حالة من عدم الرضا

تعرفو انى كرهت التدوين!!
ايوة

بجد حالة كده من عدم الرضا

سامع واحد بيقول يا عم قول سلامو عليكو الاول

معلش اعزرونى

بس بقالى كام يوم كده
بقلب فى مواضيع قديمة
ومواضيع ناس جديدة
فى اللى فكرنى بحاجات
وفى اللى ضحكنى
وفى اللى تعبني
وفى اللى قولت عليه ايه الهبل ده

وفى حاجات مرضتش اكمل قرايتها

فى مواضيع كده تحس انها شريط وبيعدى ادامك من احداث قديمة

يمكن البلوج مش قديم ولا حاجة
بس حصل فى وجوده كمية احداث مش قليلة

ليه بقي حالة من عدم الرضا

حاسس ان كل واحد اتحط فى موقف بيفسر الدنيا على مزاجه هو
كل واحد حصلتله مشكلة ييجي يعملها محاكاه من طرف واحد
واكيد مبيطلعش نفسه غلطان
لانه لو طلع نفسه غلطان مكانش عمل البوست من الاساس

ومش بس كده
مش المشكلة انه بيحكى من وجهة نظرة وممكن ميقولش الحقيقة او ميوصفش الموقف زى ما حصل
لان لو على اد كده هتبقي مشكلته لوحده
لا دا كمان بيسوق اللى بيردو على البوست لانهم يردو بالطريقة اللى تناسبه هو وتديله الاحقية

ممكن واحد يبقي اصلا غلطان
ومن اسلوب الحكى يطلع نفسه ليه الحق
وطبعا اللى بيتحكيله هيصدقه ويمشي وراه

طيب فين المصداقية هنا؟؟

انا وصلت لمرحلة انى لما بخش بلوج واقرا بوست احس انه شخصي
مبرداش اعلق خالص ولا حتى احاول اشغل بالى بالفكرة

لانه اول حاجة بقت تيجي فى بالى مين اللى قالك ان هو صادق
او بمعنى تانى مين اللى قالك انه بيحكى الموقف بالظبط

ليه ميكونش بوسته دا رد فعل لمصيبة هو عاملها اصلا خلت اللى بيحكى عنه دا يبقي مظلوم اصلا ورد فعله منطقي

ليه ميكونش هو مفصل الدنيا على مزاجه ومحتاج بس اللى يطبطب عليه ويقويه بس

ليه ميكونش اصلا الشخصية اللى بتدون دى تفكيرها غريب وهو اللى موديها للى وصلتله من حالة المسكنة دى

بجد كمية اسئلة بتخطر فى بالى
واعتقد انها منطقية انها تتسال قبل ما ترد على اى حاجة


التدوين بقي وسيلة للطبطبة


ابسطهاااااااالكو

برنامج اسامة منير ده مثلا

ليه ميكونش اللى متصل دا هو اللى غلطان وبيحكى الحكاية على مزاجه
عشان بس يلاقي الرد اللى بردو على مزاجه

مش المفروض ان اى موضوع شخصي عشان يتحكم عليه يتسمع من الطرفين؟؟
دا اكيد

طب ازاى انا احكم من السمع من ناحية واحدة

واللى يثبتلك صحة الكلام ده
ان ممكن بعدها بكام حلقة حد تانى يتصل
يحكى نفس الموقف بس من وجهة نظر تانية
ويطلع هو اللى عنده الحق
واللى كان معاه الحق من شوية بقي هو اللى غلطان
دا لان كل واحد بيحكى على مزاجه
مفيش مواجهة تعرفك مين الصح ومين الغلط

طبق بالظبط على البلوجات
ازاى ترد على حد كاتب عن مشكلة واجهها مع حد معين مين غير ما يذكره حتى
من غير ماسمع كلام الطرف التانى؟؟

من هنا جت حتة عدم المصداقية

تفتكرو الموضوع ده حله ايه؟؟

بلاش حله

ايه وجهة نظركو فى الحكاية دى؟؟

31 Comments:

  1. eslam saad said...
    والله بقالى 3 ايام عايز اكتب موضوع زى ده بالظبط وفعلا امبارح كتبت جزء كبير منه

    انا شايف المدونة دى حاجة زى آلاف الحاجات اللى ملهاش لزمة على الانترنت

    هتقولى اومال انت عامل مدونة ليه !!

    انا اقصد المدونات اللى كلها حكايات منها حاجات شخصية كتير مش عارف اصحابها بيكتبوها كده ازاى اصلا
    حتى لو على سبيل انك هتخرج اللى جواك انا بشوف حاجات كتير مينفعش تتقال
    بس يمكن برده انا شايف غلط

    كمان المدونات اللى صاحبها يكتبلك نكتة منقولة ولا يحكيلك مسلسل لأ واللى يضايقنى اكتر بقى واحد يدخل يقولك اول وتانى وتالت ... رد ليا وبعدين فى الاخر يقولك احتليت المدونة
    والله لولا انه عيب كنت دخلت قولتله انت تافه واهبل

    طيب اسمعوا دى كمان
    من فترة كنت بدخل على بلوج كانت مواضيعه زى الشائع او اللى الناس بتحبه وبترد فيه وطبيعى كنت بلاقى على الاقل 20 رد على كل بوست
    من 3/4 ايام كده دخلت عليه وفوجئت انه كله حاجات دينية وفعلا روعة جدا
    تيجى تبص هنا بقى ع الردود .. والله مش يتعدوا 2 او 3 بالكتير اللى علقوا ع البوست

    شوفتوا بقى احنا اد ايه "شعب يموت ويجرى ورا التفاهة"

    كمان من الحاجات اللى بتضايقنى بقى على النت .. الفيس بوك
    ناس قاعدة 24 ساعة مش بتتحرك من عليه
    مع انه فى الاخر وسيلة لتضييع الوقت
    والله العظيم وسيلة لتضييع الوقت
    واللى شايف غير كده يقولى افاداته

    كويزات هبلة كل يوم بتتاخد وناس تعلق عليها واللى يحط او تحط صور ليه او فيديوهات

    حاجات ملهاش معنى فى الاول وفى الاخر يعنى

    نيجى لموضوعك بقى

    طبيعى ان اى حد بيحكى اى حاجة اكيد بيقولها من وجهة نظره بس وحتى لو شايف انه غلطان فى حاجة عمره ما هيكتبها
    لو عرفها هيحتفظ بيها لنفسه بس لحد ما ينساها وكانها مش موجودة اصلا ويبين انه غلبان ومظلوم برده

    يعنى معظمه كذب فى كذب والناس بتتعايش وتصدق وتعلق وتستنى الرد كمان

    ربنا يهدى
    !! a7mad sala7 !! said...
    هههههههههههههههههههههههههههههههههه

    جايلك قريب يا سمسم
    halaS demahoM said...
    اللي في راسه بطحه بيحسس عليها
    ده مثل انا معترف بيه جدا
    هو مش عليك طبعا ... بس جه في بالي
    بص يا ابو الصلح
    اللي حلو من جواه بيشوف الدنيا حلوه وعمره ما يخطر في باله ان الدنيا وحشه حتي لو شافها وحشه فبيحاول يتجاهلها
    انما الوحش من جواه
    عمره ما هيشوف الدنيا نضيفه

