ديــــن ودنيــا

بقينا فى زمن الانفتاح
نعيش فى بلد ديموقراطية .. من حق كل واحد التعبير عن رأيه

جميل اوى

//من حق كل واحد التعبير عن رأيه//

من المنطلق ده عايزين نتكلم شوية
نصحح بعض المفاهيم
نوضح حتة صغيرة قد تكون غائبة عن ناس كتير

>>هو اى حاجة فى الدنيا كده الواحد يعبر عن رأيه فيها؟؟
هتقولى اه
كل حاجة فى الدنيا بتتاخد بالعقل

هنا اقولك استوب
دنيتك لك ان تتحكم فيها كيفما شئت
لكن دينك ملكش حق انك تشكله على مزاجك

>>فى ناس تقولك ايه
يا عمى هو ربنا عرفوه بايه
تقولى بالعقل

هنا بردو اقولك استوب
هو انت عقلك ده اد ايه عشان تتطاول على خالقك وتقولى انا عارف ربنا بالعقل؟؟

>>يا جماعة الدين لا يؤخذ بالعقول
لان اللى يحكم بيه عقلك قد يختلف عليه عقلى
واللى يقبله عقلي ممكن يرده عقلك
وبقي الدين لعبة بين البشر
انا اتفق وانت تختلف
وواحد تالت يطلع برأى كمان
يا جماعة غلط
والله العظيم غلط

>>الدين مفهوش على ما اعتقد ودا رأيي
الدين يعنى القران بيقول كذا والحديث بيقول كذا
يأما تقول الله اعلم

دين يعنى حجر اساس
لو ماتحطش صح كل حاجة هتتهد فوق راسك

>>فرق كبير بين علماء الدين والعقلانيين
العقلانيين بيعتمدو فى فتوتهم على العقل فقط
العلماء بيعتمدو على منهج ثم على عقل بردو
الناس دى مش مجرد حفيظة وبيصمو اللى بيحفظوه

دا اللى بتلاقيه اختلاف شرح بين عالم وعالم
او اختلاف تفسير بين شيخ وشيخ

>>عارفين ان اختلاف العلماء رحمة للعباد
بس لاحظ انه اختلاف العلماء وليس اختلاف العقلانيين
اختلاف العقلانيين بيوديك على طريق من الشكوك والطرق الفرعية

>>دلوقتى تلاقي كل واحد طالع برأى وفكر
ودا يعيب فى شيخ ودا يحاول يغلط شيخ
واحد جايب قضية وداير ع الفضائيات عشان يجمع اكبر عدد من الاراء
ويتتبع فى ذلات ده ويحاول يوقع دا فى الغلط
عشان فى الاخر يوصل لرأى هو عايزه ويختار الفتوى اللى تناسبه

يا جماعة والله ما ودانا فى داهية الا الفتاوى اللى كل واحد قاعد يطلعها وهو قاعد فى بيتهم فى ساعة صفا
ويقولك احنا بنعمل على تطهير العقول

>>الاندراج ورا العقلانية فى الدين بيؤدى لضلال
لان فى حاجات كتير لا يتحملها العقل البشرى
ودا نتيجته يا جنون يأما الحاد
حتى لو فى امر بسيط هيعمل تشتيت للناس

فى حاجات كتير اكبر من انك تجيبلها حل بعقلك

>>الاسلام مناهج
كتاب سماوى اللى هو قران كريم
واحاديث شريفة من سيدنا محمد عليه الصلاة والسلام
وشوية المعاملة اللى اتعلمناهم من السلف بردو
وبنقيس عليهم حياتنا فى ظل التطور اللى بنعيشه

>>مبقولش ان كل حاجة معملهاش سيدنا محمد حرام
الاساس فى التحليل والتحريم هو التحليل
كل الامور حلال ما لم يثبت العكس
بس دا فى الامور البسيطة مش اللى بتحتاج لفتوى

>>يبقي نسمع من الناس اللى دارسه وفاهمة عشان هما دول اللى هيعرفونا ديننا بجد
ربنا بيقول (انما يخشي الله من عباده العلماء) صدق الله العظيم
اكتر ناس بتخاف ربنا هما العلماء
مقالش العقلانيين ولا المفكرين ولا حتى قال العابدين
يبقي الناس دى تستحق منا كل احترام وتقدير وكلامهم يتاخد خط سير لينا
وللعلم
الغلط فى العلماء ضلال
فى ناس بتقول دول رجعيين وطول ماحنا وراهم هنفضل متخلفين
يا عم الناس طلعت القمر واحنا لسه بندور على اخش الحمام برجلى اليمين ولا الشمال
دا والله ضلال
انت لو معرفتش دينك كويس عمرك ما هتتقدم خطوة فى حياتك

