شريف و نص ..


مسلسل باااايخ
البطل بتاعه شريف عبد الفضيل
لاعب نادى الاسماعيلي _حتى الان_

الموضوع طول اوى
ورخم اوى
وبقي شكله وحش

لما ناديين كبار فى مصر يتخانقو على لاعب بالطريقة دى
ويوصل سعرة 7.5 مليون جنية ويمكن اكتر
وهيموتو بعض عليه

ونشوف طرق العصابات دى
رايح يمضي فى نادى ياخدوه فى عربية متفيمة من ع الباب
ويمضوه فى السر
ويخبوه
وشوية يقولو اتخطف

وكل واحد يطلع بتصريح
ويعلنو الحرب على بعض

بجد بينتلى مدى تفاهة ناديين القمة
هما قمة بس فى التفاهة
ناس معاها فلوس مش عارفه تعمل بيها ايه
بيجرو ورا لعيب ووصلو تمنه ل 7.5 مليون جنيه
مش فاهم هو اللى خلقه مخلقش غيره ولا ايه

مع انه من الفريق اللى بنتمى ليه
بس مش كده
بجد شكلنا بقي وحش

تعرفو انا فرحان فيهم والله
خليهم يعضو فى بعض كده
ويا رب يتوقف فى الاخر ولا يلعب هنا ولا هنا

بدل ما يدورو على حد زيه عندهم
ويشوفو قطاع الناشئين بتاعهم ويعملو زيه واحسن منه
لا
الخطف اسهل
طالما فى المغفلين اللى بتدفع
والغلابا اللى بيفرحو بالفلوس
يعنى بنجيب لعيبة ديليفرى

داحنا ولا كأننا فى شيكاغو
خطف وهروبو قافل موبايله ومش عارف ايه

دا لو هيلعب لوحده فى الفريق مش هيعملو كده
بس هى طالما وصلت للعند
ممكن يحصل اكتر من كده
وصدقونى المستفيد الوحيد من الهبل ده هو الاسماعيلي
خليهم يعلو سعره ويتخانقو مع بعض وادينا بنتفرج :D

برافو يا اندية القمة
ضحكو الناس علينا اكتر

13 Comments:

  1. eslam saad said...
    بكرة المصرى هينزل بالعرض التقيل بتاعه وشريف هبيع الاهلى والزمالك والاسماعيلى كمان

    ده ممكن يبيع ابوه فى العرض ده :D

    اومال ايه هو عرض المصرى قليل !!!
    !! a7mad sala7 !! said...
    هههههههههههههههههههههههههههههههههههه


    ودا عرض ايه ان شاء الله

    اكيد عرض ازياء :))



    احلى حاجة فى النادى المصرى ده
    ان مفهوش بذر :D
    قسورة الزواوي said...
    عالم المثالية بتاعك انتهى من ايام جدي وجدك


    كلها مصالح ومتبقاش اعور تشوف الي عليك ومفيش عندك ادنى مصداقية في القياس , على نفسك , ابقى قارن كويس يا عم وشوف الاخبار الجديدة اول باول

    على فكر ةالبلوج لاحظت انه الاستايل بتاعه حلو

    استمر , استمر
    go on

    سلام يا منجاوي
    قسورة الزواوي said...
    اه نسيت
    بقى عندكم اربعه من الاهلي الموسم ده

    انتقلوا جديد , الحضري , صديق , ماندو

    وابو مسلم

    مطلعتش اعيط ليه في البلوج عندي

    ولا مزعلك التطبيع مع الاهلي , خلاص معدش حاجة تقعد تضرب فيها , بقينا نسايب يا عم

    لووول
    !! a7mad sala7 !! said...
    النسر الاصلع

    سيد محمد بيك عزت

    //عالم المثالية بتاعك انتهى من ايام جدي وجدك//

    فين المثالية
    هو انا بقولك حاجة معجزة
    الثفقات كتير واللعيبة رايحة جاية

    ليه مفيش الضجة بتاعة شريف عبد الفضيل دى مع حد تانى


    //كلها مصالح ومتبقاش اعور تشوف الي عليك ومفيش عندك ادنى مصداقية في القياس , على نفسك , ابقى قارن كويس يا عم وشوف الاخبار الجديدة اول باول//

