محتاجالك يا خالد_3


من الجزء التانى:
\\
انا من ساعة ما عيني وقعت عليكي وانا فى كل حتة عمال اتلفت حوالين نفسي

ساره انا بقالى حوالى شهرين مش عارف اتكلم معاكى كده .. ارجوكى متصدمينيش
فكرى براحتك وردى عليا .. ورقمى معاكى اهو
سلام
//


بعد كام يوم كده
موبايل خالد بيرن
ساره بتتصل
خالد اتهز وقلبه دق جامد

خالد: الو
ساره: الو سلام عليكم
خالد: وعليكم السلام
ساره: ازيك يا خالد
خالد: الحمد لله .. وانتى عاملة ايه
ساره: الحمد لله كويسة
خالد: يا رب دايما
ساره: بص يا خالد انا فكرت فى الموضوع ده وقررت انى ماتكلمش فى الموضوع ده خالص
ويا ريت انت كمان تشيله من دماغك
انا رايحة الكلية دى عشان اتعلم وبس
مش عشان احب واضيع وقت
ويا ريت تمسح رقمى من عندك ومتحاولش تكلمنى تانى

خالد استقبل الكلمتين دول زى السهم فى القلب
واتصدم للحظات كده

وقالها: يعنى افهم من كده انك رافضانى ولا رافضة الفكرة من الاصل
ساره: انا رافضه الفكرة وبناءا عليه رافضه اى حد يخشلى من الحتة دى
خالد: وصلت الرسالة .. وانا اسف انى كنت هبوظلك حساباتك
ربنا يوفقك فى كليتنك وفى حياتك
ساره: متزعلش منى يا خالد .. بس انا مش عايزة اشغل نفسي باى حاجة بعيد عن الدراسة
خالد: لا مفيش حاجة .. مع السلامة
خالد قفل السكة
سارة: خالد .. خالد .. :(

خالد فى حاله اكتئاب جديدة عليه
خالد مبيبانش خالص لفترة كده لحد ما بدات الدراسه
خالد رايح الكلية بيفتكر اول يوم فى سنة اولى وازاى كان رايح خالى البال والقلب وبقي ازاى دلوقتى وايه اللى اتغير فى سنة كاملة عدت من عمره

بعد كام يوم من الدراسة
النهارده عيد ميلاد خالد
خالد رايح الكلية يوم عادى زى اى يوم
خلص محاضراته ومروح
وصوت من را بينادى

يا خالد .. يا خالد
ساره: كل سنة وانت طيب :)

خالد بيبص وراه لقي اللى مكانش يتوقعه

خالد: سااااره .. وانتى طيبة
خالد فى حالة زهول مش مصدق نفسه
معقول اللى بتكلمه دى ساره
خالد: ساره انتى .... كـ
ساره: هوسسسسسسس متقولش حاجة
ايه مش عايزنى اقولك كل سنة وانت طيب .. احنا مش حبايب ولا ايه
خالد: حبايب؟
ساره: ايه وحشة .. طب نمشيها زماايل
خالد: لااااااء لالالالا
زمايل ايه بس
خالد قلبه هينط منه حاسس انه هيطير من الفرح
خالد: سارة اناااا..اا
ساره: بس متقولش حاجة .. مش عايزة اسمع حاجة
ويالا انا همشي بقي .. يرضيك وقفتى دى كده فى وسط الكلية
خالد: لا انا مكونتش احلم باكتر من كده .. روحى توصلى بالف سلامة يا رب :)
ساره: الله يسلمك .. معلش ملحقتش اجيبلك هدية .. انا لسه عارفه من سلوى من شوية
خالد: هدية كمان .. ايه اللى بيحصل ده
ساره: معلش بقي
خالد: معلش ايه .. حبك دا اجمل هدية فى حياتى يا ساره
ساره: :) سلام بقي انت رغاى كده ليه
خالد: ههههههه سلام

خالد نفسه اتفتحت ع الحياة .. نظرته اتغيرت 180 درجة
بدا يشوف الدنيا بشكل تانى .. بدأ يحس ان روحة اتقسمت نصين
نص معاه ونص تانى مع ساره
علاقة خالد وساره بتطور يوم بعد يوم
عرفو عن بعض كل حاجة وفعلا بقو انسان واحد مقسوم على اتنين

.. عدت سنة تانية وعدت سنة تالتة
واحنا دلوقتى فى رابعة بكالريوس تجارة

خالد: كلها سنة يا ساره ونبقي خريجين
ساره: ساره وتبقي محاسب اد الدنيا يا خالد
خالد: ادعيلي يا ساره .. نفسي اغمض عيني وافتحها الاقيني انا وانتى فى بيت واحد
سارة: :)