كمان الاختلاف على العلماء ضلال
>>الا بالدليل

>>الكلام ده مش معناه الارهاب الفكرى
ولا ان مفيش حد يقف ادام العلماء
لا
اقف وناقش بس بالدليل والاثبات
مش بطول اللسان والفلسفة الكدابة

من قال لا اعلم فقد افتى
لما تقول مش عارف احسن ما تقول اعتقد
ارجوكم اتفلسفو فى اى حاجة الا الدين
الفساد كتر وبقينا فى عداد الاموات على قيد الحياه

محدش هيقلل من شأنك ولا هيعيبك بحاجة لما تقول الله اعلم

>>ربنا خلق الانسان وكرمه عن بقية المخلوقات بالعقل
بس اداله العقل عشان يفرق بيه بين الحق والباطل
ويطيع اوامر ربه ويمشي على منهجه الصحيح
مش عشان يخلق احزاب ويعمل من كل موضوع مليون اتجاه
ويعمل لبث بين الناس نتيجته تضليل لناس من نفس الدين

>>ناس بتدى امثلة بمصطفى حسنى وعمر خالد و و و
الناس دى ما هى الا تلاااميذ للشيوخ الكبار
وكلامهم بردو بناءا على دراسة وعلم
مش بتكوين عقلي ولا اراء وافكار

ــ نرجع بقي ورا شوية

ربنا عرفوه بأيه؟
عرفوه بالكتب السماوية والرسل والانبياء
مش بالعقل

يبقي مش كل حاجة فيها دا رأيي وعلى ما اعتقد وبيتهيألى

>>الدين يسر؟
اه يسر
بس مش بدائل

يسر فى التعامل والمحاسبة
وليس التهاون والاختيار من بين الافكار والاراء
مش اعمل دا أو ده
ولا ده مسلم بيه عندك وعندى لا
وعند واحد تالت حاجة غيرنا احنا الاتنين

>>مش عيب ان حد يغلط
بس العيب انه يصر على الغلط

الشاطر مش اللى يمشي ورا رأى ويتشبث بيه ويدافع عنه حتى لو غلط
الشاطر اللى لما يعرف انه غلط يقول انا اخطئت فى الحتة الفلانية وتصحيحها كذا
مفيش انسان معصوم من الخطأ

العند فى الدين وحش
العند بيورث الكفر

.......
كلام كتير اوى كان فى دماغى من كام يوم
حاجات كتير طارت منى ... مش مشكلة
بس اتمنى ان تكون الفكرة وصلت

ملحوظة: الموضوع ده مش بناءا على كلام من دماغى بس
دا بناءا على درسين
واحد للشيخ محمد حسان وواحد للداعية مصطفى حسني
كونت منهم الكلام اللى بقوله ده

واحد بيقولى ايش لم الشامى ع المغربي
شامى ومغربي بس الاتنين مصادرهم واحدة

مش معنى انك بتسمع لشيوخ زى محمد حسان يبقي متسمعش لدعاه صغيرين
الدعاه الصغيرين اقرب لينا فى الحياه
لامسين الواقع وبيترجمولنا المنهج بطريقة نفهمها ونقدر ننفذها
بمعنى اصح adapter
:D

هختم بردو بحديث شريف انا بشوف انه اجمال لكل كلام ممكن يتقال فى الموضوع ده
(تركت فيكم ما ان تمسكتم به لن تضلو بعدى ابدا ... كتاب الله وسنتى)
صحيح الاسناد

اللهم ارنا الحق حقا وارزقنا اتباعه
وارنا الباطل باطلا وارزقنا اجتنابه

10 Comments:

  1. غير معرف said...
    السلام عليكم

    طبعا كلامك ده صح مية بالمية

    بس ان ربنا عرفوه بالعقل

    دي واخدنها من قصة ابراهيم عليه السلام

    واللي كلنا عارفينها

    أما قصة اننا نغلط في اي شيخ عالم جليل

    فدي لا يليق باي انسان انه يعملها

    ولو كان شيخ برده

    وانا عن نفسي اللي علمني يعني ايه عمل

    خيري ينفع بلدي وديني وامتي عمرو خالد

    ومع احترامي لكل العلماء والمشايخ واني

    عمري ما اغلط في جد لان دول ناس

    بيجتهدوا عشان يحللوا الامور بس

    للاسف بجد كتروا اوي وساعات بيكون في

    خلافات بتكبر مع انها قصة تافهة جدا

    وفي الاخر احنا اللي بنتووووه

    معلش طولت عليكم

    سلام يا اسمعلااااااااااوي
    قسورة الزواوي said...
    بسم الله الرحمن الرحيم

    اول توبيك جامد في البلوج باعتقادي

    تانيا يا ابو حميد معالجة كويسة جدا وسلاسة في التنقل من نقطة لنقطة في مشكلة , يمكن هي السبب في البلاء الي احنا فيه