    وسوري يعني
    مش عشان انت صاحبي هجاملك
    لاء
    بص يا غالي
    اللي خلاك تفكر بالطريقه دي هو انك اساسا كده
    وبتحاول تعترض علي نفسك
    وانا اكتر واحد عارف كده
    او اكتر واحد ميعرفش حاجه خالص

    اسف عـــ البؤين دول
    بالنسبه للبلوجات
    كل واحد يعمل اللي يريحه
    في ناس بتكتب الحقيقه وناس بتكتب نص الحقيقه وناس بتكتب صفر حقيقه
    ملناش دعوه بيهم
    كل واحد يعمل اللي يريحوا
    علي راي الاستاذ عمرو دياب
    المهم انت بتعمل ايه؟
    انت راضي عن كتاباتك وافكارك ولا لاء؟
    متاخدش في بالك ... احنا في رمضان وايام مفترجه
    وكل سنه وانت طيب

    \\
    بجد كمية اسئلة بتخطر فى بالى
    \\
    عارف بالك ده لو مشغول بحاجه مهمه مكنش انشغل بحاجات تافهه زي دي
    وهفكرك بكلمه بتاعتك (متديش الحاجه اكبر من حجمها)

    اقعد بالعافيه انا رخمت اوي
    س ل ا م ي
    ShiMOo said...
    خليك معايا للاخر كده
    علشان بصراحه البوست استفز فيا حاجات كتير
    وناويه اعلق على كل كلمة D:

    \\
    تعرفو انى كرهت التدوين!!
    ايوة
    بجد حالة كده من عدم الرضا
    \\

    me too :(

    \\
    حاسس ان كل واحد اتحط فى موقف بيفسر الدنيا على مزاجه هو
    كل واحد حصلتله مشكلة ييجي يعملها محاكاه من طرف واحد
    واكيد مبيطلعش نفسه غلطان
    لانه لو طلع نفسه غلطان مكانش عمل البوست من الاساس
    \\

    تمام اوي اللي انت قلته
    بس قولي بقى فرضنا ان حصلت بينك وبين اي حد مشكله أيا كانت انت مقتنع ان انت مش غلطان وفي نفس الوقت التاني مقتنع انه مش غلطان
    وفرضا برده ان في طرف في النص انت والحد التاني بتشتكوا ليه
    كل واحد هيحكي بطريقته وعن اقتناع
    ويقول مبرراته اللي هي من وجهة نظره صح مش غلط
    وتحاولو انتوا الاتنين تقنعوا الطرف التالت بوجهات نظركوا
    اللي خد بالك انهم مختلفين اصلا
    بس دي حاجه طبيعيه وده حق مشروع ليكوا انتوا الاتنين
    كل واحد من حقه يقنع اللي حواليه ويقنع الطرف التاني
    ان هو اللي صح والتاني اللي غلطان
    مش لمجرد انه مش عايز يبقى غلط
    بس جايز اوي يكون هدفه ان يعرف التاني غلطه وده مبرر مقنع طبعا

    \\
    ومش بس كده
    مش المشكلة انه بيحكى من وجهة نظرة وممكن ميقولش الحقيقة او ميوصفش الموقف زى ما حصل
    علشان تأيد وجهة نظرك في انك مش غلطان
    لان لو على اد كده هتبقي مشكلته لوحده
    \\

    هي فعلا انه بيحكي من وجهة نظره دي مش مشكله بالعكس ده حقه
    حكاية ميقولش الحقيقه كامله دي فيها كلام تاني
    والموضوع في الاول والاخر برده وجهات نظر
    يعني مثلا في حاجه انا شيفاها صغيره ومش هتفرق بس انت شايفها مهمه اوي كانت عامل اساسي في ان مشكله بينك وبين حد تحصل
    الطبيعي انه لما ييجي يحكي مش هيقولها او مش هيتطرق ليها يعني
    لكن انت هتبقى عندك الحاجه دي جزء مهم اوي من الاسباب اللي سببت المشكله دي
    ومبرر مهم في المبررات اللي انت هتقولها
    بس كون الحد التاني مجبش سيرة الحاجه دي في كلامه مش معنى كده انه قاصد يخبي حقيقه
    لان وجهة نظره بتقول انها حاجه تافهه ومتسببتش في حاجه
    ShiMOo said...
    \\
    لا دا كمان بيسوق اللى بيردو على البوست لانهم يردو بالطريقة اللى تناسبه هو وتديله الاحقية
    \\

    ليه سميتها كده !!!
    من حق اي حد انه يحاول يقنع اللي حواليه بوجهة نظره حتى لو كانت غلط
    ومن حقك انك تفضل متمسك بوجهة نظرك وتقوله لا اسف مش مقتنع بكلامك

    \\
    ممكن واحد يبقي اصلا غلطان
    ومن اسلوب الحكى يطلع نفسه ليه الحق
    وطبعا اللى بيتحكيله هيصدقه ويمشي وراه
    \\

    مادام انا معرفش انه غلطان
    يبقى لو كلامه منطقي ودخل دماغي
    واجب عليا اصدقه لحد ما يظهرلي العكس

    \\
    طيب فين المصداقية هنا؟؟
    \\

    بصراحه يا احمد انا مش فاهمه ليه متحامل على الناس اوي كده وليه مفترض سوء النية يمكن فعلا اللي بيحكي مش قاصد وده هو اسلوبه العادي في الكلام ولو حصل وهو كان غلكان وكلامه ظهر عكس كده احتمال وارد برده يبقى مش قاصد
    طيب بص انا هتكلم عن نفسي
    انا بيني وبين حد ما مشكله
    وانا عن اقتناع اني مش غلطانه
    بس في الحقيقه انا غلطانه
    بس "انا" لو كنت عارفه فعلا اني غلطانه الموضوع مكنش هيكبر لحد ما انزل بوست او اتكلم واقول يا جماعه حصل كذا كذا وفلان غلطان ومبرراتي اهه
    مش هعمل كل ده وانا عارفه بيني وبين نفسي اني غلطانه
    يعني لو حصل وعملت كده هبقى من جوايا عارفه اني صح
    تى لو الناس شيفاني غلط
    ساعتها يبقى في مناقشه
    نتيجتها ان حد يقنع الطرف التاني بوجهة نظره والموضوع كده يبقى خلص

    \\
    انا وصلت لمرحلة انى لما بخش بلوج واقرا بوست احس انه شخصي
    مبرداش اعلق خالص ولا حتى احاول اشغل بالى بالفكرة
    \\