.. وعدت سنة رابعة كمان
دفعة خالد وساره وسلوى وكريم وهبه و و اتخرجت

خالد: الو
ساره:الو .. صباح الخير يا خالد
خالد: صباح النور يا نور عنيا
ساه: انت فين كده
خالد: انا فى الكلية بخلص ورقي .. وعشان رايح بكرة الفرز بتاع الجيش .. ادعيلي ربنا يقدم اللى فيه الخير
ساره: ربنا معاك يا خالد يا رب

...خالد جاله جيش

ساره: ايه يا خالد عملت ايه
خالد: جالى سنة جيش يا ساره
ساره: يالا قدر الله وما شاء فعل
على خير ان شاء الله يا خالد
خالد: ربنا يستر .. انا قلقان اوى
ساره: قلقان من ايه .. الجيش للرجالة
خالد: هههههههه رجالة ايه بس يا ساره .. انا مش قلقان من الجيش نفسه
ساره: امال قلقان من ايه
خالد: قلقان من الايام يا ساره .. مش عارف مخبيالنا ايه
ساره: يا حبيبي سيبها على الله .. متحملش هم انت اعمل اللى عليك بس وسيبها على ربنا
خالد: يعنى اطمن يا ساره؟
ساره: متقلقش يا خالد .. مستنياك .. ساره راجل :)
خالد: :) .. ربنا يطمن قلبك يا رب


خالد راح الجيش وساره فى البيت مقيمة

ام ساره: ساره يا حبيبتي
ساره: ايوة يا ماما
ام ساره: جايلنا النهارده ضيوف عايزاكى تتشيكي كده
ساره: ضيوف مين يا ماما
ام ساره: عمك ابراهيم صاحب ابوكى ومراته وابنه
عايزة اشوف قمر النهارده بالليل
ساره: اشمعنى النهارده يعنى يا ماما
ام ساره: مفيش بس دول اول مرة يجولنا .. وعايزين نعرفهم ان احنا عندنا قمر كده
ساره: مش مطمنااالك يا ماما
ام ساره: بطلى غلبة يا بت .. هروح اشوف الاكل ع النار

يتبع..

12 Comments:

  1. ЯậŇ MỗŘỹ said...
    لالالالالالالالالالالالالالالالالا
    مستحيل تتجوز واحد غيره
    و بعدين ايه البت دى غير مبادئها كده فى ثانيه
    لو سمحت بقى غير الاتنين
    !! a7mad sala7 !! said...
    لسسسسسسسسسسسسسه

    لسسسسسسسسسسسسسسسسسسسسسه
    صاحب رأى said...
    مش فاهم فى ايه رفضت الفكرة وكان عندها مبدأ
    وفى ايه عرضت حبها عليه مرة واحده كدا

    والنهاية دايما معروفه
    كل واحد بياخد نصيبه :)
    أنشودة said...
    اهم حاجه ان الواحد بيبقى
    متوقع ان ده هيحصل اصلا من اول
    جمله نطقتها ساره من غير ما تحسم الموقف
    بنات بقى وفاهمين بعض :D
    شكلها كده مش هتتجوز خالد
    علشان يبقى فى تغير متبقاش حاجه تقليديه:D
    !! a7mad sala7 !! said...
    صاحب رأى

    الحب ملوش كبير يا عم حشمت :D


    وفى الاخر كل واحد بياخد نصيبه طبعا
    !! a7mad sala7 !! said...
    انشودة


    خليكي اتوقعى كده لحد ما القصة تخلص بقي :D

    يا رب يكون فى جديد بس
    غير معرف said...
    هوا انت اللى مألف القصة دى؟
    !! a7mad sala7 !! said...
    اينعم
    حد متابع said...
    اسلوبك حلو اوى ومبدع فى الاحداث

    فى تقدم دائم ان شاء الله :)


    مستنيين باقى الاحداث
    !! a7mad sala7 !! said...
    ربنا يخليك

    يشرفنى انك متابعه :)
    halaS demahoM said...
    هههههههههه
    علي فكره انت دورك خلصان من فتره كده

    يالا يا عم
    اشجنا يا عم خالد
    !! a7mad sala7 !! said...
    دور مين؟؟


    مش فاهم

Post a Comment



رسالة أحدث رسالة أقدم الصفحة الرئيسية

Blogger Template by Blogcrowds