اصفر x ازرق

من زمااان ناوى اكتب الموضوع ده
وكنت مأجله لبعد الدورى
أيا كان مين كسب
دا موضوع ملوش وقت

مش هعلق على الماتش رغم ان فيه كلام كتير
بس عايز اقولكو الاصفر والازرق دول مش لونين فريق بس
بجد دول لونين بلد كامله

اللى جه اسماعلية قبل كده يعرف ان هنا
الرصيف اصفر فى ازرق
الكراسي العامة دى اصفر فى ازرق
الاكشاك فى الشوارع اصفر فى ازرق
التكاسيات لونها اصفر
وبردو معلقين اعلام اصفر وازرق

يعنى بجد هنا الدنيا لونها اصفر

الناس هنا بتتنفس كورة
ناس عارفه يعنى ايه كورة بجد
ناس ذواقه

كون ان فى ناس متعصبين ف دى اقلية وانا قلت الكلام ده قبل كده
الناس اللى بتقول احنا بنكره مش عارف مين
وان احنا بنحقد وبنعمل
يا جماعة والله دا كله كلام فارغ
مش المفروض ان حد يكره حد مهما كان وايا كان السبب
الكلمة دى صعبة اوى

كون ان فى عداوة بين ناس معينين وبعضها
دى كلها فى حدود كورة
متوصلش لعلاقات شخصية
وان الناس تحارب بعضها ويتحولو اعداء
وناس تزعل من ناس وناس تكره ناس
ليه وعشان ايه
الكورة دى لعب
لعععععععععععععععععب
يعنى تسلية وترفيه
مش حرب وحرقة دم ومشاكل

الاعلام بيهول كتير اوى من الاحداث
والناس بتصدق وتمشي ورا الكلام زى قطيع الخرفان
اسف فى اللفظ
بس بجد فى ناس مخها تعبان
ويعييو ويكرهو بعض وياخدو من بعض مواقف

وناس خدت منى انا شخصيا موقف من الموضوع اللى فات
وناس وجهتلى كلام مش كويس
و ان انا عصبي وكلام كتير اوى

وقسمتو الدنيا احزاب
وعملنا حرب قبلية زى اللى بتحصل فى بلاد المتخلفين

مع ان احنا مش كده
احنا ساعة المنتخب بنبقي كلنا كتلة واحدة
ومحدش بيشاور يقول دا اهلاوى ولا اسماعلاوى

دلوقتى جماهير الاهلى بتقول دا اغلى دورى عشان اخدناه من الاسماعيلي
ليه يعنى
انت لو كنت خدته من فرقة تانية مكانش هيبقي غالى
ولا هو عند وخلاص يعنى

ماتش يتلعب فى اسكندرية
يعنى اخر الدنيا بالنسبة لاسماعلية
لو كان اتلعب فى السعودية كان احسن

ذنبها ايه الناس تقعد 7 ساعات سفر عشان يروحو يتفرجو على ماتش
ليه هو ذنب
زى ميكون مصر مفهاش ملاعب الا اللى فى اسكندرية

وتفتيش ذاتى فظيع ولا كأنهم فى مخيم اسرائيلي
وضرب وبهدلة والناس تمشى على رجلها 2 كيلو
وتقتيش مخزى للستات والاطفال
عيييييييييب
بجد عيب
عشان ايه دا كله

يعنى حكام مش على مستوى
حتى رئيس لجنة الحكام يقولك ماحنا جايبين حكام اجانب اهو
عايزين ايه تانى نجيبلهم حكام من المريخ
ليه اللهجة دى يعنى
مهو لو زمالك واهلى بتجيب احسن حكام وانت قافل بؤك
ولو عملت غير كده تانى يوم تبقي فى بيتكو من غير شغل
يبقي لزمته ايه الكلام ده

اللى بيتكلمو بلسان الاهلى يقولك حرام نضيع مجهود سنة كاملة ومناخدش الدورى
وهى دى عدالة السماء اللى هبطت على ملعب اسكندرية
يعنى احنا وصلنا لنفس الوضع ده فى يوم وليلة مثلا
ولا هو الاهلى بس اللى بقاله سنة بيتعب