    وانت كنت عامل البلوج ليه ؟؟
    انا عن نفسي لما عملته كان نفسي اعمل حاجه جديده
    واعرف ناس جديده واشوف افكار جديده
    يعني تجربة جديده عايزه اعيشها
    عايزه اشوف الناس بتتكلم ازاي وبتفكر ازاي
    ايزه لما اكون متضايقه اقول انا متضايقه
    لما اكون فرحانه افرح الناس كلها معايا
    عايزه اقول يا بشر انا اهه بتضايق ساعات وبزعل ساعات وبفرح ساعات وبكتئب كتيير D:
    يعني علشان تعبر عن نفسك
    تحاول تقنع اللي حواليك بفكره انت واخدها مبدأ حياتك
    تناقش مواضيع بتستفزك بطريقتك
    تقول وجهة نظرك في اللي بيحصل حواليك
    ShiMOo said...
    \\
    لانه اول حاجة بقت تيجي فى بالى مين اللى قالك ان هو صادق
    او بمعنى تانى مين اللى قالك انه بيحكى الموقف بالظبط
    ليه ميكونش بوسته دا رد فعل لمصيبة هو عاملها اصلا خلت اللى بيحكى عنه دا يبقي مظلوم اصلا ورد فعله منطقي
    \\

    ليه بتفكر كده !!
    ليه بتفترض سوء النيه !!
    هما مش بيقوا ان المتهم برئ حتى تسبت ادانتليه انت بتحكم على الناس من بره
    من غير ما تسمع مبرراتهم !!
    وليه لما بتسمعها مش بتصدقها !!
    على فكره من حقهم عليك انك تصدقهم
    مادام محصلش معاك موقف منهم قبل كده
    يقول انهم ممكن يبقوا بيبالغوا او بيخبوا الحقيقه

    \\
    ليه ميكونش هو مفصل الدنيا على مزاجه ومحتاج بس اللى يطبطب عليه ويقويه بس
    \\

    وده حق طبيعي للناس كلها
    من حقي ان الاقي حد يطبطب عليا لما اكون متضايقه وزعلانه
    من حقي الاقي حد جنبي ينصحني حتى لو كنت غلط
    من حقك انت تلاقي حد يسمعك لما تبقى مخنوق
    ومن حق اي حد انها لما تحكي لحد يصدقها

    \\
    ليه ميكونش اصلا الشخصية اللى بتدون دى تفكيرها غريب وهو اللى موديها للى وصلتله من حالة المسكنة دى
    \\

    عارف حتى الناس اللي انت بتتكلم عنها وبتقول تفكيرها غريب
    من حقها تلاقي حد يسمعها ويحس بيها
    من حقها عليك تناقشها
    ومن حقها عليا اسمعها وانصحها
    واقول رأيي فيها وفي كلامها

    \\
    بجد كمية اسئلة بتخطر فى بالى
    واعتقد انها منطقية انها تتسال قبل ما ترد على اى حاجة
    \\

    وده من حقوقك << اسأل وناقش واتكلم وحاول تقنعهم برأيك
    ولو رأيهم مش عاجبك ومش مقتنع بيه قول لا

    \\
    التدوين بقي وسيلة للطبطبة
    \\

    لا طبعا
    بس مفيش مانع ان الطبطبه دي تبقى من ضمن اهدافه
    بس للي يستحقها فعلا يعني مش تطبطب على اي حد
    هتعرف منين بقى انه يستاهل ؟؟؟
    بمناقشتك معاه بأنك تسمعه وتحاول تشاركه اللي بيحسه
    النتجيه ايه بقى ؟
    انك اكيد من جواك هتحس اللي قدامك ده فعلا يستاهل الطبطبه دي ولا ميستاهلش
    وبيتيقلي مش عيب انك تطبطب على حد يستاهل
    العيب انك تشوف حد يستاهل ومتطبطبش عليه

    \\
    برنامج اسامة منير ده مثلا
    ليه ميكونش اللى متصل دا هو اللى غلطان وبيحكى الحكاية على مزاجه
    عشان بس يلاقي الرد اللى بردو على مزاجه
    \\

    موضوع اسامه ده اتكلمنا فيه كتير اوي وقلنا فيه ياما
    واعتقد ان كتير مننا ليهم نفس وجهة النظر
    بس انت قلت وجهة نظرك باسلوب مختلف غير اللي اتكملنا عنه قبل كده



    \\
    مش المفروض ان اى موضوع شخصي عشان يتحكم عليه يتسمع من الطرفين؟؟
    دا اكيد
    \\

    كلامك صح طبعا لازم اسمع من الطرفين
    ShiMOo said...
    \\
    طب ازاى انا احكم من السمع من ناحية واحدة
    \\

    وانا اجيب الناحية التانيه دي منين بقى !!!
    مش منطقي ان اتنين متخانقين او بينهم مشكله
    وعايزين اسامة او غيره يعني يقول رأيه فيها
    يقوم واحد فيهم يروح للتاني ويقوله تعالا نروح نحاول نحلها سوا
    "عارف ان ده هو اللي المفروض يحصل ان كل اتنين يتناقشوا مع بعضهم ويحلوا مشاكلهم سوا"
    بس لما يبقوا اتنين مش متفاهمين وكل واحد مقتنع ان التاني بس هو اللي غلطان وهو ماشي ميه ميه ولا واحد مقتنع ان هما الاتنين غلطانين
    بس التاني بيكابر وبيقول لا
    ساعتها مش هقدلا اسمع من الاتنين سوا
    او يعني مش شرط ان الاتنين يبقول عايزين يحلوا مشكلتهم عن طريق اسامه او غيره
    ده في ناس اصلا مابتصدق يحصلها مشكله مع حد
    وبتتلكك علشان تبعد عنه
    تقولي يحلوا مشكلتهم بالمناقشه علشان نسمع للطرفين سوا !!
    يعني من الاخر اذا قدرت على واحد مش هقدر على التاني
    واذا عرفت اسمع من الاتنين يبقى خير وبركه

    \\
    دا لان كل واحد بيحكى على مزاجه
    مفيش مواجهة تعرفك مين الصح ومين الغلط
    \\

    هي بالظبط المواجهه اللي كنت بتكلم عنها دلوقتي

    \\
    طبق بالظبط على البلوجات
    ازاى ترد على حد كاتب عن مشكلة واجهها مع حد معين مين غير ما يذكره حتى
    من غير ماسمع كلام الطرف التانى؟؟
    \\

    ما انا قلتلك انت المفروض تسمع من اللي عايز يتكلم
    اللي مش عايز يتكلم بقى هو حر
    بس من حق اللي كلمني وناقشني اني اصدقه لحد ما يظهرلي العكس

    \\
    من هنا جت حتة عدم المصداقية

    \\

    لا مسمهاش عدم مصدقية

    \\
    تفتكرو الموضوع ده حله ايه؟؟
    \\

    حله بسيط وسهل اوي
    انك تفترض للي قدامك حسن النية لحد ما يظهر ليك العكس
    وبكده الحياه هتبقى احسن يعني
    ع الاقل هتبل تشغل دماغك بالافكار المريبه دي D:

    صدقني والله لو اتعاملت مع الناس بالطريقة اللي انت بتتكلم بيها دي
    الحياه هتبقى وحشه اوي ومش بعيد تخسر ناس كتير
    ShiMOo said...
    الله يسامحك
    تعبت اووووووي من الكتابة :((
    بس يارب ييجي بفايده D:
    !! a7mad sala7 !! said...
    لالالالالالالالالالالالالالا

