سلااااااام عليكو :)
مفهوم الاختلاف...وحرية الرأى
شوية جد بقي @-)

كتير اوى ببقي قاعد لوحدى كده
واقعد افكر فى مقولة الناس كلها بتقولها
"الاختلاف فى الراى لا يفسد للود قضية"
جميل اوى الكلام ده
بس انا عايز اقول حاجة
هو اه مش بيفسد للود قضية
بس الاختلاف فى الراى نفسه ممكن يفسد الهدف والمضمون
بمعنى:
ان فى حاجات مينفعش فيها الاختلاف
زى الدين والعرف والتقاليد والقواعد والنظريات وحاجات تانية كتير...

فى حاجات يا ابيض يا اسود
مفيهاش رمادى

لما الاختلاف يكون على حاجات مسلم بيها
ومينفعش فيها الجدال
هنا يفسد المفهوم والمضمون ويعيشنا فى ميا البطيخ كلنا
عشان كل واحد ليه راى ومقتنع بيه وعايش ورا ستار الديموقرااااااطية فى الااراء
ولما تيجي تقول لحد يا عم انت كده مش صح
يقولك انت معقد
وتفكيرك ضيق
واللى زيك هما اللى مأخرين البلد ومرجعينها ورا :D

>>ويقولك يا عم دا فى عهد الرسول كان بياخد الامر شورى بينهم

>>يا حبيبي ايوة بياخد الامر شورى بس مش هياخد راى غلط
او بمعنى اخر افتكاسة بيعملها من دماغه عشان يمشي حياته عليها بالطريقة اللى تناسبه
ونطبقها بصفة عامة بقي
غير انى عايز اقول ان على عهد الرسول الناس كانت ماشية بمنهج واحد
ومهما اختلفو فى الراى فهما فى الاخر بيتقابلو فى طريق واحد
الشورى كانت لسبب
ان حد يفتح مدارك حد تانى
يقترح حاجة كانت غايبة عن الناس
يطلع بفكرة مفيييدة وتحتها عشرتاشر خط
وفى نفس الوقت متكونش بتخالف تعاليم دين او عرف سائد

لكن دلوقتى للاسف
كل من هب ودب بقي ليه رؤية ومنظور
وكل واحد مش عاجبه كلام حد تانى يعمله خطة تطهير للعقول
وياريتها من دماغه
للاسف دا بيبقى فكر مسيطر عليه
سواء كان من حد قريب منه
من كتابين قراهم لواحد متفتح زيادة عن اللزوم
من ثقافة غربية مش مناسبة لعاداتنا ولا تقاليدنا
ولا لعرف بلد شرقي تختلف اختلاف كلى عن اللى بيحصل ويتطبق برا
كل اللى هو عايزه انه يبقي بس مختلف
بدون النظر ان هو كده صح ولا غلط

ولما تقول لحد كده
يقولك انت بتفتقد ثقافة الاختلاف

حتى الدين في اختلاف
وعلى سيبل المثال شيوخ كتير قالو النقاب فرض وشيوخ اكتر قاله انه سنة
وشيوخ اكتر قالوا انه لا فرض ولا سنة

الدين يا حبيبي فيه اختلاف فى حاجات بسيطة
والحاجات البسيطة دى اختلفو فيها نظرا لان مفيش نص قرانى محدد يحكمها
او حديث نبوى او قدسي
غير كده مفيش 2 فى الدنيا يقدرو يختلفو على حاجة فى الدين الا ويكونو بيستهبلو بقي
يعنى مينفعش حد يقول صلاة العشاء 4 ركعات وييجي واحد تانى يقول لا دول 3 بس

والتقاليد...كتيييييييييير منها فيه اختلاف
تقاليد هل الصعيد تختلف عن تقليد اهل السواحل عن تقليد اهل الدلتا
غير ان اصلا التقليد من صنع البشر والاختلاف فطرة اساسية في البشر

طب يا عمى بتختلف بينها وبين بعض فى طريقة التطبيق
وازاى الناس فى كل مكان اتعودو عليها
يعنى مفهوم التقاليد مرتبط بمفهوم العادات
بس التقاليد فى بلدنا كلها بتصب فى حاجة واحدة بس اللى هى العرف
يعنى مفهوم الاحترام مثلا
على سبيل المثال
هو هو عند الصعايدة والفلاحين والسواحلية و و
رغم ان تقاليدهم مختلفة بس العرف السائد فى مصر عامة
وبين المسلمين خصوصا واحد

