همسة

يا جماعة همسة فى اذن كل المدونين

بجد والله انا بحبكو لله فى لله
ومش بقول الكلام ده من اى باب غير النصيحة

كنت عاوز اقول حاجة من فترة كده

بس كنت متردد مش عارف ليه

عموما انا هقول وخلاص

بالنسبة لموضوع الاغانى ده

عرفنا انه حرام طبعا

بس لان نفوسنا ضعيفة
فمعظمنا بيسمع
وانا اولكو

انا مش جاى اقولكو متسمعوش ولا اعمل شيخ وواعظ

بس جاى اكلمكو فى اضعف الايمان

يعنى بدل ما تاخد 5 او 6 ذنوب يوميا
خليهم ذنب واحد

وربنا يقدرنا على طاعته

يعنى مثلا اللى حاطط اغنية فى بلوجه يا ريت يشيلها
وخلى سماعها لنفسك انت على الاقل

عشان كل واحد هيخش يسمعها هتاخد انت ذنبه
يعنى بدل ما تشيل ذنبك وذنب اللى بيخش يسمع
كفاية ذنبك انت لوحدك
الحكاية مش ناقصة :D

غير انك مش هتستفيد حاجة لما تسمع اللى داخل

الناس اللى بتعمل كول تون على خطوط الموبايل
كل واحد هيتصل بيك ويسمع هتاخد ذنبه

وانت قاعد فى بيتكو بتسمع اغانى
وطى الصوت او اسمع من الهيدفون الصغير ده

لان كل واحد فى البيت بيسمع معاك هتاخد ذنبه


مش بقولكو انى متقي وعارف ربنا اكتر منكو
انا كنت اولكو فى الحاجات اللى قلتها دى
ويمكن اكتر واحد فيكو بيسمع اغانى

بس خلوها تيجي واحدة واحدة كده
امبارح كنت بتسمع وتسمع اللى حواليك
النهارده بتسمع لوحدك
بكره ربنا يقدرك ومتسمعش خالص

ربنا يوفقنا لما نحبه ويرضاه لنا


انا هقفل ردود الموضوع ده
مش عامله عشان حد يرد

اللى مزنوق فى رد اوى يرد فى الموضوع اللى قبله :D

0 Comments:

Post a Comment



رسالة أحدث رسالة أقدم الصفحة الرئيسية

Blogger Template by Blogcrowds