    انت فهمتنى غلط خاااااالص على فكرة

    انا لو بتكلم عن نفسي مكنتش كتبت الموضوع على فكرة :D
    دا مبدأيا

    لان انا مش واحد جايب يحاسب ضميره هنا

    يمكن انا جزء من الموضوع
    بس والله انا مش شايف نفسي كده

    اكيد انا مش صح 100% بردو

    بس انا مش اقل من 50% حقيقة دى انا متاكد منها

    وبعدين لو خدت بالك هتلاى انى قولت انى اتفرجت على مواضيع قديمة ليا
    ومواضيع لناس

    يا عزيزي ماعتقدش ان فى حد بيهد المعبد على نفسه

    مش هاجى اقول انا بحكى على مزاجى فى البلوج بتاعى عشان الناس تطبطب عليا


    //اللي خلاك تفكر بالطريقه دي هو انك اساسا كده
    وبتحاول تعترض علي نفسك
    وانا اكتر واحد عارف كده//

    وانت اللى خلاك ترد بالطريقة دى انك بس داخل وناوى ترخم

    انت لو ناوى تخش تقرا الموضوع بصفة عامة
    كنت رديت بصفة عامة


    //عارف بالك ده لو مشغول بحاجه مهمه مكنش انشغل بحاجات تافهه زي دي
    وهفكرك بكلمه بتاعتك (متديش الحاجه اكبر من حجمها)//

    ومين قالك انى بالى مشغول بدى بس؟؟

    وبعدين هو كل اللى بالى هيتشغل بيه هخش اكتب عنه ولا ايه
    مش معقول يعنى

    //اسف عـــ البؤين دول
    اقعد بالعافيه انا رخمت اوي//

    ولا يهمك
    على راى استاذ عمرو بردو
    دا مفيش بين الصحاب غيره وعتاب :D
    !! a7mad sala7 !! said...
    يا صلاة النبي
    شيمو انتى متاكده انك صايمة :p

    انتى جبتي الصحة دى منين

    انا حاسس انك عايزة تضربيني :d

    عموما فى ميس اندراستاندنج حصل
    انا مفرضتش سوء النية خالص
    الله اعلم بنية كل واحد

    ولا علقت المشانق للمدونين
    من حق كل واحد يكتب اللى يريحه
    بس لنفسه
    ميستناش الرد اللى يديله الحكم
    ومش من حق اللى بيرد انه يرمى دماغه للى بيكتب
    اظن فيها نوع من الظلم للى بيتحكى عنه

    عموما
    هرد على كومنت كومنت
    بس بعد الفطار بقي
    لاحسن الواحد مش ناقص فرهدة :d

    على راى موبينيل
    سيبونى فى حالى الدنيا صيام :p

    بي باك..
    ShiMOo said...
    a7mad sala7

    \\
    يا صلاة النبي
    شيمو انتى متاكده انك صايمة :p
    انتى جبتي الصحة دى منين
    \\

    ههههههههههه
    الله اكبر الله اكبر D:

    \\
    عموما فى ميس اندراستاندنج حصل
    انا مفرضتش سوء النية خالص
    الله اعلم بنية كل واحد
    \\

    ازاي بتقولي مفرضتش سوء النية !!
    طيب ما انت بتشك في كلام اللي قدامك
    ده مش سوء نيه ؟؟؟
    حتى لو مكنتش بتكذبه
    بس الشك في حد ذاته سوء نية طبعا وعدم ثقه

    \\
    ولا علقت المشانق للمدونين
    من حق كل واحد يكتب اللى يريحه
    بس لنفسه
    ميستناش الرد اللى يديله الحكم
    ومش من حق اللى بيرد انه يرمى دماغه للى بيكتب

    \\
    اظن فيها نوع من الظلم للى بيتحكى عنه
    \\

    لا خالص مين قال كده بس !!
    دي مجرد مناقشة
    وبعدين انت لا بتعيب في حد ولا بتظلم وتيجي على حد
    وكمان ما الناس كلها ممكن تغلط
    وبعدين لو قريت البوست اللي نزلته انهارده ;)
    هتعرف اني قلت مش معنى ان اللي قدامي غلط غلطه يبق حد مش كويس


    \\
    عموما
    هرد على كومنت كومنت
    بس بعد الفطار بقي
    لاحسن الواحد مش ناقص فرهدة :d
    \\

    هههههههههههه ماشي

    wait u :)
    Ahmed Gaber said...
    بص يا ابو صلاح
    انت حسيت الاحساس ده دلوقتي و كتبت عنه, و ده برضه نوع من الطبطبه,
    اتحدي بقي ان كل مدون في الدنيا دي كلها, بل كل واحد تحت ايده قلم و بيكتب في مكان كل الناس بتشوفه بيحس الاحساس ده

    و التعليقات اللي فوق بعضها بيأكد صدق كلامي
    العاقل فينا اللي لما حد يضربه ميعيطش, يستني لما يهدي و بعد كده يبدأ يقيم الي حصل, و ساعتها ممكن ميلاقيش حاجه يكتبها لان الانفعال ساعتها هيكون تمثيليه سخيفه هو بيمثلها علي الناس اللي بتقراها.

    أقولك بقي علي حاجه هتخليك تقول عليا مجنون, انا لما باجي اكتب بوست مش بنشرها من اول مر, بفضل احنتف فيها و اشيل و احط و اغير كلمات و افكار لما بتوصل ان البوست بتبقي تافهه و مش برضي عنها فبمسحها. محدش قراها,و بمسحها و ده يمكن احد الاسباب ان انتاجي التدويني (كلمه كبيره دي :D) شبه منعدم, لاني ببساطه مش بنشر الا اللي انا راضي عنه و مقتنع انه من جوايا و بدون اي انفعال

    جرب اللي انا بعمله كده, و ادي ذقني لو نشرت بوست في الشهر. و ساعتها ممكن ترضي عن نفسك

    زيي تمام

    أقعد بالعافيه
    e_emy said...
    //حاسس ان كل واحد اتحط فى موقف بيفسر الدنيا على مزاجه هو
    كل واحد حصلتله مشكلة ييجي يعملها محاكاه من طرف واحد
    واكيد مبيطلعش نفسه غلطان
    لانه لو طلع نفسه غلطان مكانش عمل البوست من الاساس //

    بالظبط كده حصلتلى مرة
    بس مكنش بوست ع بلوج دا كان ع المنتدى كله بقى D: وتخيل بقى كل الناس مع الى كاتب ومحدش عارف غير رايه بس .. كل الناس كانوا معاها الا طبعا انا وواحد كان بيفكر تخيل واحد من 10 علقوا ع الموضوع

    ممكن تكون مجاملات او طبطبه زى ماقولت
    مع ان المفروض مش فاهم حاجه
    اقل حاجه تعملها متعلقش

    رأيى بقى انك تكتب اصلا ع البلوج موضوع شخصى غلط ممكن نعبر عن الموضوع بصفة عامة او قصة او صورة او اى حاجه من سبيل الفضفضة

    انا كمان كرهت التدوين D:

    بوست جميل
    !! a7mad sala7 !! said...
    eslam saad

    //واللى يضايقنى اكتر بقى واحد يدخل يقولك اول وتانى وتالت ... رد ليا وبعدين فى الاخر يقولك احتليت المدونة
    والله لولا انه عيب كنت دخلت قولتله انت تافه واهبل//