حتى النظريات قالك فى علماء بيستعينو بحاجات وعلماء بيستعينو بحاجات

ههههههههههههههههههههههههه
تختلف ازاى يعنى
يعنى البنى ادمين كلهم اجمعو ان ثابت الجذب العام= 9.8
نيجي احنا فى اسماعلية نطبقة 9.8 وفى الزقازيق مثلا بيطبقوه 7 ولا ايه
مش معقول يعنى
والنظرية اللى يختلف عليها 2 بردو
تبقي نظرية خاطئة وجه بعدها نظريات كتير عدلتها
لكن انا بتكلم عن النظريات النهائية اللى مفيش فيها جدال

لما الاختلاف يكون على حاجات مسلم بيها
ومينفعش فيها الجدال
دا ماسموش الاختلاف بالمعنى المطلوب
ولما يكون بقي المسلم بيه عندى غير المسلم بيه عندك يبقى فى حد فينا غلط بقي

نيجي بقي لبرهان لذيذ نتفرج منه ع الاختلاف من وجه نظر البعض

ارسم 8 كبيرة بالعربي ع الارض
وحد يقف عندها م الناحية دي والتاني يقف من الناحية التانية

ومن المسلم بيه عند الشخص الاولاني انها الرقم8
في حين انها من المسلم بيه عند الشخص التاني هي الرقم 7

بقي هو دا الاختلاف؟
معنى كلامك ده انى ممكن احط المصلية فى اى حتة واصلى
وميكونش فى حاجة اسمها قبلة بقي

مفاهيم كتير عند ناس كتير محتاجة تتغير
محتاجين نتكلم بعقلانية شوية وفى نفس الوقت يبقى عندنا خلفية بحاجات مقيدين بيها
ماقولش انا بفكر بعقلي ومليش دعوة بحاجة تانية

دى كانت مناقشة بيني وبين شخص ما
ارجو انها تكون مفيدة الى حد ما
انا عارف الكلام كتير اوى وممكن يكون ممل
بس سامحونى بقي
انا غاوى وجع قلب :D

اقعدو بالعافية :)

19 Comments:

  1. Dreams said...
    السلام عليكم

    اولا باشكرك على الموضوع الهام والطرح السهل والهادىء والموضوعى له

    ثانيا انا معاك فى كلمة قولتها

    فيه ناس بتختلف لمجرد الاختلاف ...للشهرة ..لانه بيحب نفسه مختلف وغير الناس ودول بيكون كل همهم انهم يطلعوا نفسهم صح حتى لو اختلفوا فى موضوع مسلم بيه زى مثلا الشمش بتطلع من الشرق هو يقولك لا دى بتطلع من الناحيه دى ودى الغرب حتى لو كانت الشرق برضه (فاهم حاجه )ودول غالبا بيكون الاختلاف معاهم يفسد للود وللمحبة ولكل حاجه قضية ودول برضه تبعد عنهم وعن صداعهم احسن