    حاجات كتير بتمد ايدها عشان تدق مسامير في نعش الامة

    منها الدعوى للديموقراطية , اواه لو يعلمون ما تخفي هذه الكلمة من دمار وخراب لامة الاسلام

    اواه كم دمرتنا الفرقة والتحزب والاختلاف , وكلام الرويبضة الفويسق في امور العامة , فضل واضل .

    والله الذي لا اله الا هو لو تمسكنا بما كان عليه نبينا صلى الله عليه وسلم لاهتدينا .

    الا تعقلون ؟؟ االديموقراطية افضل من دين الله , هل جر الدين على الناس الويلات ؟ هل كنا اعز امة بغير الدين

    ام هل ترانا اقوي على القيام بدعاوى الديموقراطية اكثر من مبتدعيها , وهم قد فشلوا وضلوا , هل كلام الفلاسفة والبشر وما وضعوه يهدي من اضل الله , ام هل هو افضل من ما جاء به الدين الحنيف , اغير دين الله تبغون

    والى الله المشتكى

    (فستذكرون ما اقول لكم وافوض امري الى الله , أن الله بصير بالعباد)
    !! a7mad sala7 !! said...
    Mohamed Al-Sayed

    الخلافات دى اللى بيخلقها الايدي الخفية اللى عايزة توقع الدين

    وبيبقو مبسوطين بيها اوى

    واحنا اللى اديناهم الفرصة لكده
    !! a7mad sala7 !! said...
    النسر الاصلع

    //اول توبيك جامد في البلوج باعتقادي//

    ميرسي ليك ;;)


    //الرويبضة//

    احد اسباب فساد الدين والمجتمع
    اللهم احفظنا
    صاحب رأى said...
    موافقك فى كلامك
    بس ياريت يا احمد تفكر شويه
    سيدنا ابراهيم عليه السلام
    كان بيعبد ايه فى الاول
    مش القمر ومن بعده الشمس
    واحنا عارفين الحكايه
    وفى الاخر عرف ان ربنا واحد والى نهايه القصه
    اصبح بيعبد ربنا بناءا على تفكيره وتأمله وكل ده بيساوى "عقل"
    وبعد كده ربنا اوحى له
    وسأل ربنا انه يثبت له وجوده
    وده ليطمئن قلبه
    يبقى العمليه كلها يا ابو صلاح "عقل + قلب"
    دا علشان تؤمن بربنا
    عقلك مدرك 100 % بوجود الله
    وقلبك كذلك مؤمن ومطمئن بذلك


    ,,اما بقى مسأله حلال وحرام دى ترجع للقرآن والسنه ودا طبعا مفيش فيه كلام
    بخلاف المقياس على حياتنا دلوقتى

    والله اعلم طبعا يا ابو صلاح

    واسف على الاطاله
    صاحب رأى said...
    اسف يا ابو صلاح نسيت حاجه مهمه
    الشيوخ والعلماء اللى بيقوموا بموضوع المقياس
    يعنى زى الحشيش مثلا بيقيسوه انه بيذهب العقل
    والخمر بتذهب العقل
    يبقى الحشيش حرام

    من كل ده عايز اقول انه استخدم عقله بجانب القرأن والسنه

    مش هتقدر تستغنى عن عقلك لانك مخير مش مسير

    وعلى فكره لغايه دلوقتى فى ناس بتحرم الجواز الشرعى وفى ناس بتحلله .
    واقرأ فتاوى الازهر وانت هتلاقى تناقضات
    !! a7mad sala7 !! said...
    Heshmat

    انا مقلتش امنع عقلك فى التأمل
    انا قلت امنع عقلك فى الحكم على امور الدين
    وعلى الفتاوى

    زى ما قلت فوق ان ربنا كرم الانسان بالعقل
    عشان يميز بين الحق والباطل
    ويختار طريق الهداية