    هههههههههههههههههههههههههههه
    ;))

    //حاجات دينية وفعلا روعة جدا
    تيجى تبص هنا بقى ع الردود .. والله مش يتعدوا 2 او 3 بالكتير اللى علقوا ع البوست//

    لا والنبي يا عم
    بلاش الناس تألف فى المواضيع الدينية
    كده احسن
    اللى يرد يدعى للى كاتب وخلاص
    واللى بيكتب موضوع ديني مبيستناش ردود
    اظن دى حاجة لوجه الله

    //كمان من الحاجات اللى بتضايقنى بقى على النت .. الفيس بوك
    ناس قاعدة 24 ساعة مش بتتحرك من عليه
    مع انه فى الاخر وسيلة لتضييع الوقت
    والله العظيم وسيلة لتضييع الوقت
    واللى شايف غير كده يقولى افاداته//

    اه اتكلمت عن الموضوع ده قبل كده فى بوست كامل


    نورت يا سيد المعلمين
    واديك فضفضت هنا يا عم
    يالا اى خدمة
    ;)
    !! a7mad sala7 !! said...
    Ahmed Gaber

    //انت حسيت الاحساس ده دلوقتي و كتبت عنه, و ده برضه نوع من الطبطبه,
    اتحدي بقي ان كل مدون في الدنيا دي كلها, بل كل واحد تحت ايده قلم و بيكتب في مكان كل الناس بتشوفه بيحس الاحساس ده//

    اكيد يابوحميد
    بيتهيالى دى طبيعة بشرية
    احتياج للمساندة
    حتى لو على غلط
    اكيد مش عيب فى الشخص


    //جرب اللي انا بعمله كده, و ادي ذقني لو نشرت بوست في الشهر. و ساعتها ممكن ترضي عن نفسك//

    فعلا والله
    فى مواضيع بكتبها
    ومبلحقش انشرها عشان النت بيفصل مثل
    ابات واقوم الصبح اقول ايه اللى انا كاتبه ده
    وبلغيه خالص

    والمواضيع اللى كاتب عناوينها ع الجنب دى
    توبيكس ان مايند
    مش مقتنع بافكارهم حاليا
    مع ان مواضيعهم جاهزة فى دماغى

    وفعلا الواحد لو فكر فى الموضوع قبل ما ينشره
    غالبا مش هينشره
    بس مش موضوعنا يعنى دلوقتى

    نورتنى يا باشا
    والف مبروك البكالوريا
    وعقبالنا ياااا رب :)
    !! a7mad sala7 !! said...
    e_emy

    //مع ان المفروض مش فاهم حاجه
    اقل حاجه تعملها متعلقش
    //

    بيتهيألى كده


    وبعدين متكرهيش التدوين بسببي
    متحسسينيش بالذنب
    التدوين جميل خالص على فكرة
    هههههههههههه
    !! a7mad sala7 !! said...
    //خليك معايا للاخر كده
    علشان بصراحه البوست استفز فيا حاجات كتير
    وناويه اعلق على كل كلمة D://

    يا ساتر يا رب
    عنيها بتطق شرار :D

    //بس دي حاجه طبيعيه وده حق مشروع ليكوا انتوا الاتنين
    كل واحد من حقه يقنع اللي حواليه ويقنع الطرف التاني//

    ايوة من حقه تماما
    وانا مجبتش سيرة اللى بيدون على فكرة :)

    انا بقول انا دلوقتى ك قارئ
    ودخلت مدونة عشان اقرا وارد
    ازاى ارمى دماغى للرد

    لكن مجبتش سيرة اللى كاتب
    هو حر تماما فى اللى بيكتبه


    //يعني مثلا في حاجه انا شيفاها صغيره ومش هتفرق بس انت شايفها مهمه اوي كانت عامل اساسي في ان مشكله بينك وبين حد تحصل
    الطبيعي انه لما ييجي يحكي مش هيقولها او مش هيتطرق ليها يعني
    لكن انت هتبقى عندك الحاجه دي جزء مهم اوي من الاسباب اللي سببت المشكله دي
    ومبرر مهم في المبررات اللي انت هتقولها//

    دى حاجة تانية بقي انا ماتكلمتش عليها
    ودى بتتاخد لما تكونى محكمة حد
    وعايزة توصلى لحل
    وبردو فى وجود الطرف التانى
    مبيتحكمش على حد غيابى

    //\\
    لا دا كمان بيسوق اللى بيردو على البوست لانهم يردو بالطريقة اللى تناسبه هو وتديله الاحقية
    \\

    ليه سميتها كده !!!
    من حق اي حد انه يحاول يقنع اللي حواليه بوجهة نظره حتى لو كانت غلط//

    لان هو فعلا كده

    وجهة النظر مفيش عليها اختلاف
    واللى وجهة نظره بتختلف عن التانى مبتعملش مشكلة
    لكن الحكم فيه اختلاف
    لما الحكم بيبقى مش مظبوط دى فيها ظلم

    وجهة النظر غير الحكم

    //مادام انا معرفش انه غلطان
    يبقى لو كلامه منطقي ودخل دماغي
    واجب عليا اصدقه لحد ما يظهرلي العكس//

    والعكس دا هيظهرلك ازاى وامتى؟؟
    مفيش عكس هنا هيبان
    لان دا كلام من طرف واحد
    وحكمك بيبقي وقتى
    يعنى بتردى بعد القراية على طول
    مبتدوريش على الطرف التانى وتسمعى منه قبل ما تردى

    //بصراحه يا احمد انا مش فاهمه ليه متحامل على الناس اوي كده وليه مفترض سوء النية يمكن فعلا اللي بيحكي مش قاصد وده هو اسلوبه العادي في الكلام ولو حصل وهو كان غلكان وكلامه ظهر عكس كده احتمال وارد برده يبقى مش قاصد//

    انا ماتحاملتش على حد والله
    ولا فرضت سوء نية لحد ابدا
    حاش لله انى اعمل كده

    كل كلامى على موقف اللى بيقرا
    مش موقف اللى بيحكى

    انا لو اتكلمت عن المدون نفسه
    يبقي مقصدتش الا نفسي
    لان انا عارف انا بكتب ايه

    لكن لما اتكلم عن الناس
    يبقي بتكلم عن االلى بيردو بس

    //تى لو الناس شيفاني غلط
    ساعتها يبقى في مناقشه
    نتيجتها ان حد يقنع الطرف التاني بوجهة نظره والموضوع كده يبقى خلص//

    هاتيلي حد كده عمل بوست واحد
    ومن المناقشة فى الردود غير رأيه
    او اقتنع ان هو غلطان
    !!!!