    طولت عليك بس تقعدوا بالعافيه ....الله يعافيك واتفضل عندنا شوية
    Dreams said...
    راجعة تانى عشان نسيت اقول ان بالنسبة للاختلاف فى الدين فعلا فيه اشياء استحاله يوجد فيها اختلاف او انكار لانها من قوائم الدين زى الصلاة والفروض وكيفيتها
    يعنى ما حدش يجى ويقول ان السجود بيكون قبل الركوع مثلا ..انما فيه اشياء تانيه اختلف فيها العلماء (واقصد هنا بالعلماء الربانيين الثقات مش اللى كل شويه يطلعولنا لغايه ما بقوا اكتر من الرز وشوية هيطلعولك فى الحلم).
    والدين سمح بالاختلاف فى حدود الشرع والاختلاف اللى بيكون هدفه التيسيير من غير تفريض فى الدين ..وزى ما بيقولوا ان اختلاف العلماء رحمة. (وخلوا بالكوا من العلماء)
    ShiMOo said...
    اكيد في حاجات مسلم بيها مينفعش يبقى فيها وجهات نظر يعني مينفعش لما تختلف مع حد فيها تقوله "الاختلاف في الرأي لا يفسد للود قضيه" اصل دي ثوابت يعني اكيد واحد فيكوا صح والتاني غلط كلمه "الاختلاف في الرأي لا يفسد للود قضيه" دي تتقال لما تكونوا بتطبقوا حاجه معينه وكل واحد بيطبقها بطريقته مش لما تكونوا بتتناقشوا في الدين
    وبعدين الحاجات البسيطه اللي الناس مختلفه عليها في الدين مش احنا اللي نقول فيها رأينا
    اللي يناقش فيها هو الحد اللي ثقافته ومعلوماته فيها تديه الحق انه يناقش مش كل من هب ودب يقول رأيه
    اصلها مش مناقشه مفتوحه في السياسه ولا حتى في الاقتصاد
    وبعدين بقى مش كل اختلاف في الرأي لا يفسد للود قضيه يعني مثلا لما حد ييجي يقولك ان الست مكانها البيت وتربية الولاد وملهاش في التعليم اصلا ودي حاجه مش من حقها سوري بقى هنا "الاختلاف في الرأي يفسد للود قضيه"
    وفي ناس اصلا مش عندها قضيه تناقش فيها اللي بيتبعوا مبدأ "خالف تعرف" يعني الناس تقول "يمين" يقول حضرته "شمال" والعكس لمجرد انه يحس بالاختلاف مع الناس ويقعد "يجادل" خلي بالك انا مقولتش "يناقش" انا قولت "يجادل" لان المناقشه بيبقى ليها هدف لكن ده بيجادل وهو اصلا عارف انه غلط او حتى بيحاول يقنع نفسه انه صح بس مش قادر
    ده بقى ميستحقش انك تتضيع معاه وقتك وتسمعه..


    بوست حلو اوووووووووي ومش جديد عليك طبعا
    Boba said...
    انا مازلت مصرة ان الاختلاف في اراي لا يفسد للود قضية
    لكن عندم احترام الاختلاف هو اللي يفسد كل حاجة
    :)

    دي مقاله عن منهج الوسطية عند الدكتور يوسف القرضاوي واللي بيقوم على اختلاف الاراء
    وانا بشوف اهم عبارة في المقال ده
    وفي هذا قالوا: من لم يعرف اختلاف العلماء: فليس بعالم، ومن لم يعرف اختلاف الفقهاء: لم تشم أنفه رائحة الفقه)
    http://www.qaradawi.net/site/topics/article.asp?cu_no=2&item_no=6481&version=1&template_id=119&parent_id=13#_ftnref13

    هكمل ارد بعدين عشان بجد مصدعة
    بس يا ريت حاول تقرى المقالة دي

    بس على فكرة مش عشان حد اختلف معاك
    يبقى هو حب في الاختلاف من اجل الختلاف فقط
    تحياتي
    !! a7mad sala7 !! said...
    Boba

    موضوعى باسم
    ///مفهوم الاختلاف...وحرية الرأى///

    والمقالة اللى جبتيها باسم
    ///القرضاوي يرفع لواء الوسطية///

    اظن مفيش علاقة بين الموضوعين من قريب او من بعيد
    وان كان فى اى ربط بينهم ف انا معاكى للاخر
    ---------------
    اصرارك على رايك حاجة ترجعلك
    وعدم احترام الاختلاف يفسد كل حاجة فعلا
    لكن لو اختلاف فى محله
    غير انى ماتجاوزتش فى اى كلمة عن الاختلاف
    بشهادة الجميع ;;)

    الدكتور القرضاوى على عيني وراسي
    بس انا حاسس ان مقالته ملهاش علاقة بالموضوع

    يا ريت تقرى موضوعى انا اللى هتردى عليه وتدينا رايك
    مش المقالة اللى انتى جايباهالنا ومش هتردى عليها وفى الاخر بردو هتدينا ردك :D

    يعنى فى كلا الحالتين مستنى تعليقك مش تعليق الدكتور القرضاوى :D

    على فكرة موضوعى مش عشان اختلفت مع حد
    دا مجرد نقاااش ليس الا

    والف سلامة عليكي :)
    Boba said...
    انا قصدت م المقاله
    اعلق ان هناك اختلاف في امور الدين
    الامور اللي هي يطلق عليها امور اجتهادية

