طبعا السنة بتفنش كل سنة وانتو طيبين
والامتحانات ع الابواب

وفى نفس الوقت طلبة سنة تانية المفروض بيملو رغبات اليومين دول
وبالنسبة لعندنا _حاسبات اسماعلية_
معندناش غير قسمين علوم حاسب ونظم معلومات

ناس كتير سألتنى محتارين يخشو ايه
اكمن انا خبرة بقي فى الكلية وكده
وعلى دراية :D
>>الواحد مبيحبش يتكلم عن نفسه خااااالص
هههههههههههه
ما علينا

طبعا كلامى عن حاسبات اسماعلية
بناءا على اللى بيحصل هنا
وعلى كلام ناس كبيرة اتخرجت وفى معترك الحياة دلوقتى

مبدأيا كده
احنا كده كده فى الكلية دى
كلنا حاسبات
وفى الاخر هنطلع نشتغل شغل واحد
>>اقصد هنشتغل فى نفس المجالات
لان دلوقتى شغلك مبيعتمدش على شهادتك تخصصها ايه
الشغل كله دلوقتى بالكفائة فى المقام الاول
ف كونك سي اس او اي اس
دى مش فارقة
اللى بيفرق من واحد للتانى شغله
دا مبدأيا

طب بالنسبة للدراسة بقي
للاسف الشديد كليتنا مبتعملش حاجة
لا فيها سوفت وير ولا فيها اجهزة عدلة
ولا فى اى دعم عليه القيمة
سواء سي اس او اي اس
واللى واهم نفسه انه هيستفيد باللى بياخده فى الكلية دى يبقي غلطان
دا كله نظام تلقين وبيسيح بعد ما تطلع من الامتحان ب5 دقايق

طيب المنطقي ان انت تعمل ايه دلوقتى
انك تدور على اللى يريحك
وفى نفس الوقت ينفعك لمستقبلك
هتخش سي اس هيتحرق دمك طول السنة
فى دش انت فى غنى عنه
ومش هتستفيد منه فى الاخر
لانهم للاسف مش بياخدو علم وتطبيق
كلها رتوش واجتهادات
وفى الاخر بيطلعو ياخدو كورسات داتا بيز
وحاجات تانية عشان يشتغلو بيها

مش هقولك احنا اللى بناخد العلم _اى اس_
احنا بردو معظمها مواد نظرى ودش
ولا تتعلق بالشغل بأى حاجة
بس على الاقل راحة بال

مفيش ضغط عليك طول السنة
وفى نفس الوقت عندك فرصة تتعلم حاجة تستفيد بيها بعدين
وتتعلمها على مهلك بدل ما تتزنق فيها بعد ما تتخرج
ويبقي عندك اعباء فى حياتك كتير غير انك تقعد تتعلم تانى

هتخش سي اس هتضيع سنتين من عمرك فى تعب اعصاب وحرقة دم
وفى الاخر هتطلع تدور على كورسات تشتغل بيها بردو

اما بالنسبة لنسبة النجاح هنا وهنا
ف النتيجة موجودة فى موقع كليتنا
ممكن تخشو تعرفو الفرق بنفسكو
http://fci-scu.com/index.php
ملاحظة:الموقع تحت التعديل

لاحظ ان معظم اللى بقابلهم من تالتة سي اس دلوقتى يقولى يااااااااارتنى
لو يرجع بيا الزمن
طبعا كان دخل اى اس

مفيش غير اللى بيعندو
ومش عايز يحسس نفسه بالندم
بيحاول يثبت لنفسه ان هو ماشي صح
بس بردو من جواه تعبان :D

طيب بعد دا كله
صاحب العقل يفهم

تختار تخش ايه
وانت طالب تانية حاسبات اسماعلية
؟؟؟

//تحديث\\
====

يا جماعة انا لما اتكلمت فى الموضوع ده
مش نكاية فى بتوع سي اس
او عشان اغظيهم
او تحيز للقسم بتاعى...لا
كلامى بناءا على اراء ناس كبيرة خريجين
ناس عارفه الدنيا ماشية ازاى
وبصيين للكلية من فوق شوية

فى مشكلة كبيرة فى كليتنا
ان الناس بتحاسب بتوع سي اس على انهم علمى
وبتوع اى اس انهم دبي
زى الثانوية العامة كده

وناس تانية تقولك اشوف الاغلبية هيخشو ايه واخش زيهم
زى اللى بياخد رأى الجمهور

وبعدين عايز اوصل لكو حاجة
انا مليش مصلحة انى اخلى اكبر عدد من الناس يخشو اى اس
انا مليش قرايب فى الكلية والله :D

