حقا .. الهيافة كنز لا يفنى

البوست اللى فات اتكلمت ع الموضوع من ناحية الكورة
والناس محبتش الموضوع والردود كلها جت على الناحية السياسية

نديها سياسة .. وماله
عشان تقيس مدى تقدم الشعوب وتحضرها
قيس مدى انجازاتها على المستوى العالمى
ومدى ابداعاتها على مستويات العلمية والادبية والثقافية والرياضية و و ..
ودى احدى ابداااعات المصريين فى مجال التصميم والجرافيكس
ايه الحلاوة دى يا ولاد
دا العلم المشترك بين الجزائر واسرائيل
دا اللى بيقولك لم الشامى ع المغربي

انا نفسي بنى ادم واحد بس يخش يقولى بعد الصور دى والشتايم وقلة الادب
عملنا ايه للمنتخب
بلاش المنتخب
عملنا ايه لكرامة الشعب اللى اتبعترت
زودنا ايه للحل فى الازمة
استفدنا ايه غير اننا بقينا جهله زيهم

لاتدع سفالة الاخرين تكشف عن سفالتك

الناس كلها بتفش غلها فى الشتيمة وقلة الادب
ودنسنا علم بلد مسلمة عشان شوية رعاع منهم سوئو سمعتهم
بلاش شوية منهم
عشان جيييل باكمله منهم غبي الطباع
واحنا ما شاء الله محترفيييييين فى نشر الغسيل الوسخ
نفسي اعرف فى صوت الحكمة اللى فى مصر
لما ابن رئيس الجمهورية نفسه طالع يهرتل ع الفضائيات ويقول كلام ملوش معنى
ودا المفروض ادام العالم هيبقي رئيسنا الجاى :D
المشكلة ان الهبهبة دى مش هتقدم ولا هتأخر
ولا هترجع حق ولا هترد كرامة
ولا هتجبر اى شعب فى العالم على انه يحترمنا
بل بالعكس دول بيشاورو علينا ويقولو العبط اهم
وبقينا اساتذة فى السب والقذف وكأن دا انتصار لكرامتنا
مع ان اللى بيحصل ده تقليل من شأننا اكتر ما هو قل
مشوفتش خوة ايجابية بعد الماتش تدل على اننا شعب واعى شعب متحضر بيقول للعالم احنا اهو
يا جماعة دا ليس القوى منكم بالصرعة
والله ما بالشتيمة والقذف ونشر الغسيل الوسخ
القوى من يمتلك نفسه عند الغضب
والله لو اللى بنعمله دا هييجي بفايدة لكنت ابقي اول واحد فيكو بيهرتل

الاعلام بيسوق الناس زى المعيز وهما هررررر وراهم
قبل الماتش نفخو المنتخب نفخة طلعوه السحاب
وبرامج واغانى وطنية على كل القنوات
ونسيو كل حاجة الا الكورة
لو كان تركيزنا دا فى حاجة تانية غير الكورة مكانش ده بقي حالنا
بقي التليفزيون المصرى كله كورة
والهيافة ما شاء الله كنز لا يفنى
وخلينا لعيبة المنتخب دول كتيبة المقاتلين
والناس يا عيني غلابا مفيش حاجة تفرحهم الا الكورة
بينساقو ورا الفرح والزمر والهيصة حتى لو على حاجة هايفة
هو عشان نروح نلعب 3 ماتشات فى كاس العالم نخسر سمعتنا ادام العالم
روح اتفرج على الصحف الاوربية والاسرائيلية وشوف الكاريكاتيرات والتعليقات
والضحك من القلب
وصفونا باننا فتح وحماس على مستوى اعلى
وورونا بقي سفاهة العرب وضيق مخهم و و و
وهما بيقطعو فى بعض زى البهايم
وهما المستفيدين

ليه مننتقدش بطريقة كويسة وبكبرياء وكرامة بردو
من غير ما نشتم من غير ما نسب ونلعن
وبردو نبقي احسن منهم ونبقي بنحب بلدنا
ولا هو لازم الشتيمة وقلة الادب عشان نبقي حلوين

لازم نفهم ان كرامتنا وعزة نفسنا حاجة
وماتش الكورة دا حاجة تانية
اللى حصل بعد الماتش لا يمس كرة القدم بشيئ
دى سياسة بايتة من زمان
وهما لو كانو خسروا او كسبوا
فهو دا اللى محضرين ليه من زمان
هما جايين من بلادهم بالسكاكين والشوم
يعنى مبيتينلها

انا ماتكلمتش عن احداث ما بعد المباراه
انا اتكلمت عن الجو العام فى نطاق الكورة

لكن منخلطش الامور ببعضها
بتوع الكورة بقي كل كلامهم دلوقتى عن اللى حصل بعد الماتش
زى ما يكون اللى حصل بعد الماتش هو اللى خسرنا
الضرب والاهانة دول كنت عايز اشوف التغطية بتاعتهم لو كنا كسبنا
مكنتيش هتلاقي ربع التغطية الاعلامية دى
كان كله هيتلهى فى المكسب واغانى الانتصار
وهينسو الناس اللى راحت تشجع دى
سياسة البلد دى
نفسي اعرف امتى هنفهمها ونتكلم من غير اندفاع كده

اللى حصل بعد الماتش فى الجماهير يا سادة ملوش علاقة بأن احنا كسبنا ولا لا
الناس دى جاية من بلادهم وعارفين هيعملو ايه
سواء كسبو او خسرو
دول كانو ماسكين سكاكين فى المدرجات قبل ما الماتش يبدا
حتت الماتش دى جت كأداة بس
النية متبيتة من زمان
والحكاية كانت واقفة على شعره
من زمان اوى وفى عداوة بين المصريين والجزائريين بشكل او باخر
وكان منتظر جدا يحصل ده
يعنى الحكاية حكاية سياسة مش ماتش كورة