    انت قلت لا دين ولا التقاليد ولا النظريات فيهم اختلاف
    انا رديت بسي على اول نقطة

    واسفة بجد لو كنت خرجت عن الموضع
    تقدر تعتبر كأنه شئ لم يكن
    halaS demahoM said...
    أزال أحد مشرفي المدونة هذا التعليق.
    !! a7mad sala7 !! said...
    Dreams

    فهمت قصدك
    ومفيش تطويل ولا حاجة
    الله يعافيكي :D
    !! a7mad sala7 !! said...
    تم حذف التعليق

    ظبط تعليقك يابوصلاح
    ونزله تانى

    مستنيك
    !! a7mad sala7 !! said...
    ShiMOo

    ربنا يخليكي
    كلك ذوق

    وانا متفق معاكى
    بالظبط دا اللى بقول عليه
    halaS demahoM said...
    ماشي يا ابو صلاح بتمسح تعليقي
    وبتبعت لي رد علي مزاجك اضيفه
    هي دي الديمقراطيه ولا بلاش


    بيقولوا دايما صاحب بالين كداب
    وقيل ايضا ما خلق الله في قلب امرء من جوفين
    الله ! ايه الدخله الشمال دي يا ابو صلاح
    معلش بس بصراحه عاوز اعلق علي كل تعليق
    وكرمالكم ياللي في بالي
    هسيبني من الكلام المرسل وهتكلم معاكم بطريقتكم اللي تفهموها
    معلش مغرور بقي

    اولا مسألة اختلاف الراي فده فعلا بيفسد للود قضيه ويفجر منها قضايا اخري
    وخصوصا اننا في بلد ديمقراطي زي مصر
    واخدين بالكم
    تلاقي الناس بتتكلم في التليفزيون مش طايقين بعض وهاين عليهم يقوموا يتخانقوا ويا بعض
    وده مش نقاش
    والاسلام قال وحدد طريقه للمناقشه
    واللي مش عاجبه الكلام ميعلقش زي النهارده الدكتور عندنا فضل ساعه يتناقش معانا في موضوع كده
    انا مرضيتش اقوم اعلق لاني بجد كنت ممكن اقوم انفجر فيه
    بس اكتفيت بالابتسامه علي الشعب المصري وطريقته في النقاش
    مثلا من فتره ليست ببعيده كان عمي بيناقشني فلسانه فلت منه فخفت عليه من لساني قمت ضارب السماعات في ودني وسيبته يكلم نفسه

    فالنقاش لو كان محترم وليس عشوائي اكيد هيكون مثمر

    ثانيا بالنسبه لموضوع السبعه والتمانيه دي فدي يا محترمين ويا محترمات
    لا تفهم الا كما كتبت يعني لو اللي كاتبها قال عليها انا كاتبها 8 تبقي هي تمانيه لو قريتها من هنا او من هناك لانها كتبت هكذا
    زي ما واحد واقف في وشي وبيقولي بص ع اليمين انا من الطبيعي هبص ع الشمال لان شمالي يعتبر يمينه وهو يقصد يمينه هو اكيد

    جميل
    بالنسبه لموضوع الدين وان الناس مختلفه فيه وده بيقول وده بيعيد وده بيزيد وده بيزيط وانهم مختلفين عشان مجاش نص قراني او حديث فده كله كلام خرف
    لان ربنا قال في القران "اليوم اكملت لكم دينكم واتممت عليكم نعمتي ورضيت لكم الاسلام دينا" يعني كل ما يتعلق بالدين قد نبه عنه الرسول
    وكون ان الناس بتختلف ففي علماء وفحول وحدوا الاختلاف ده
    وكون انك بتدور علي الاختلاف قبل التوحد فده بيرجعلك
    انت عاوز تدخل نفسك في متهات..انت حر
    انما الدين ثابت
    وموضوع النقاب فهو فرض وعليه نص قراني وهو "قل للمؤمنات يدين عليهن من جلاببيهن ولا يبدين زينتهن الا لبعولتهن" ولما سمعت النساء بهذا قطعوا من جلابيهن حتي يغطين وجوهن