ومش معنى انى دخلت اى اس يبقي هو القسم المثالى
بالعكس وللاسف القسمين زفت واسف فى التعبير
واحنا الضحية فى كده
بس هنعمل ايه دا امر واقع ولازم نتأقلم عليه

بس انا بقول نظرتى فى الكلية بالقسمين بتوعها
وبعدين انا ماتخرجتش قبل كده واشتغلت عشان اقولكو الدنيا ماشية ازاى
دى اراء مختلفة ولكل واحد حق الاختيار

يا ريت ناس من سي اس
_حاسبات اسماعلية_
عشان نتكلم على وضعنا احنا
تخش تتكلم ونتناقش
احنا ك تالتة ورابعة خلاص امرنا محسوم
بس الكلام دلوقتى فى مصلحة طلبة تانية
الناس اللى طلبت رأينا ومافدناهمش
واللى اكيد هنتحاسب ادام ربنا عليهم


===================

اقعدو بالامتحانات :)

19 Comments:

  1. قسورة الزواوي said...
    انا عن نفسي لو حاسبات اسماعيلية (بعيد الشر)

    انا بحس لم اجيب سيرة الاسماعيلية دي بشعور غريب !!! ما علينا نخلينا في الافتراض ده

    اه نسيت , ولو انا برده في سنه تانية وفي حاسبات اسماعيلية

    طبعا هدخل سي اس , مش عارف ؟! بس حاسس
    ان حاجة انتا مرتاح فيها , تبقى حاجة مش ولا بد
    انا اعلنها من الان انا سي اس وسي اي ايه وسي بلس بلس بس مش اي اس
    نيهاهاهاهاها على رأي مخ

    سلامزمز
    Bola 7elmi said...
    :0

    ايه يا عمي الكلام الكبير دا
    cs أو is

    مليش فيه :S


    أنا طبعا إتعتقت خلااااااااااااااااص
    ويارتني م اتعتقت .. مهو أعده فـ البيت زي خيبتها D:
    ياما صحباتي قالولي إنزلي سنه يابولا .. ونا أقول : أنا لا ينكن أبدا ألطخ شهادتي ..!! <<.. يارتني لطختها
    وسمعني أغنيه يارتني D:

    >> شفتني ونا بديك حافز عشان تزاكر .. بشجعك اهو D:


    يالا ربنا معاك .. وإقعد فـ إمتحانات :)
    صاحب رأى said...
    دا ردى فى المنتدى هو ردى على موضوعك


    بمنتهى الصراحه الشغل فى مصر للقسمين يعتبر واحد مفيش تفرقه بينهم
    ممكن بتاع cs يشتغل شغل Is والعكس
    طبعا هتقولوا الشغل ايه اصلا
    هو زى ما قال علاء ان علوم الحاسب عمليه شويه عن نظم المعلومات اللى معظمها مواد نظرى
    المفروض ان بتاع علوم الحاسب شغله عباره عن مبرمج او Coder فى اى لغه برمجه هو يحب يشتغلها مع الميل للغات Open source
    اما نظم المعلومات فا المفروض غير الواقع يعنى فى الواقع هيشتغلوا نفس شغل علوم الحاسب مع الميل للغات ميكروسوفت
    المفروض فى نظم المعلومات انه يشتغل محلل نظم او قواعد بيانات بس الكليه فى اللائحه القديمه مش بتعطى لنظم المعلومات غير كورس واحد قواعد بيانات ، بالرغم ان علوم الحاسب بتاخد كورسين قواعد بيانات ودى كانت مشكله من المشاكل اعتقد ان اللائحه الجديده صححتها شويه .
    ونصيحه مهمه :
    لو بتحب برمجه وشغل العملى ادخل علوم حاسب
    بتحب النظرى والحفظ ادخل نظم معلومات
    وفى الآخر انت اللى هتبنى نفسك فى المجال اللى انت بتحبه مش الكليه
    Doaa said...
    هبعت البوست لغداره الكليه بتحرض العيال علي ايه القسم كده هيقفل ويعملوا لجان للفحص والتمحيص ويشوفوا ايه الدوافع ورا قفل القسم هيلاقوك انت
    او انهم يخلوا اي اس زي سي اس ويقرفوكوا طول السنه
    انا علي فكره بحب اهدي النفوس بس
    هيدعوا عليك دعي وانا هقوم معاهم بالواجب
    سلام يادكتور
    halaS demahoM said...
    هصمت احسن لان كلامي مش هيعجبك يا صلاح