    مش عشان يخلق فتاوى


    سيدنا ابراهيممكانش جاله وحى
    ولا كان انزل عليه كتاب سماوى

    كأن بيتأمل فى الكون من البديهة


    لكن احنا عندنا الطريق موجود
    ليه نحاول احنا نخرج من عليه

    ولا لازم نتبع طريقة ودنك منين يا جحا؟؟

    وخلي بالك لو اتبعت الطريق ده
    هتوديك لأسئلة ملهاش اجوبة
    هترجع بعقلك لمين اول الخلق
    سيدنا ادم
    وايه قبل ادم
    وايه قبل الملائكة
    وايه قبل وايه قبل
    هتودى نفسك لطريق مسدود
    هتلاقي عقلك شكك فى الكينونة
    وحاجات تانية انت فى غنا تام عنها

    أعوذ بك أن أضل أو أضل أو أزل أو أزل أو أظلم أو أظلم أو أجهل أو يجهل علي

    وما كان من خطأ أو سهو أو نسيان فمني ومن قلة علمي وكثرة جهلي ومن الشيطان. وأعوذ بالله أن أذكركم به وأنساه، وأعوذ به أن أكون جسرا تعبرون عليه إلى الجنة ويرمى به في النار.
    قسورة الزواوي said...
    سلام عليكم
    تصحيح للاخ الي بيقول سيدنا ابراهيم عبد الشمس والقمر

    حاشا لله

    هنا برضه بناخد النصوص بدون تفسير
    هو عمل كده عشان يري قومه بطلان معبوداتهم , وبرده بمنهج عقلي وبحاجه يفهمومها , القرأن متاح للجميع يتاملوه , ولكن الابتعاد عن الهوى في التفسير , ويجب على المتكلم قما قلت في عدة مناسبات , يكون عالم ملم بامور اللغة العربية
    جميعها , ودارس حاجات كتير تانية , عشان يقدر يتكلم في الحاكية دي , القرأن لم يمنع التأمل وتفعيل العقل , ولكن فيما هو محسوس , وايضا هذا المحسوس بشروط , لانه لو تفكر العقل في ما وراء الحس , كالملائكة والجن وغيرها , سيكون حكمه وكلامه مجرد تخيلات , وكلامه غير موثق , وايضا لو تكلم في المحسوس الظاهر يتكلم حسب حدود , فالعقل يعتمد على ما تمده حواس الجسم في بناء الاستنتاجات , كالصورة من العين والسمع من الاذن وكذا سائر الحواس , وكثيرا ما تخطئ هذا الحواس , الا ترانا نخطئ في شخص عندما نراه ونحسبه شخص اخر !
    اذا حتى حواسنا قد تعطينا صورة ناقصة عن الواقع , او نظرة محدودة من جانب وزاوية معينة , وقد يرى اخر هذا الواقع من زاوية اخرى , فيتشتت الرأي , وتقف الحياة , فكانت رحمة الله لنا بتشريعه وتحديده للحدود والاوامر والنواهي , فلله الحمد والمنة

    اود ان اذكر جميع اخوتي , الم نكن أفضل الامم المتقدمة ونحن محافظين على تعاليم الدين ,والان وقد جربنا جميع المذاهب من اشتراكية وديموقراطية , ترانا تقدمنا , ام نزيد ضلالها وخمولا وظلما وتفشي لسوء الخلق , فالدين الدين وما كان عليه السلف الصالح من الامة , والله المستعان

    اسف على الاطالة
    ЯậŇ MỗŘỹ said...
    بصراحه مش عارفه ازود كلام بعد اللى قلتوه
    احنا بجد بقينا فى عصر محتاج اننا نتمسك بالدين الاسلامى
    نهتم بالامور العظيمه و نعلى من شأن ديننا مش نهتم بالكوره و الكلام ده و نسيب رفعة الدين بتاعنا و نتخانق الشيخ ده قال ايه و ده قال ايه و نخلى التعصب يتحكم فينا
    سيدنا عمر - رضى الله عنه - قال
    "رأى الجماعة لا يشقى البلاد به رغم الخلاف و رأى الفرد يشقيها"
    ده معناه ان يكون فى ديمقراطيه بس فى حدود من التعاليم الاسلاميه
    و موضوع ان ربنا عرفوه بالعقل و لا بالقلب
    الايمان بربنا بيكون بكل الحواس مش الانفراد بجزء دون الاخر
    الايمان بجد انك بتكون حاسس بوجود الله و متأكد انه جنبك بكل حواسك
    بالعقل و القلب و كل جزء فيك مقتنع
    ღ tota ღ said...
    اممممممممممم

    مبقاش في كلام اقوله بعد اللي انتوا قلتوه
    ^
    ربنا يهدينا جميعا
    اللهم اجلعنا ممن يتبعون سنه نبيك وحبيبك محمد عليه افضل الصلاه والسلام

    ^

Post a Comment



رسالة أحدث رسالة أقدم الصفحة الرئيسية

Blogger Template by Blogcrowds