỗŘỹ said...
    السلام عليكم و رحمة الله و بركاته
    كممممممممممممممممممل
    و الله قايمه من السرير مخصوص علشان اقراها يعنى لو نقلونى مستشفى يبقى بسببك
    كمل بقى حاجه فرياحى كفايه اللى الواحد فيه
    سلام بقى
    غير معرف said...
    //يتبع .. ولا بلاش؟ :D//

    بلاش مين انت مجنون

    بعد ما علقتنا كده

    وبعدين انت فواصلك كترت
    دا ولا اعلانات رمضان


    سرع شوية بقي :(
    !! a7mad sala7 !! said...
    روان


    لااااااااا
    خليكي
    القصة مش هتطير
    متشيلينيش ذنبك الله يكرمك

    وماوعدكيش ان النهاية تبقي سعيدة
    حابب اكون واقعى لابعد الحدود
    !! a7mad sala7 !! said...
    الغير معروف

    ههههههههههههه
    ماشي يا سيدي

    خد عندك بقي
    نا مش مكمل القصة الا لما اعرف انت مين
    حلو كده؟؟
    e_emy said...
    يتبع طبعا إن شاء الله ..

    ربنا يعينك (:
    Unknown said...
    يتبع طبعاااااااا منتظرين بكل شوق..


    رواية رائعة..جزيت الفردوس
    صاحب رأى said...
    لا مؤاخذه
    يستاهل ضرب الجزمة لو فكر يرجعلها

    لانه لو رجع هتركب وتدلدل
    وخلينى اشوف الواقعية وبلاش شغل الافلام والمسلسلات

    بس يابو صلاح لو كان هيعمل زى توتى وموتى يبقى يا خسارة الردالة :)
    :) said...
    شكله كدة هايخطب سلوي فى الاخر
    lostlove said...
    بوص اعتبرني في سفر وهات من الاخر
    يالهوتي
    كل يوم اجي ويوم ما اجي اعرف النهايه تقول يتبع
    انا عاوزه حد يلغي الحروف ديه ي ت ب ع
    كمل بقي
    !! a7mad sala7 !! said...
    e_emy

    ان شاء الله
    !! a7mad sala7 !! said...
    فارس الحرية


    جزانا واياكم
    منور البلوج :)
    !! a7mad sala7 !! said...
    صاحب رأى


    ههههههههههههه
    ايوة خليك سخنى كده
    متخليك محضر خير يا عم حشمت

    دانا محموئله جاهز :D
    !! a7mad sala7 !! said...
    :)



    لالالالا
    سيبك م الاتجاه ده خالص
    سلوى مجرد اخت :D
    !! a7mad sala7 !! said...
    lostlove

    ههههههههههههه

    الله
    مهو لازم يبقي فى عنصر التشويق
    امال هدلٌ القصة كلها مرة واحدة كده :P

    معلش حبي كلمة يتبع شوية
    ومش هيتبع كتير ان شاء الله :)
    سلطان الاسيوطي said...
    هو ده ابوصلاح
    وبكده
    100 % انت اللي كاتبها
    باسلوبك المهروش ده
    كنت بكمل من نفسي والله والاقي الكلام موجود
    عيب دا احنا عقلين في دماغ ولا هيا بتتقال ازاي ؟؟؟

    ابتديت من هنا
    اشم ريحة انتحار وحركات اطفال زي كده
    مجرد تخمين
    halaS demahoM said...
    أمض يا أشول
    ههههههههههههههههه
    طب جو اون ياخويه
    MOROOOO said...
    بلاش ! بلاش ازاى يعنى ؟ هتفضل معلقنا كده ؟!!

    بجد اعلاناتك كترت :D

    يلا بقى عايزه بقيت الحدوووووووووووته :((
    !! a7mad sala7 !! said...
    سلطان

    لالالالالالالالالالالالالالالالالا
    لا انتحار ولا حاجة

    القصة هتمشي طبيعي جدا


    يا ايمن
    قصدي يا سلطان
    !! a7mad sala7 !! said...
    MOROOOO

    ههههههههههه
    مهو الاعلانات دى بفلوس بردو

    مش كنت شغلت اعلانات جوجل
    كان زمان طلعلى سبوبه حلوة دلوقتى :D

    يالا مش مشكلة
    وهكمل اهوان
    هكمل
    ЯậŇ MỗŘỹ said...
    السلام عليكم و رحمة الله و بركاته
    عاوزه جزء كمان دلوقت ده انا غلبانه و سافروا و سابونى
    اهئ اهئ
    كمل بدل ما اعمل جمعية حماية حقوق تكملة القصه و هنتلم عليك و نجيبلك










    حاجه حلوه
    يالا بقى
    نرفزتنى
    يوووووووووووووه
    بطئ قوى
    سلام اصل زهقتنى
    p:
    حلم بيعافر said...
    هو قطر وكلنا راكبينه
    مش خالد بس
    تحياتى
    !! a7mad sala7 !! said...
    روان