اجواء الماتش ملهاش دعوة باللى حصل
يعنى اللعيبة اللى كانت فى الملعب كانت عارفه هيحصل ايه بعد الماتش؟؟
الامن كان مستتب جداا فى الملعب
والامور مشيت على ما يرام
وكل حاجة كانت متاحة لمصر انها تكسب
كل اللى حصل ده بعد الماتش
ناس كتير جدا بتلاعبهم وتكسبهم
دى بس شماعات بنعلق عليها الخيبة

عايزين تقنعونى ان الاهتمام بارواح الناس ده كان هيبقي زى ما هو كده لو كنا كسبنا

والله ما كان هيبقي فى اهتمام بالشكل ده
كنا هنقول مبروك وهارد لاك للفريق الخسران
وهنعتبر اللى حصل منهم دا تجاوزات من اقلية جزائرية
وكنا هنطمن على الكام مغنى والكام ممثل اللى رايحين
وشكرا على كده
المصرى فى الحاجات دى ملوش تمن
احنا لو سفاراتنا ووزارتنا دابحين القطة
مكانش دا حصل
اى سايح فى مصر لو اتلمست منه شعرة كده الدنيا بتقوم ومتقعدش
واتصالات وحالات تأهب على اعلى مستوى

لكن لما تكون الجزائر باعته جماهير بطاياارت حربية وببلاش واحنا عارفين
ولما تكون الجماهير جاية بمواصفات ان سنهم يبقي تحت ال20 وكلهم ذوات بنية جسمانية قوية واحنا عارفين
ولما يكونو من قبل الماتش وهما عمالين يشترو فى اسلحة من السودان واحنا عارفين
ولما نروح نلعب فى السودان وامنها ضعيف وعندهم مشاكل الدنيا وحروب بينهم وبين بعض اصلا واحنا عارفين
ولما الناس تسافر تشجع ومفيش عليهم اى تأمين ومعرضين انهم يروحو فى داهية واحنا عارفين
يبقي احنا كده لا نلومن الا نفسنا
احنا اللى خيخة ومش خايفين على بعض
لكن محدش يقنعنى ان اللى بيحصل فى الاعلام دا دلوقتى بداعى اننا خايفين على ارواح مشجعينا
وحفاظا على كرامة الشعب المصرى
وكلام مواضيع التعابير ده
احنا لو كده فعلا كنا عملنا استعداداتنا من الاول
اننا رايحين حرب
مش رايحين فسحة فى شم النسيم

سيبو بقي الموضوع ياخد حجمه كده مع نفسه
وارجعو بعد كده للدورى المصرى والاهلى بطل مجرة درب التبانة
والحرب الاهلية اللى بتحصل هنا دى
عشان نكمل نشر الغسيل الوسخ بس على ضيق شوية

فعلا امة ضحكت من جهلها الامم

7 Comments:

  1. Cute Kitty **sookra said...
    احمد ادخل عند احمد حسن البنا وانت تكتشف الحقيقه المخجله ورا اللى بيحصل دا ودا اللينك
    http://ahmedhassanworld.blogspot.com/
    MOROOOO said...
    \\ فعلا امة ضحكت من جهلها الامم

    كلام جميل كلام معقول
    مش عارفه اعلق عليه اقول ايه ؟
    أنشودة said...
    http://ahmedhassanworld.blogspot.com\/
    مش عارفه مش داخل مخى حاجه من الى فى المقاله دى ليه
    \\عشان تقيس مدى تقدم الشعوب وتحضرها\\
    بص لاعلامها بس وحضرتك تعرف
    وطبعا الاعلام بتاعنا مش عايز تعليق الصوره واضحه:(
    طيب الاعلام والنت واليوتيوب والفيس بوك مفيش شغلانه لهم غير الموضوع ده
    كل ده مش فى صالح الى بيحصل خالص مش لازم ننساق ورا اى مادة اعلاميه
    بجدد ان خايفه مووووووت ليحصل فتنه
    انا مش قادره استوعب الى حصل
    هو فعلا كل الدول بتحمل لنا كل الكم الرهيب ده من الكره؟مش الجزائر بس على فكره
    طيب قناة الجزيره واقفه ضدنا ليه
    لما تجيب الى احنا بنعمله فى الجزاير
    ومتجبش سيره عن الى حصلنا من جمهور الجزائر
    ياااارب الموضوع ده يعدى على خير
    وتيجى حاجه تانيه تنشغل الناس بيها

    \\ امة ضحكت من جهلها الامم\\
    اه:(
    !! a7mad sala7 !! said...
    sookra

    بصراحة مش مقتنع خالص باللى فى اللينك ده

    دا سيناريو فيلم
    !! a7mad sala7 !! said...
    MOROOOO

    مش لازم تقول يا سيدي

    المهم انك مقتنعة

    نورتيني :)
    !! a7mad sala7 !! said...
    hidaya

    الفتنة حصلت خلاص
    والقادم اصعب

    اما نشوف الدنيا موديانا على فين
    !! a7mad sala7 !! said...
    بس اقولك على حاجة

    مش هنجيب جديد

    اتعلم علينا وخلاص

    وانتهت على كده

    الجاى بقي مشاكل وبس

Post a Comment



رسالة أحدث رسالة أقدم الصفحة الرئيسية

Blogger Template by Blogcrowds