    اهدى بس وابلع ريقك
    مصالح ايه يا عم الحاج
    الموضوع كله عند فى عند ليس اكتر

    وفين اللى عليا ومشفتوش ده
    لو هتكلمنى بصفتى ممثل للاسماعيلي
    هرد عليك بردو
    انت شفت الاسماعيلي راح خطف لعيب من على باب نادى
    ولا حد من عندنا خبي لعيب او هربه

    اللعيبة اللى بتيجي كلها بتيجي بمحض ارادتها
    لان الاسماعيلي هو اللى بيعمل نجم
    مش اللى بيجي بيعمل نجوميه للاسماعيلي

    لو سلاحكو الفلوس والامكانيات
    احنا معندناش وسيلة اغراء نجر بيها لعيبة يعنى بييجو بمزاجهم خالص

    والاخبار انا متابعها مش فاهم تقصد ايه

    //على فكر ةالبلوج لاحظت انه الاستايل بتاعه حلو

    استمر , استمر
    go on//

    ميرسي خالص
    اى ويل جو اون اكتشيوالى ;;)
    !! a7mad sala7 !! said...
    //بقى عندكم اربعه من الاهلي الموسم ده

    انتقلوا جديد , الحضري , صديق , ماندو

    وابو مسلم //

    اهلا وسهلا بيهم
    ربنا يزيد ويبارك

    //مطلعتش اعيط ليه في البلوج عندي //

    وتعيط ليه يا حبييييبي
    هو احنا خدنا منكو حاجة غظب عنكو
    دا هما اللى بيترمو علينا
    انت مش واخد بالك ولا ايه


    //خلاص معدش حاجة تقعد تضرب فيها , بقينا نسايب يا عم //

    لو هتحسبها كده يبقي اه طبعا
    انت فى حرب وكل حاجة بقت مباحة
    والضرب تحت الحزام بقي علني

    ومش معقول هتبقي واقف بتتخطف وبيقطعو منك كل شوية حتة وتسكت

    لازم تمد ايدك والعين بالعين

    ولاحظ ان كل حاجة بيعملها الاسماعيلي بيعملها فى النور

    دا الفرق بينا وبينكو

    هدى اعصابك شوية هى مش خناقة

    وانا هرد عليكي فى كل حاجة
    متقلقش
    قسورة الزواوي said...
    بص يا حمادة برده مقولتش الحقيقة

    احنا محتاجين ندعم الدفاع , تمام

    هتمشي ورا كلام ابراهيم يوسف , ويقولك خدوه من قدام بوابة النادي , بعدين احنا بنتكلم عن جاموسة , ده لاعب ليه كيان

    هو حر يا اخي يروح يلعب في اي مكان
    وطبعا حكاية الخطف , هو نفسه الكلام الماسخ الي نازلين تكرروه, خطف ايه
    هو الناس هنود يعني , هو لو كان راح الزمالك هيبقى برد وسلام , ولما يروح للاهلي
    تعيطوا , يا ابوحميد مش كده
    لاعب واختار يروح فريق , نسيبه يروح
    وتاني هفكرك , بقى نص فريق الاسماعيلي من لعيبة الاهلي , يعني الاية انقلبت ,ومش لازم افكرك انه ده احتراف ,وبقولك النادي يشوف مصلحته فين ويعملها , ولا هتقولي الاتفاق ده متمش مع ادارة الاسماعيلي , ومن الاساس , كل حاجة مترتبة على فكرة من ايام صفقة الحضري بس انتا الي مش متابع
    اسف على الاطالة , وانا مش معصب ولا بشاكل
    سلام
    !! a7mad sala7 !! said...
    يا سيدي الفاضل

    دعمو فريقكو براحتكو

    وخدو اللى يعجبكم

    بس فى اصول

    ويا ريت متتكلمش عن الاحترافية
    عشان اللى بيعملو الاهلى ده همجية
    مش احترافية