الكابتن شادى محمد لاعب دولى يقولك الاعلام بيقولو علينا عواجيز
ادينا خدنا الدورى
وكسبنا العيال
عيال ازاى يعنى
مانت كنت فى يوم من الايام ادهم كده ومستنى حد يشجعك ويساندك عشان تبقي فى وضعك دلوقتى
ولا انت اتولدت لاعب دولى

حتى حكم ماتش الجيش
بعد م الناس كلها اجمعت ان جون ابوتريكة فاول وهو صفر انها فاول
هو بنفسه اعترف قال مستحيل كنت ماحسبهاش والاهلى مغلوب
الملعب كله كان اهلاوية !!
مفيش تعليق

مش عارف
يعنى بجد حاجة تكسف
يعنى احنا المفروض نجيب حكام اجانب لماتشتنا وماتشات اللى بينافسونا كمان ؟؟

اتحاد كورة ولجنة حكام بيعملو كل اللى يقدرو عليه عشان ينفذو حاجة فى دماغهم
وعملوها
مش عارف هتفضل لحد امتى الكورة فى مصر فريق واحد
هما مستريحين لكده يعنى
حلو ان الدورى يخلص قبل الموسم ما يخلص ب 10 ولا 15 اسبوع
ونقول الدورى المصرى ترتيبه متأخر ليه
الدورى التونسي سابقنا بمراحل عشان بتتفرج على كوره نزيهة
سايبين الناس كلها تدى اللى عندها رغم ان منتخبهم مش فى حجم منتخبنا
ورغم ان منتخبنا اعظم منتخب افريقي
دا عشان ساعة ما بنقول يا منتخب بنبقي كلنا صوت واحد وايد واحدة

عموما هنيئا للنادى الاهلى
وهنيئا لجماهيره

زى ما قلت قبل كده
الاسماعيلي مش محتاج حد يتكلم عنه
دى مملكة جوا اسماعلية اسمها الاسماعيلي
احسن فريق فى مصر على الاقل السنادى بشهادة الناس اللى بتفهم كوره
واحنا على قناعة تامة بكده مهما كانت النتايج

الاهلى ادار الماتش بطريقة ممتازة
لعب ب8 مدافعين .. خطف جون فى اول 5 دقايق ..واتعامل مع بقيت الماتش بخبرة المحترفين بلاش العواجيز
مع العلم ان فى جون صحيح 100% ماتحسبش كان اكيد هيغير مسار الماتش واللى شاف الماتش يعرف
ولا تعليق على اداء الحكام

اخيرا مفيش حاجة تتقال
غير مبروك للنادى الاهلى
كل دورى وانتو طيبين :)

معلش مش هرد على لتعليقات حد على الموضوع ده
منعا للمشاكل
دى كانت وجهة نظرى ونقلتها بكلمات

Ism3lawy 4 Ever ;)

10 Comments:

  1. غير معرف said...
    اولا انا اتخضيت لما ملقتش ردود

    ومش عارف الموضوع نازل امتى

    انا مش متعصب بس بقول اني اهلاوي لاني من وانا صغير بحب الاهلي مع ان والدي الله يرحمه كان زملكاوي صميم

    بس أيام ما كان زمالك .. اسف بس دي حقيقة ومش شماتة ولكنها حزن على النادي اللي هوى في قاع سحيق وأضاع حازم امان بين ثنايا قدميه المتعثرتين بالمصالح الشخصية

    كلامك في جزء كبير جدا ن الصحة

    بس يا احمد اللي بيحصل ده مش في الكورة بس

    انا عن نفسي مشفتش ماتش الجيش

    بس سمعت الكلام بتاع الفاول

    وللاسف الكلام ده في حياتنا كلها

    ومبروك للأهلي وحظ طيب لأحسن اسماعيلي في العالم

    واللي بعشقه وبعشق مدينته

    بس يا ريت المتعصبين يبعدوا عن الفريق لانهم بيسيئوا لاسمه بجد

    وسلام يا صاحبي وبعدين لازم ترد لان ده بيتك

    واقنعني واقنعك

    يا اسمعلاوي سلام
    !! a7mad sala7 !! said...
    زى مانت بتقول يا محمد

    اللى بيحصل دا مش فى الكورة بس


    لما تكون عايش فى بلد كلها فساد
    متستبعدش اى حاجة تحصل فى اى مجال

    ومجاتش ع الكورة يعنى :D
    رحلتنا في الحياة said...
    اااااااه يعنى من الكورة وسنينها كل ما ادخل مدونة تتكلم عن الكورة
    انا بتعصب من سيرتها ومش بفهم فيها :(
    !! a7mad sala7 !! said...
    ههههههههههههههههههههههههههه