    //وانت كنت عامل البلوج ليه ؟؟
    انا عن نفسي لما عملته كان نفسي اعمل حاجه جديده
    واعرف ناس جديده واشوف افكار جديده
    يعني تجربة جديده عايزه اعيشها
    عايزه اشوف الناس بتتكلم ازاي وبتفكر ازاي
    ايزه لما اكون متضايقه اقول انا متضايقه
    لما اكون فرحانه افرح الناس كلها معايا//

    وانا معاكى تماما فى ده
    ومجيبتش سيرته فى الكلام


    بي بااك ..
    ShiMOo said...
    a7mad sala7

    \\
    دى حاجة تانية بقي انا ماتكلمتش عليها
    ودى بتتاخد لما تكونى محكمة حد
    وعايزة توصلى لحل
    وبردو فى وجود الطرف التانى
    مبيتحكمش على حد غيابى
    \\

    مين قال بس ان احنا في ردنا بنحكم على حد !!!
    احنا بنقول مجرد رأي او وجهة نظر
    انا معرفش اللي كتب ولا اللي الحد التاني
    بيني وبينهم بس بوست حد فيهم قاله
    بيقول فيه وجهة نظره وبيحاول يحكي بطريقته
    حتى لو مقالش صراحة ان البوست ده بيمثل حاجه شخصية بالنسباله

    \\
    لان هو فعلا كده
    وجهة النظر مفيش عليها اختلاف
    واللى وجهة نظره بتختلف عن التانى مبتعملش مشكلة
    لكن الحكم فيه اختلاف
    لما الحكم بيبقى مش مظبوط دى فيها ظلم
    وجهة النظر غير الحكم
    \\

    حكم ايه بس !!!
    ده احنا لا نعرف اللي حكى ولا التاني !!!
    احنا بنسمع ونقول رأينا في اللي اتقال
    انا كواحده داخله لقيت بوست بالشكل ده
    اقرار واناقش واعلق على اللي فهمته
    بسسسسسسسسسس
    انا ماليش اني احكم على حد اصلا

    \\
    والعكس دا هيظهرلك ازاى وامتى؟؟
    مفيش عكس هنا هيبان
    لان دا كلام من طرف واحد
    وحكمك بيبقي وقتى
    يعنى بتردى بعد القراية على طول
    مبتدوريش على الطرف التانى وتسمعى منه قبل ما تردى
    \\

    هو الموضوع اساسا هيفرق معايا في ايه
    "كقارئ برده"
    اذا كنت لا اعرف ده ولا ده
    يعني الموضوع بالنسبالي مش هيشغلني الا الخمس دقايق اللي قريت وعلقت فيهم
    حاجه لنفسي بقى اني احاول اتعلم لو في حاجه تفيد
    او حاجه مكنتش واخده بالي منها والمفروض احطها في اعتباري
    بسسسسسسسسسسسسسس
    لموضوع مش اكبر من كده يعني

    \\
    هاتيلي حد كده عمل بوست واحد
    ومن المناقشة فى الردود غير رأيه
    او اقتنع ان هو غلطان !!!!
    \\

    ياعم احمد انا بقول يمين وانت بتقول شمال
    ناقشتني واقنعتني بوجهة نظرك كان بها
    مأقنعتنيش تأكد برده ان كلامك هيفرق معايا بأي شكل من الاشكال
    حتى لو انا مش واخده بالي من كده
    ولو انا اللي غلط فعلا يوم ما هعرف اني مكنتش على حق
    هقول اه ده فلان قالي وحاول يقنعني وانا كنت بكابر بس
    مش كل الناس كده اكيد في ناس مش بتكابر
    ولما تلاقي نفسها غلطانه بتعترف وتقول
    بس برده ده مش معناه ان كل اللي مش على حق ومش مقتنع بوجة نظر التاني يبقى بيكابر
    في ناس فعلا بتبقى مصدقه اللي هي فيه
    ومش قادره تقتنع بوجهة نظر تانيه غصب عنها



    \\
    بي بااك ..
    \\

    Wait u :)
    !! a7mad sala7 !! said...
    ... بااك

    //
    هما مش بيقوا ان المتهم برئ حتى تسبت ادانتليه انت بتحكم على الناس من بره
    من غير ما تسمع مبرراتهم !!
    وليه لما بتسمعها مش بتصدقها !! //

    اديكي قولتى اهو
    ((بحكم))

    ازاى بقي ادى الحق لنفسي احكم على اللى بيكتب
    او على اللى بيتكتب عنه
    حتى لو انا ماعرفوش
    هو نفسه هيقرا ردى هيحس بالظلم

    //على فكره من حقهم عليك انك تصدقهم
    مادام محصلش معاك موقف منهم قبل كده
    يقول انهم ممكن يبقوا بيبالغوا او بيخبوا الحقيقه//

    الله ينور عليكي :D
    دا المفروض

    بس فى حاجات بتحس ان ليها وجهين للمعنى
    او الموقف يحتمل تصرفين
    حتى لو حد متعرفوش

    //وده حق طبيعي للناس كلها
    من حقي ان الاقي حد يطبطب عليا لما اكون متضايقه وزعلانه//

    لا على فكرة
    مش بالبساطة دى

    الجدعنة مش انى اطبطب على حد لما يكون زعلان وخلاص

    الجدعنة انى اشوفه زعلان ليه الاول واحاول اصلح معاه
    وبعد كده اطبطب عليه

    مش يمكن المشكلة منه هو
    وبطبطبتى دى ثبت الفكرة فى دماغه ان هو مظلوم

    وقويته على حاجة بدل ما اديله حلها للمرات اللى جاية اديته مسكن للمرادى دى
    وسبت المشكلة زى ما هى

    يا بخت من بكانى وبكى عليا
    ولا ضحكنى وضحك الناس عليا

    الطبطبة عمرها ما كانت وسيلة لحل المشاكل

    //عارف حتى الناس اللي انت بتتكلم عنها وبتقول تفكيرها غريب
    من حقها تلاقي حد يسمعها ويحس بيها
    من حقها عليك تناقشها
    ومن حقها عليا اسمعها وانصحها
    واقول رأيي فيها وفي كلامها//

    وانا هعرف منين اصلا ان تفكيرهم غريب فى الموضوع
    الموضوع اللى بيتكتب ده بيبقي نتيجة
    مش بداية مشكلة

    من حق اى حد انه يتسمع اه
    بس ميتسمعش فى مشكلته مع حد تانى
    و لو اتسمه مديلوش خطوط سير يمشي عليها
    لازم التمس العذر للى مش بيتسمع هو كمان


    //بس للي يستحقها فعلا يعني مش تطبطب على اي حد
    هتعرف منين بقى انه يستاهل ؟؟؟
    بمناقشتك معاه بأنك تسمعه وتحاول تشاركه اللي بيحسه//

    مبيبانش والله
    كل واحد بيختار الصياغة اللى تخليه فى وضع اللى معاه الحق

    لو بين فى اسلوبه انه ميستاهلش طبطبة مش هيكتب موضوعه اصلا


    //\\
    طب ازاى انا احكم من السمع من ناحية واحدة
    \\

    وانا اجيب الناحية التانيه دي منين بقى !!! //

    معرفتش اجيبها يبقي ماردش

    عندى للرد فى الحالة دى تشبيه
    كانك بتغمى عين وتتفرج بالتانية بس

    //ده في ناس اصلا مابتصدق يحصلها مشكله مع حد
    وبتتلكك علشان تبعد عنه
    تقولي يحلوا مشكلتهم بالمناقشه علشان نسمع للطرفين سوا !!
    يعني من الاخر اذا قدرت على واحد مش هقدر على التاني//