    مفيش حاجة بالعافية زى مانت قولت

    يبقي مفيش داعى يخبوه ويهربوه

    ويخلوه يقفل تليفونه

    دا واحد متخلف مش عارف عاقبة اللى بيعمله

    والطرق اللى بيستخدمها القيعى دى طرق رخيصة

    اينعم هى اللى بتنفع بس بردو رخيصة

    عمرنا ما سمعنا عن نادى محترم بيعمل كده

    ورغبة اللاعب كانت للزمالك وفى عقد متوثق وهو ماضي عليه بايده
    عشان هو مش جاموسه زى مانت بتقول ولاعب ليه كيانه

    بس هى الفلوس بتعمى الناس بعيد عنك

    وبعدين انا لا جبت سيرة ابراهيم يوسف ولا جيت جنبه
    كلامى كله من دماغى
    بناءا ع اللى بتفرج عليه فى التليفزيون والجرايد والنت

    ومتقوليش نص الفريق من الاهلى والكلام ده
    عشان رديت عليه فوق
    اقرا ردودى تانى بتمعن

    عشان قلتلك جايين بمحض ارادتهم

    عشان الاسماعيلي هو اللى بيخليهم نجوم

    مش الاسماعيلي اللى بياخدهم نجوم

    رد تانى يالا
    عيد الكلام
    halaS demahoM said...
    الله يخرب بيت ام الكره اللي لحست دماغ الناس
    ايه يا جماعه
    خلاص ضاقت بينا وكل واحد الدنيا ضاقت بيه ومقدموش غير الكوره
    انا الموضوع ده اتفتح معايا في يوم اكتر من ميت مره لما زهقت منه ومن الكورة واللي بيشجعوا الكوره
    وبعدين شريف مين ده اللي بتتكلموا عليه
    والنبي اول مره اسمع عنه
    بتتكلموا عليه وكأنه كان بيلعب في روما وقرر يرجع الدوري المصري
    ايه يا استاذ
    هتزلونا بيه
    خدووووووووه
    انت وهو والاسماعيلي والزمالك والاهلي كمان والمنتخب
    دريم كبير said...
    السلام عليكم ورحمة الله

    معذرة ياجماعه دي اسمها سوء اهدار للموارد

    و















    تفاهة

    يعني ايه يدفعوا 7.5 مليون على لاعيب

    ودكاترة الجامعات مش لاقيين ياكلوا !

    يعني ايه واحد عايز يمول بحثه علشان يطلع باختراع ب3000 جنيه بس وتتحطم حياته علشان محدش بيموله ويروح يشوفله صنعه ياكل بيها عيش في البلد المتخلف علميا ده

    ارجو اني مااكونش عكرت مزاجكم بالكلمتين دول

    ويارب ادعوا معايا نشوف تفكير سليم في بلدنا
    لان لو مكانش الشعب مهتم الاهتمام ده بالكوره مكنتش هتشوف المبالغ دي بتتصرف في الجهة دي!

    تحياتي
    !! a7mad sala7 !! said...
    Catch Me If You Can

    هههههههههههههه

    //ايه يا استاذ
    هتزلونا بيه
    خدووووووووه//

    يا سلام لو كل الاهلاوية زيك كده
    الكورة هيتصلح حالها :D

    //انت وهو والاسماعيلي والزمالك والاهلي كمان والمنتخب//

    لا وسعت منك كده ;)
    !! a7mad sala7 !! said...
    دريم كبير

    //معذرة ياجماعه دي اسمها سوء اهدار للموارد

    و

    تفاهة //

    ومعزرة ليه يابنى
    مهى دى الحقيقة
    فعلا تفاهة

    ومش دكاترة الجامعة بس
    عمم بقي

    وفعلا كلامك صح ومن غير اسف

    ويلكمد
    !! a7mad sala7 !! said...
    اخر كلام

    شريف عبد الفضيل فى الاهلى مقابل 7.5 مليون جنية

    +احمد صديق

    شكرااااااااااا

    مبروك عليهم وعلينا

    بس صدقونى احنا الكسبانين :D

Post a Comment



رسالة أحدث رسالة أقدم الصفحة الرئيسية

Blogger Template by Blogcrowds