    انا كنت معاك تمام
    لغيت لما قلت هتحس انك ضيعت سنتين من عمرك ع الفاضي

    للاسف ناس كتير اوي مش عارفين ايه الفرق بين نظم وعلوم
    وانا عشان رخم وفاهم كويس اوي الفرق مابينهم ... مش قايل
    رزاله مني
    اختصارا
    اي اس بروجرامر مش فاهم الدنيا ماشيه ازاي
    سي اس مش بروجرامر بس فاهم الدنيا ماشيه ازاي

    اكيد محدش فاهم

    بس خش نظم وريح دماغك بخلاف اي حاجه
    مجالها منتشر في مصر اكتر
    اه يا ولاد المصريين

    يلا يا سيدي كله علي الله
    morgana said...
    كل اللي اقدر اقوله ان انا ولا عاجبني علوم ولا عاجبني نظم
    بفكر كفايه علي الكليه كده انا شكلي هاعتزل خلاص
    وبعدين هيا شكلها كده هترسي علي قاعده في البيت في الاول وفي الاخر
    وبعدين هو فين الاختيار اساسا؟
    هما قسمين ويقولك اختار وبعد ما الناس تختار بيعملو اللي عوزينو برضه ولو عندهم عجز في قسم بيوزعو الناس عليه
    علي فكرة ده مش رأي متشائم بس انا فعلا من يوم مادخلت الكليه مش كنت عامله حسابي علي النظام ده في الدراسه
    كنت داخله بقي كليه عمليه بقي والحياه بقي لونها بمبي بقي وخلصنا ثانويه عامه
    لقيت اني من يوم مادخلت الكليه لغاية النهارده ما افتكرش اني قعدت علي جهاز واشتغلت
    D:
    ربنا يوفق الجميع
    :)
    ShiMOo said...
    بعيدا عن السوق بره عايز ايه
    او حتى مين اللي بيستفيد من دراسته في الكلية ومين بيضيع وقت
    انا هتكلم في نقطة تانيه خالص ...
    لما نييجي نناقش موضوع يبقى نجيب حد محايد
    او نجيب طرفين ليهم وجهة نظر مختلفه
    وكل واحد يدافع عن رأيه
    والحكم في الاخر للناس اللي شايفه رأي مين مقنع اكتر
    ومين عبر عن وجهة نظره بشكل احسن وقدر يقنع اللي قدامه
    طيب يعني ايه برده ؟
    يعني مثلا واحد مقعد مراته في البيت
    وأجيبه يتكلم في ندوره عن اهمية عمل المرأه
    طيب ازاي ؟؟؟؟؟؟؟؟؟؟
    ماهو رأيه معروف مقدما اصلا
    يعني احمد (اي اس) الطبيعي انه يكون شايف (اي اس) احسن من (سي اس)
    والا مكنش دخل (اي اس) من الاول
    وبتاع (سي اس) بالنسباله هيبقى (سي اس) احسن اكيد
    والا برده مكنش دخلها من الاول صح ولا ايه ؟؟
    كمان في حاجه
    ساعات الضغط اللي علينا او اقصد يعني بتوع (سي اس) بالذات
    يخليهم يقولوا (ياريتنا) دخلنا (اي اس)
    بس ده برده مش دليل انهم ندمانين
    كل واحد بقى مش هيحس انهي احسن
    الا بعد ما يتخرج ويشتغل
    ساعتها اكيد هيحس الفرق
    معلش بقى طولت ...
    عموما ربنا يوفق الكل يــــــــــــارب
    :)
    !! a7mad sala7 !! said...
    النسر الاصلع

    //انا عن نفسي لو حاسبات اسماعيلية (بعيد الشر)//

    يا عم انت تطول اصلا :D


    // طبعا هدخل سي اس , مش عارف ؟! بس حاسس
    ان حاجة انتا مرتاح فيها //

    ااااااااه انت من بتوع مشيت ورا احساسي
    ليه دا يبقي معهد روبى العالى
    مش حاسبات يا كابتن :D
    !! a7mad sala7 !! said...
    Bola 7elmi

    مش كنتى نزلتى سنة يا بولا :P


    ربنا يخليكي
    شكرا ع الدعوتين :)
    !! a7mad sala7 !! said...
    Heshmat

    //علوم الحاسب عمليه شويه عن نظم المعلومات اللى معظمها مواد نظرى//

    يا باشا الكلية مفهاش سوفت وير
    ومفهاش اجهزة كويسة

    يبقي عملية من ناحية ايه

    العمل عمل ربنا

    احنا بنتكلم فى حدود الامكانات المتاحة

    يعنى على ارض الواقع انت بتاخد ردش فى النحايتين
    !! a7mad sala7 !! said...
    Do3a2