    جميل
    رابعا بالنسبه للعادات والتقاليد
    فده بيختلف من بيت لبيت
    الله وانت عاوز ايه اكتر من كده
    في بيتك العادات ثابته مبتتغيرش يبقي لا اختلاف عليها
    ثم ان كل هذا يصب في مصطلح الثقافه والثقافه دي ثابته في كل امه وكل امه وثقافتها بقي
    وبتختلف صحيح بس ثابته عندنا
    ومختلفه عندنا صحيح بس ثابته في بيتنا
    ومختلفه في بيتنا صحيح بس ثابته جوانا

    قال الرسول" إن الحلال بيّن والحرام بيّن ، وبينهما أمور مشتبهات لا يعلمهن كثير من الناس ، فمن اتقى الشبهات فقد استبرأ لدينه وعرضه ، ومن وقع في الشبهات فقد وقع في الحرام ، كالراعي يرعى حول الحمى يوشك أن يرتع فيه ، ألا وأن لكل ملك حمى ، ألا وإن حمى الله محارمه ، إلا وإن في الجسد مضغة إذا صلحت صلح الجسد كله ، وإذا فسدت فسد الجسد كله ، ألا وهي القلب ) رواه البخاري و مسلم "

    جميل جدا
    اخيرا حتة النظريات
    يبقي كل واحد وكوزه علي راي ظاظا
    النظريات ثابه فعلا واي تغيير فيها يغير منها ويجعلها نظريه اخري غير متعلقه باللي قبلها

    ويطول الحوار بين نفسي ولكني لن اطيل عليكم

    ولانك محظوظ معايا دايما مش عارف ليه
    دايما بتاخد مني حاجات مش بقولها لاي حد
    فخد دي
    بيقولك
    سيستمر التسلسل الزمني السخيف
    وستظل الحقيقه صامتــــــــــه


    سلامي
    يا سيد ابو حفيظه يا بتاع اخبار الخامسه والعشرون
    !! a7mad sala7 !! said...
    Boba

    من غير اسف
    مفيش مشكلة
    محصلش حاجة

    ومستني تعليقك انتى بردو
    !! a7mad sala7 !! said...
    mo7mad sala7 3rafa

    ههههههههههههه
    انا بعتلك تعليق تضيفه؟؟

    انا اه مسحت التعليق الاولانى
    بس انا معرفش اكتب الكلمتين اللى انت كاتبهم دول يا عم بعتلك ايه

    الرد كان فيه غلطه ومسحته
    غلطه ها
    لما اشوفك هنتحاسب
    دريم كبير said...
    السلام عليكم ورحمة الله وبركاته

    بصراحه كنت متردد ارد ولا لا ارد ولا لا

    وقررت اني بدل ماارد اجيب الخلاصه واكتبها في بوست عندي في البلوج (غلاسه بقا) ههههههه

    ثقافة الكل في الكل هي ده انسب تعبير للي بيتناقشوا في المواضيع دي بدل ماكل واحد يرجع للمصادر ويشوف ايه صحه الكلام اللي بيتقال ده اوي يرجع للعلماء في المجال اللي بيناقش فيه ده لأ يقوم يفتي من دماغه او ينقل كلام ناس محسوبين على المجال اللي بيناقش فيه وماعندهمش علم وبعضهم بيستغل الكلام المعسول والعاطفه الجياشه اللي عند الشعب في التعاطف مع فكرهم زي اللي بيدعوا ان الدين يسر وانه دين الستامح ومش عارف ايه ويحللوا ويجيزوا ومعندهمش علم (خلي قلبك دليلك) ههههههههه مش كورن فلكس لا ده فعلا شيء حقيقي

    اشكرك على طرح الموضوع علشان قدرت اكتب الكلمتين دول فيه وياريت الناس تقرأهم وتخليهم قاعده عندهم في كل النقاشات

    وفعلا زي مانت بتقول :

    وسيب الناس تختلف فى الراى
    عشان منفسدش للوز قضية

    ههههههههههههه جامده جدا
    !! a7mad sala7 !! said...
    هههههههههههههههه
    اه طبعا
    اهم حاجة الوز يعيش حياة كريمة :D
    ونكاكى كلنا مع بعض :))