    خلاص متزعليش
    مفيش كلام فى الكورة تانى
    مولد واتفض

    المهم انك نورتينا :D
    قسورة الزواوي said...
    سبحان الله

    انتا بتقول كلام جميل وحلو اوي في اول الرد , وبعدين تقول ابو تريكة والجيش والحكام

    هههههههههههههههههه

    هو برده مش لازم تطلعوا غلطانين
    ومش هنجيب سيرة التفويت والكلام ده
    بس انا هقول برده التفكير ده الي مضيعكم
    وفي ناس لو عاوزة تفحر ورا الاسماعيلي هتطلع بلاوي ملهاش حصر
    عموما اخدنا الدوري , مفيش حاجة جديدة

    بس الحلو فيه انه بطعم المانجا
    الاهلي = الزمالك*الاسماعيلي+1

    كول يا ماو

    اه نسيت
    يعني لو الزمالك والاسماعيلي استغلوا وقت الكلام ده واشتغلوا , صدقني هيبقوا حاجة

    مش كفاية الاهلي يلعب في كل مكان باسم مصر
    حاولوا تساعدوا شوية معاه
    فوزوا في بطولة اي بطولة برا
    عشان نقول الاسماعيلي فعلا برازيل
    غير معرف said...
    الاسماعيلي برازيل

    معروفة ومن زمان

    واتشرف بيها لاني مصري

    والفساد بيحكمنا حتى في الكورة

    انا بجد عايز اشوف اي حتة نضيفة لاني بجد قرفت والظاهر كدة اننا قريبا وبسبب بعض الناس اللي مش فاهمة اي حاجة في اي حاجة وارجو اني مكنش منهم

    مع غياب الضمير والشرف والدين

    هنضيع احنا الاتنين هنضيع على راي امال ماهر

    عزيزي ابو صلاح

    لنا الله

    والصبر خير
    !! a7mad sala7 !! said...
    يا سيدي الفاضل

    منين هتشتغل وانت متحارب

    لما تكون بتطلع خطوة ادام وتلاقي اللى بيرجعك خطوتين

    ناس هوايتها تحبط وتكسر

    لما تلاقي فى وشك اعلام و صحافة
    اتحاد كورة ولجنة حكام

    منين هييجي الانجاز جوا ولا برا

    والانجاز برا مبيجيش الا من انجاز جوا

    دا سلم بيتاخد واحدة واحدة

    ابسط مثال جوزيه اهو

    لما لقي شوية هجوم عليه
    ساب مصر بحالها ومشي
    وهو فى قمة مجده
    الراجل مقدرش يستحمل

    راح يشوف حاله فى حتة تانية



    عجبي !!
    غير معرف said...
    ههههههههههههههههههههههههههههههههه

    مش عارف أرد أقول ايه

    بس بجد لو الكلام ده حقيقي مية المية تبقى

    كووووووووووووووووووسة

    ربنا يهدي

    لو الضمير والدين يرجعوا اكيد هيكون

    في كلام تاني

    سلام بقى وجعتلكو دماغكو
    ЯậŇ MỗŘỹ said...
    ايه الكلام ده؟
    كوره حرااااااااااااااااااااااام
    يا بنى شوفلى بيتين شعر احسن و لا كام كلمه حزاينى تبقى فله فله
    كل دورى و انتوا طيبين لكل الناس
    و بلاش تعصب
    ده انا عمرى ما اتفرجت على ماتش فى حياتى
    !! a7mad sala7 !! said...
    وانتى طيبة

Post a Comment



رسالة أحدث رسالة أقدم الصفحة الرئيسية

Blogger Template by Blogcrowds