    دى تبقي مشكلة اللى بيهرب بقي
    ومش محتاجة انى اتدخل فيها
    اى حد بيهرب من مناقشه حتى لو معاه الحق بيضيع حقه فى ساعتها

    //من حق اللي كلمني وناقشني اني اصدقه لحد ما يظهرلي العكس//

    صعب اوى يظهر العكس بنفس الطريقة
    فكرى فيها كده
    هتلاقيها مستحيلة

    //وبكده الحياه هتبقى احسن يعني
    ع الاقل هتبل تشغل دماغك بالافكار المريبه دي D: //

    هههههههههه
    فكرتيني بعوكل
    وهو بيقولها ممكن تخلى السرعة 80 مثلا
    هتبقى سعيدة بردو
    وهنعيش كمان

    على فكرة هى مجرد فكرة جت فى دماغى
    دا مش معناه انى اخسر حد بسببها
    يعنى يبقي الوضع كما هو عليه
    كل ما فى الامر هى حالة من عدم الرضا
    انا فكرت كتير فى الموضوع ده قبل ماكتبه
    لقيت انى لازم اخلص ضميري على الاقل بالكلام ده

    //الله يسامحك
    تعبت اووووووي من الكتابة :((
    بس يارب ييجي بفايده D: //

    هههههههههههه
    سعد باشا قالها
    مفييييش فايدة :(
    !! a7mad sala7 !! said...
    كونتينيود ...

    //ده مش سوء نيه ؟؟؟
    حتى لو مكنتش بتكذبه
    بس الشك في حد ذاته سوء نية طبعا وعدم ثقه//

    مش شك والله
    ولا تكذيب
    هو مجرد افتقاد لباقي الحدث

    //\\
    اظن فيها نوع من الظلم للى بيتحكى عنه
    \\

    لا خالص مين قال كده بس !!
    دي مجرد مناقشة//

    مناقشة تبقي فى فكرة عامة
    متتعمقش لجزء شخصى
    حتى لو ماتزكرش الاشخاص
    الكلام يبقي عن الفكرة من برا وكل واحد يقول وجهة نظرة فيها
    مقولش اصل فلان عمل كذا
    راح التانى عمل كذا
    وراح رد عليه بكذا
    وانا كأنى بتفرج على مسلسل بيمثله شخص واحد قايم بكل الادوار

    اللى انتى بتقولى عليه ده

    زى طالب راح المدرسة لوحده
    ملقاش حد راح شارح لنفسه
    روح معملشس الواجب
    راح جاى تانى يوم ضارب نفسه عشان معملش الواجب

    >>دا مستحيل يحصل طبعا

    //هتعرف اني قلت مش معنى ان اللي قدامي غلط غلطه يبق حد مش كويس//

    دا اكيد
    كل ابن ادم خطاء

    اللى بيغلط مرة اه ممكن يكون انسان كويس
    لكن اللى بيغلط كذا مرة نفس الغلطة
    دا اللى بيبقي بيستهبل


    //مين قال بس ان احنا في ردنا بنحكم على حد !!!
    احنا بنقول مجرد رأي او وجهة نظر
    انا معرفش اللي كتب ولا اللي الحد التاني
    بيني وبينهم بس بوست حد فيهم قاله
    بيقول فيه وجهة نظره وبيحاول يحكي بطريقته//

    اه حكم طبعا امال ايه
    لما تخش تأيد حد بيحكى عن موضوع شخصي
    وتقوله جو اون انت تمام على اساس الكلام اللى انت بتقوله
    دا يبقي ايه؟؟


    //انا كواحده داخله لقيت بوست بالشكل ده
    اقرار واناقش واعلق على اللي فهمته
    بسسسسسسسسسس//

    اهى دى بقى انا مش بالعها
    مش عارف ليه :D

    //هو الموضوع اساسا هيفرق معايا في ايه
    "كقارئ برده" //

    مش هيفرق معاكى انتى
    بس هيفرق مع اللى بيتحكى عنه
    اللى يتحط فى موقف زى كده هو اللى ممكن يقولك هتفرق ازاى


    //
    يعني الموضوع بالنسبالي مش هيشغلني الا الخمس دقايق اللي قريت وعلقت فيهم//

    مهى دى المشكلة
    بالنسبالك انتى ممكن يكون 5 دقايق
    بالنسبة للمعنيين بالمشكلة كتير اوى

    //ناقشتني واقنعتني بوجهة نظرك كان بها
    مأقنعتنيش تأكد برده ان كلامك هيفرق معايا بأي شكل من الاشكال//

    يا حاجة اقنعك بأيه
    هو انتى قولتى انا غلطانة اصلا؟؟
    الموضوع بصياغته ادامى لا يحتمل الا رد واحد
    >> انتى عندك حق
    و جو اون ميهمكيش من الطرف التانى
    +طبطبتين عهلى الكتف
    +بوسه لو الموضوع بين البنات :D


    //ولو انا اللي غلط فعلا يوم ما هعرف اني مكنتش على حق
    هقول اه ده فلان قالي وحاول يقنعني وانا كنت بكابر بس
    مش كل الناس كده اكيد في ناس مش بتكابر//

    لو انتى فى الموضوع قولتى انا غلط يبقي اكيد بتحكى صح
    والرد هنا هيبقي عادل جدا
    وبعدين لما اكون بناقش اللى بيكتب على اساس ان هو غلط مفيش مشكلة
    لانه هيرد ويدافع عن نفسه
    لكن لما اناقش اللى كاتب على اساس ان اللى بيتكلم عنه هو اللى غلط دى المشكلة
    لانه مش هيعرف يدافع عن نفسه


    اقعدى اشربي حاجة بقي زمان ريقك نشف
    ولا انتى لسه صايمة ؟
    ;))
    !! a7mad sala7 !! said...
    للعلم يا جماعة
    ========
    انا لما كتبت الموضوع ده
    زى ما مكانش اقصد بيه نفسي
    بردو مكنتش اقصد بيه حد معين

    الموضوع جه بناءا على مجموعة مواقف واجهتها كده

    على مجموعةمواضيع حسيت انها مرسومة بريشة المدون ومفهاش اى نقطة نشاذ

    ودا طبعا اللى يخليك تقول ازاى

    هو كل واحد بيكتب بوست عن موضوع شخصي بيبقي هو اللى مظلوم؟؟

    معنى كده ان مفيش حد غلطان فى الدنيا

    ولا الغلطانين كلهم معندهمش مدونات؟؟



    حاجة كمان
    =====
    عشان فى ناس بتفهم المواضيع على مزاجها

    زى بالظبط موضوع النت المحدود
    الناس فكرت انى بشتغل مع الحكومة
    ولا باخد اجر من ورا الدفاع عنهم
    او ليا اى مصلحة من قريب او بعيد


    هنا بردو
    انا مقولتش لحد متكتبش موضوع شخصي
    ولا قولت لحد غير طريقتك فى التدوين
    كل واحد حر فى كل تصرف يعمله

    مواضيعي للحكم على نفسي بس
    مش على حد تانى

    وانتقادى مش عشان امشيه ع الناس
    ولا عشان اعمم الفكرة اللى انا مؤمن بيها
    انتقادى ما هو الا رأيي
    قد يكون صح وقد يكون غلط

    وكل واحد حر ما لم يضر

    ودومتم..
    OlivE said...
    أنتو جبتو الصحه دى كلها منين
    الله اكبر فى عينى
    بس هدوء كدا بقى علشان اعرف اقول رايى مبحبش الصوت العالى جنبى وانا بركز

    أولا انت اتخنقت من التدوين ؟؟
    طيب ازاى وانت اول ما فكرت فكرت تتكتب هنا فى المدونه بتاعتك يعنى ولا مخنوق ولا حاجة .