    دايما ارائك بتعجبنى يا واد يا سنيبر ;;)
    دبلوماسي دبلوماسي يعنى ;)

    متفق معاك تماما
    بس مين يسمع!!!!!
    Che Ahmad said...
    ازيك يا ابو حميد يا جميل
    بص يا سيدي
    انا واحد من الناس شايف الناس ممكن تختلف ف كل حاجة حتي ف الدين والاعراف كمان ماعدا الاركان الخمسة لديننا غير كدا حاجات كتير معرضه للأختلاف
    احب افكرك ان الامام الشافعي والامام الشافعي مش محتاج اقول هو ايه يعني
    المهم انه اتقتل ف عز شبابه علشان اختلف مع تلامذه الامام مالك ف اتقتل
    يعني في اختلاف ف الدين ومكانش اختلاف عادي كان اختلاف في حاجات مهمة ف الدين

    انا شايف ان من حق اي حد يختلف مع اي حاجة ف الدنيا حتي لو نظريه ما
    دا حقه
    حتى لو كلامه متخلف بس دا حقه يعني ما نقدرش نقوله حاجة

    وف اي حاجة ف الدنيا كدا
    يعني مثلا ف العادات والاعراف في ختان الاناث !!! دي حاجة المفروض ما نختلفش فيها مثلا ؟؟
    اكيد لا
    العادات دي بردو فيها مثلا الجواز بين اتنين ما يعرفوش بعض ولا واحد يتجوز واحدة وما تتكشفش عليه غير بعد الجواز وفيها ان العلاقة بين الولد والبنت غلط وحرام وفيها التار وفيها العار وفيها بيحطوا البنت او الانثي مجرد جسد وبتتولد عروسه منتظرين ليها العريس اللى احسن من ضل الحيطة علشان يلمها ويريح اهلها منها الاعراف دي فيها شرف البنت ف غشاء بكارتها اللى بيفضلوا قصاد البيت ليله الدخلة مستنين العريس او امه يطلعوا بالمنديل ويغنوا سوا فرحانين بالشرف !!!!!!!!!!!!!!!!!!!!!
    مش دي حاجات يا احمد ف الاعراف والتقاليد
    ازاي ما نختلفش
    هتقولي دا تخلف مثلا
    هقولك بس ف العادات والتقاليد
    انا شايف الاختلاف حاجة ضرورية لبقاء الجنس البشري

    اما بالنسبة لان كل من هب ودب ليه رأي
    ايوة لازم
    علشان لما يكون ليه رأي يبقي انسان ليه تفكير وليه عقل ويكون حد بيحاول يعمل لنفسه وجود ورأي وفكر

    اما بالنسبة لخطة تطهير العقول دي حسب كل شخص وانا نفسي بحاول اعمل كدا وكل واحد تقريبا لانه شايف اللى هو عليه الصح ونفسه يخلي الدنيا صح ع الاقل من وجهه نظره بس انا عمري ما فرضت رأيي علي حد انا بخلي ناس تفكر وتشغل دماغها واقولهم اراءي و فـ الاخر بيختلفوا معايا والله ويقولولي لأ احنا شايفين حاجة غير كلامك او شايفين انك غلط
    وبتقبل دا عادي جدا بدون مشاكل
    في فرق بين تطهير العقول وغسيل المخ
    تطهير العقول يعني تخلي الناس تفكر ويبقي عندها فكرها المنفصل الخاص بيهم اما غسيل المخ انك تملا دماغهم بكلام معين انت عايز تحطه جواهم والفرق شاسع

    Quote
    """""
    حتى الدين في اختلاف
    وعلى سيبل المثال شيوخ كتير قالو النقاب فرض وشيوخ اكتر قاله انه سنة
    وشيوخ اكتر قالوا انه لا فرض ولا سنة

    الدين يا حبيبي فيه اختلاف فى حاجات بسيطة
    والحاجات البسيطة دى اختلفو فيها نظرا لان مفيش نص قرانى محدد يحكمها
    او حديث نبوى او قدسي
    غير كده مفيش 2 فى الدنيا يقدرو يختلفو على حاجة فى الدين الا ويكونو بيستهبلو بقي
    يعنى مينفعش حد يقول صلاة العشاء 4 ركعات وييجي واحد تانى يقول لا دول 3 بس""""" End