    حاضر بنكمل
    مهو كل يوم جزء
    هنجرى بقي ولا ايه :D

    الصبر
    الصبر مفتاح 14
    !! a7mad sala7 !! said...
    حلم بيعافر

    كلنا كلنا؟؟

    ماعتقدش

    عموما ربنا يستر

    ونورت فى اول زيارة :)
    معروف said...
    اظن كده عرفتنى
    معروف said...
    كمل بقيىىىىىى
    !! a7mad sala7 !! said...
    :D


    اذا كان كده ماشي

    نكمل

    :d
    غير معرف said...
    يعني ايه متكملهاش انت ياه انت بتعلقناولا ايه بس اشمعني ساره يعني ما الاسماء كتيره وحلوه ملقتش غير الاسم ده ولا في حاجه من ورانا
    MOROOOO said...
    ههههههههههههههه
    حلوه فى حاجه من ورانا دى
    هههههههههههههههههه
    =))
    يلا بقى مستنيه بقيت الحدووووووووته

    ويتتتتتتتتتتتتتتتتتنج
    !! a7mad sala7 !! said...
    الغير معروف

    احم احم
    اولا مش بعلقكو ولا حاجة
    دى مجرد دعابة :D
    دانا لو مكملتش يالكونى

    وبعدين ساره دا اسم راندم
    يعنى كان ممكن اسميها غير معروف على اسمك كده :D
    بس هو اللى جه فى بالى بقي
    ومضايقك فى ايه ساره يعنى
    ممكن تغيري اسمك تخليه ساره
    عادى يعنى :P



    وعايز اعرف بقي ايه حاجة من وراكو دى

    وايه الفرق بينها وبين الحاجة اللى ادامكو

    :-?
    !! a7mad sala7 !! said...
    MOROOOO

    عاجباكى اوى الحاجة اللى من ورانا

    طب لما انتى عارفاها متقوليهالى
    ولا مكملش القصة بقي ؟ :P

    خليكو ويتنج كده
    marwa al ta said...
    السلام عليكم
    بصراحة مش متوقعة نهاية الحكاية دى ايه
    عامل التشويق زاد عن حده كفاية بقى وقلنا باقى الاحداث بسرعة

    بالتوفيق
    lemoo said...
    اممممممممم
    ممكن تكمل لانها شدتنى اوووي جدااااااا خالص فكمل بلبيز
    !! a7mad sala7 !! said...
    marwa

    وعليكم السلام

    خلاص نهايتها قربت

    نشكركم لحسن استماعكم :D


    قصدى متابعتكم :)
    !! a7mad sala7 !! said...
    lemoo

    حاضر
    اوك
    طيب
    ماشي



    ويلكم هير :)
    قسورة الزواوي said...
    سلام عليكم ورحمة الله وبركاته

    همسة بسيطة في اذنك اخي الكريم

    لو نظرت نظرة خاطفة على هذه القصص وما ترسخه في نفوس الشباب , من أختلاط أولا
    ونظر محرم الى الحديث عن الحب والعشق
    والى ما لا يحصى مما لا يرضي الله تعالى

    كأنك هنا ترسخ لفكرة الاختلاط والعشق
    والحديث بين الرجل والمرأة , أرجوك
    لاتنسى أنها كلها مخالفات شرعية

    فلكم جرتنا تلك القصص الى التوهم
    والعيش في دنيا التخيل وقصص الهوى

    لي سؤال واحد يجب أن يسأله كل شخص
    يقدم على عمل أي عمل

    هل يقربنا هذا العمل الى الله ؟
    أم هل يرضاه الله تعالى ؟
    أو يسرنا أن يكتب في صحائفنا يوم
    العرض على الله تعالى ؟

    أو سؤال أخر نسأله أنفسنا

    هل يا ترى سيكتب عملنا هذا ملك اليمين
    أو ملك الشمال ؟

    والله نسأل الهداية والثبات
    قسورة الزواوي said...
    معلش نسيت

    في موضوع على منتدى كليات حاسبات
    ومعلومات مصر

    http://www.forums.fci4all.com/index.php?showtopic=18184

    يا رب الجميع يشوفه

    انا مش عاوز اكتر من انك تقرأ
    بقلبك , وتستبرأ لدينك
    سلام عليكم
    lostlove said...
    يتبع يتبع بس بطل تتطول
    انا جيبت القصه من الاول خلصهابقي
    اكتب يتبع زي منته عاوز
    بس اكتب الاجزاء كلها في يوم واحد:D
    تحياتي ليك
    هو فعلا بقي في تشويق جامد
    بس خلص بقي
    !! a7mad sala7 !! said...
    Qasswrah

    السيد محمد عزت

    معلش مردتش عليك بس بجد مكنتش فاضي والله
    حتى مردتش على حد غيرك بعدها

    هرد فى البوست اللى بعده بقي
    !! a7mad sala7 !! said...
    وهقرا الموضوع حاضر


    وعليكم السلام
    !! a7mad sala7 !! said...
    lostlove

    وخلصت القصة

    عايزين نشوفك تانى بقي :)

Post a Comment



رسالة أحدث رسالة أقدم الصفحة الرئيسية

Blogger Template by Blogcrowds