    ثانيا معظم الناس لما بتكتب حاجة شخصيه او خاصه بيه فى حياته او موقف معين مر بيه بتبقى بتكتب لهدفين نوع من انواع الفضفضه وكمان المشاركه فى التفكير مع اصدقائه
    يعنى انا مثلا عندى مشكله وهموت واحكى عنها هحكى عنها واقول كل اللى ينفع يتقال لاحظ هنا ان فى حاجات مينفعش تتقال على المدونه خالص وحضرتك كقارىء للموضوع هتقول رايك فى ايه فى اللى مكتوب فى اللى فهمته وهتوضح دا انك فهمت من الموضوع دا كذا كذا ووجه نظرك هى كذا .
    وبصراحه يعنى الكلام عمره ما بيوصل كل حاجة فى حاجات كدا مينفعش يعنى تفهمها الا بمواقف تتحكى ومفيش حد هيدخل يحكى مواقف حياته كلها على البلوج.

    ردك بيكون بناء على اللى قريته مش اللى بتفكر ان يكون صاحب الموضوع مخبيه وانه كدا مش واضح احنا مجرد بنقول راينا مش بنحكم لا حد او على موقف .

    انا واحده من الناس مش بتحب ابدا اسلوب الغموض فى الكتابه علشان كدا بطلت اكتب اى حاجة شخصيه لانى بحس انى بعذب الناس بالكلام دا لانهم مش فاهمين حاجة ومش مطالبين يردوا على كلام مش فهمينه
    انا عندى حل والله لو كان الشخص دا بيكتب لمجرد الفضفضه فقط ومش محتاج انه يسمع ردود من حد يبقى يقفل التعليقات فى الموضوع دا ومجرد انه دون حاجة حابب يتكلم فيها حاليا

    اما بقى لو كان بيكتب علشان محتاج راى الناس وانه يتناقش فى الموضوع دا يبقى فى نوع من اانواع المصدقيه فى الكتابه والوضوح علشان يبقى فى مصداقيه فى الرد

    دى وجه نظرى

    حاجة اخيره
    //التدوين بقي وسيلة للطبطبة//

    وايه يعنى لما يكون كدا بس يكون الشخص دا فعلا على حق ومحتاج دا هتقولى ونعرف ازاى بقى بدام بيطلع نفسه هو اللى مظلوم هنفترض حسن النيه وهنرض حسب اللى فهمناه من الموضوع اما بقى لو حسيت ان الموضوع دا نقصه حاجات كتير وملخبط يبقى الافضل متردش خالص فى الحاله دى ...

    كفايه كـــــــــــــدا

    سلامى
    ShiMOo said...
    Olivetree

    معــــــــــــــــــاكي في كل كلامك
    اعتقد اننا متفقين يعني :)



    a7mad sala7

    واضح فعلا ان مفيش فايده D:
    بس في حاجه صغيره عايزه الفت نظرك ليها
    وافكر نفسي بيها انا كمان
    خلي دايما رأيك يحتمل الصواب والخطأ ومتجزمش بيه 100%
    لانك معرض ان ييجي اليوم اللي تكتشف فيه
    انك كنت غلط في تصرف او في وجهة نظر
    يعني يا عالم ممكن بكره اجي واقولك كلامك ده صح
    انا كنت حسباه غلط او العكس

    مش قارده اقول حاجه تاني
    صداااااااااااااااااااااااااااااااع
    :((

    حسدتوني ربنا يسامحكوا D:
    !! a7mad sala7 !! said...
    Olivetree

    //أولا انت اتخنقت من التدوين ؟؟
    طيب ازاى وانت اول ما فكرت فكرت تتكتب هنا فى المدونه بتاعتك يعنى ولا مخنوق ولا حاجة .//

    هو انا كل ما اتخنق من حاجة هسيبها ولا ايه

    طب انا اتخنقت من الكلية
    ماروحش تانى؟؟

    وبعدين انا اتخنقت من حاجة معينة
    الرد على المواضيع الشخصية
    او حتى قرايتها
    بس

    //انا واحده من الناس مش بتحب ابدا اسلوب الغموض فى الكتابه علشان كدا بطلت اكتب اى حاجة شخصيه لانى بحس انى بعذب الناس بالكلام دا لانهم مش فاهمين حاجة//

    هو دا اللى هيحصل


    //لو حسيت ان الموضوع دا نقصه حاجات كتير وملخبط يبقى الافضل متردش خالص فى الحاله دى ...//

    تمام
    لا جديد فى باقي الرد

    ويلكمد زتونة ::)
    !! a7mad sala7 !! said...
    ShiMOo

    //لانك معرض ان ييجي اليوم اللي تكتشف فيه
    انك كنت غلط في تصرف او في وجهة نظر//


    لالالا اطلااااقا
    مين قال كده؟؟


    //مش قارده اقول حاجه تاني
    صداااااااااااااااااااااااااااااااع
    :((

    حسدتوني ربنا يسامحكوا D: //

    لا انا بس اللى حسدت على فكرة ;))

    الف سلامة يا سيدتى
    وابقي خدى احتياطاتك قبل المشاركة بعد كده
    يعنى شنطتك يبقي فيها دوا صداع وحاجات زى كده :P

    هابي فور يور ديسكاشن :)
    OlivE said...
    ShiMOo

    //مش قارده اقول حاجه تاني
    صداااااااااااااااااااااااااااااااع
    :((//

    متدخليش البلوج دا تانى
    p:
    p:
    ShiMOo said...
    Olivetree

    \\
    متدخليش البلوج دا تانى
    p:
    p:
    \\

    لا بجد انتوا عملتوا فيا ايه ؟؟؟
    انا بقالي 5 ساعات نايمة :))
    !! a7mad sala7 !! said...
    =))


    ادى اخرة اللى يرد عندى



    الف لا بأس يا شيمو والله :)
    !! a7mad sala7 !! said...
    وانتى يا زتونة دخلى لسانك

    فى فران بتعدى فى البلوج

    انتى حره بقي :D
    ShiMOo said...
    a7mad sala7

    \\
    فى فران بتعدى فى البلوج
    \\

    وكمان فران !!!
    كله الا دي بقى :))
    !! a7mad sala7 !! said...
    دا مش فران بس


    دا بيت زواحف على فكرة


    :))


    كل واحد ياخد باله من نفسه بقي ;;)

Post a Comment



رسالة أحدث رسالة أقدم الصفحة الرئيسية

Blogger Template by Blogcrowds