    الاختلاف بيكون في حاجات اكبر من كدا بكتير والله مش مجرد نقاب وبس لكن في حاجات بيها نص صريح مينفعش فيها تغيير لأنها واضحه لأي حد بسيط جدا وعادي جدا وامي كمان هيعرف دا يعني دي حاجات مش قابله للأختلاف بس دا مش ف كل حاجة

    Quote
    """""
    لما الاختلاف يكون على حاجات مسلم بيها
    ومينفعش فيها الجدال
    دا ماسموش الاختلاف بالمعنى المطلوب
    ولما يكون بقي المسلم بيه عندى غير المسلم بيه عندك يبقى فى حد فينا غلط بقي"""""End
    ليه لازم يبقي حد فينا غلط ليه ما يكونش كل واحد شايف من وجهه نظر غير التاني ومحتاجين نبص من وجهات نظر مختلفه

    وكمان الصراحة مش شايف اي مشكلة ان واحد يختلف مع اينشتاين بس يكون مثلا شايف وجهه نظر تانية او عنده مبرر لأختلافه معاه مش لمجرد انه يبقي مختلف مثلا
    ومش لازم يطلع حد ف الاتنين غلط
    يمكن الاتنين بيكملوا بعض او اي حاجة وما إلي اخره
    كدا يعني

    Quote
    """""
    بقي هو دا الاختلاف؟
    معنى كلامك ده انى ممكن احط المصلية فى اى حتة واصلى
    وميكونش فى حاجة اسمها قبلة بقي"""""End

    اه دا اختلاف
    بص انت برهنت علي كلامي علي فكرة
    الاتنين مختلفين والاتنين صح بس محدش كلف نفسه يروح يشوف التاني يقصد ما حاولناش نقرب وجهات النظر
    وبالنسبة للقبلة
    لا في حاجة اسمها قبله بس انت ممكن تحط المصلية ف مكان وتوجهها ناحية شمال الشرق وانا احطها واوجهها ناحية جنوب الغرب احنا الاتنين مختلفين بس احنا الاتنين صح
    هي كدا
    نعمل ايه بقي
    نخرج برا الصندوق بتاعنا ونبص من فوق
    يعني من صندوقنا احنا شايفين التماينة دي تمانيه
    لو بصينا من فوق هنلاقيها ماشية تمانية وسبعه
    او بمعني تاني نبص من منظور عين الطائر علي رأي بتوع عماره

    Quote
    """""
    ماقولش انا بفكر بعقلي ومليش دعوة بحاجة تانية"""""End
    مش كدا بس فعلا العقل يكفي الواحد غالبا ولكن بالاطلاع كمان والاتنين ف نظري حاجة واحدة يعني
    تحياتي
    OlivE said...
    اولا السلام عليكم ورحمه الله وبركاته
    ثانيا موضوع جامد كالعاده منك يا احمد زى ما اتعودنا منك
    اسمحولى اقول رايى
    المقوله دى بنسمعها من زمان اوى بس انا اقولها لما اكون بتكلم عن موضوع معين او على موقف حصل قدامى واقول دا صح ودا غلط او اتناقش مع حد فى مشكله معينه علشان نشوف حل ليها ممكن هو يشوف حلها بوجه نظر وانا اشوف الحل بوجه نظر تانيه
    الدين مينفعش نهائيا اقول فيه الاختلاف فى الراى لا يفسد للود قضيه لان الدين تشريعات سموايه لازم اى مسلم يكوم مسلم بالحاجه دى تسليم تام وانت ذكرت منها حاجات كتير الصلاه الصوم وكل شىء دينى مينفعش جدال فيه او انى اقول رايى فى ايه قرانيه او حديث شريف فالمقوله دى بعيده كل البعد عن الدين
    بالنسبه بقى للتقاليد والعرف فدى افكار بتستمر لفتره من الوقت كل الناس بتفضل تطبقها لحد ما يقولوا عليها دى تقليد وعادات وبتختلف فعلا من مكان لمكان واظن انها مش بتسبب اى مشاكل لان التقاليد والعادات دى بتبقى حريات بس مش من شخص لشخص دا من مكان لمكان وانا شايفه انها مفيهاش اى مشاكل يعنى ...
    اما بالنسبه للاخلاق والاحترام فدى حاجة برضوا مش فيها جدال ولا نقاش لاننا كلنا مهما بعدت المسافات ما بينا كلنا مسلمين ودينا واحد ومهما اختلف تقليدنا وعاداتنا كلنا عارفين اللى هو الصح وايه هو الغلط وقادرين نميز ما بينهم بعيدا عن اى تقاليد او اراء او ود او قضيه ...
    اخيرا فى فرق كبير جدا ما بين الراى فى مشكله او موضوع وما بين حاجات مسلم بيها نهائيا وقطعيا مينفعش الجدال فيها ...
    دا راي الخاص اتمنى انى اكون قدرت اوصله ليكم
    اسفه على الاطاله فى الرد
    وشكرا على الموضوع
    !! a7mad sala7 !! said...
    Che Ahmad