    هههههههههههههههههه
    احنا مبنتهددش على فكرة

    وبعدين احنا باقيلنا سنة ونخلع

    غير ان انتو اخر ناس تتكلمو فى الموضوع دا يا بتوع بنها

    ياللى معندكوش غير قسم واحد

    لازم اشردكو يعنى عشان تسكتو :P
    !! a7mad sala7 !! said...
    mo7mad sala7 3rafa

    //هصمت احسن لان كلامي مش هيعجبك يا صلاح//

    ليه يا سيدي
    اتكلم...طالما باحترام ومناقشة فعالة...اتكلم

    //اي اس بروجرامر مش فاهم الدنيا ماشيه ازاي
    سي اس مش بروجرامر بس فاهم الدنيا ماشيه ازاي//

    هههههههههههههههههه
    فاهمها من ايه
    وبناءا على ايه يا عمنا
    ايه الابداع اللى بيتاخد عشان يبقي فاهم الدنيا ماشية ازاى

    دى الاكواد والالجورزمات بتتحفظ وتخش تدلقها فى الورقة زى مهى

    مواد العملى بقت تعريفات
    ومواضيع تعبير

    ايه الابداع فى كده؟؟
    !! a7mad sala7 !! said...
    morgana

    //كل اللي اقدر اقوله ان انا ولا عاجبني علوم ولا عاجبني نظم//

    دا اللى بقوله
    بس اللى بقوله بردو
    انك تختار انسب الوحشين
    طالما انت بقيت فى امر واقع

    //هما قسمين ويقولك اختار وبعد ما الناس تختار بيعملو اللي عوزينو برضه ولو عندهم عجز في قسم بيوزعو الناس عليه//

    لا عندنا فى اسماعلية مفيش مشكلة فى الحتة دى
    ليك حرية الاختيار :)

    //يوم مادخلت الكليه مش كنت عامله حسابي علي النظام ده في الدراسه
    كنت داخله بقي كليه عمليه بقي والحياه بقي لونها بمبي بقي وخلصنا ثانويه عامه
    لقيت اني من يوم مادخلت الكليه لغاية النهارده ما افتكرش اني قعدت علي جهاز واشتغلت//

    دا بردو اللى قلت عليه
    انك اصلا مبتطبقش اللى انت بتدرسه
    او اللى المفروض تدرسه

    كليتنا كويسة جداا جداا
    بس لو ادارناها صح

    وللاسف :(
    !! a7mad sala7 !! said...
    ShiMOo

    //لما نييجي نناقش موضوع يبقى نجيب حد محايد
    او نجيب طرفين ليهم وجهة نظر مختلفه
    وكل واحد يدافع عن رأيه
    والحكم في الاخر للناس اللي شايفه رأي مين مقنع اكتر
    ومين عبر عن وجهة نظره بشكل احسن وقدر يقنع اللي قدامه//

    دا اللى قلته فى التحديث

    //يعني احمد (اي اس) الطبيعي انه يكون شايف (اي اس) احسن من (سي اس)//

    انا مقولتش احسن والله

    اكيد فى الحقيقة مش احسن طبعااا

    بس انا بتكلم فى ارض الواقع
    على وضعنا دلوقتى

    انا بتكلم عن الاريح والانسب
    مش الاحسن

    اعمل ايه بالاحسن طالما مش هستثمرة صح !!!
    !! a7mad sala7 !! said...
    يا ريت نسمع الاراء بعد تحديث البوست
    طالب تانية حاسبات اسماعلية said...
    كلامك مقنع جدا يا باشمهندس احمد

    يا ريت حد من سي اس يفيدنا
    !! a7mad sala7 !! said...
    طالب تانية حاسبات اسماعلية

    ماشي يا سيدي

    بس محدش يقولى يا باشمهندس

    انا طالب زيي زيكو

    لما اتخرج ابقي قولولي يا باشمهندس
    morgana said...
    كده لما حضرتك قولت رأيك ان اي اس افضل لانك مقتنع بكده
    ولما واحد يقول رأيه من سي اس هيقول انه أفضل من وجهة نظره برضه لانه داخل و مقتنع بكده
    يبقي كده الناس اتلخبطت اكتر من الاول
    ولا ايـــــــــه؟؟


    شكرا لطرح الموضوع :):)
    !! a7mad sala7 !! said...
    morgana

    //ولما واحد يقول رأيه من سي اس هيقول انه أفضل من وجهة نظره برضه لانه داخل و مقتنع بكده//

    خلاص حد من سي اس يخش يقنعنا انه الافضل

    ومفيش لخبطة ان شاء الله

Post a Comment



رسالة أحدث رسالة أقدم الصفحة الرئيسية

Blogger Template by Blogcrowds