    حبيب قلبي ابوحميد
    مع احترامى لرأيك
    مفيش فى اختلاف فى دين
    قال تعالى(اليوم اتكملت لكم دينكم واتممت عليكم نعمتى ورضيت لكم الاسلام دينا)
    ربنا مسابلناش حاجة نختلف عليها والا كانت ظهرت الفتن والدين ميستمرش ليوم القيامة
    كون ان حصل خلاف ادى لمقتل احد الائمة
    دا مش مؤشر ان الاختلاف مسموح بيه
    وافتكر ان الاختلاف دا بيبقى على حاجات طفيييفة خالص غير مؤثرة بالمرة
    مبيبقاش فى امور حساسة تغير مسار امه
    ---------------
    واحد رايه متخلف يبقي لنفسه
    حقه يعمل اى حاجة حتى الاختلاف دا لنفسه
    وميتطبقش الا على نفسه
    واديك قلت بنفسك(متخلف)
    --------------
    جزء العادات السيئة اللى انت ذكرته ده
    احنا فى غنا تااام عنه
    ومش دا الحاجة المسلم بيها اللى المفروض نمشي عليها
    لذلك فهى خارج المقارنة
    --------------
    كل من هب ودب ده يكون راى وشخصية زى مهو عايز
    بس ميبنيش على اسس ليس لها اساس من الصحة
    والا هيكون راى متخلف
    ويجيب بعده جيل متخلف زيه ياخرنا ويرجعنا لورا
    بدل ما يقدمنا
    يا فرحتى انه بيكون اتجاه
    وتكتر الاتجاهات
    وفى الاخر نتوه فى بعض
    -------------------
    كل انسان طموح بيتمنى يطهر العقول
    بس يطهرها بعلم موثوق منه
    ويستند على دلائل وحقائق مسلم بيها
    مش شرط ان عقلك هو اللى يقود كل حاجة
    فى حاجات لازم نتربط بيها من دون تفكير
    لو فكرنا بعقلنا فى كل حاجة هنتجنن
    وهنقود نفسنا لطريق مسدود
    -------------------
    مش فاهم الجزء الهندسي بتاعك
    بس مش دا المنظور اللى هناخد بيه فى الاختلاف
    اختلاف القبله مش صحيح الا فى حالة ضل الطريق
    ساعتها ممكن تصلى فى اى اتجاه
    دى حاجة مفهاش اختلاف الا فى كده
    لان الدين يسر
    لكن مش لانه يسر يبقي تساهل
    -----------------
    اخيرا العقل عمره ما كان كفاية لوحده
    والا مكانش هيبقي في دين ومنهج
    وكان كل واحد مشي بدماغه

    محبتى واحترامى :)
    !! a7mad sala7 !! said...
    olivetree

    وعليكم السلام
    ربنا يخليكي دا من ذوقك

    متفق معاكى لحد كبير
    رايك دبلوماسي جدا ومنقدرش نقول لا على اى كلمة
    وفكرتك وصلت تماما

    نورتي البلوج فى اول زيارة ليكي
    ويا رب متكونش الاخيرة :)

Post a Comment



رسالة أحدث رسالة أقدم الصفحة الرئيسية

Blogger Template by Blogcrowds